ශ්රීමද්වාල්මීකීය රාමායණේ සුංදරකාංඩම් ।
අථ චතුර්ථස්සර්ගඃ ।
ස නිර්ජිත්ය පුරීං ශ්රේෂ්ඨාං ලංකාං තාං කාමරූපිණීම් ।
වික්රමේණ මහාතේජා හනුමාන් කපිසත්තමඃ ॥ 1 ॥
අද්වාරේණ ච මහාබාහුඃ ප්රාකාරමභිපුප්ලුවේ ।
ප්රවිශ්ය නගරීං ලංකාං කපිරාජහිතංකරඃ ॥ 2 ॥
චක්රේऽථ පාදං සව්යං ච ශත්රූණාං ස තු මූර්ධනි ।
ප්රවිෂ්ටඃ සත්ත්වසංපන්නෝ නිශායාං මාරුතාත්මජඃ ॥ 3 ॥
ස මහාපථමාස්ථාය මුක්තාපුෂ්පවිරාජිතම් ।
තතස්තු තාං පුරීං ලංකාං රම්යාමභියයෞ කපිඃ ॥ 4 ॥
හසිතෝත්කෘෂ්ටනිනදෛස්තූර්යඝෝෂපුරස්සරෛඃ ।
වජ්රාංකුශනිකාශෛශ්ච වජ්රජාලවිභූෂිතෛඃ ॥ 5 ॥
ගෘහමේඝෛඃ පුරී රම්යා බභාසේ ද්යෞරිවාංබුදෛඃ ।
ප්රජජ්වාල තතෝ ලංකා රක්ෂෝගණගෘහෛඃ ශුභෛඃ ॥ 6 ॥
සිතාභ්රසදෘශෛශ්චිත්රෛඃ පද්මස්වස්තිකසංස්ථිතෛඃ ।
වර්ධමානගෘහෛශ්චාපි සර්වතඃ සුවිභූෂිතා ॥ 7 ॥
තාං චිත්රමාල්යාභරණාං කපිරාජහිතංකරඃ ।
රාඝවාර්ථං චරන් ශ්රීමාන් දදර්ශ ච නනංද ච ॥ 8 ॥
භවනාද්භවනං ගච්ඡන් දදර්ශ පවනාත්මජඃ ।
විවිධාකෘතිරූපාණි භවනානි තතස්තතඃ ॥ 9 ॥
ශුශ්රාව මධුරං ගීතං ත්රිස්ථානස්වරභූෂිතම් ।
ස්ත්රීණාං මදසමෘද්ධානාං දිවි චාප්සරසාමිව ॥ 10 ॥
ශුශ්රාව කාංචීනිනදං නූපුරාණාං ච, නිඃස්වනම් ।
සෝපානනිනදාංශ්චෛව භවනේෂු මහාත්මනාම් ॥ 11 ॥
අස්ඵෝටිතනිනාදාංශ්ච ක්ෂ්වේලිතාංශ්ච තතස්තතඃ ।
ශුශ්රාව ජපතාං තත්ර මංත්රාන් රක්ෂෝගෘහේෂු වෛ ॥ 12 ॥
ස්වාධ්යායනිරතාංශ්චෛව යාතුධානාන් දදර්ශ සඃ ।
රාවණස්තවසංයුක්තාන් ගර්ජතෝ රාක්ෂසානපි ॥ 13 ॥
රාජමාර්ගං සමාවෘත්ය ස්ථිතං රක්ෂෝබලං මහත් ।
දදර්ශ මධ්යමේ ගුල්මේ රාවණස්ය චරාන් බහූන් ॥ 14 ॥
දීක්ෂිතාන් ජටිලාන් මුංඩාන් ගෝජිනාංබරවාසසඃ ।
දර්භමුෂ්ටිප්රහරණානග්නිකුංඩායුඝාංස්තථා ॥ 15 ॥
කූටමුද්ගරපාණීංශ්ච දංඩායුධධරානපි ।
ඒකාක්ෂානේකකර්ණාංශ්ච ලංබෝදරපයෝධරාන් ॥ 16 ॥
කරාලාන් භුග්නවක්ත්රාංශ්ච විකටාන් වාමනාංස්තථා ।
ධන්විනඃ ඛංගිනශ්චෛව ශතඝ්නීමුසලායුධාන් ॥ 17 ॥
පරිඝෝත්තමහස්තාංශ්ච විචිත්රකවචෝජ්ජ්වලාන් ।
නාතිස්ථූලාන්නාතිකෘශාන්නාතිදීර්ඝාතිහ්රස්වකාන් ॥ 18 ॥
නාතිගෞරාන්නාතිකෘෂ්ණාන්නාතිකුබ්ජාන්න වාමනාන් ।
විරූපාන් බහුරූපාංශ්ච සුරූපාංශ්ච සුවර්චසඃ ॥ 19 ॥
ධ්වජීන් පතාකිනශ්චෛව දදර්ශ විවිධායුධාන් ।
ශක්තිවෘක්ෂායුධාංශ්චෛව පට්ටිසාශනිධාරිණඃ ॥ 20 ॥
ක්ෂේපණීපාශහස්තාංශ්ච දදර්ශ ස මහාකපිඃ ।
ස්රග්විණස්ත්වනුලිප්තාංශ්ච වරාභරණභූෂිතාන් ॥ 21 ॥
නානාවේෂසමායුක්තාන් යථාස්ස්වෛරගතාන් බහූන් ।
තීක්ෂ්ණශූලධරාංශ්චෛව වජ්රිණශ්ච මහාබලාන් ॥ 22 ॥
ශතසාහස්රමව්යග්රමාරක්ෂං මධ්යමං කපිඃ ।
රක්ෂෝධිපතිනිර්දිෂ්ටං දදර්ශාංතඃපුරාග්රතඃ ॥ 23 ॥
ස තදා තද්ගෘහං දෘෂ්ට්වා මහාහාටකතෝරණම් ।
රාක්ෂසේංද්රස්ය විඛ්යාතමද්රිමූර්ධ්නි ප්රතිෂ්ඨිතම් ॥ 24 ॥
පුංඩරීකාවතංසාභිඃ පරිඛාභිරලංකෘතම් ।
ප්රාකාරාවෘතමත්යංතං දදර්ශ ස මහාකපිඃ ॥ 25 ॥
ත්රිවිෂ්ටපනිභං දිව්යං දිව්යනාදනිනාදිතම් ।
වාජිහේෂිතසංඝුෂ්ටං නාදිතං භූෂණෛස්තථා ॥ 26 ॥
රථෛර්යානෛර්විමානෛශ්ච තථා හයගජෛඃ ශුභෛඃ ।
වාරණෛශ්ච චතුර්ථංතෛඃ ශ්වේතාභ්රනිචයෝපමෛඃ ॥ 27 ॥
භූෂිතං රුචිරද්වාරං මත්තෛශ්ච මෘගපක්ෂිභිඃ ।
රක්ෂිතං සුමහාවීර්යෛර්යාතුධානෛඃ සහස්රශඃ ।
රාක්ෂසාධිපතේර්ගුප්තමාවිවේශ මහාකපිඃ ॥ 28 ॥
සහේමජාංබූනදචක්රවාලං මහාර්හමුක්තාමණිභූෂිතාංතම් ।
පරාර්ථ්යකාලාගුරුචංදනාක්තං ස රාවණාංතඃපුරමාවිවේශ ॥ 29 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ චතුර්ථස්සර්ගඃ ॥
