ശ്രീമദ്വാല്മീകീയ രാമായണേ സുംദരകാംഡമ് ।
അഥ ചതുര്ഥസ്സര്ഗഃ ।
സ നിര്ജിത്യ പുരീം ശ്രേഷ്ഠാം ലംകാം താം കാമരൂപിണീമ് ।
വിക്രമേണ മഹാതേജാ ഹനുമാന് കപിസത്തമഃ ॥ 1 ॥
അദ്വാരേണ ച മഹാബാഹുഃ പ്രാകാരമഭിപുപ്ലുവേ ।
പ്രവിശ്യ നഗരീം ലംകാം കപിരാജഹിതംകരഃ ॥ 2 ॥
ചക്രേഽഥ പാദം സവ്യം ച ശത്രൂണാം സ തു മൂര്ധനി ।
പ്രവിഷ്ടഃ സത്ത്വസംപന്നോ നിശായാം മാരുതാത്മജഃ ॥ 3 ॥
സ മഹാപഥമാസ്ഥായ മുക്താപുഷ്പവിരാജിതമ് ।
തതസ്തു താം പുരീം ലംകാം രമ്യാമഭിയയൌ കപിഃ ॥ 4 ॥
ഹസിതോത്കൃഷ്ടനിനദൈസ്തൂര്യഘോഷപുരസ്സരൈഃ ।
വജ്രാംകുശനികാശൈശ്ച വജ്രജാലവിഭൂഷിതൈഃ ॥ 5 ॥
ഗൃഹമേഘൈഃ പുരീ രമ്യാ ബഭാസേ ദ്യൌരിവാംബുദൈഃ ।
പ്രജജ്വാല തതോ ലംകാ രക്ഷോഗണഗൃഹൈഃ ശുഭൈഃ ॥ 6 ॥
സിതാഭ്രസദൃശൈശ്ചിത്രൈഃ പദ്മസ്വസ്തികസംസ്ഥിതൈഃ ।
വര്ധമാനഗൃഹൈശ്ചാപി സർവതഃ സുവിഭൂഷിതാ ॥ 7 ॥
താം ചിത്രമാല്യാഭരണാം കപിരാജഹിതംകരഃ ।
രാഘവാര്ഥം ചരന് ശ്രീമാന് ദദര്ശ ച നനംദ ച ॥ 8 ॥
ഭവനാദ്ഭവനം ഗച്ഛന് ദദര്ശ പവനാത്മജഃ ।
വിവിധാകൃതിരൂപാണി ഭവനാനി തതസ്തതഃ ॥ 9 ॥
ശുശ്രാവ മധുരം ഗീതം ത്രിസ്ഥാനസ്വരഭൂഷിതമ് ।
സ്ത്രീണാം മദസമൃദ്ധാനാം ദിവി ചാപ്സരസാമിവ ॥ 10 ॥
ശുശ്രാവ കാംചീനിനദം നൂപുരാണാം ച, നിഃസ്വനമ് ।
സോപാനനിനദാംശ്ചൈവ ഭവനേഷു മഹാത്മനാമ് ॥ 11 ॥
അസ്ഫോടിതനിനാദാംശ്ച ക്ഷ്വേലിതാംശ്ച തതസ്തതഃ ।
ശുശ്രാവ ജപതാം തത്ര മംത്രാന് രക്ഷോഗൃഹേഷു വൈ ॥ 12 ॥
സ്വാധ്യായനിരതാംശ്ചൈവ യാതുധാനാന് ദദര്ശ സഃ ।
രാവണസ്തവസംയുക്താന് ഗര്ജതോ രാക്ഷസാനപി ॥ 13 ॥
രാജമാര്ഗം സമാവൃത്യ സ്ഥിതം രക്ഷോബലം മഹത് ।
ദദര്ശ മധ്യമേ ഗുല്മേ രാവണസ്യ ചരാന് ബഹൂന് ॥ 14 ॥
ദീക്ഷിതാന് ജടിലാന് മുംഡാന് ഗോജിനാംബരവാസസഃ ।
ദര്ഭമുഷ്ടിപ്രഹരണാനഗ്നികുംഡായുഘാംസ്തഥാ ॥ 15 ॥
കൂടമുദ്ഗരപാണീംശ്ച ദംഡായുധധരാനപി ।
ഏകാക്ഷാനേകകര്ണാംശ്ച ലംബോദരപയോധരാന് ॥ 16 ॥
കരാലാന് ഭുഗ്നവക്ത്രാംശ്ച വികടാന് വാമനാംസ്തഥാ ।
ധന്വിനഃ ഖംഗിനശ്ചൈവ ശതഘ്നീമുസലായുധാന് ॥ 17 ॥
പരിഘോത്തമഹസ്താംശ്ച വിചിത്രകവചോജ്ജ്വലാന് ।
നാതിസ്ഥൂലാന്നാതികൃശാന്നാതിദീര്ഘാതിഹ്രസ്വകാന് ॥ 18 ॥
നാതിഗൌരാന്നാതികൃഷ്ണാന്നാതികുബ്ജാന്ന വാമനാന് ।
വിരൂപാന് ബഹുരൂപാംശ്ച സുരൂപാംശ്ച സുവര്ചസഃ ॥ 19 ॥
ധ്വജീന് പതാകിനശ്ചൈവ ദദര്ശ വിവിധായുധാന് ।
ശക്തിവൃക്ഷായുധാംശ്ചൈവ പട്ടിസാശനിധാരിണഃ ॥ 20 ॥
ക്ഷേപണീപാശഹസ്താംശ്ച ദദര്ശ സ മഹാകപിഃ ।
സ്രഗ്വിണസ്ത്വനുലിപ്താംശ്ച വരാഭരണഭൂഷിതാന് ॥ 21 ॥
നാനാവേഷസമായുക്താന് യഥാസ്സ്വൈരഗതാന് ബഹൂന് ।
തീക്ഷ്ണശൂലധരാംശ്ചൈവ വജ്രിണശ്ച മഹാബലാന് ॥ 22 ॥
ശതസാഹസ്രമവ്യഗ്രമാരക്ഷം മധ്യമം കപിഃ ।
രക്ഷോധിപതിനിര്ദിഷ്ടം ദദര്ശാംതഃപുരാഗ്രതഃ ॥ 23 ॥
സ തദാ തദ്ഗൃഹം ദൃഷ്ട്വാ മഹാഹാടകതോരണമ് ।
രാക്ഷസേംദ്രസ്യ വിഖ്യാതമദ്രിമൂര്ധ്നി പ്രതിഷ്ഠിതമ് ॥ 24 ॥
പുംഡരീകാവതംസാഭിഃ പരിഖാഭിരലംകൃതമ് ।
പ്രാകാരാവൃതമത്യംതം ദദര്ശ സ മഹാകപിഃ ॥ 25 ॥
ത്രിവിഷ്ടപനിഭം ദിവ്യം ദിവ്യനാദനിനാദിതമ് ।
വാജിഹേഷിതസംഘുഷ്ടം നാദിതം ഭൂഷണൈസ്തഥാ ॥ 26 ॥
രഥൈര്യാനൈർവിമാനൈശ്ച തഥാ ഹയഗജൈഃ ശുഭൈഃ ।
വാരണൈശ്ച ചതുര്ഥംതൈഃ ശ്വേതാഭ്രനിചയോപമൈഃ ॥ 27 ॥
ഭൂഷിതം രുചിരദ്വാരം മത്തൈശ്ച മൃഗപക്ഷിഭിഃ ।
രക്ഷിതം സുമഹാവീര്യൈര്യാതുധാനൈഃ സഹസ്രശഃ ।
രാക്ഷസാധിപതേര്ഗുപ്തമാവിവേശ മഹാകപിഃ ॥ 28 ॥
സഹേമജാംബൂനദചക്രവാലം മഹാര്ഹമുക്താമണിഭൂഷിതാംതമ് ।
പരാര്ഥ്യകാലാഗുരുചംദനാക്തം സ രാവണാംതഃപുരമാവിവേശ ॥ 29 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുംദരകാംഡേ ചതുര്ഥസ്സര്ഗഃ ॥
