ശ്രീമദ്വാല്മീകീയ രാമായണേ സുംദരകാംഡമ് ।
അഥ ചതുസ്ത്രിംശസ്സര്ഗഃ ।
തസ്യാസ്തദ്വചനം ശ്രുത്വാ ഹനുമാന്ഹരിപുംഗവഃ ।
ദുഃഖാദ്ദുഃഖാഭിഭൂതായാ സ്സാംത്വമുത്തരമബ്രവീത് ॥ 1 ॥
അഹം രാമസ്യ സംദേശാദ്ദേവി ദൂതസ്തവാഗതഃ ।
വൈദേഹി കുശലീ രാമസ്ത്വാം ച കൌശലമബ്രവീത് ॥ 2 ॥
യോ ബ്രഹ്മമസ്ത്രം വേദാംശ്ച വേദ വേദവിദാംവരഃ ।
സ ത്വാം ദാശരഥീ രാമോ ദേവി കൌശലമബ്രവീത് ॥ 3 ॥
ലക്ഷ്മണശ്ച മഹാതേജാ ഭര്തുസ്തേഽനുചരഃ പ്രിയഃ ।
കൃതവാന്ശോകസംതപ്തശ്ശിരസാ തേഽഭിവാദനമ് ॥ 4 ॥
സാ തയോഃ കുശലം ദേവീ നിശമ്യ നരസിംഹയോഃ ।
പ്രീതിസംഹൃഷ്ടസർവാംഗീ ഹനുമംതമഥാബ്രവീത് ॥ 5 ॥
കല്യാണീ ബത ഗാഥേയം ലൌകികീ പ്രതിഭാതി മാ ।
ഏതി ജീവംതമാനംദോ നരം വര്ഷശതാദപി ॥ 6 ॥
തയാ സമാഗതേ തസ്മിന്പ്രീതിരുത്പാദിതാഽദ്ഭുതാ ।
പരസ്പരേണ ചാലാപം വിശ്വസ്തൌ തൌ പ്രചക്രതുഃ ॥ 7 ॥
തസ്യാസ്തദ്വചനം ശ്രുത്വാ ഹനുമാന്ഹരിയൂഥപഃ ।
സീതായാശ്ശോകദീനായാസ്സമീപമുപചക്രമേ ॥ 8 ॥
യഥാ യഥാ സമീപം സ ഹനുമാനുപസര്പതി ।
തഥാ തഥാ രാവണം സാ തം സീതാ പരിശംകതേ ॥ 9 ॥
അഹോ ധിഗ്ദുഷ്കൃതമിദം കഥിതം ഹി യദസ്യ മേ ।
രൂപാംതരമുപാഗമ്യ സ ഏവായം ഹി രാവണഃ ॥ 10 ॥
താമശോകസ്യ ശാഖാം സാ വിമുക്ത്വാ ശോകകര്ശിതാ ।
തസ്യാമേവാനവദ്യാംഗീ ധരണ്യാം സമുപാവിശത് ॥ 11 ॥
ഹനുമാനപി ദുഃഖാര്താം താം ദൃഷ്ട്വാ ഭയമോഹിതാമ് ।
അവംദത മഹാബാഹുസ്തതസ്താം ജനകാത്മജാമ് ॥ 12 ॥
സാ ചൈനം ഭയവിത്രസ്താ ഭൂയോ നൈവാഭ്യുദൈക്ഷത ।
തം ദൃഷ്ട്വാ വംദമാനം തു സീതാ ശശിനിഭാനനാ ॥ 13 ॥
അബ്രവീദ്ധീര്ഘമുച്ഛവസ്യ വാനരം മധുരസ്വരാ ।
മായാം പ്രവിഷ്ടോ മായാവീ യദി ത്വം രാവണസ്സ്വയമ് ॥ 14 ॥
ഉത്പാദയസി മേ ഭൂയസ്സംതാപം തന്ന ശോഭനമ് ।
സ്വം പരിത്യജ്യ രൂപം യഃ പരിവ്രാജകരൂപധ്രുത് ।
ജനസ്ഥാനേ മയാ ദൃഷ്ടസ്ത്വം സ ഏവാസി രാവണഃ ॥ 15 ॥
ഉപവാസകൃശാം ദീനാം കാമരൂപ നിശാചര ।
സംതാപയസി മാം ഭൂയസ്സംതപ്താം തന്ന ശോഭനമ് ॥ 16 ॥
അഥവാ നൈതദേവം ഹി യന്മയാ പരിശംകിതമ് ॥ 17 ॥
മനസോ ഹി മമ പ്രീതിരുത്പന്നാ തവ ദര്ശനാത് ।
യദി രാമസ്യ ദൂതസ്ത്വമാഗതോ ഭദ്രമസ്തു തേ ॥ 18 ॥
പൃച്ഛാമി ത്വാം ഹരിശ്രേഷ്ഠ പ്രിയാ രാമകഥാ ഹി മേ ।
ഗുണാന്രാമസ്യ കഥയ പ്രിയസ്യ മമ വാനര ॥ 19 ॥
ചിത്തം ഹരസി മേ സൌമ്യ നദീകൂലം യഥാ രയഃ ।
അഹോ സ്വപ്നസ്യ സുഖതാ യാഹമേവം ചിരാഹൃതാ ॥ 20 ॥
പ്രേഷിതം നാമ പശ്യാമി രാഘവേണ വനൌകസമ് ।
സ്വപ്നേഽപി യദ്യഹം വീരം രാഘവം സഹലക്ഷ്മണമ് ॥ 21 ॥
പശ്യേയം നാവസീദേയം സ്വപ്നോഽപി മമ മത്സരീ ।
നാഹം സ്വപ്നമിമം മന്യേ സ്വപ്നേ ദൃഷ്ട്വാ ഹി വാനരമ് ॥ 22 ॥
ന ശക്യോഽഭ്യുദയഃ പ്രാപ്തും പ്രാപ്തശ്ചാഭ്യുദയോ മമ ।
കിന്നു സ്യാചിത്തമോഹോഽയം ഭവേദ്വാതഗതിസ്ത്വിയമ് ॥ 23 ॥
ഉന്മാദജോ വികാരോ വാ സ്യാദിയം മൃഗതൃഷ്ണികാ ।
അഥവാ നായമുന്മാദോ മോഹോഽപ്യുന്മാദലക്ഷണഃ ॥ 24 ॥
സംബുധ്യേ ചാഹമാത്മാനമിയം ചാപി വനൌകസമ് ।
ഇത്യേവം ബഹുധാ സീതാ സംപ്രധാര്യ ബലാബലമ് ॥ 25 ॥
രക്ഷസാം കാമരൂപത്വാന്മേനേ തം രാക്ഷസാധിപമ് ।
ഏതാം ബുദ്ധിം തദാ കൃത്വാ സീതാ സാ തനുമധ്യമാ ॥ 26 ॥
ന പ്രതിവ്യാജഹാരാഥ വാനരം ജനകാത്മജാ ।
സീതായാശ്ചിംതിതം ബുദ്ധ്വാ ഹനുമാന്മാരുതാത്മജഃ ॥ 27 ॥
ശ്രോത്രാനുകൂലൈർവചനൈസ്തദാ താം സംപ്രഹര്ഷയത് ।
ആദിത്യ ഇവ തേജസ്വീ ലോകകാംതശ്ശശീ യഥാ ॥ 28 ॥
രാജാ സർവസ്യ ലോകസ്യ ദേവോ വൈശ്രവണോ യഥാ ।
വിക്രമേണോപപന്നശ്ച യഥാ വിഷ്ണുര്മഹായശാഃ ॥ 29 ॥
സത്യവാദീ മധുരവാഗ്ദേവോ വാചസ്പതിര്യഥാ ।
രൂപവാന്സുഭഗ ശ്രീമാന് കംദര്പ ഇവ മൂര്തിമാന് ॥ 30 ॥
സ്ഥാനക്രോധഃ പ്രഹര്താ ച ശ്രേഷ്ഠോ ലോകേ മഹാരഥഃ ।
ബാഹുച്ഛായാമവഷ്ടബ്ധോ യസ്യ ലോകോ മഹാത്മനഃ ॥ 31 ॥
അപകൃഷ്യാശ്രമപദാന്മൃഗരൂപേണ രാഘവമ് ।
ശൂന്യേ യേനാപനീതാസി തസ്യ ദ്രക്ഷ്യസി യത്ഫലമ് ॥ 32 ॥
ന ചിരാദ്രാവണം സംഖ്യേ യോ വധിഷ്യതി വീര്യവാന് ।
രോഷപ്രമുക്തൈരിഷുഭിര്ജ്വലദ്ഭിരിവ പാവകൈഃ ॥ 33 ॥
തേനാഹം പ്രേഷിതോ ദൂത സ്ത്വത്സകാശമിഹാഗതഃ ।
ത്വദ്വിയോഗേന ദുഃഖാര്ത സ്സ ത്വാം കൌശലമബ്രവീത് ॥ 34 ॥
ലക്ഷ്മണശ്ച മഹാതേജാസ്സുമിത്രാനംദവര്ധനഃ ।
അഭിവാദ്യ മഹാബാഹുസ്സ ത്വാം കൌശലമബ്രവീത് ॥ 35 ॥
രാമസ്യ ച സഖാ ദേവി സുഗ്രീവോ നാമ വാനരഃ ।
രാജാ വാനരമുഖ്യാനാം സ ത്വാം കൌശലമബ്രവീത് ॥ 36 ॥
നിത്യം സ്മരതി രാമസ്ത്വാം സസുഗ്രീവ സ്സലക്ഷ്മണഃ ।
ദിഷ്ട്യാ ജീവസി വൈദേഹി രാക്ഷസീവശമാഗതാ ॥ 37 ॥
നചിരാദ്ദ്രക്ഷ്യസേ രാമം ലക്ഷ്മണം ച മഹാബലമ് ।
മധ്യേ വാനരകോടീനാം സുഗ്രീവം ചാമിതൌജസമ് ॥ 38 ॥
അഹം സുഗ്രീവസചിവോ ഹനുമാന്നാമ വാനരഃ ।
പ്രവിഷ്ടോ നഗരീം ലംകാം ലംഘയിത്വാ മഹോദധിമ് ॥ 39 ॥
കൃത്വാ മൂര്ധ്നി പദന്യാസം രാവണസ്യ ദുരാത്മനഃ ।
ത്വാം ദ്രഷ്ടുമുപയാതോഽഹം സമാശ്രിത്യ പരാക്രമമ് ॥ 40 ॥
നാഹമസ്മി തഥാ ദേവി യഥാ മാമവഗച്ഛസി ।
വിശംകാ ത്യജ്യതാമേഷാ ശ്രദ്ധത്സ്വ വദതോ മമ ॥ 41 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുംദരകാംഡേ ചതുസ്ത്രിംശസ്സര്ഗഃ ॥
