śrīmadvālmīkīya rāmāyaṇē sundarakāṇḍam ।
atha ēkōnachatvāriṃśassargaḥ ।
maṇiṃ dattvā tataḥ sītā hanūmantamathābravīt ।
abhijñānamabhijñātamētadrāmasya tattvataḥ ॥ 1 ॥
maṇiṃ tu dṛṣṭvā rāmō vai trayāṇāṃ saṃsmariṣyati ।
vīrō jananyā mama cha rājñō daśarathasya cha ॥ 2 ॥
sa bhūyastvaṃ samutsāhē chōditō harisattama ।
asminkāryasamārambhē prachintaya yaduttaram ॥ 3 ॥
tvamasminkāryaniryōgē pramāṇaṃ harisattama ।
hanumanyatnamāsthāya duḥkhakṣayakarō bhava ॥ 4 ॥
tasya chintayatō yatnō duḥkhakṣayakarō bhavēt ।
sa tathēti pratijñāya mārutirbhīmavikramaḥ ॥ 5 ॥
śirasā vandhya vaidēhīṃ gamanāyōpachakramē ।
jñātvā samprasthitaṃ dēvī vānaraṃ mārutātmajam ॥ 6 ॥
bāṣpagadgadayā vāchā maithilī vākyamabravīt ।
kuśalaṃ hanumanbrūyāḥ sahitau rāmalakṣmaṇau ॥ 7 ॥
sugrīvaṃ cha sahāmātyaṃ vṛddhān sarvāṃścha vānarān ।
brūyāstvaṃ vānaraśrēṣṭha kuśalaṃ dharmasaṃhitam ॥ 8 ॥
yathā sa cha mahābāhurmāṃ tārayati rāghavaḥ ।
asmāddhuḥkhāmbusaṃrōdhāttvaṃ samādhātumarhasi ॥ 9 ॥
jīvantīṃ māṃ yathā rāmaḥ sambhāvayati kīrtimān ।
tattathā hanumanvāchyaṃ vāchā dharmamavāpnuhi ॥ 10 ॥
nityamutsāhayuktāścha vāchaśrutvā tvayēritāḥ ।
vardhiṣyatē dāśarathēḥ pauruṣaṃ madavāptayē ॥ 11 ॥
matsandēśayutā vāchastvattaśśrutvā cha rāghavaḥ ।
parākramavidhiṃ vīrō vidhivatsaṃvidhāsyati ॥ 12 ॥
sītāyā vachanaṃ śrutvā hanumānmārutātmajaḥ ।
śirasyañjalimādhāya vākyamuttaramabravīt ॥ 13 ॥
kṣipramēṣyati kākutsthō hāryṛkṣapravarairvṛtaḥ ।
yastē yudhi vijityārīnśōkaṃ vyapanayiṣyati ॥ 14 ॥
na hi paśyāmi martyēṣu nāsurēṣu surēṣu vā ।
yastasya kṣipatō bāṇānsthātumutsahatē'grataḥ ॥ 15 ॥
apyarkamapi parjanyamapi vaivasvataṃ yamam ।
sa hi sōḍhuṃ raṇē śaktastava hētōrviśēṣataḥ ॥ 16 ॥
sa hi sāgaraparyantāṃ mahīṃ śāsitumīhati ।
tvannimittō hi rāmasya jayō janakanandini ॥ 17 ॥
tasya tadvachanaṃ śrutvā samyaksatyaṃ subhāṣitam ।
jānakī bahumēnē'tha vachanaṃ chēdamabravīt ॥ 18 ॥
tatastaṃ prasthitaṃ sītā vīkṣamāṇā punaḥ punaḥ ।
bhartṛsnēhānvitaṃ vākyaṃ sauhārdādanumānayat ॥ 19 ॥
yadi vā manyasē vīra vasaikāhamarindama ।
kasmiṃśchitsaṃvṛtē dēśē viśrāntaḥśvō gamiṣyasi ॥ 20 ॥
mama chēdalpabhāgyāyā sānnidhyāttava vānara ।
asya śōkasya mahatō muhūrtaṃ mōkṣaṇaṃ bhavēt ॥ 21 ॥
gatē hi hariśārdūla punarāgamanāya tu ।
prāṇānāmapi sandēhō mama syānnātra saṃśayaḥ ॥ 22 ॥
tavādarśanajaḥ śōkō bhūyō māṃ paritāpayēt ।
duḥkhāddhuḥkhaparāmṛṣṭāṃ dīpayanniva vānara ॥ 23 ॥
ayaṃ cha vīra sandēhastiṣṭhatīva mamāgrataḥ ।
sumahāṃstvatsahāyēṣu haryṛkṣēṣu harīśvaraḥ ॥ 24 ॥
kathaṃ nu khalu duṣpāraṃ tariṣyanti mahōdadhim ।
tāni haryṛkṣasainyāni tau vā naravarātmajau ॥ 25 ॥
trayāṇāmēva bhūtānāṃ sāgarasyāsya laṅghanē ।
śaktissyādvainatēyasya tava vā mārutasya vā ॥ 26 ॥
tadasminkāryaniryōgē vīraivaṃ duratikramē ।
kiṃ paśyasi samādhānaṃ tvaṃ hi kāryavidāṃ varaḥ ॥ 27 ॥
kāmamasya tvamēvaikaḥ kāryasya parisādhanē ।
paryāptaḥ paravīraghna yaśasyastē phalōdayaḥ ॥ 28 ॥
balaissamagrairyadi māṃ rāvaṇaṃ jitya saṃyugē ।
vijayī svapuraṃ yāyāttattasya sadṛśaṃ bhavēt ॥ 29 ॥
śaraistu saṅkulāṃ kṛtvā laṅkāṃ parabalārdanaḥ ।
māṃ nayēdyadi kākutsthaḥ tattasya sadṛśaṃ bhavēt ॥ 30 ॥
tadyathā tasya vikrāntamanurūpaṃ mahātmanaḥ ।
bhavēdāhavaśūrasya tathā tvamupapādaya ॥ 31 ॥
tadarthōpahitaṃ vākyaṃ praśritaṃ hētusaṃhitam ।
niśamya hanumānśēṣaṃ vākyamuttaramabravīt ॥ 32 ॥
dēvi haryṛkṣasainyānāmīśvaraḥ plavatāṃ varaḥ ।
sugrīvassattvasampannastavārthē kṛtaniśchayaḥ ॥ 33 ॥
sa vānarasahasrāṇāṃ kōṭībhirabhisaṃvṛtaḥ ।
kṣipramēṣyati vaidēhi rākṣasānāṃ nibarhaṇaḥ ॥ 34 ॥
tasya vikramasampannāssattvavantō mahābalāḥ ।
manassaṅkalpasampātā nidēśē harayaḥ sthitāḥ ॥ 35 ॥
yēṣāṃ nōpari nādhastānna tiryaksajjatē gatiḥ ।
na cha karmasu sīdanti mahatsvamitatējasaḥ ॥ 36 ॥
asakṛttairmahōtsāhaissasāgaradharādharā ।
pradakṣiṇīkṛtā bhūmirvāyumārgānusāribhiḥ ॥ 37 ॥
madviśiṣṭāścha tulyāścha santi tatra vanaukasaḥ ।
mattaḥ pratyavaraḥ kaśchinnāsti sugrīvasannidhau ॥ 38 ॥
ahaṃ tāvadiha prāptaḥ kiṃ punastē mahābalāḥ ।
na hi prakṛṣṭāḥ prēṣyantē prēṣyantē hītarē janāḥ ॥ 39 ॥
tadalaṃ paritāpēna dēvi śōkō vyapaitu tē ।
ēkōtpātēna tē laṅkāmēṣyanti hariyūthapāḥ ॥ 40 ॥
mama pṛṣṭhagatau tau cha chandrasūryāvivōditau ।
tvatsakāśaṃ mahāsattvau nṛsiṃhāvāgamiṣyataḥ ॥ 41 ॥
tatō vīrau naravarau sahitau rāmalakṣmaṇau ।
āgamya nagarīṃ laṅkāṃ sāyakairvidhamiṣyataḥ ॥ 42 ॥
sagaṇaṃ rāvaṇaṃ hattvā rāghavō raghunandanaḥ ।
tvāmādāya varārōhē svapurīṃ pratiyāsyati ॥ 43 ॥
tadāśvasihi bhadraṃ tē bhava tvaṃ kālakāṅkṣiṇī ।
nachirāddrakṣyasē rāmaṃ prajvalantamivānalam ॥ 44 ॥
nihatē rākṣasēndrē'sminsaputrāmātyabāndhavē ।
tvaṃ samēṣvasi rāmēṇa śaśāṅkēnēva rōhiṇī ॥ 45 ॥
kṣipraṃ tvaṃ dēvi śōkasya pāraṃ yāsyasi maithili ।
rāvaṇaṃ chaiva rāmēṇa nihataṃ drakṣyasē'chirāt ॥ 46 ॥
ēvamāśvāsya vaidēhīṃ hanumānmārutātmajaḥ ।
gamanāya matiṃ kṛtvā vaidēhīṃ punarabravīt ॥ 47 ॥
tamarighnaṃ kṛtātmānaṃ kṣipraṃ drakṣyasi rāghavam ।
lakṣmaṇaṃ cha dhanuṣpāṇiṃ laṅkādvāramupāgatam ॥ 48 ॥
nakhadaṃṣṭrāyudhānvīrānsimhaśārdūlavikramān ।
vānarānvāraṇēndrābhānkṣipraṃ drakṣyasi saṅgatān ॥ 49 ॥
śailāmbudanikāśānāṃ laṅkāmalayasānuṣu ।
nardatāṃ kapimukhyānāmāryē yūdhānyanēkaśaḥ ॥ 50 ॥
sa tu marmaṇi ghōrēṇa tāḍitō manmathēṣuṇā ।
na śarma labhatē rāmassiṃhārdhita iva dvipaḥ ॥ 51 ॥
mā rudō dēvi śōkēna mābhūttē manasō'priyam ।
śachīva patyā śakrēṇa bhartrā nāthavatī hyasi ॥ 52 ॥
rāmādviśiṣṭaḥ kō'nyō'sti kaśchitsaumitriṇā samaḥ ।
agnimārutakalpau tau bhrātarau tava saṃśrayau ॥ 53 ॥
nāsmiṃśchiraṃ vatsyasi dēvi dēśē rakṣōgaṇairadhyuṣitē'tiraudrē ।
na tē chirādāmagamanaṃ priyasya kṣamasva matsaṅgamakālamātram ॥ 54 ॥
ityārṣē śrīmadrāmāyaṇē vālmīkīya ādikāvyē sundarakāṇḍē ēkōnachatvāriṃśassargaḥ ॥
