শ্রীমদ্বাল্মীকীয় রামাযণে সুংদরকাংডম্ ।
অথ পংচত্রিংশস্সর্গঃ ।
তাং তু রামকথাং শ্রুত্বা বৈদেহী বানরর্ষভাত্ ।
উবাচ বচনং সাংত্বমিদং মধুরয়া গিরা ॥ 1 ॥
ক্ব তে রামেণ সংসর্গঃ কথং জানাসি লক্ষ্মণম্ ।
বানরাণাং নরাণাং চ কথমাসীত্সমাগমঃ ॥ 2 ॥
যানি রামস্য় লিংগানি লক্ষ্মণস্য় চ বানর ।
তানি ভূযস্সমাচক্ষ্ব ন মাং শোকস্সমাবিশেত্ ॥ 3 ॥
কীদৃশং তস্য় সংস্থানং রূপং রামস্য় কীদৃশম্ ।
কথমূরূ কথং বাহূ লক্ষ্মণস্য় চ শংস মে ॥ 4 ॥
এবমুক্তস্তু বৈদেহ্য়া হনুমান্মারুতাত্মজঃ ।
ততো রামং যথাতত্ত্বমাখ্য়াতুমুপচক্রমে ॥ 5 ॥
জানংতী বত দিষ্ট্য়া মাং বৈদেহি পরিপৃচ্ছসি ।
ভর্তুঃ কমলপত্ত্রাক্ষি সংস্থানং লক্ষ্মণস্য় চ ॥ 6 ॥
যানি রামস্য় চিহ্নানি লক্ষ্মণস্য় চ যানি বৈ ।
লক্ষিতানি বিশালাক্ষি বদতশ্শৃণু তানি মে ॥ 7 ॥
রামঃ কমলপত্ত্রাক্ষ স্সর্বসত্ত্বমনোহরঃ ।
রূপদাক্ষিণ্যসংপন্নঃ প্রসূতো জনকাত্মজে ॥ 8 ॥
তেজসাঽদিত্য় সংকাশঃ ক্ষময়া পৃথিবীসমঃ ।
বৃহস্পতিসমো বুদ্ধ্য়া যশসা বাসবোপমঃ ॥ 9 ॥
রক্ষিতা জীবলোকস্য় স্বজনস্য়াভিরক্ষিতা ।
রক্ষিতা স্বস্য় বৃত্তস্য় ধর্মস্য় চ পরংতপঃ ॥ 10 ॥
রামো ভামিনি লোকস্য় চাতুর্বর্ণ্যস্য় রক্ষিতা ।
মর্য়াদানাং চ লোকস্য় কর্তা কারয়িতা চ সঃ ॥ 11 ॥
অর্চিষ্মানর্চিতোঽত্যর্থং ব্রহ্মচর্যব্রতে স্থিতঃ ।
সাধূনামুপকারজ্ঞঃ প্রচারজ্ঞশ্চ কর্মণাম্ ॥ 12 ॥
রাজবিদ্য়াবিনীতশ্চ ব্রাহ্মণানামুপাসিতা ।
শ্রুতবান্শীলসংপন্নো বিনীতশ্চ পরংতপঃ ॥ 13 ॥
যজুর্বেদবিনীতশ্চ বেদবিদ্ভিস্সুপূজিতঃ ।
ধনুর্বেদে চ বেদেষু বেদাংগেষু চ নিষ্ঠিতঃ ॥ 14 ॥
বিপুলাংসো মহাবাহুঃ কংবুগ্রীবশ্শুভাননঃ ।
গূঢজত্রুস্সুতাম্রাক্ষো রামো দেবি জনৈ শ্শ্রুতঃ ॥ 15 ॥
দুংদুভিস্বননির্ঘোষ স্স্নিগ্ধবর্ণঃ প্রতাপবান্ ।
সম স্সমবিভক্তাংগো বর্ণং শ্য়ামং সমাশ্রিতঃ ॥ 16 ॥
ত্রিস্থিরস্ত্রিপ্রলংবশ্চ ত্রিসমস্ত্রিষু চোন্নতঃ ।
ত্রিতাম্রস্ত্রিষু চ স্নিগ্ধো গংভীরস্ত্রিষু নিত্যশঃ ॥ 17 ॥
ত্রিবলীবাংস্ত্র্যবনতশ্চতুর্ব্য়ংগস্ত্রিশীর্ষবান্ ।
চতুষ্কলশ্চতুর্লেখশ্চতুষ্কিষ্কুশ্চতু স্সমঃ ॥ 18 ॥
চতুর্দশসমদ্বংদ্বশ্চতুর্দংষ্ট্রশ্চতুর্গতিঃ ।
মহোষ্ঠহনুনাসশ্চ পংচস্নিগ্ধোঽষ্টবংশবান্ ॥ 19 ॥
দশপদ্মো দশবৃহত্ত্রিভির্ব্য়াপ্তো দ্বিশুক্লবান্ ।
ষডুন্নতো নবতনুস্ত্রিভির্ব্য়াপ্নোতি রাঘবঃ ॥ 20 ॥
সত্যধর্মপরশ্শ্রীমান্ সংগ্রহানুগ্রহে রতঃ ।
দেশকালবিভাগজ্ঞস্সর্বলোকপ্রিয়ংবদঃ ॥ 21 ॥
ভ্রাতা তস্য় চ দ্বৈমাত্রস্সৌমিত্রিরপরাজিতঃ ।
অনুরাগেণ রূপেণ গুণৈশ্চৈব তথাবিধঃ ॥ 22 ॥
তাবুভৌ নরশার্দূলৌ ত্বদ্দর্শনসমুত্সুকৌ ।
বিচিন্বংতৌ মহীং কৃত্স্নামস্মাভিরভিসংগতৌ ॥ 23 ॥
ত্বামেব মার্গমাণৌ তৌ বিচরংতৌ বসুংধরাম্ ।
দদর্শতুর্মৃগপতিং পূর্বজেনাবরোপিতম্ ॥ 24 ॥
ঋশ্যমূকস্য় পৃষ্ঠে তু বহুপাদপসংকুলে ।
ভ্রাতুর্ভয়ার্তমাসীনং সুগ্রীবং প্রিযদর্শনম্ ॥ 25 ॥
বয়ং তু হরিরাজং তং সুগ্রীবং সত্যসংগরম্ ।
পরিচর্য়ামহে রাজ্য়াত্পূর্বজেনাবরোপিতম্ ॥ 26 ॥
ততস্তৌ চীরবসনৌ ধনুঃ প্রবরপাণিনৌ ।
ঋশ্যমূকস্য় শৈলস্য় রম্য়ং দেশমুপাগতৌ ॥ 27 ॥
স তৌ দৃষ্ট্বা নরব্য়াঘ্রৌ ধন্বিনৌ বানরর্ষভঃ ।
অবপ্লুতো গিরেস্তস্য় শিখরং ভযমোহিতঃ ॥ 28 ॥
ততস্স শিখরে তস্মিন্বানরেংদ্রো ব্যবস্থিতঃ ।
তয়োস্সমীপং মামেব প্রেষয়ামাস সত্বরম্ ॥ 29 ॥
তাবহং পুরুষব্য়াঘ্রৌ সুগ্রীববচনাত্প্রভূ ।
রূপলক্ষণসংপন্নৌ কৃতাংজলিরুপস্থিতঃ ॥ 30 ॥
তৌ পরিজ্ঞাততত্ত্বার্থৌ ময়া প্রীতিসমন্বিতৌ ।
পৃষ্ঠমারোপ্য় তং দেশং প্রাপিতৌ পুরুষর্ষভৌ ॥ 31 ॥
নিবেদিতৌ চ তত্ত্বেন সুগ্রীবায় মহাত্মনে ।
তয়োরন্য়োন্যসল্লাপাদ্ভৃশং প্রীতিরজাযত ॥ 32 ॥
ততস্তৌ প্রীতিসংপন্নৌ হরীশ্বরনরেশ্বরৌ ।
পরস্পরকৃতাশ্বাসৌ কথয়া পূর্ববৃত্তয়া ॥ 33 ॥
ততস্স সাংত্বয়ামাস সুগ্রীবং লক্ষ্মণাগ্রজঃ ।
স্ত্রীহেতোর্বালিনা ভ্রাত্রা নিরস্তমুরুতেজসা ॥ 34 ॥
ততস্ত্বন্নাশজং শোকং রামস্য়াক্লিষ্টকর্মণঃ ।
লক্ষ্মণো বানরেংদ্রায় সুগ্রীবায় ন্যবেদযত্ ॥ 35 ॥
স শ্রুত্বা বানরেংদ্রস্তু লক্ষ্মণেনেরিতং বচঃ ।
তদাসীন্নিষ্প্রভোঽত্যর্থং গ্রহগ্রস্ত ইবাংশুমান্ ॥ 36 ॥
ততস্ত্বদ্গাত্রশোভীনি রক্ষসা হ্রিযমাণয়া ।
যান্য়াভরণজালানি পাতিতানি মহীতলে ॥ 37 ॥
তানি সর্বাণি রামায় আনীয় হরিয়ূথপাঃ ।
সংহৃষ্টা দর্শয়ামাসুর্গতিং তু ন বিদুস্তব ॥ 38 ॥
তানি রামায় দত্তানি ময়ৈবোপহৃতানি চ ।
স্বনবংত্যবকীর্ণানি তস্মিন্বিগতচেতসি ॥ 39 ॥
তান্য়ংকে দর্শনীয়ানি কৃত্বা বহুবিধং তব ।
তেন দেবপ্রকাশেন দেবেন পরিদেবিতম্ ॥ 40 ॥
পশ্যতস্তানি রুদতস্তাম্যতশ্চ পুনঃ পুনঃ ।
প্রাদীপয়ংদাশরথেস্তানি শোকহুতাশনম্ ॥ 41 ॥
শয়িতং চ চিরং তেন দুঃখার্তেন মহাত্মনা ।
ময়াপি বিবিধৈর্বাক্য়ৈঃ কৃচ্ছ্রাদুত্থাপিতঃ পুনঃ ॥ 42 ॥
তানি দৃষ্ট্বা মহাবাহুর্দর্শয়িত্বা মুহুর্মুহুঃ ।
রাঘবস্সহ সৌমিত্রিস্সুগ্রীবে স ন্যবেদযত্ ॥ 43 ॥
স তবাদর্শনাদার্য়ে রাঘবঃ পরিতপ্যতে ।
মহতা জ্বলতা নিত্যমগ্নিনেবাগ্নিপর্বতঃ ॥ 44 ॥
ত্বত্কৃতে তমনিদ্রা চ শোকশ্চিংতা চ রাঘবম্ ।
তাপয়ংতি মহাত্মানমগ্ন্যগারমিবাগ্নয়ঃ ॥ 45 ॥
তবাদর্শনশোকেন রাঘবঃ প্রবিচাল্যতে ।
মহতা ভূমিকংপেন মহানিব শিলোচ্চয়ঃ ॥ 46 ॥
কাননানি সুরম্য়াণি নদীঃ প্রস্রবণানি চ ।
চরন্ন রতিমাপ্নোতি ত্বামপশ্যন্নৃপাত্মজে ॥ 47 ॥
স ত্বাং মনুজশার্দূলঃ ক্ষিপ্রং প্রাপ্স্যতি রাঘবঃ ।
সমিত্রবাংধবং হত্বা রাবণং জনকাত্মজে ॥ 48 ॥
সহিতৌ রামসুগ্রীবাবুভাবকুরুতাং তদা ।
সময়ং বালিনং হংতুং তব চান্বেষণং তথা ॥ 49 ॥
ততস্তাভ্য়াং কুমারাভ্য়াং বীরাভ্য়াং স হরীশ্বরঃ ।
কিষ্কিংধাং সমুপাগম্য় বালী যুদ্ধে নিপাতিতঃ ॥ 50 ॥
ততো নিহত্য় তরসা রামো বালিনমাহবে ।
সর্বর্ক্ষহরিসংঘানাং সুগ্রীবমকরোত্পতিম্ ॥ 51 ॥
রামসুগ্রীবয়োরৈক্য়ং দেব্য়েবং সমজাযত ।
হনুমংতং চ মাং বিদ্ধি তয়োর্দূতমিহাগতম্ ॥ 52 ॥
স্বরাজ্য়ং প্রাপ্য় সুগ্রীবস্সমানীয় হরীশ্বরান্ ।
ত্বদর্থং প্রেষয়ামাস দিশো দশ মহাবলান্ ॥ 53 ॥
আদিষ্টা বানরেংদ্রেণ সুগ্রীবেণ মহৌজসা ।
অদ্রিরাজপ্রতীকাশাস্সর্বতঃ প্রস্থিতৌ মহীম্ ॥ 54 ॥
ততস্তে মার্গমাণা বৈ সুগ্রীববচনাতুরাঃ ।
চরংতি বসুধাং কৃত্স্নাং বযমন্য়ে চ বানরাঃ ॥ 55 ॥
অংগদো নাম লক্ষ্মীবান্বালিসূনুর্মহাবলঃ ।
প্রস্থিতঃ কপিশার্দূলস্ত্রিভাগবলসংবৃতঃ ॥ 56 ॥
তেষাং নো বিপ্রণষ্টানাং বিংধ্য়ে পর্বতসত্তমে ।
ভৃশং শোকপরীতানামহোরাত্রগণা গতাঃ ॥ 57 ॥
তে বয়ং কার্যনৈরাশ্য়াত্কালস্য়াতিক্রমেণ চ ।
ভয়াচ্চ কপিরাজস্য় প্রাণাংস্ত্যক্তুং ব্যবস্থিতাঃ ॥ 58 ॥
বিচিত্য় বনদুর্গাণি গিরিপ্রস্রবণানি চ ।
অনাসাদ্য় পদং দেব্য়াঃ প্রাণাংস্ত্যক্তুং সমুদ্যতাঃ ॥ 59 ॥
দৃষ্ট্বা প্রায়োপবিষ্টাংশ্চ সর্বান্বানরপুংগবান্ ।
ভৃশং শোকার্ণবে মগ্নঃ পর্যদেবযদংগদঃ ॥ 60 ॥
তব নাশং চ বৈদেহি বালিনশ্চ বধং তথা ।
প্রায়োপবেশমস্মাকং মরণং চ জটায়ুষঃ ॥ 61 ॥
তেষাং নস্বামিসংদেশান্নিরাশানাং মুমূর্ষতাম্ ।
কার্যহেতোরিবায়াতশ্শকুনির্বীর্যবান্মহান্ ॥ 62 ॥
গৃধ্ররাজস্য় সোদর্য়ঃ সংপাতির্নাম গৃধ্ররাট্ ।
শ্রুত্বা ভ্রাতৃবধং কোপাদিদং বচনমব্রবীত্ ॥ 63 ॥
যবীয়ান্কেন মে ভ্রাতা হতঃ ক্ব চ নিপাতিতঃ ।
এতদাখ্য়াতুমিচ্ছামি ভবদ্ভির্বানরোত্তমাঃ ॥ 64 ॥
অংগদোঽকথযত্তস্য় জনস্থানে মহদ্বধম্ ।
রক্ষসা ভীমরূপেণ ত্বামুদ্দিশ্য় যথাতথম্ ॥ 65 ॥
জটায়ুষো বধং শ্রুত্বা দুঃখিতস্সোঽরুণাত্মজঃ ।
ত্বাং শশংস বরারোহে বসংতীং রাবণালয়ে ॥ 66 ॥
তস্য় তদ্বচনং শ্রুত্বা সংপাতেঃ প্রীতিবর্ধনম্ ।
অংগদপ্রমুখাস্তূর্ণং ততস্সংপ্রস্থিতা বযম্ ॥ 67 ॥
বিংধ্য়াদুত্থায় সংপ্রাপ্তা স্সাগরস্য়াংতমুত্তরম্ ।
ত্বদ্ধর্শনকৃতোত্সাহা হৃষ্টাস্তুষ্টাঃ প্লবংগমাঃ ॥ 68 ॥
অংগদপ্রমুখাস্সর্বে বেলোপাংতমুপস্থিতাঃ ।
চিংতাং জগ্মুঃ পুনর্ভীতাস্ত্বদ্দর্শনসমুত্সুকাঃ ॥ 69 ॥
অথাহং হরিসৈন্যস্য় সাগরং প্রেক্ষ্য় সীদতঃ ।
ব্যবধূয় ভয়ং তীব্রং যোজনানাং শতং প্লুতঃ ॥ 70 ॥
লংকা চাপি ময়া রাত্রৌ প্রবিষ্টা রাক্ষসাকুলা ।
রাবণশ্চ ময়া দৃষ্টস্ত্বং চ শোকপরিপ্লুতা ॥ 71 ॥
এতত্তে সর্বমাখ্য়াতং যথাবৃত্তমনংদিতে ।
অভিভাষস্ব মাং দেবি দূতো দাশরথেরহম্ ॥ 72 ॥
তং মাং রামকৃতোদ্য়োগং ত্বন্নিমিত্তমিহাগতম্ ।
সুগ্রীবসচিবং দেবি বুদ্ধ্যস্ব পবনাত্মজম্ ॥ 73 ॥
কুশলী তব কাকুত্স্থস্সর্বশস্ত্রভৃতাং বরঃ ।
গুরোরারাধনে যুক্তো লক্ষ্মণশ্চ সুলক্ষণঃ ॥ 74 ॥
তস্য় বীর্যবতো দেবি ভর্তুস্তব হিতে রতঃ ।
অহমেকস্তু সংপ্রাপ্ত স্সুগ্রীববচনাদিহ ॥ 75 ॥
ময়েযমসহায়েন চরতা কামরূপিণা ।
দক্ষিণা দিগনুক্রাংতা ত্বন্মার্গবিচয়ৈষিণা ॥ 76 ॥
দিষ্ট্য়াহং হরিসৈন্য়ানাং ত্বন্নাশমনুশোচতাম্ ।
অপনেষ্য়ামি সংতাপং তবাভিগমশংসনাত্ ॥ 77 ॥
দিষ্ট্য়া হি মম ন ব্যর্থং দেবি সাগরলংঘনম্ ।
প্রাপ্স্য়াম্যহমিদং দিষ্ট্য়া ত্বদ্দর্শনকৃতং যশঃ ॥ 78 ॥
রাঘবশ্চ মহাবীর্য়ঃ ক্ষিপ্রং ত্বামভিপত্স্যতে ।
সমিত্রবাংধবং হত্বা রাবণং রাক্ষসাধিপম্ ॥ 79 ॥
মাল্যবান্নাম বৈদেহি গিরীণামুত্তমো গিরিঃ ।
ততো গচ্ছতি গোকর্ণং পর্বতং কেসরী হরিঃ ॥ 80 ॥
স চ দেবর্ষিভির্দিষ্টঃ পিতা মম মহাকপিঃ ।
তীর্থে নদীপতেঃ পুণ্য়ে শংবসাদনমুদ্ধরত্ ॥ 81 ॥
তস্য়াহং হরিণঃ ক্ষেত্রে জাতো বাতেন মৈথিলি ।
হনুমানিতি বিখ্য়াতো লোকে স্বেনৈব কর্মণা ॥ 82 ॥
বিশ্বাসার্থং তু বৈদেহি ভর্তুরুক্তা ময়া গুণাঃ ।
অচিরাদ্রাঘবো দেবি ত্বামিতো নয়িতাঽনঘে ॥ 83 ॥
এবং বিশ্বাসিতা সীতা হেতুভিশ্শোককর্শিতা ।
উপপন্নৈরভিজ্ঞানৈর্দূতং তমবগচ্ছতি ॥ 84 ॥
অতুলং চ গতা হর্ষং প্রহর্ষেণ চ জানকী ।
নেত্রাভ্য়াং বক্রপক্ষ্মাভ্য়াং মুমোচানংদজং জলম্ ॥ 85 ॥
চারু তদ্বদনং তস্য়াস্তাম্রশুক্লাযতেক্ষণম্ ।
অশোভত বিশালাক্ষ্য়া রাহুমুক্ত ইবোডুরাট্ ॥ 86 ॥
হনুমংতং কপিং ব্যক্তং মন্যতে নান্যথেতি সা ।
অথোবাচ হনূমাংস্তামুত্তরং প্রিযদর্শনাম্ ॥ 87 ॥
এতত্তে সর্বমাখ্য়াতং সমাশ্বসিহি মৈথিলি ।
কিং করোমি কথং বা তে রোচতে প্রতিয়াম্যহম্ ॥ 88 ॥
হতেঽসুরে সংযতি শংবসাদনে কপিপ্রবীরেণ মহর্ষিচোদনাত্ ।
ততোঽস্মি বায়ুপ্রভবো হি মৈথিলি প্রভাবতস্তত্প্রতিমশ্চ বানরঃ ॥ 89 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে সুংদরকাংডে পংচত্রিংশস্সর্গঃ ॥
