śrīmadvālmīkīya rāmāyaṇē sundarakāṇḍam ।
atha chaturthassargaḥ ।
sa nirjitya purīṃ śrēṣṭhāṃ laṅkāṃ tāṃ kāmarūpiṇīm ।
vikramēṇa mahātējā hanumān kapisattamaḥ ॥ 1 ॥
advārēṇa cha mahābāhuḥ prākāramabhipupluvē ।
praviśya nagarīṃ laṅkāṃ kapirājahitaṅkaraḥ ॥ 2 ॥
chakrē'tha pādaṃ savyaṃ cha śatrūṇāṃ sa tu mūrdhani ।
praviṣṭaḥ sattvasampannō niśāyāṃ mārutātmajaḥ ॥ 3 ॥
sa mahāpathamāsthāya muktāpuṣpavirājitam ।
tatastu tāṃ purīṃ laṅkāṃ ramyāmabhiyayau kapiḥ ॥ 4 ॥
hasitōtkṛṣṭaninadaistūryaghōṣapurassaraiḥ ।
vajrāṅkuśanikāśaiścha vajrajālavibhūṣitaiḥ ॥ 5 ॥
gṛhamēghaiḥ purī ramyā babhāsē dyaurivāmbudaiḥ ।
prajajvāla tatō laṅkā rakṣōgaṇagṛhaiḥ śubhaiḥ ॥ 6 ॥
sitābhrasadṛśaiśchitraiḥ padmasvastikasaṃsthitaiḥ ।
vardhamānagṛhaiśchāpi sarvataḥ suvibhūṣitā ॥ 7 ॥
tāṃ chitramālyābharaṇāṃ kapirājahitaṅkaraḥ ।
rāghavārthaṃ charan śrīmān dadarśa cha nananda cha ॥ 8 ॥
bhavanādbhavanaṃ gachChan dadarśa pavanātmajaḥ ।
vividhākṛtirūpāṇi bhavanāni tatastataḥ ॥ 9 ॥
śuśrāva madhuraṃ gītaṃ tristhānasvarabhūṣitam ।
strīṇāṃ madasamṛddhānāṃ divi chāpsarasāmiva ॥ 10 ॥
śuśrāva kāñchīninadaṃ nūpurāṇāṃ cha, niḥsvanam ।
sōpānaninadāṃśchaiva bhavanēṣu mahātmanām ॥ 11 ॥
asphōṭitaninādāṃścha kṣvēlitāṃścha tatastataḥ ।
śuśrāva japatāṃ tatra mantrān rakṣōgṛhēṣu vai ॥ 12 ॥
svādhyāyaniratāṃśchaiva yātudhānān dadarśa saḥ ।
rāvaṇastavasaṃyuktān garjatō rākṣasānapi ॥ 13 ॥
rājamārgaṃ samāvṛtya sthitaṃ rakṣōbalaṃ mahat ।
dadarśa madhyamē gulmē rāvaṇasya charān bahūn ॥ 14 ॥
dīkṣitān jaṭilān muṇḍān gōjināmbaravāsasaḥ ।
darbhamuṣṭipraharaṇānagnikuṇḍāyughāṃstathā ॥ 15 ॥
kūṭamudgarapāṇīṃścha daṇḍāyudhadharānapi ।
ēkākṣānēkakarṇāṃścha lambōdarapayōdharān ॥ 16 ॥
karālān bhugnavaktrāṃścha vikaṭān vāmanāṃstathā ।
dhanvinaḥ khaṅginaśchaiva śataghnīmusalāyudhān ॥ 17 ॥
parighōttamahastāṃścha vichitrakavachōjjvalān ।
nātisthūlānnātikṛśānnātidīrghātihrasvakān ॥ 18 ॥
nātigaurānnātikṛṣṇānnātikubjānna vāmanān ।
virūpān bahurūpāṃścha surūpāṃścha suvarchasaḥ ॥ 19 ॥
dhvajīn patākinaśchaiva dadarśa vividhāyudhān ।
śaktivṛkṣāyudhāṃśchaiva paṭṭisāśanidhāriṇaḥ ॥ 20 ॥
kṣēpaṇīpāśahastāṃścha dadarśa sa mahākapiḥ ।
sragviṇastvanuliptāṃścha varābharaṇabhūṣitān ॥ 21 ॥
nānāvēṣasamāyuktān yathāssvairagatān bahūn ।
tīkṣṇaśūladharāṃśchaiva vajriṇaścha mahābalān ॥ 22 ॥
śatasāhasramavyagramārakṣaṃ madhyamaṃ kapiḥ ।
rakṣōdhipatinirdiṣṭaṃ dadarśāntaḥpurāgrataḥ ॥ 23 ॥
sa tadā tadgṛhaṃ dṛṣṭvā mahāhāṭakatōraṇam ।
rākṣasēndrasya vikhyātamadrimūrdhni pratiṣṭhitam ॥ 24 ॥
puṇḍarīkāvataṃsābhiḥ parikhābhiralaṅkṛtam ।
prākārāvṛtamatyantaṃ dadarśa sa mahākapiḥ ॥ 25 ॥
triviṣṭapanibhaṃ divyaṃ divyanādanināditam ।
vājihēṣitasaṅghuṣṭaṃ nāditaṃ bhūṣaṇaistathā ॥ 26 ॥
rathairyānairvimānaiścha tathā hayagajaiḥ śubhaiḥ ।
vāraṇaiścha chaturthantaiḥ śvētābhranichayōpamaiḥ ॥ 27 ॥
bhūṣitaṃ ruchiradvāraṃ mattaiścha mṛgapakṣibhiḥ ।
rakṣitaṃ sumahāvīryairyātudhānaiḥ sahasraśaḥ ।
rākṣasādhipatērguptamāvivēśa mahākapiḥ ॥ 28 ॥
sahēmajāmbūnadachakravālaṃ mahārhamuktāmaṇibhūṣitāntam ।
parārthyakālāguruchandanāktaṃ sa rāvaṇāntaḥpuramāvivēśa ॥ 29 ॥
ityārṣē śrīmadrāmāyaṇē vālmīkīya ādikāvyē sundarakāṇḍē chaturthassargaḥ ॥
