ශ්රීමද්වාල්මීකීය රාමායණේ සුංදරකාංඩම් ।
අථ චතුස්ත්රිංශස්සර්ගඃ ।
තස්යාස්තද්වචනං ශ්රුත්වා හනුමාන්හරිපුංගවඃ ।
දුඃඛාද්දුඃඛාභිභූතායා ස්සාංත්වමුත්තරමබ්රවීත් ॥ 1 ॥
අහං රාමස්ය සංදේශාද්දේවි දූතස්තවාගතඃ ।
වෛදේහි කුශලී රාමස්ත්වාං ච කෞශලමබ්රවීත් ॥ 2 ॥
යෝ බ්රහ්මමස්ත්රං වේදාංශ්ච වේද වේදවිදාංවරඃ ।
ස ත්වාං දාශරථී රාමෝ දේවි කෞශලමබ්රවීත් ॥ 3 ॥
ලක්ෂ්මණශ්ච මහාතේජා භර්තුස්තේऽනුචරඃ ප්රියඃ ।
කෘතවාන්ශෝකසංතප්තශ්ශිරසා තේऽභිවාදනම් ॥ 4 ॥
සා තයෝඃ කුශලං දේවී නිශම්ය නරසිංහයෝඃ ।
ප්රීතිසංහෘෂ්ටසර්වාංගී හනුමංතමථාබ්රවීත් ॥ 5 ॥
කල්යාණී බත ගාථේයං ලෞකිකී ප්රතිභාති මා ।
ඒති ජීවංතමානංදෝ නරං වර්ෂශතාදපි ॥ 6 ॥
තයා සමාගතේ තස්මින්ප්රීතිරුත්පාදිතාऽද්භුතා ।
පරස්පරේණ චාලාපං විශ්වස්තෞ තෞ ප්රචක්රතුඃ ॥ 7 ॥
තස්යාස්තද්වචනං ශ්රුත්වා හනුමාන්හරියූථපඃ ।
සීතායාශ්ශෝකදීනායාස්සමීපමුපචක්රමේ ॥ 8 ॥
යථා යථා සමීපං ස හනුමානුපසර්පති ।
තථා තථා රාවණං සා තං සීතා පරිශංකතේ ॥ 9 ॥
අහෝ ධිග්දුෂ්කෘතමිදං කථිතං හි යදස්ය මේ ।
රූපාංතරමුපාගම්ය ස ඒවායං හි රාවණඃ ॥ 10 ॥
තාමශෝකස්ය ශාඛාං සා විමුක්ත්වා ශෝකකර්ශිතා ।
තස්යාමේවානවද්යාංගී ධරණ්යාං සමුපාවිශත් ॥ 11 ॥
හනුමානපි දුඃඛාර්තාං තාං දෘෂ්ට්වා භයමෝහිතාම් ।
අවංදත මහාබාහුස්තතස්තාං ජනකාත්මජාම් ॥ 12 ॥
සා චෛනං භයවිත්රස්තා භූයෝ නෛවාභ්යුදෛක්ෂත ।
තං දෘෂ්ට්වා වංදමානං තු සීතා ශශිනිභානනා ॥ 13 ॥
අබ්රවීද්ධීර්ඝමුච්ඡවස්ය වානරං මධුරස්වරා ।
මායාං ප්රවිෂ්ටෝ මායාවී යදි ත්වං රාවණස්ස්වයම් ॥ 14 ॥
උත්පාදයසි මේ භූයස්සංතාපං තන්න ශෝභනම් ।
ස්වං පරිත්යජ්ය රූපං යඃ පරිව්රාජකරූපධ්රුත් ।
ජනස්ථානේ මයා දෘෂ්ටස්ත්වං ස ඒවාසි රාවණඃ ॥ 15 ॥
උපවාසකෘශාං දීනාං කාමරූප නිශාචර ।
සංතාපයසි මාං භූයස්සංතප්තාං තන්න ශෝභනම් ॥ 16 ॥
අථවා නෛතදේවං හි යන්මයා පරිශංකිතම් ॥ 17 ॥
මනසෝ හි මම ප්රීතිරුත්පන්නා තව දර්ශනාත් ।
යදි රාමස්ය දූතස්ත්වමාගතෝ භද්රමස්තු තේ ॥ 18 ॥
පෘච්ඡාමි ත්වාං හරිශ්රේෂ්ඨ ප්රියා රාමකථා හි මේ ।
ගුණාන්රාමස්ය කථය ප්රියස්ය මම වානර ॥ 19 ॥
චිත්තං හරසි මේ සෞම්ය නදීකූලං යථා රයඃ ।
අහෝ ස්වප්නස්ය සුඛතා යාහමේවං චිරාහෘතා ॥ 20 ॥
ප්රේෂිතං නාම පශ්යාමි රාඝවේණ වනෞකසම් ।
ස්වප්නේऽපි යද්යහං වීරං රාඝවං සහලක්ෂ්මණම් ॥ 21 ॥
පශ්යේයං නාවසීදේයං ස්වප්නෝऽපි මම මත්සරී ।
නාහං ස්වප්නමිමං මන්යේ ස්වප්නේ දෘෂ්ට්වා හි වානරම් ॥ 22 ॥
න ශක්යෝऽභ්යුදයඃ ප්රාප්තුං ප්රාප්තශ්චාභ්යුදයෝ මම ।
කින්නු ස්යාචිත්තමෝහෝऽයං භවේද්වාතගතිස්ත්වියම් ॥ 23 ॥
උන්මාදජෝ විකාරෝ වා ස්යාදියං මෘගතෘෂ්ණිකා ।
අථවා නායමුන්මාදෝ මෝහෝऽප්යුන්මාදලක්ෂණඃ ॥ 24 ॥
සංබුධ්යේ චාහමාත්මානමියං චාපි වනෞකසම් ।
ඉත්යේවං බහුධා සීතා සංප්රධාර්ය බලාබලම් ॥ 25 ॥
රක්ෂසාං කාමරූපත්වාන්මේනේ තං රාක්ෂසාධිපම් ।
ඒතාං බුද්ධිං තදා කෘත්වා සීතා සා තනුමධ්යමා ॥ 26 ॥
න ප්රතිව්යාජහාරාථ වානරං ජනකාත්මජා ।
සීතායාශ්චිංතිතං බුද්ධ්වා හනුමාන්මාරුතාත්මජඃ ॥ 27 ॥
ශ්රෝත්රානුකූලෛර්වචනෛස්තදා තාං සංප්රහර්ෂයත් ।
ආදිත්ය ඉව තේජස්වී ලෝකකාංතශ්ශශී යථා ॥ 28 ॥
රාජා සර්වස්ය ලෝකස්ය දේවෝ වෛශ්රවණෝ යථා ।
වික්රමේණෝපපන්නශ්ච යථා විෂ්ණුර්මහායශාඃ ॥ 29 ॥
සත්යවාදී මධුරවාග්දේවෝ වාචස්පතිර්යථා ।
රූපවාන්සුභග ශ්රීමාන් කංදර්ප ඉව මූර්තිමාන් ॥ 30 ॥
ස්ථානක්රෝධඃ ප්රහර්තා ච ශ්රේෂ්ඨෝ ලෝකේ මහාරථඃ ।
බාහුච්ඡායාමවෂ්ටබ්ධෝ යස්ය ලෝකෝ මහාත්මනඃ ॥ 31 ॥
අපකෘෂ්යාශ්රමපදාන්මෘගරූපේණ රාඝවම් ।
ශූන්යේ යේනාපනීතාසි තස්ය ද්රක්ෂ්යසි යත්ඵලම් ॥ 32 ॥
න චිරාද්රාවණං සංඛ්යේ යෝ වධිෂ්යති වීර්යවාන් ।
රෝෂප්රමුක්තෛරිෂුභිර්ජ්වලද්භිරිව පාවකෛඃ ॥ 33 ॥
තේනාහං ප්රේෂිතෝ දූත ස්ත්වත්සකාශමිහාගතඃ ।
ත්වද්වියෝගේන දුඃඛාර්ත ස්ස ත්වාං කෞශලමබ්රවීත් ॥ 34 ॥
ලක්ෂ්මණශ්ච මහාතේජාස්සුමිත්රානංදවර්ධනඃ ।
අභිවාද්ය මහාබාහුස්ස ත්වාං කෞශලමබ්රවීත් ॥ 35 ॥
රාමස්ය ච සඛා දේවි සුග්රීවෝ නාම වානරඃ ।
රාජා වානරමුඛ්යානාං ස ත්වාං කෞශලමබ්රවීත් ॥ 36 ॥
නිත්යං ස්මරති රාමස්ත්වාං සසුග්රීව ස්සලක්ෂ්මණඃ ।
දිෂ්ට්යා ජීවසි වෛදේහි රාක්ෂසීවශමාගතා ॥ 37 ॥
නචිරාද්ද්රක්ෂ්යසේ රාමං ලක්ෂ්මණං ච මහාබලම් ।
මධ්යේ වානරකෝටීනාං සුග්රීවං චාමිතෞජසම් ॥ 38 ॥
අහං සුග්රීවසචිවෝ හනුමාන්නාම වානරඃ ।
ප්රවිෂ්ටෝ නගරීං ලංකාං ලංඝයිත්වා මහෝදධිම් ॥ 39 ॥
කෘත්වා මූර්ධ්නි පදන්යාසං රාවණස්ය දුරාත්මනඃ ।
ත්වාං ද්රෂ්ටුමුපයාතෝऽහං සමාශ්රිත්ය පරාක්රමම් ॥ 40 ॥
නාහමස්මි තථා දේවි යථා මාමවගච්ඡසි ।
විශංකා ත්යජ්යතාමේෂා ශ්රද්ධත්ස්ව වදතෝ මම ॥ 41 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ චතුස්ත්රිංශස්සර්ගඃ ॥
