શ્રીમદ્વાલ્મીકીય રામાયણે સુંદરકાંડમ્ ।
અથ ચતુર્થસ્સર્ગઃ ।
સ નિર્જિત્ય પુરીં શ્રેષ્ઠાં લંકાં તાં કામરૂપિણીમ્ ।
વિક્રમેણ મહાતેજા હનુમાન્ કપિસત્તમઃ ॥ 1 ॥
અદ્વારેણ ચ મહાબાહુઃ પ્રાકારમભિપુપ્લુવે ।
પ્રવિશ્ય નગરીં લંકાં કપિરાજહિતંકરઃ ॥ 2 ॥
ચક્રેઽથ પાદં સવ્યં ચ શત્રૂણાં સ તુ મૂર્ધનિ ।
પ્રવિષ્ટઃ સત્ત્વસંપન્નો નિશાયાં મારુતાત્મજઃ ॥ 3 ॥
સ મહાપથમાસ્થાય મુક્તાપુષ્પવિરાજિતમ્ ।
તતસ્તુ તાં પુરીં લંકાં રમ્યામભિયયૌ કપિઃ ॥ 4 ॥
હસિતોત્કૃષ્ટનિનદૈસ્તૂર્યઘોષપુરસ્સરૈઃ ।
વજ્રાંકુશનિકાશૈશ્ચ વજ્રજાલવિભૂષિતૈઃ ॥ 5 ॥
ગૃહમેઘૈઃ પુરી રમ્યા બભાસે દ્યૌરિવાંબુદૈઃ ।
પ્રજજ્વાલ તતો લંકા રક્ષોગણગૃહૈઃ શુભૈઃ ॥ 6 ॥
સિતાભ્રસદૃશૈશ્ચિત્રૈઃ પદ્મસ્વસ્તિકસંસ્થિતૈઃ ।
વર્ધમાનગૃહૈશ્ચાપિ સર્વતઃ સુવિભૂષિતા ॥ 7 ॥
તાં ચિત્રમાલ્યાભરણાં કપિરાજહિતંકરઃ ।
રાઘવાર્થં ચરન્ શ્રીમાન્ દદર્શ ચ નનંદ ચ ॥ 8 ॥
ભવનાદ્ભવનં ગચ્છન્ દદર્શ પવનાત્મજઃ ।
વિવિધાકૃતિરૂપાણિ ભવનાનિ તતસ્તતઃ ॥ 9 ॥
શુશ્રાવ મધુરં ગીતં ત્રિસ્થાનસ્વરભૂષિતમ્ ।
સ્ત્રીણાં મદસમૃદ્ધાનાં દિવિ ચાપ્સરસામિવ ॥ 10 ॥
શુશ્રાવ કાંચીનિનદં નૂપુરાણાં ચ, નિઃસ્વનમ્ ।
સોપાનનિનદાંશ્ચૈવ ભવનેષુ મહાત્મનામ્ ॥ 11 ॥
અસ્ફોટિતનિનાદાંશ્ચ ક્ષ્વેલિતાંશ્ચ તતસ્તતઃ ।
શુશ્રાવ જપતાં તત્ર મંત્રાન્ રક્ષોગૃહેષુ વૈ ॥ 12 ॥
સ્વાધ્યાયનિરતાંશ્ચૈવ યાતુધાનાન્ દદર્શ સઃ ।
રાવણસ્તવસંયુક્તાન્ ગર્જતો રાક્ષસાનપિ ॥ 13 ॥
રાજમાર્ગં સમાવૃત્ય સ્થિતં રક્ષોબલં મહત્ ।
દદર્શ મધ્યમે ગુલ્મે રાવણસ્ય ચરાન્ બહૂન્ ॥ 14 ॥
દીક્ષિતાન્ જટિલાન્ મુંડાન્ ગોજિનાંબરવાસસઃ ।
દર્ભમુષ્ટિપ્રહરણાનગ્નિકુંડાયુઘાંસ્તથા ॥ 15 ॥
કૂટમુદ્ગરપાણીંશ્ચ દંડાયુધધરાનપિ ।
એકાક્ષાનેકકર્ણાંશ્ચ લંબોદરપયોધરાન્ ॥ 16 ॥
કરાલાન્ ભુગ્નવક્ત્રાંશ્ચ વિકટાન્ વામનાંસ્તથા ।
ધન્વિનઃ ખંગિનશ્ચૈવ શતઘ્નીમુસલાયુધાન્ ॥ 17 ॥
પરિઘોત્તમહસ્તાંશ્ચ વિચિત્રકવચોજ્જ્વલાન્ ।
નાતિસ્થૂલાન્નાતિકૃશાન્નાતિદીર્ઘાતિહ્રસ્વકાન્ ॥ 18 ॥
નાતિગૌરાન્નાતિકૃષ્ણાન્નાતિકુબ્જાન્ન વામનાન્ ।
વિરૂપાન્ બહુરૂપાંશ્ચ સુરૂપાંશ્ચ સુવર્ચસઃ ॥ 19 ॥
ધ્વજીન્ પતાકિનશ્ચૈવ દદર્શ વિવિધાયુધાન્ ।
શક્તિવૃક્ષાયુધાંશ્ચૈવ પટ્ટિસાશનિધારિણઃ ॥ 20 ॥
ક્ષેપણીપાશહસ્તાંશ્ચ દદર્શ સ મહાકપિઃ ।
સ્રગ્વિણસ્ત્વનુલિપ્તાંશ્ચ વરાભરણભૂષિતાન્ ॥ 21 ॥
નાનાવેષસમાયુક્તાન્ યથાસ્સ્વૈરગતાન્ બહૂન્ ।
તીક્ષ્ણશૂલધરાંશ્ચૈવ વજ્રિણશ્ચ મહાબલાન્ ॥ 22 ॥
શતસાહસ્રમવ્યગ્રમારક્ષં મધ્યમં કપિઃ ।
રક્ષોધિપતિનિર્દિષ્ટં દદર્શાંતઃપુરાગ્રતઃ ॥ 23 ॥
સ તદા તદ્ગૃહં દૃષ્ટ્વા મહાહાટકતોરણમ્ ।
રાક્ષસેંદ્રસ્ય વિખ્યાતમદ્રિમૂર્ધ્નિ પ્રતિષ્ઠિતમ્ ॥ 24 ॥
પુંડરીકાવતંસાભિઃ પરિખાભિરલંકૃતમ્ ।
પ્રાકારાવૃતમત્યંતં દદર્શ સ મહાકપિઃ ॥ 25 ॥
ત્રિવિષ્ટપનિભં દિવ્યં દિવ્યનાદનિનાદિતમ્ ।
વાજિહેષિતસંઘુષ્ટં નાદિતં ભૂષણૈસ્તથા ॥ 26 ॥
રથૈર્યાનૈર્વિમાનૈશ્ચ તથા હયગજૈઃ શુભૈઃ ।
વારણૈશ્ચ ચતુર્થંતૈઃ શ્વેતાભ્રનિચયોપમૈઃ ॥ 27 ॥
ભૂષિતં રુચિરદ્વારં મત્તૈશ્ચ મૃગપક્ષિભિઃ ।
રક્ષિતં સુમહાવીર્યૈર્યાતુધાનૈઃ સહસ્રશઃ ।
રાક્ષસાધિપતેર્ગુપ્તમાવિવેશ મહાકપિઃ ॥ 28 ॥
સહેમજાંબૂનદચક્રવાલં મહાર્હમુક્તામણિભૂષિતાંતમ્ ।
પરાર્થ્યકાલાગુરુચંદનાક્તં સ રાવણાંતઃપુરમાવિવેશ ॥ 29 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે સુંદરકાંડે ચતુર્થસ્સર્ગઃ ॥
