শ্রীমদ্বাল্মীকীয় রামাযণে সুংদরকাংডম্ ।
অথ চতুস্ত্রিংশস্সর্গঃ ।
তস্য়াস্তদ্বচনং শ্রুত্বা হনুমান্হরিপুংগবঃ ।
দুঃখাদ্দুঃখাভিভূতায়া স্সাংত্বমুত্তরমব্রবীত্ ॥ 1 ॥
অহং রামস্য় সংদেশাদ্দেবি দূতস্তবাগতঃ ।
বৈদেহি কুশলী রামস্ত্বাং চ কৌশলমব্রবীত্ ॥ 2 ॥
যো ব্রহ্মমস্ত্রং বেদাংশ্চ বেদ বেদবিদাংবরঃ ।
স ত্বাং দাশরথী রামো দেবি কৌশলমব্রবীত্ ॥ 3 ॥
লক্ষ্মণশ্চ মহাতেজা ভর্তুস্তেঽনুচরঃ প্রিয়ঃ ।
কৃতবান্শোকসংতপ্তশ্শিরসা তেঽভিবাদনম্ ॥ 4 ॥
সা তয়োঃ কুশলং দেবী নিশম্য় নরসিংহয়োঃ ।
প্রীতিসংহৃষ্টসর্বাংগী হনুমংতমথাব্রবীত্ ॥ 5 ॥
কল্য়াণী বত গাথেয়ং লৌকিকী প্রতিভাতি মা ।
এতি জীবংতমানংদো নরং বর্ষশতাদপি ॥ 6 ॥
তয়া সমাগতে তস্মিন্প্রীতিরুত্পাদিতাঽদ্ভুতা ।
পরস্পরেণ চালাপং বিশ্বস্তৌ তৌ প্রচক্রতুঃ ॥ 7 ॥
তস্য়াস্তদ্বচনং শ্রুত্বা হনুমান্হরিয়ূথপঃ ।
সীতায়াশ্শোকদীনায়াস্সমীপমুপচক্রমে ॥ 8 ॥
যথা যথা সমীপং স হনুমানুপসর্পতি ।
তথা তথা রাবণং সা তং সীতা পরিশংকতে ॥ 9 ॥
অহো ধিগ্দুষ্কৃতমিদং কথিতং হি যদস্য় মে ।
রূপাংতরমুপাগম্য় স এবায়ং হি রাবণঃ ॥ 10 ॥
তামশোকস্য় শাখাং সা বিমুক্ত্বা শোককর্শিতা ।
তস্য়ামেবানবদ্য়াংগী ধরণ্য়াং সমুপাবিশত্ ॥ 11 ॥
হনুমানপি দুঃখার্তাং তাং দৃষ্ট্বা ভযমোহিতাম্ ।
অবংদত মহাবাহুস্ততস্তাং জনকাত্মজাম্ ॥ 12 ॥
সা চৈনং ভযবিত্রস্তা ভূয়ো নৈবাভ্য়ুদৈক্ষত ।
তং দৃষ্ট্বা বংদমানং তু সীতা শশিনিভাননা ॥ 13 ॥
অব্রবীদ্ধীর্ঘমুচ্ছবস্য় বানরং মধুরস্বরা ।
মায়াং প্রবিষ্টো মায়াবী যদি ত্বং রাবণস্স্বযম্ ॥ 14 ॥
উত্পাদযসি মে ভূযস্সংতাপং তন্ন শোভনম্ ।
স্বং পরিত্যজ্য় রূপং যঃ পরিব্রাজকরূপধ্রুত্ ।
জনস্থানে ময়া দৃষ্টস্ত্বং স এবাসি রাবণঃ ॥ 15 ॥
উপবাসকৃশাং দীনাং কামরূপ নিশাচর ।
সংতাপযসি মাং ভূযস্সংতপ্তাং তন্ন শোভনম্ ॥ 16 ॥
অথবা নৈতদেবং হি যন্ময়া পরিশংকিতম্ ॥ 17 ॥
মনসো হি মম প্রীতিরুত্পন্না তব দর্শনাত্ ।
যদি রামস্য় দূতস্ত্বমাগতো ভদ্রমস্তু তে ॥ 18 ॥
পৃচ্ছামি ত্বাং হরিশ্রেষ্ঠ প্রিয়া রামকথা হি মে ।
গুণান্রামস্য় কথয় প্রিযস্য় মম বানর ॥ 19 ॥
চিত্তং হরসি মে সৌম্য় নদীকূলং যথা রয়ঃ ।
অহো স্বপ্নস্য় সুখতা যাহমেবং চিরাহৃতা ॥ 20 ॥
প্রেষিতং নাম পশ্য়ামি রাঘবেণ বনৌকসম্ ।
স্বপ্নেঽপি যদ্যহং বীরং রাঘবং সহলক্ষ্মণম্ ॥ 21 ॥
পশ্য়েয়ং নাবসীদেয়ং স্বপ্নোঽপি মম মত্সরী ।
নাহং স্বপ্নমিমং মন্য়ে স্বপ্নে দৃষ্ট্বা হি বানরম্ ॥ 22 ॥
ন শক্য়োঽভ্য়ুদয়ঃ প্রাপ্তুং প্রাপ্তশ্চাভ্য়ুদয়ো মম ।
কিন্নু স্য়াচিত্তমোহোঽয়ং ভবেদ্বাতগতিস্ত্বিযম্ ॥ 23 ॥
উন্মাদজো বিকারো বা স্য়াদিয়ং মৃগতৃষ্ণিকা ।
অথবা নাযমুন্মাদো মোহোঽপ্য়ুন্মাদলক্ষণঃ ॥ 24 ॥
সংবুধ্য়ে চাহমাত্মানমিয়ং চাপি বনৌকসম্ ।
ইত্য়েবং বহুধা সীতা সংপ্রধার্য় বলাবলম্ ॥ 25 ॥
রক্ষসাং কামরূপত্বান্মেনে তং রাক্ষসাধিপম্ ।
এতাং বুদ্ধিং তদা কৃত্বা সীতা সা তনুমধ্যমা ॥ 26 ॥
ন প্রতিব্য়াজহারাথ বানরং জনকাত্মজা ।
সীতায়াশ্চিংতিতং বুদ্ধ্বা হনুমান্মারুতাত্মজঃ ॥ 27 ॥
শ্রোত্রানুকূলৈর্বচনৈস্তদা তাং সংপ্রহর্ষযত্ ।
আদিত্য় ইব তেজস্বী লোককাংতশ্শশী যথা ॥ 28 ॥
রাজা সর্বস্য় লোকস্য় দেবো বৈশ্রবণো যথা ।
বিক্রমেণোপপন্নশ্চ যথা বিষ্ণুর্মহাযশাঃ ॥ 29 ॥
সত্যবাদী মধুরবাগ্দেবো বাচস্পতির্যথা ।
রূপবান্সুভগ শ্রীমান্ কংদর্প ইব মূর্তিমান্ ॥ 30 ॥
স্থানক্রোধঃ প্রহর্তা চ শ্রেষ্ঠো লোকে মহারথঃ ।
বাহুচ্ছায়ামবষ্টব্ধো যস্য় লোকো মহাত্মনঃ ॥ 31 ॥
অপকৃষ্য়াশ্রমপদান্মৃগরূপেণ রাঘবম্ ।
শূন্য়ে যেনাপনীতাসি তস্য় দ্রক্ষ্যসি যত্ফলম্ ॥ 32 ॥
ন চিরাদ্রাবণং সংখ্য়ে যো বধিষ্যতি বীর্যবান্ ।
রোষপ্রমুক্তৈরিষুভির্জ্বলদ্ভিরিব পাবকৈঃ ॥ 33 ॥
তেনাহং প্রেষিতো দূত স্ত্বত্সকাশমিহাগতঃ ।
ত্বদ্বিয়োগেন দুঃখার্ত স্স ত্বাং কৌশলমব্রবীত্ ॥ 34 ॥
লক্ষ্মণশ্চ মহাতেজাস্সুমিত্রানংদবর্ধনঃ ।
অভিবাদ্য় মহাবাহুস্স ত্বাং কৌশলমব্রবীত্ ॥ 35 ॥
রামস্য় চ সখা দেবি সুগ্রীবো নাম বানরঃ ।
রাজা বানরমুখ্য়ানাং স ত্বাং কৌশলমব্রবীত্ ॥ 36 ॥
নিত্য়ং স্মরতি রামস্ত্বাং সসুগ্রীব স্সলক্ষ্মণঃ ।
দিষ্ট্য়া জীবসি বৈদেহি রাক্ষসীবশমাগতা ॥ 37 ॥
নচিরাদ্দ্রক্ষ্যসে রামং লক্ষ্মণং চ মহাবলম্ ।
মধ্য়ে বানরকোটীনাং সুগ্রীবং চামিতৌজসম্ ॥ 38 ॥
অহং সুগ্রীবসচিবো হনুমান্নাম বানরঃ ।
প্রবিষ্টো নগরীং লংকাং লংঘয়িত্বা মহোদধিম্ ॥ 39 ॥
কৃত্বা মূর্ধ্নি পদন্য়াসং রাবণস্য় দুরাত্মনঃ ।
ত্বাং দ্রষ্টুমুপয়াতোঽহং সমাশ্রিত্য় পরাক্রমম্ ॥ 40 ॥
নাহমস্মি তথা দেবি যথা মামবগচ্ছসি ।
বিশংকা ত্যজ্যতামেষা শ্রদ্ধত্স্ব বদতো মম ॥ 41 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে সুংদরকাংডে চতুস্ত্রিংশস্সর্গঃ ॥
