śrīmadvālmīkīya rāmāyaṇē sundarakāṇḍam ।
atha chatustriṃśassargaḥ ।
tasyāstadvachanaṃ śrutvā hanumānharipuṅgavaḥ ।
duḥkhādduḥkhābhibhūtāyā ssāntvamuttaramabravīt ॥ 1 ॥
ahaṃ rāmasya sandēśāddēvi dūtastavāgataḥ ।
vaidēhi kuśalī rāmastvāṃ cha kauśalamabravīt ॥ 2 ॥
yō brahmamastraṃ vēdāṃścha vēda vēdavidāṃvaraḥ ।
sa tvāṃ dāśarathī rāmō dēvi kauśalamabravīt ॥ 3 ॥
lakṣmaṇaścha mahātējā bhartustē'nucharaḥ priyaḥ ।
kṛtavānśōkasantaptaśśirasā tē'bhivādanam ॥ 4 ॥
sā tayōḥ kuśalaṃ dēvī niśamya narasiṃhayōḥ ।
prītisaṃhṛṣṭasarvāṅgī hanumantamathābravīt ॥ 5 ॥
kalyāṇī bata gāthēyaṃ laukikī pratibhāti mā ।
ēti jīvantamānandō naraṃ varṣaśatādapi ॥ 6 ॥
tayā samāgatē tasminprītirutpāditā'dbhutā ।
parasparēṇa chālāpaṃ viśvastau tau prachakratuḥ ॥ 7 ॥
tasyāstadvachanaṃ śrutvā hanumānhariyūthapaḥ ।
sītāyāśśōkadīnāyāssamīpamupachakramē ॥ 8 ॥
yathā yathā samīpaṃ sa hanumānupasarpati ।
tathā tathā rāvaṇaṃ sā taṃ sītā pariśaṅkatē ॥ 9 ॥
ahō dhigduṣkṛtamidaṃ kathitaṃ hi yadasya mē ।
rūpāntaramupāgamya sa ēvāyaṃ hi rāvaṇaḥ ॥ 10 ॥
tāmaśōkasya śākhāṃ sā vimuktvā śōkakarśitā ।
tasyāmēvānavadyāṅgī dharaṇyāṃ samupāviśat ॥ 11 ॥
hanumānapi duḥkhārtāṃ tāṃ dṛṣṭvā bhayamōhitām ।
avandata mahābāhustatastāṃ janakātmajām ॥ 12 ॥
sā chainaṃ bhayavitrastā bhūyō naivābhyudaikṣata ।
taṃ dṛṣṭvā vandamānaṃ tu sītā śaśinibhānanā ॥ 13 ॥
abravīddhīrghamuchChavasya vānaraṃ madhurasvarā ।
māyāṃ praviṣṭō māyāvī yadi tvaṃ rāvaṇassvayam ॥ 14 ॥
utpādayasi mē bhūyassantāpaṃ tanna śōbhanam ।
svaṃ parityajya rūpaṃ yaḥ parivrājakarūpadhrut ।
janasthānē mayā dṛṣṭastvaṃ sa ēvāsi rāvaṇaḥ ॥ 15 ॥
upavāsakṛśāṃ dīnāṃ kāmarūpa niśāchara ।
santāpayasi māṃ bhūyassantaptāṃ tanna śōbhanam ॥ 16 ॥
athavā naitadēvaṃ hi yanmayā pariśaṅkitam ॥ 17 ॥
manasō hi mama prītirutpannā tava darśanāt ।
yadi rāmasya dūtastvamāgatō bhadramastu tē ॥ 18 ॥
pṛchChāmi tvāṃ hariśrēṣṭha priyā rāmakathā hi mē ।
guṇānrāmasya kathaya priyasya mama vānara ॥ 19 ॥
chittaṃ harasi mē saumya nadīkūlaṃ yathā rayaḥ ।
ahō svapnasya sukhatā yāhamēvaṃ chirāhṛtā ॥ 20 ॥
prēṣitaṃ nāma paśyāmi rāghavēṇa vanaukasam ।
svapnē'pi yadyahaṃ vīraṃ rāghavaṃ sahalakṣmaṇam ॥ 21 ॥
paśyēyaṃ nāvasīdēyaṃ svapnō'pi mama matsarī ।
nāhaṃ svapnamimaṃ manyē svapnē dṛṣṭvā hi vānaram ॥ 22 ॥
na śakyō'bhyudayaḥ prāptuṃ prāptaśchābhyudayō mama ।
kinnu syāchittamōhō'yaṃ bhavēdvātagatistviyam ॥ 23 ॥
unmādajō vikārō vā syādiyaṃ mṛgatṛṣṇikā ।
athavā nāyamunmādō mōhō'pyunmādalakṣaṇaḥ ॥ 24 ॥
sambudhyē chāhamātmānamiyaṃ chāpi vanaukasam ।
ityēvaṃ bahudhā sītā sampradhārya balābalam ॥ 25 ॥
rakṣasāṃ kāmarūpatvānmēnē taṃ rākṣasādhipam ।
ētāṃ buddhiṃ tadā kṛtvā sītā sā tanumadhyamā ॥ 26 ॥
na prativyājahārātha vānaraṃ janakātmajā ।
sītāyāśchintitaṃ buddhvā hanumānmārutātmajaḥ ॥ 27 ॥
śrōtrānukūlairvachanaistadā tāṃ sampraharṣayat ।
āditya iva tējasvī lōkakāntaśśaśī yathā ॥ 28 ॥
rājā sarvasya lōkasya dēvō vaiśravaṇō yathā ।
vikramēṇōpapannaścha yathā viṣṇurmahāyaśāḥ ॥ 29 ॥
satyavādī madhuravāgdēvō vāchaspatiryathā ।
rūpavānsubhaga śrīmān kandarpa iva mūrtimān ॥ 30 ॥
sthānakrōdhaḥ prahartā cha śrēṣṭhō lōkē mahārathaḥ ।
bāhuchChāyāmavaṣṭabdhō yasya lōkō mahātmanaḥ ॥ 31 ॥
apakṛṣyāśramapadānmṛgarūpēṇa rāghavam ।
śūnyē yēnāpanītāsi tasya drakṣyasi yatphalam ॥ 32 ॥
na chirādrāvaṇaṃ saṅkhyē yō vadhiṣyati vīryavān ।
rōṣapramuktairiṣubhirjvaladbhiriva pāvakaiḥ ॥ 33 ॥
tēnāhaṃ prēṣitō dūta stvatsakāśamihāgataḥ ।
tvadviyōgēna duḥkhārta ssa tvāṃ kauśalamabravīt ॥ 34 ॥
lakṣmaṇaścha mahātējāssumitrānandavardhanaḥ ।
abhivādya mahābāhussa tvāṃ kauśalamabravīt ॥ 35 ॥
rāmasya cha sakhā dēvi sugrīvō nāma vānaraḥ ।
rājā vānaramukhyānāṃ sa tvāṃ kauśalamabravīt ॥ 36 ॥
nityaṃ smarati rāmastvāṃ sasugrīva ssalakṣmaṇaḥ ।
diṣṭyā jīvasi vaidēhi rākṣasīvaśamāgatā ॥ 37 ॥
nachirāddrakṣyasē rāmaṃ lakṣmaṇaṃ cha mahābalam ।
madhyē vānarakōṭīnāṃ sugrīvaṃ chāmitaujasam ॥ 38 ॥
ahaṃ sugrīvasachivō hanumānnāma vānaraḥ ।
praviṣṭō nagarīṃ laṅkāṃ laṅghayitvā mahōdadhim ॥ 39 ॥
kṛtvā mūrdhni padanyāsaṃ rāvaṇasya durātmanaḥ ।
tvāṃ draṣṭumupayātō'haṃ samāśritya parākramam ॥ 40 ॥
nāhamasmi tathā dēvi yathā māmavagachChasi ।
viśaṅkā tyajyatāmēṣā śraddhatsva vadatō mama ॥ 41 ॥
ityārṣē śrīmadrāmāyaṇē vālmīkīya ādikāvyē sundarakāṇḍē chatustriṃśassargaḥ ॥
