ශ්රීමද්වාල්මීකීය රාමායණේ සුංදරකාංඩම් ।
අථ ඒකෝනචත්වාරිංශස්සර්ගඃ ।
මණිං දත්ත්වා තතඃ සීතා හනූමංතමථාබ්රවීත් ।
අභිජ්ඤානමභිජ්ඤාතමේතද්රාමස්ය තත්ත්වතඃ ॥ 1 ॥
මණිං තු දෘෂ්ට්වා රාමෝ වෛ ත්රයාණාං සංස්මරිෂ්යති ।
වීරෝ ජනන්යා මම ච රාජ්ඤෝ දශරථස්ය ච ॥ 2 ॥
ස භූයස්ත්වං සමුත්සාහේ චෝදිතෝ හරිසත්තම ।
අස්මින්කාර්යසමාරංභේ ප්රචිංතය යදුත්තරම් ॥ 3 ॥
ත්වමස්මින්කාර්යනිර්යෝගේ ප්රමාණං හරිසත්තම ।
හනුමන්යත්නමාස්ථාය දුඃඛක්ෂයකරෝ භව ॥ 4 ॥
තස්ය චිංතයතෝ යත්නෝ දුඃඛක්ෂයකරෝ භවේත් ।
ස තථේති ප්රතිජ්ඤාය මාරුතිර්භීමවික්රමඃ ॥ 5 ॥
ශිරසා වංධ්ය වෛදේහීං ගමනායෝපචක්රමේ ।
ජ්ඤාත්වා සංප්රස්ථිතං දේවී වානරං මාරුතාත්මජම් ॥ 6 ॥
බාෂ්පගද්ගදයා වාචා මෛථිලී වාක්යමබ්රවීත් ।
කුශලං හනුමන්බ්රූයාඃ සහිතෞ රාමලක්ෂ්මණෞ ॥ 7 ॥
සුග්රීවං ච සහාමාත්යං වෘද්ධාන් සර්වාංශ්ච වානරාන් ।
බ්රූයාස්ත්වං වානරශ්රේෂ්ඨ කුශලං ධර්මසංහිතම් ॥ 8 ॥
යථා ස ච මහාබාහුර්මාං තාරයති රාඝවඃ ।
අස්මාද්ධුඃඛාංබුසංරෝධාත්ත්වං සමාධාතුමර්හසි ॥ 9 ॥
ජීවංතීං මාං යථා රාමඃ සංභාවයති කීර්තිමාන් ।
තත්තථා හනුමන්වාච්යං වාචා ධර්මමවාප්නුහි ॥ 10 ॥
නිත්යමුත්සාහයුක්තාශ්ච වාචශ්රුත්වා ත්වයේරිතාඃ ।
වර්ධිෂ්යතේ දාශරථේඃ පෞරුෂං මදවාප්තයේ ॥ 11 ॥
මත්සංදේශයුතා වාචස්ත්වත්තශ්ශ්රුත්වා ච රාඝවඃ ।
පරාක්රමවිධිං වීරෝ විධිවත්සංවිධාස්යති ॥ 12 ॥
සීතායා වචනං ශ්රුත්වා හනුමාන්මාරුතාත්මජඃ ।
ශිරස්යංජලිමාධාය වාක්යමුත්තරමබ්රවීත් ॥ 13 ॥
ක්ෂිප්රමේෂ්යති කාකුත්ස්ථෝ හාර්යෘක්ෂප්රවරෛර්වෘතඃ ।
යස්තේ යුධි විජිත්යාරීන්ශෝකං ව්යපනයිෂ්යති ॥ 14 ॥
න හි පශ්යාමි මර්ත්යේෂු නාසුරේෂු සුරේෂු වා ।
යස්තස්ය ක්ෂිපතෝ බාණාන්ස්ථාතුමුත්සහතේऽග්රතඃ ॥ 15 ॥
අප්යර්කමපි පර්ජන්යමපි වෛවස්වතං යමම් ।
ස හි සෝඪුං රණේ ශක්තස්තව හේතෝර්විශේෂතඃ ॥ 16 ॥
ස හි සාගරපර්යංතාං මහීං ශාසිතුමීහති ।
ත්වන්නිමිත්තෝ හි රාමස්ය ජයෝ ජනකනංදිනි ॥ 17 ॥
තස්ය තද්වචනං ශ්රුත්වා සම්යක්සත්යං සුභාෂිතම් ।
ජානකී බහුමේනේऽථ වචනං චේදමබ්රවීත් ॥ 18 ॥
තතස්තං ප්රස්ථිතං සීතා වීක්ෂමාණා පුනඃ පුනඃ ।
භර්තෘස්නේහාන්විතං වාක්යං සෞහාර්දාදනුමානයත් ॥ 19 ॥
යදි වා මන්යසේ වීර වසෛකාහමරිංදම ।
කස්මිංශ්චිත්සංවෘතේ දේශේ විශ්රාංතඃශ්වෝ ගමිෂ්යසි ॥ 20 ॥
මම චේදල්පභාග්යායා සාන්නිධ්යාත්තව වානර ।
අස්ය ශෝකස්ය මහතෝ මුහූර්තං මෝක්ෂණං භවේත් ॥ 21 ॥
ගතේ හි හරිශාර්දූල පුනරාගමනාය තු ।
ප්රාණානාමපි සංදේහෝ මම ස්යාන්නාත්ර සංශයඃ ॥ 22 ॥
තවාදර්ශනජඃ ශෝකෝ භූයෝ මාං පරිතාපයේත් ।
දුඃඛාද්ධුඃඛපරාමෘෂ්ටාං දීපයන්නිව වානර ॥ 23 ॥
අයං ච වීර සංදේහස්තිෂ්ඨතීව මමාග්රතඃ ।
සුමහාංස්ත්වත්සහායේෂු හර්යෘක්ෂේෂු හරීශ්වරඃ ॥ 24 ॥
කථං නු ඛලු දුෂ්පාරං තරිෂ්යංති මහෝදධිම් ।
තානි හර්යෘක්ෂසෛන්යානි තෞ වා නරවරාත්මජෞ ॥ 25 ॥
ත්රයාණාමේව භූතානාං සාගරස්යාස්ය ලංඝනේ ।
ශක්තිස්ස්යාද්වෛනතේයස්ය තව වා මාරුතස්ය වා ॥ 26 ॥
තදස්මින්කාර්යනිර්යෝගේ වීරෛවං දුරතික්රමේ ।
කිං පශ්යසි සමාධානං ත්වං හි කාර්යවිදාං වරඃ ॥ 27 ॥
කාමමස්ය ත්වමේවෛකඃ කාර්යස්ය පරිසාධනේ ।
පර්යාප්තඃ පරවීරඝ්න යශස්යස්තේ ඵලෝදයඃ ॥ 28 ॥
බලෛස්සමග්රෛර්යදි මාං රාවණං ජිත්ය සංයුගේ ।
විජයී ස්වපුරං යායාත්තත්තස්ය සදෘශං භවේත් ॥ 29 ॥
ශරෛස්තු සංකුලාං කෘත්වා ලංකාං පරබලාර්දනඃ ।
මාං නයේද්යදි කාකුත්ස්ථඃ තත්තස්ය සදෘශං භවේත් ॥ 30 ॥
තද්යථා තස්ය වික්රාංතමනුරූපං මහාත්මනඃ ।
භවේදාහවශූරස්ය තථා ත්වමුපපාදය ॥ 31 ॥
තදර්ථෝපහිතං වාක්යං ප්රශ්රිතං හේතුසංහිතම් ।
නිශම්ය හනුමාන්ශේෂං වාක්යමුත්තරමබ්රවීත් ॥ 32 ॥
දේවි හර්යෘක්ෂසෛන්යානාමීශ්වරඃ ප්ලවතාං වරඃ ।
සුග්රීවස්සත්ත්වසංපන්නස්තවාර්ථේ කෘතනිශ්චයඃ ॥ 33 ॥
ස වානරසහස්රාණාං කෝටීභිරභිසංවෘතඃ ।
ක්ෂිප්රමේෂ්යති වෛදේහි රාක්ෂසානාං නිබර්හණඃ ॥ 34 ॥
තස්ය වික්රමසංපන්නාස්සත්ත්වවංතෝ මහාබලාඃ ।
මනස්සංකල්පසංපාතා නිදේශේ හරයඃ ස්ථිතාඃ ॥ 35 ॥
යේෂාං නෝපරි නාධස්තාන්න තිර්යක්සජ්ජතේ ගතිඃ ।
න ච කර්මසු සීදංති මහත්ස්වමිතතේජසඃ ॥ 36 ॥
අසකෘත්තෛර්මහෝත්සාහෛස්සසාගරධරාධරා ।
ප්රදක්ෂිණීකෘතා භූමිර්වායුමාර්ගානුසාරිභිඃ ॥ 37 ॥
මද්විශිෂ්ටාශ්ච තුල්යාශ්ච සංති තත්ර වනෞකසඃ ।
මත්තඃ ප්රත්යවරඃ කශ්චින්නාස්ති සුග්රීවසන්නිධෞ ॥ 38 ॥
අහං තාවදිහ ප්රාප්තඃ කිං පුනස්තේ මහාබලාඃ ।
න හි ප්රකෘෂ්ටාඃ ප්රේෂ්යංතේ ප්රේෂ්යංතේ හීතරේ ජනාඃ ॥ 39 ॥
තදලං පරිතාපේන දේවි ශෝකෝ ව්යපෛතු තේ ।
ඒකෝත්පාතේන තේ ලංකාමේෂ්යංති හරියූථපාඃ ॥ 40 ॥
මම පෘෂ්ඨගතෞ තෞ ච චංද්රසූර්යාවිවෝදිතෞ ।
ත්වත්සකාශං මහාසත්ත්වෞ නෘසිංහාවාගමිෂ්යතඃ ॥ 41 ॥
තතෝ වීරෞ නරවරෞ සහිතෞ රාමලක්ෂ්මණෞ ।
ආගම්ය නගරීං ලංකාං සායකෛර්විධමිෂ්යතඃ ॥ 42 ॥
සගණං රාවණං හත්ත්වා රාඝවෝ රඝුනංදනඃ ।
ත්වාමාදාය වරාරෝහේ ස්වපුරීං ප්රතියාස්යති ॥ 43 ॥
තදාශ්වසිහි භද්රං තේ භව ත්වං කාලකාංක්ෂිණී ।
නචිරාද්ද්රක්ෂ්යසේ රාමං ප්රජ්වලංතමිවානලම් ॥ 44 ॥
නිහතේ රාක්ෂසේංද්රේऽස්මින්සපුත්රාමාත්යබාංධවේ ।
ත්වං සමේෂ්වසි රාමේණ ශශාංකේනේව රෝහිණී ॥ 45 ॥
ක්ෂිප්රං ත්වං දේවි ශෝකස්ය පාරං යාස්යසි මෛථිලි ।
රාවණං චෛව රාමේණ නිහතං ද්රක්ෂ්යසේऽචිරාත් ॥ 46 ॥
ඒවමාශ්වාස්ය වෛදේහීං හනුමාන්මාරුතාත්මජඃ ।
ගමනාය මතිං කෘත්වා වෛදේහීං පුනරබ්රවීත් ॥ 47 ॥
තමරිඝ්නං කෘතාත්මානං ක්ෂිප්රං ද්රක්ෂ්යසි රාඝවම් ।
ලක්ෂ්මණං ච ධනුෂ්පාණිං ලංකාද්වාරමුපාගතම් ॥ 48 ॥
නඛදංෂ්ට්රායුධාන්වීරාන්සිම්හශාර්දූලවික්රමාන් ।
වානරාන්වාරණේංද්රාභාන්ක්ෂිප්රං ද්රක්ෂ්යසි සංගතාන් ॥ 49 ॥
ශෛලාංබුදනිකාශානාං ලංකාමලයසානුෂු ।
නර්දතාං කපිමුඛ්යානාමාර්යේ යූධාන්යනේකශඃ ॥ 50 ॥
ස තු මර්මණි ඝෝරේණ තාඩිතෝ මන්මථේෂුණා ।
න ශර්ම ලභතේ රාමස්සිංහාර්ධිත ඉව ද්විපඃ ॥ 51 ॥
මා රුදෝ දේවි ශෝකේන මාභූත්තේ මනසෝऽප්රියම් ।
ශචීව පත්යා ශක්රේණ භර්ත්රා නාථවතී හ්යසි ॥ 52 ॥
රාමාද්විශිෂ්ටඃ කෝऽන්යෝऽස්ති කශ්චිත්සෞමිත්රිණා සමඃ ।
අග්නිමාරුතකල්පෞ තෞ භ්රාතරෞ තව සංශ්රයෞ ॥ 53 ॥
නාස්මිංශ්චිරං වත්ස්යසි දේවි දේශේ රක්ෂෝගණෛරධ්යුෂිතේऽතිරෞද්රේ ।
න තේ චිරාදාමගමනං ප්රියස්ය ක්ෂමස්ව මත්සංගමකාලමාත්රම් ॥ 54 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ ඒකෝනචත්වාරිංශස්සර්ගඃ ॥
