ଶ୍ରୀମଦ୍ଵାଲ୍ମୀକୀୟ ରାମାୟଣେ ସୁଂଦରକାଂଡମ୍ ।
ଅଥ ଚତୁର୍ଥସ୍ସର୍ଗଃ ।
ସ ନିର୍ଜିତ୍ୟ ପୁରୀଂ ଶ୍ରେଷ୍ଠାଂ ଲଂକାଂ ତାଂ କାମରୂପିଣୀମ୍ ।
ଵିକ୍ରମେଣ ମହାତେଜା ହନୁମାନ୍ କପିସତ୍ତମଃ ॥ 1 ॥
ଅଦ୍ଵାରେଣ ଚ ମହାବାହୁଃ ପ୍ରାକାରମଭିପୁପ୍ଲୁଵେ ।
ପ୍ରଵିଶ୍ୟ ନଗରୀଂ ଲଂକାଂ କପିରାଜହିତଂକରଃ ॥ 2 ॥
ଚକ୍ରେଽଥ ପାଦଂ ସଵ୍ୟଂ ଚ ଶତ୍ରୂଣାଂ ସ ତୁ ମୂର୍ଧନି ।
ପ୍ରଵିଷ୍ଟଃ ସତ୍ତ୍ଵସଂପନ୍ନୋ ନିଶାୟାଂ ମାରୁତାତ୍ମଜଃ ॥ 3 ॥
ସ ମହାପଥମାସ୍ଥାୟ ମୁକ୍ତାପୁଷ୍ପଵିରାଜିତମ୍ ।
ତତସ୍ତୁ ତାଂ ପୁରୀଂ ଲଂକାଂ ରମ୍ୟାମଭିୟୟୌ କପିଃ ॥ 4 ॥
ହସିତୋତ୍କୃଷ୍ଟନିନଦୈସ୍ତୂର୍ୟଘୋଷପୁରସ୍ସରୈଃ ।
ଵଜ୍ରାଂକୁଶନିକାଶୈଶ୍ଚ ଵଜ୍ରଜାଲଵିଭୂଷିତୈଃ ॥ 5 ॥
ଗୃହମେଘୈଃ ପୁରୀ ରମ୍ୟା ବଭାସେ ଦ୍ୟୌରିଵାଂବୁଦୈଃ ।
ପ୍ରଜଜ୍ଵାଲ ତତୋ ଲଂକା ରକ୍ଷୋଗଣଗୃହୈଃ ଶୁଭୈଃ ॥ 6 ॥
ସିତାଭ୍ରସଦୃଶୈଶ୍ଚିତ୍ରୈଃ ପଦ୍ମସ୍ଵସ୍ତିକସଂସ୍ଥିତୈଃ ।
ଵର୍ଧମାନଗୃହୈଶ୍ଚାପି ସର୍ଵତଃ ସୁଵିଭୂଷିତା ॥ 7 ॥
ତାଂ ଚିତ୍ରମାଲ୍ୟାଭରଣାଂ କପିରାଜହିତଂକରଃ ।
ରାଘଵାର୍ଥଂ ଚରନ୍ ଶ୍ରୀମାନ୍ ଦଦର୍ଶ ଚ ନନଂଦ ଚ ॥ 8 ॥
ଭଵନାଦ୍ଭଵନଂ ଗଚ୍ଛନ୍ ଦଦର୍ଶ ପଵନାତ୍ମଜଃ ।
ଵିଵିଧାକୃତିରୂପାଣି ଭଵନାନି ତତସ୍ତତଃ ॥ 9 ॥
ଶୁଶ୍ରାଵ ମଧୁରଂ ଗୀତଂ ତ୍ରିସ୍ଥାନସ୍ଵରଭୂଷିତମ୍ ।
ସ୍ତ୍ରୀଣାଂ ମଦସମୃଦ୍ଧାନାଂ ଦିଵି ଚାପ୍ସରସାମିଵ ॥ 10 ॥
ଶୁଶ୍ରାଵ କାଂଚୀନିନଦଂ ନୂପୁରାଣାଂ ଚ, ନିଃସ୍ଵନମ୍ ।
ସୋପାନନିନଦାଂଶ୍ଚୈଵ ଭଵନେଷୁ ମହାତ୍ମନାମ୍ ॥ 11 ॥
ଅସ୍ଫୋଟିତନିନାଦାଂଶ୍ଚ କ୍ଷ୍ଵେଲିତାଂଶ୍ଚ ତତସ୍ତତଃ ।
ଶୁଶ୍ରାଵ ଜପତାଂ ତତ୍ର ମଂତ୍ରାନ୍ ରକ୍ଷୋଗୃହେଷୁ ଵୈ ॥ 12 ॥
ସ୍ଵାଧ୍ୟାୟନିରତାଂଶ୍ଚୈଵ ୟାତୁଧାନାନ୍ ଦଦର୍ଶ ସଃ ।
ରାଵଣସ୍ତଵସଂୟୁକ୍ତାନ୍ ଗର୍ଜତୋ ରାକ୍ଷସାନପି ॥ 13 ॥
ରାଜମାର୍ଗଂ ସମାଵୃତ୍ୟ ସ୍ଥିତଂ ରକ୍ଷୋବଲଂ ମହତ୍ ।
ଦଦର୍ଶ ମଧ୍ୟମେ ଗୁଲ୍ମେ ରାଵଣସ୍ୟ ଚରାନ୍ ବହୂନ୍ ॥ 14 ॥
ଦୀକ୍ଷିତାନ୍ ଜଟିଲାନ୍ ମୁଂଡାନ୍ ଗୋଜିନାଂବରଵାସସଃ ।
ଦର୍ଭମୁଷ୍ଟିପ୍ରହରଣାନଗ୍ନିକୁଂଡାୟୁଘାଂସ୍ତଥା ॥ 15 ॥
କୂଟମୁଦ୍ଗରପାଣୀଂଶ୍ଚ ଦଂଡାୟୁଧଧରାନପି ।
ଏକାକ୍ଷାନେକକର୍ଣାଂଶ୍ଚ ଲଂବୋଦରପୟୋଧରାନ୍ ॥ 16 ॥
କରାଲାନ୍ ଭୁଗ୍ନଵକ୍ତ୍ରାଂଶ୍ଚ ଵିକଟାନ୍ ଵାମନାଂସ୍ତଥା ।
ଧନ୍ଵିନଃ ଖଂଗିନଶ୍ଚୈଵ ଶତଘ୍ନୀମୁସଲାୟୁଧାନ୍ ॥ 17 ॥
ପରିଘୋତ୍ତମହସ୍ତାଂଶ୍ଚ ଵିଚିତ୍ରକଵଚୋଜ୍ଜ୍ଵଲାନ୍ ।
ନାତିସ୍ଥୂଲାନ୍ନାତିକୃଶାନ୍ନାତିଦୀର୍ଘାତିହ୍ରସ୍ଵକାନ୍ ॥ 18 ॥
ନାତିଗୌରାନ୍ନାତିକୃଷ୍ଣାନ୍ନାତିକୁବ୍ଜାନ୍ନ ଵାମନାନ୍ ।
ଵିରୂପାନ୍ ବହୁରୂପାଂଶ୍ଚ ସୁରୂପାଂଶ୍ଚ ସୁଵର୍ଚସଃ ॥ 19 ॥
ଧ୍ଵଜୀନ୍ ପତାକିନଶ୍ଚୈଵ ଦଦର୍ଶ ଵିଵିଧାୟୁଧାନ୍ ।
ଶକ୍ତିଵୃକ୍ଷାୟୁଧାଂଶ୍ଚୈଵ ପଟ୍ଟିସାଶନିଧାରିଣଃ ॥ 20 ॥
କ୍ଷେପଣୀପାଶହସ୍ତାଂଶ୍ଚ ଦଦର୍ଶ ସ ମହାକପିଃ ।
ସ୍ରଗ୍ଵିଣସ୍ତ୍ଵନୁଲିପ୍ତାଂଶ୍ଚ ଵରାଭରଣଭୂଷିତାନ୍ ॥ 21 ॥
ନାନାଵେଷସମାୟୁକ୍ତାନ୍ ୟଥାସ୍ସ୍ଵୈରଗତାନ୍ ବହୂନ୍ ।
ତୀକ୍ଷ୍ଣଶୂଲଧରାଂଶ୍ଚୈଵ ଵଜ୍ରିଣଶ୍ଚ ମହାବଲାନ୍ ॥ 22 ॥
ଶତସାହସ୍ରମଵ୍ୟଗ୍ରମାରକ୍ଷଂ ମଧ୍ୟମଂ କପିଃ ।
ରକ୍ଷୋଧିପତିନିର୍ଦିଷ୍ଟଂ ଦଦର୍ଶାଂତଃପୁରାଗ୍ରତଃ ॥ 23 ॥
ସ ତଦା ତଦ୍ଗୃହଂ ଦୃଷ୍ଟ୍ଵା ମହାହାଟକତୋରଣମ୍ ।
ରାକ୍ଷସେଂଦ୍ରସ୍ୟ ଵିଖ୍ୟାତମଦ୍ରିମୂର୍ଧ୍ନି ପ୍ରତିଷ୍ଠିତମ୍ ॥ 24 ॥
ପୁଂଡରୀକାଵତଂସାଭିଃ ପରିଖାଭିରଲଂକୃତମ୍ ।
ପ୍ରାକାରାଵୃତମତ୍ୟଂତଂ ଦଦର୍ଶ ସ ମହାକପିଃ ॥ 25 ॥
ତ୍ରିଵିଷ୍ଟପନିଭଂ ଦିଵ୍ୟଂ ଦିଵ୍ୟନାଦନିନାଦିତମ୍ ।
ଵାଜିହେଷିତସଂଘୁଷ୍ଟଂ ନାଦିତଂ ଭୂଷଣୈସ୍ତଥା ॥ 26 ॥
ରଥୈର୍ୟାନୈର୍ଵିମାନୈଶ୍ଚ ତଥା ହୟଗଜୈଃ ଶୁଭୈଃ ।
ଵାରଣୈଶ୍ଚ ଚତୁର୍ଥଂତୈଃ ଶ୍ଵେତାଭ୍ରନିଚୟୋପମୈଃ ॥ 27 ॥
ଭୂଷିତଂ ରୁଚିରଦ୍ଵାରଂ ମତ୍ତୈଶ୍ଚ ମୃଗପକ୍ଷିଭିଃ ।
ରକ୍ଷିତଂ ସୁମହାଵୀର୍ୟୈର୍ୟାତୁଧାନୈଃ ସହସ୍ରଶଃ ।
ରାକ୍ଷସାଧିପତେର୍ଗୁପ୍ତମାଵିଵେଶ ମହାକପିଃ ॥ 28 ॥
ସହେମଜାଂବୂନଦଚକ୍ରଵାଲଂ ମହାର୍ହମୁକ୍ତାମଣିଭୂଷିତାଂତମ୍ ।
ପରାର୍ଥ୍ୟକାଲାଗୁରୁଚଂଦନାକ୍ତଂ ସ ରାଵଣାଂତଃପୁରମାଵିଵେଶ ॥ 29 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ସୁଂଦରକାଂଡେ ଚତୁର୍ଥସ୍ସର୍ଗଃ ॥
