ଶ୍ରୀମଦ୍ଵାଲ୍ମୀକୀୟ ରାମାୟଣେ ସୁଂଦରକାଂଡମ୍ ।
ଅଥ ପଂଚତ୍ରିଂଶସ୍ସର୍ଗଃ ।
ତାଂ ତୁ ରାମକଥାଂ ଶ୍ରୁତ୍ଵା ଵୈଦେହୀ ଵାନରର୍ଷଭାତ୍ ।
ଉଵାଚ ଵଚନଂ ସାଂତ୍ଵମିଦଂ ମଧୁରୟା ଗିରା ॥ 1 ॥
କ୍ଵ ତେ ରାମେଣ ସଂସର୍ଗଃ କଥଂ ଜାନାସି ଲକ୍ଷ୍ମଣମ୍ ।
ଵାନରାଣାଂ ନରାଣାଂ ଚ କଥମାସୀତ୍ସମାଗମଃ ॥ 2 ॥
ୟାନି ରାମସ୍ୟ ଲିଂଗାନି ଲକ୍ଷ୍ମଣସ୍ୟ ଚ ଵାନର ।
ତାନି ଭୂୟସ୍ସମାଚକ୍ଷ୍ଵ ନ ମାଂ ଶୋକସ୍ସମାଵିଶେତ୍ ॥ 3 ॥
କୀଦୃଶଂ ତସ୍ୟ ସଂସ୍ଥାନଂ ରୂପଂ ରାମସ୍ୟ କୀଦୃଶମ୍ ।
କଥମୂରୂ କଥଂ ବାହୂ ଲକ୍ଷ୍ମଣସ୍ୟ ଚ ଶଂସ ମେ ॥ 4 ॥
ଏଵମୁକ୍ତସ୍ତୁ ଵୈଦେହ୍ୟା ହନୁମାନ୍ମାରୁତାତ୍ମଜଃ ।
ତତୋ ରାମଂ ୟଥାତତ୍ତ୍ଵମାଖ୍ୟାତୁମୁପଚକ୍ରମେ ॥ 5 ॥
ଜାନଂତୀ ବତ ଦିଷ୍ଟ୍ୟା ମାଂ ଵୈଦେହି ପରିପୃଚ୍ଛସି ।
ଭର୍ତୁଃ କମଲପତ୍ତ୍ରାକ୍ଷି ସଂସ୍ଥାନଂ ଲକ୍ଷ୍ମଣସ୍ୟ ଚ ॥ 6 ॥
ୟାନି ରାମସ୍ୟ ଚିହ୍ନାନି ଲକ୍ଷ୍ମଣସ୍ୟ ଚ ୟାନି ଵୈ ।
ଲକ୍ଷିତାନି ଵିଶାଲାକ୍ଷି ଵଦତଶ୍ଶୃଣୁ ତାନି ମେ ॥ 7 ॥
ରାମଃ କମଲପତ୍ତ୍ରାକ୍ଷ ସ୍ସର୍ଵସତ୍ତ୍ଵମନୋହରଃ ।
ରୂପଦାକ୍ଷିଣ୍ୟସଂପନ୍ନଃ ପ୍ରସୂତୋ ଜନକାତ୍ମଜେ ॥ 8 ॥
ତେଜସାଽଦିତ୍ୟ ସଂକାଶଃ କ୍ଷମୟା ପୃଥିଵୀସମଃ ।
ବୃହସ୍ପତିସମୋ ବୁଦ୍ଧ୍ୟା ୟଶସା ଵାସଵୋପମଃ ॥ 9 ॥
ରକ୍ଷିତା ଜୀଵଲୋକସ୍ୟ ସ୍ଵଜନସ୍ୟାଭିରକ୍ଷିତା ।
ରକ୍ଷିତା ସ୍ଵସ୍ୟ ଵୃତ୍ତସ୍ୟ ଧର୍ମସ୍ୟ ଚ ପରଂତପଃ ॥ 10 ॥
ରାମୋ ଭାମିନି ଲୋକସ୍ୟ ଚାତୁର୍ଵର୍ଣ୍ୟସ୍ୟ ରକ୍ଷିତା ।
ମର୍ୟାଦାନାଂ ଚ ଲୋକସ୍ୟ କର୍ତା କାରୟିତା ଚ ସଃ ॥ 11 ॥
ଅର୍ଚିଷ୍ମାନର୍ଚିତୋଽତ୍ୟର୍ଥଂ ବ୍ରହ୍ମଚର୍ୟଵ୍ରତେ ସ୍ଥିତଃ ।
ସାଧୂନାମୁପକାରଜ୍ଞଃ ପ୍ରଚାରଜ୍ଞଶ୍ଚ କର୍ମଣାମ୍ ॥ 12 ॥
ରାଜଵିଦ୍ୟାଵିନୀତଶ୍ଚ ବ୍ରାହ୍ମଣାନାମୁପାସିତା ।
ଶ୍ରୁତଵାନ୍ଶୀଲସଂପନ୍ନୋ ଵିନୀତଶ୍ଚ ପରଂତପଃ ॥ 13 ॥
ୟଜୁର୍ଵେଦଵିନୀତଶ୍ଚ ଵେଦଵିଦ୍ଭିସ୍ସୁପୂଜିତଃ ।
ଧନୁର୍ଵେଦେ ଚ ଵେଦେଷୁ ଵେଦାଂଗେଷୁ ଚ ନିଷ୍ଠିତଃ ॥ 14 ॥
ଵିପୁଲାଂସୋ ମହାବାହୁଃ କଂବୁଗ୍ରୀଵଶ୍ଶୁଭାନନଃ ।
ଗୂଢଜତ୍ରୁସ୍ସୁତାମ୍ରାକ୍ଷୋ ରାମୋ ଦେଵି ଜନୈ ଶ୍ଶ୍ରୁତଃ ॥ 15 ॥
ଦୁଂଦୁଭିସ୍ଵନନିର୍ଘୋଷ ସ୍ସ୍ନିଗ୍ଧଵର୍ଣଃ ପ୍ରତାପଵାନ୍ ।
ସମ ସ୍ସମଵିଭକ୍ତାଂଗୋ ଵର୍ଣଂ ଶ୍ୟାମଂ ସମାଶ୍ରିତଃ ॥ 16 ॥
ତ୍ରିସ୍ଥିରସ୍ତ୍ରିପ୍ରଲଂବଶ୍ଚ ତ୍ରିସମସ୍ତ୍ରିଷୁ ଚୋନ୍ନତଃ ।
ତ୍ରିତାମ୍ରସ୍ତ୍ରିଷୁ ଚ ସ୍ନିଗ୍ଧୋ ଗଂଭୀରସ୍ତ୍ରିଷୁ ନିତ୍ୟଶଃ ॥ 17 ॥
ତ୍ରିଵଲୀଵାଂସ୍ତ୍ର୍ୟଵନତଶ୍ଚତୁର୍ଵ୍ୟଂଗସ୍ତ୍ରିଶୀର୍ଷଵାନ୍ ।
ଚତୁଷ୍କଲଶ୍ଚତୁର୍ଲେଖଶ୍ଚତୁଷ୍କିଷ୍କୁଶ୍ଚତୁ ସ୍ସମଃ ॥ 18 ॥
ଚତୁର୍ଦଶସମଦ୍ଵଂଦ୍ଵଶ୍ଚତୁର୍ଦଂଷ୍ଟ୍ରଶ୍ଚତୁର୍ଗତିଃ ।
ମହୋଷ୍ଠହନୁନାସଶ୍ଚ ପଂଚସ୍ନିଗ୍ଧୋଽଷ୍ଟଵଂଶଵାନ୍ ॥ 19 ॥
ଦଶପଦ୍ମୋ ଦଶବୃହତ୍ତ୍ରିଭିର୍ଵ୍ୟାପ୍ତୋ ଦ୍ଵିଶୁକ୍ଲଵାନ୍ ।
ଷଡୁନ୍ନତୋ ନଵତନୁସ୍ତ୍ରିଭିର୍ଵ୍ୟାପ୍ନୋତି ରାଘଵଃ ॥ 20 ॥
ସତ୍ୟଧର୍ମପରଶ୍ଶ୍ରୀମାନ୍ ସଂଗ୍ରହାନୁଗ୍ରହେ ରତଃ ।
ଦେଶକାଲଵିଭାଗଜ୍ଞସ୍ସର୍ଵଲୋକପ୍ରିୟଂଵଦଃ ॥ 21 ॥
ଭ୍ରାତା ତସ୍ୟ ଚ ଦ୍ଵୈମାତ୍ରସ୍ସୌମିତ୍ରିରପରାଜିତଃ ।
ଅନୁରାଗେଣ ରୂପେଣ ଗୁଣୈଶ୍ଚୈଵ ତଥାଵିଧଃ ॥ 22 ॥
ତାଵୁଭୌ ନରଶାର୍ଦୂଲୌ ତ୍ଵଦ୍ଦର୍ଶନସମୁତ୍ସୁକୌ ।
ଵିଚିନ୍ଵଂତୌ ମହୀଂ କୃତ୍ସ୍ନାମସ୍ମାଭିରଭିସଂଗତୌ ॥ 23 ॥
ତ୍ଵାମେଵ ମାର୍ଗମାଣୌ ତୌ ଵିଚରଂତୌ ଵସୁଂଧରାମ୍ ।
ଦଦର୍ଶତୁର୍ମୃଗପତିଂ ପୂର୍ଵଜେନାଵରୋପିତମ୍ ॥ 24 ॥
ଋଶ୍ୟମୂକସ୍ୟ ପୃଷ୍ଠେ ତୁ ବହୁପାଦପସଂକୁଲେ ।
ଭ୍ରାତୁର୍ଭୟାର୍ତମାସୀନଂ ସୁଗ୍ରୀଵଂ ପ୍ରିୟଦର୍ଶନମ୍ ॥ 25 ॥
ଵୟଂ ତୁ ହରିରାଜଂ ତଂ ସୁଗ୍ରୀଵଂ ସତ୍ୟସଂଗରମ୍ ।
ପରିଚର୍ୟାମହେ ରାଜ୍ୟାତ୍ପୂର୍ଵଜେନାଵରୋପିତମ୍ ॥ 26 ॥
ତତସ୍ତୌ ଚୀରଵସନୌ ଧନୁଃ ପ୍ରଵରପାଣିନୌ ।
ଋଶ୍ୟମୂକସ୍ୟ ଶୈଲସ୍ୟ ରମ୍ୟଂ ଦେଶମୁପାଗତୌ ॥ 27 ॥
ସ ତୌ ଦୃଷ୍ଟ୍ଵା ନରଵ୍ୟାଘ୍ରୌ ଧନ୍ଵିନୌ ଵାନରର୍ଷଭଃ ।
ଅଵପ୍ଲୁତୋ ଗିରେସ୍ତସ୍ୟ ଶିଖରଂ ଭୟମୋହିତଃ ॥ 28 ॥
ତତସ୍ସ ଶିଖରେ ତସ୍ମିନ୍ଵାନରେଂଦ୍ରୋ ଵ୍ୟଵସ୍ଥିତଃ ।
ତୟୋସ୍ସମୀପଂ ମାମେଵ ପ୍ରେଷୟାମାସ ସତ୍ଵରମ୍ ॥ 29 ॥
ତାଵହଂ ପୁରୁଷଵ୍ୟାଘ୍ରୌ ସୁଗ୍ରୀଵଵଚନାତ୍ପ୍ରଭୂ ।
ରୂପଲକ୍ଷଣସଂପନ୍ନୌ କୃତାଂଜଲିରୁପସ୍ଥିତଃ ॥ 30 ॥
ତୌ ପରିଜ୍ଞାତତତ୍ତ୍ଵାର୍ଥୌ ମୟା ପ୍ରୀତିସମନ୍ଵିତୌ ।
ପୃଷ୍ଠମାରୋପ୍ୟ ତଂ ଦେଶଂ ପ୍ରାପିତୌ ପୁରୁଷର୍ଷଭୌ ॥ 31 ॥
ନିଵେଦିତୌ ଚ ତତ୍ତ୍ଵେନ ସୁଗ୍ରୀଵାୟ ମହାତ୍ମନେ ।
ତୟୋରନ୍ୟୋନ୍ୟସଲ୍ଲାପାଦ୍ଭୃଶଂ ପ୍ରୀତିରଜାୟତ ॥ 32 ॥
ତତସ୍ତୌ ପ୍ରୀତିସଂପନ୍ନୌ ହରୀଶ୍ଵରନରେଶ୍ଵରୌ ।
ପରସ୍ପରକୃତାଶ୍ଵାସୌ କଥୟା ପୂର୍ଵଵୃତ୍ତୟା ॥ 33 ॥
ତତସ୍ସ ସାଂତ୍ଵୟାମାସ ସୁଗ୍ରୀଵଂ ଲକ୍ଷ୍ମଣାଗ୍ରଜଃ ।
ସ୍ତ୍ରୀହେତୋର୍ଵାଲିନା ଭ୍ରାତ୍ରା ନିରସ୍ତମୁରୁତେଜସା ॥ 34 ॥
ତତସ୍ତ୍ଵନ୍ନାଶଜଂ ଶୋକଂ ରାମସ୍ୟାକ୍ଲିଷ୍ଟକର୍ମଣଃ ।
ଲକ୍ଷ୍ମଣୋ ଵାନରେଂଦ୍ରାୟ ସୁଗ୍ରୀଵାୟ ନ୍ୟଵେଦୟତ୍ ॥ 35 ॥
ସ ଶ୍ରୁତ୍ଵା ଵାନରେଂଦ୍ରସ୍ତୁ ଲକ୍ଷ୍ମଣେନେରିତଂ ଵଚଃ ।
ତଦାସୀନ୍ନିଷ୍ପ୍ରଭୋଽତ୍ୟର୍ଥଂ ଗ୍ରହଗ୍ରସ୍ତ ଇଵାଂଶୁମାନ୍ ॥ 36 ॥
ତତସ୍ତ୍ଵଦ୍ଗାତ୍ରଶୋଭୀନି ରକ୍ଷସା ହ୍ରିୟମାଣୟା ।
ୟାନ୍ୟାଭରଣଜାଲାନି ପାତିତାନି ମହୀତଲେ ॥ 37 ॥
ତାନି ସର୍ଵାଣି ରାମାୟ ଆନୀୟ ହରିୟୂଥପାଃ ।
ସଂହୃଷ୍ଟା ଦର୍ଶୟାମାସୁର୍ଗତିଂ ତୁ ନ ଵିଦୁସ୍ତଵ ॥ 38 ॥
ତାନି ରାମାୟ ଦତ୍ତାନି ମୟୈଵୋପହୃତାନି ଚ ।
ସ୍ଵନଵଂତ୍ୟଵକୀର୍ଣାନି ତସ୍ମିନ୍ଵିଗତଚେତସି ॥ 39 ॥
ତାନ୍ୟଂକେ ଦର୍ଶନୀୟାନି କୃତ୍ଵା ବହୁଵିଧଂ ତଵ ।
ତେନ ଦେଵପ୍ରକାଶେନ ଦେଵେନ ପରିଦେଵିତମ୍ ॥ 40 ॥
ପଶ୍ୟତସ୍ତାନି ରୁଦତସ୍ତାମ୍ୟତଶ୍ଚ ପୁନଃ ପୁନଃ ।
ପ୍ରାଦୀପୟଂଦାଶରଥେସ୍ତାନି ଶୋକହୁତାଶନମ୍ ॥ 41 ॥
ଶୟିତଂ ଚ ଚିରଂ ତେନ ଦୁଃଖାର୍ତେନ ମହାତ୍ମନା ।
ମୟାପି ଵିଵିଧୈର୍ଵାକ୍ୟୈଃ କୃଚ୍ଛ୍ରାଦୁତ୍ଥାପିତଃ ପୁନଃ ॥ 42 ॥
ତାନି ଦୃଷ୍ଟ୍ଵା ମହାବାହୁର୍ଦର୍ଶୟିତ୍ଵା ମୁହୁର୍ମୁହୁଃ ।
ରାଘଵସ୍ସହ ସୌମିତ୍ରିସ୍ସୁଗ୍ରୀଵେ ସ ନ୍ୟଵେଦୟତ୍ ॥ 43 ॥
ସ ତଵାଦର୍ଶନାଦାର୍ୟେ ରାଘଵଃ ପରିତପ୍ୟତେ ।
ମହତା ଜ୍ଵଲତା ନିତ୍ୟମଗ୍ନିନେଵାଗ୍ନିପର୍ଵତଃ ॥ 44 ॥
ତ୍ଵତ୍କୃତେ ତମନିଦ୍ରା ଚ ଶୋକଶ୍ଚିଂତା ଚ ରାଘଵମ୍ ।
ତାପୟଂତି ମହାତ୍ମାନମଗ୍ନ୍ୟଗାରମିଵାଗ୍ନୟଃ ॥ 45 ॥
ତଵାଦର୍ଶନଶୋକେନ ରାଘଵଃ ପ୍ରଵିଚାଲ୍ୟତେ ।
ମହତା ଭୂମିକଂପେନ ମହାନିଵ ଶିଲୋଚ୍ଚୟଃ ॥ 46 ॥
କାନନାନି ସୁରମ୍ୟାଣି ନଦୀଃ ପ୍ରସ୍ରଵଣାନି ଚ ।
ଚରନ୍ନ ରତିମାପ୍ନୋତି ତ୍ଵାମପଶ୍ୟନ୍ନୃପାତ୍ମଜେ ॥ 47 ॥
ସ ତ୍ଵାଂ ମନୁଜଶାର୍ଦୂଲଃ କ୍ଷିପ୍ରଂ ପ୍ରାପ୍ସ୍ୟତି ରାଘଵଃ ।
ସମିତ୍ରବାଂଧଵଂ ହତ୍ଵା ରାଵଣଂ ଜନକାତ୍ମଜେ ॥ 48 ॥
ସହିତୌ ରାମସୁଗ୍ରୀଵାଵୁଭାଵକୁରୁତାଂ ତଦା ।
ସମୟଂ ଵାଲିନଂ ହଂତୁଂ ତଵ ଚାନ୍ଵେଷଣଂ ତଥା ॥ 49 ॥
ତତସ୍ତାଭ୍ୟାଂ କୁମାରାଭ୍ୟାଂ ଵୀରାଭ୍ୟାଂ ସ ହରୀଶ୍ଵରଃ ।
କିଷ୍କିଂଧାଂ ସମୁପାଗମ୍ୟ ଵାଲୀ ୟୁଦ୍ଧେ ନିପାତିତଃ ॥ 50 ॥
ତତୋ ନିହତ୍ୟ ତରସା ରାମୋ ଵାଲିନମାହଵେ ।
ସର୍ଵର୍କ୍ଷହରିସଂଘାନାଂ ସୁଗ୍ରୀଵମକରୋତ୍ପତିମ୍ ॥ 51 ॥
ରାମସୁଗ୍ରୀଵୟୋରୈକ୍ୟଂ ଦେଵ୍ୟେଵଂ ସମଜାୟତ ।
ହନୁମଂତଂ ଚ ମାଂ ଵିଦ୍ଧି ତୟୋର୍ଦୂତମିହାଗତମ୍ ॥ 52 ॥
ସ୍ଵରାଜ୍ୟଂ ପ୍ରାପ୍ୟ ସୁଗ୍ରୀଵସ୍ସମାନୀୟ ହରୀଶ୍ଵରାନ୍ ।
ତ୍ଵଦର୍ଥଂ ପ୍ରେଷୟାମାସ ଦିଶୋ ଦଶ ମହାବଲାନ୍ ॥ 53 ॥
ଆଦିଷ୍ଟା ଵାନରେଂଦ୍ରେଣ ସୁଗ୍ରୀଵେଣ ମହୌଜସା ।
ଅଦ୍ରିରାଜପ୍ରତୀକାଶାସ୍ସର୍ଵତଃ ପ୍ରସ୍ଥିତୌ ମହୀମ୍ ॥ 54 ॥
ତତସ୍ତେ ମାର୍ଗମାଣା ଵୈ ସୁଗ୍ରୀଵଵଚନାତୁରାଃ ।
ଚରଂତି ଵସୁଧାଂ କୃତ୍ସ୍ନାଂ ଵୟମନ୍ୟେ ଚ ଵାନରାଃ ॥ 55 ॥
ଅଂଗଦୋ ନାମ ଲକ୍ଷ୍ମୀଵାନ୍ଵାଲିସୂନୁର୍ମହାବଲଃ ।
ପ୍ରସ୍ଥିତଃ କପିଶାର୍ଦୂଲସ୍ତ୍ରିଭାଗବଲସଂଵୃତଃ ॥ 56 ॥
ତେଷାଂ ନୋ ଵିପ୍ରଣଷ୍ଟାନାଂ ଵିଂଧ୍ୟେ ପର୍ଵତସତ୍ତମେ ।
ଭୃଶଂ ଶୋକପରୀତାନାମହୋରାତ୍ରଗଣା ଗତାଃ ॥ 57 ॥
ତେ ଵୟଂ କାର୍ୟନୈରାଶ୍ୟାତ୍କାଲସ୍ୟାତିକ୍ରମେଣ ଚ ।
ଭୟାଚ୍ଚ କପିରାଜସ୍ୟ ପ୍ରାଣାଂସ୍ତ୍ୟକ୍ତୁଂ ଵ୍ୟଵସ୍ଥିତାଃ ॥ 58 ॥
ଵିଚିତ୍ୟ ଵନଦୁର୍ଗାଣି ଗିରିପ୍ରସ୍ରଵଣାନି ଚ ।
ଅନାସାଦ୍ୟ ପଦଂ ଦେଵ୍ୟାଃ ପ୍ରାଣାଂସ୍ତ୍ୟକ୍ତୁଂ ସମୁଦ୍ୟତାଃ ॥ 59 ॥
ଦୃଷ୍ଟ୍ଵା ପ୍ରାୟୋପଵିଷ୍ଟାଂଶ୍ଚ ସର୍ଵାନ୍ଵାନରପୁଂଗଵାନ୍ ।
ଭୃଶଂ ଶୋକାର୍ଣଵେ ମଗ୍ନଃ ପର୍ୟଦେଵୟଦଂଗଦଃ ॥ 60 ॥
ତଵ ନାଶଂ ଚ ଵୈଦେହି ଵାଲିନଶ୍ଚ ଵଧଂ ତଥା ।
ପ୍ରାୟୋପଵେଶମସ୍ମାକଂ ମରଣଂ ଚ ଜଟାୟୁଷଃ ॥ 61 ॥
ତେଷାଂ ନସ୍ଵାମିସଂଦେଶାନ୍ନିରାଶାନାଂ ମୁମୂର୍ଷତାମ୍ ।
କାର୍ୟହେତୋରିଵାୟାତଶ୍ଶକୁନିର୍ଵୀର୍ୟଵାନ୍ମହାନ୍ ॥ 62 ॥
ଗୃଧ୍ରରାଜସ୍ୟ ସୋଦର୍ୟଃ ସଂପାତିର୍ନାମ ଗୃଧ୍ରରାଟ୍ ।
ଶ୍ରୁତ୍ଵା ଭ୍ରାତୃଵଧଂ କୋପାଦିଦଂ ଵଚନମବ୍ରଵୀତ୍ ॥ 63 ॥
ୟଵୀୟାନ୍କେନ ମେ ଭ୍ରାତା ହତଃ କ୍ଵ ଚ ନିପାତିତଃ ।
ଏତଦାଖ୍ୟାତୁମିଚ୍ଛାମି ଭଵଦ୍ଭିର୍ଵାନରୋତ୍ତମାଃ ॥ 64 ॥
ଅଂଗଦୋଽକଥୟତ୍ତସ୍ୟ ଜନସ୍ଥାନେ ମହଦ୍ଵଧମ୍ ।
ରକ୍ଷସା ଭୀମରୂପେଣ ତ୍ଵାମୁଦ୍ଦିଶ୍ୟ ୟଥାତଥମ୍ ॥ 65 ॥
ଜଟାୟୁଷୋ ଵଧଂ ଶ୍ରୁତ୍ଵା ଦୁଃଖିତସ୍ସୋଽରୁଣାତ୍ମଜଃ ।
ତ୍ଵାଂ ଶଶଂସ ଵରାରୋହେ ଵସଂତୀଂ ରାଵଣାଲୟେ ॥ 66 ॥
ତସ୍ୟ ତଦ୍ଵଚନଂ ଶ୍ରୁତ୍ଵା ସଂପାତେଃ ପ୍ରୀତିଵର୍ଧନମ୍ ।
ଅଂଗଦପ୍ରମୁଖାସ୍ତୂର୍ଣଂ ତତସ୍ସଂପ୍ରସ୍ଥିତା ଵୟମ୍ ॥ 67 ॥
ଵିଂଧ୍ୟାଦୁତ୍ଥାୟ ସଂପ୍ରାପ୍ତା ସ୍ସାଗରସ୍ୟାଂତମୁତ୍ତରମ୍ ।
ତ୍ଵଦ୍ଧର୍ଶନକୃତୋତ୍ସାହା ହୃଷ୍ଟାସ୍ତୁଷ୍ଟାଃ ପ୍ଲଵଂଗମାଃ ॥ 68 ॥
ଅଂଗଦପ୍ରମୁଖାସ୍ସର୍ଵେ ଵେଲୋପାଂତମୁପସ୍ଥିତାଃ ।
ଚିଂତାଂ ଜଗ୍ମୁଃ ପୁନର୍ଭୀତାସ୍ତ୍ଵଦ୍ଦର୍ଶନସମୁତ୍ସୁକାଃ ॥ 69 ॥
ଅଥାହଂ ହରିସୈନ୍ୟସ୍ୟ ସାଗରଂ ପ୍ରେକ୍ଷ୍ୟ ସୀଦତଃ ।
ଵ୍ୟଵଧୂୟ ଭୟଂ ତୀଵ୍ରଂ ୟୋଜନାନାଂ ଶତଂ ପ୍ଲୁତଃ ॥ 70 ॥
ଲଂକା ଚାପି ମୟା ରାତ୍ରୌ ପ୍ରଵିଷ୍ଟା ରାକ୍ଷସାକୁଲା ।
ରାଵଣଶ୍ଚ ମୟା ଦୃଷ୍ଟସ୍ତ୍ଵଂ ଚ ଶୋକପରିପ୍ଲୁତା ॥ 71 ॥
ଏତତ୍ତେ ସର୍ଵମାଖ୍ୟାତଂ ୟଥାଵୃତ୍ତମନଂଦିତେ ।
ଅଭିଭାଷସ୍ଵ ମାଂ ଦେଵି ଦୂତୋ ଦାଶରଥେରହମ୍ ॥ 72 ॥
ତଂ ମାଂ ରାମକୃତୋଦ୍ୟୋଗଂ ତ୍ଵନ୍ନିମିତ୍ତମିହାଗତମ୍ ।
ସୁଗ୍ରୀଵସଚିଵଂ ଦେଵି ବୁଦ୍ଧ୍ୟସ୍ଵ ପଵନାତ୍ମଜମ୍ ॥ 73 ॥
କୁଶଲୀ ତଵ କାକୁତ୍ସ୍ଥସ୍ସର୍ଵଶସ୍ତ୍ରଭୃତାଂ ଵରଃ ।
ଗୁରୋରାରାଧନେ ୟୁକ୍ତୋ ଲକ୍ଷ୍ମଣଶ୍ଚ ସୁଲକ୍ଷଣଃ ॥ 74 ॥
ତସ୍ୟ ଵୀର୍ୟଵତୋ ଦେଵି ଭର୍ତୁସ୍ତଵ ହିତେ ରତଃ ।
ଅହମେକସ୍ତୁ ସଂପ୍ରାପ୍ତ ସ୍ସୁଗ୍ରୀଵଵଚନାଦିହ ॥ 75 ॥
ମୟେୟମସହାୟେନ ଚରତା କାମରୂପିଣା ।
ଦକ୍ଷିଣା ଦିଗନୁକ୍ରାଂତା ତ୍ଵନ୍ମାର୍ଗଵିଚୟୈଷିଣା ॥ 76 ॥
ଦିଷ୍ଟ୍ୟାହଂ ହରିସୈନ୍ୟାନାଂ ତ୍ଵନ୍ନାଶମନୁଶୋଚତାମ୍ ।
ଅପନେଷ୍ୟାମି ସଂତାପଂ ତଵାଭିଗମଶଂସନାତ୍ ॥ 77 ॥
ଦିଷ୍ଟ୍ୟା ହି ମମ ନ ଵ୍ୟର୍ଥଂ ଦେଵି ସାଗରଲଂଘନମ୍ ।
ପ୍ରାପ୍ସ୍ୟାମ୍ୟହମିଦଂ ଦିଷ୍ଟ୍ୟା ତ୍ଵଦ୍ଦର୍ଶନକୃତଂ ୟଶଃ ॥ 78 ॥
ରାଘଵଶ୍ଚ ମହାଵୀର୍ୟଃ କ୍ଷିପ୍ରଂ ତ୍ଵାମଭିପତ୍ସ୍ୟତେ ।
ସମିତ୍ରବାଂଧଵଂ ହତ୍ଵା ରାଵଣଂ ରାକ୍ଷସାଧିପମ୍ ॥ 79 ॥
ମାଲ୍ୟଵାନ୍ନାମ ଵୈଦେହି ଗିରୀଣାମୁତ୍ତମୋ ଗିରିଃ ।
ତତୋ ଗଚ୍ଛତି ଗୋକର୍ଣଂ ପର୍ଵତଂ କେସରୀ ହରିଃ ॥ 80 ॥
ସ ଚ ଦେଵର୍ଷିଭିର୍ଦିଷ୍ଟଃ ପିତା ମମ ମହାକପିଃ ।
ତୀର୍ଥେ ନଦୀପତେଃ ପୁଣ୍ୟେ ଶଂବସାଦନମୁଦ୍ଧରତ୍ ॥ 81 ॥
ତସ୍ୟାହଂ ହରିଣଃ କ୍ଷେତ୍ରେ ଜାତୋ ଵାତେନ ମୈଥିଲି ।
ହନୁମାନିତି ଵିଖ୍ୟାତୋ ଲୋକେ ସ୍ଵେନୈଵ କର୍ମଣା ॥ 82 ॥
ଵିଶ୍ଵାସାର୍ଥଂ ତୁ ଵୈଦେହି ଭର୍ତୁରୁକ୍ତା ମୟା ଗୁଣାଃ ।
ଅଚିରାଦ୍ରାଘଵୋ ଦେଵି ତ୍ଵାମିତୋ ନୟିତାଽନଘେ ॥ 83 ॥
ଏଵଂ ଵିଶ୍ଵାସିତା ସୀତା ହେତୁଭିଶ୍ଶୋକକର୍ଶିତା ।
ଉପପନ୍ନୈରଭିଜ୍ଞାନୈର୍ଦୂତଂ ତମଵଗଚ୍ଛତି ॥ 84 ॥
ଅତୁଲଂ ଚ ଗତା ହର୍ଷଂ ପ୍ରହର୍ଷେଣ ଚ ଜାନକୀ ।
ନେତ୍ରାଭ୍ୟାଂ ଵକ୍ରପକ୍ଷ୍ମାଭ୍ୟାଂ ମୁମୋଚାନଂଦଜଂ ଜଲମ୍ ॥ 85 ॥
ଚାରୁ ତଦ୍ଵଦନଂ ତସ୍ୟାସ୍ତାମ୍ରଶୁକ୍ଲାୟତେକ୍ଷଣମ୍ ।
ଅଶୋଭତ ଵିଶାଲାକ୍ଷ୍ୟା ରାହୁମୁକ୍ତ ଇଵୋଡୁରାଟ୍ ॥ 86 ॥
ହନୁମଂତଂ କପିଂ ଵ୍ୟକ୍ତଂ ମନ୍ୟତେ ନାନ୍ୟଥେତି ସା ।
ଅଥୋଵାଚ ହନୂମାଂସ୍ତାମୁତ୍ତରଂ ପ୍ରିୟଦର୍ଶନାମ୍ ॥ 87 ॥
ଏତତ୍ତେ ସର୍ଵମାଖ୍ୟାତଂ ସମାଶ୍ଵସିହି ମୈଥିଲି ।
କିଂ କରୋମି କଥଂ ଵା ତେ ରୋଚତେ ପ୍ରତିୟାମ୍ୟହମ୍ ॥ 88 ॥
ହତେଽସୁରେ ସଂୟତି ଶଂବସାଦନେ କପିପ୍ରଵୀରେଣ ମହର୍ଷିଚୋଦନାତ୍ ।
ତତୋଽସ୍ମି ଵାୟୁପ୍ରଭଵୋ ହି ମୈଥିଲି ପ୍ରଭାଵତସ୍ତତ୍ପ୍ରତିମଶ୍ଚ ଵାନରଃ ॥ 89 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ସୁଂଦରକାଂଡେ ପଂଚତ୍ରିଂଶସ୍ସର୍ଗଃ ॥
