ශ්රීමද්වාල්මීකීය රාමායණේ සුංදරකාංඩම් ।
අථ චත්වාරිංශස්සර්ගඃ ।
ශ්රුත්වා තු වචනං තස්ය වායුසූනෝර්මහාත්මනඃ ।
උවාචාත්මහිතං වාක්යං සීතා සුරසුතෝපමා ॥ 1 ॥
ත්වාං දෘෂ්ට්වා ප්රියවක්තාරං සංප්රහෘෂ්යාමි වානරඃ ।
අර්ධසංජාතසස්යේව වෘෂ්ටිං ප්රාප්ය වසුංධරා ॥ 2 ॥
යථා තං පුරුෂව්යාඝ්රං ගාත්රෛශ්ශෝකාභිකර්ශිතෛඃ ।
සංස්පෘශේයං සකාමාහං තථා කුරු දයාං මයි ॥ 3 ॥
අභිජ්ඤානං ච රාමස්ය දද්යා හරිගණෝත්තම ।
ක්ෂිප්තාමිෂීකාං කාකස්ය කෝපාදේකාක්ෂිශාතනීම් ॥ 4 ॥
මනශ්ශිලායාස්තිලකෝ ගංඩපාර්ශ්වේ නිවේශිතඃ ।
ත්වයා ප්රණෂ්ටේ තිලකේ තං කිල ස්මර්තුමර්හසි ॥ 5 ॥
ස වීර්යවාන්කථං සීතාං හෘතාං සමනුමන්යසේ ।
වසංතීං රක්ෂසාං මධ්යේ මහේංද්රවරුණෝපමඃ ॥ 6 ॥
ඒෂ චූඩාමණිර්දිව්යෝ මයා සුපරිරක්ෂිතඃ ।
ඒතං දෘෂ්ට්වා ප්රහෘෂ්යාමි ව්යසනේ ත්වාමිවානඝ ॥ 7 ॥
ඒෂ නිර්යාතිතශ්ශ්රීමාන්මයා තේ වාරිසංභවඃ ।
අතඃ පරං න ශක්ෂ්යාමි ජීවිතුං ශෝකලාලසා ॥ 8 ॥
අසහ්යානි ච දුඃඛානි වාචශ්ච හෘදයච්ඡිදඃ ।
රාක්ෂසීනාං සුඝෝරාණාං ත්වත්කෘතේ මර්ෂයාම්යහම් ॥ 9 ॥
ධාරයිෂ්යාමි මාසං තු ජීවිතං ශත්රුසූදන ।
ඌර්ධ්වං මාසාන්න ජීවිෂ්යේ ත්වයා හීනා නෘපාත්මජ ॥ 10 ॥
ඝෝරෝ රාක්ෂසරාජෝऽයං දෘෂ්ටිශ්ච න සුඛා මයි ।
ත්වාං ච ශ්රුත්වා විපද්යංතං න ජීවේයමහං ක්ෂණම් ॥ 11 ॥
වෛදේහ්යා වචනං ශ්රුත්වා කරුණං සාශ්රු භාෂිතම් ।
අථාබ්රවීන්මහාතේජා හනුමාන්මාරුතාත්මජඃ ॥ 12 ॥
ත්වච්ඡෝකවිමුඛෝ රාමෝ දේවි සත්යේන තේ ශපේ ।
රාමේ දුඃඛාභිභූතේ තු ලක්ෂ්මණඃ පරිතප්යතේ ॥ 13 ॥
කථංචිද්භවතී දෘෂ්ටා න කාලඃ පරිශෝචිතුම් ।
ඉමං මුහූර්තං දුඃඛානාමංතං ද්රක්ෂ්යසි භාමිනි ॥ 14 ॥
තාවුභෞ පුරුෂව්යාඝ්රෞ රාජපුත්රාවරිංදමෞ ।
ත්වද්දර්ශනකෘතෝත්සාහෞ ලංකාං භස්මීකරිෂ්යතඃ ॥ 15 ॥
හත්ත්වා ච සමරේ ක්රූරං රාවණං සහබාංධවම් ।
රාඝවෞ ත්වාං විශාලාක්ෂි ස්වාං පුරීං ප්රාපයිෂ්යතඃ ॥ 16 ॥
යත්තු රාමෝ විජානීයාදභිජ්ඤානමනිංදිතේ ।
ප්රීතිසංජනනං තස්ය භූයස්ත්වං දාතුමර්හසි ॥ 17 ॥
සාබ්රවීද්දත්තමේවේති මයාභිජ්ඤානමුත්තමම් ।
ඒතදේව හි රාමස්ය දෘෂ්ට්වා මත්කේශභූෂණම් ॥ 18 ॥
ශ්රද්ධේයං හනුමන්වාක්යං තව වීර භවිෂ්යති ।
ස තං මණිවරං ගෘහ්ය ශ්රීමාන්ප්ලවගසත්තමඃ ॥ 19 ॥
ප්රණම්ය ශිරසා දේවීං ගමනායෝපචක්රමේ ।
තමුත්පාතකෘතෝත්සාහමවේක්ෂ්ය හරිපුංගවම් ॥ 20 ॥
වර්ධමානං මහාවේගමුවාච ජනකාත්මජා ।
අශ්රුපූර්ණමුඛී දීනා බාෂ්පගද්ගදයා ගිරා ॥ 21 ॥
හනුමන්සිංහසංකාශෞ භ්රාතරෞ රාමලක්ෂ්මණෞ ।
සුග්රීවං ච සහාමාත්යං සර්වාන් බ්රූයාහ්යනාමයම් ॥ 22 ॥
යථා ච ස මහාබාහුර්මාං තාරයති රාඝවඃ ।
අස්මාද්දුඃඛාංබුසම්රෝධාත්ත්වං සමාධාතුමර්හසි ॥ 23 ॥
ඉමං ච තීව්රං මම ශෝකවේගං රක්ෂෝභිරේභිඃ පරිභර්ත්සනං ච ।
බ්රූයාස්තු රාමස්ය ගතස්සමීපං ශිවශ්ච තේऽධ්වාऽස්තු හරිප්රවීර ॥ 24 ॥
ස රාජපුත්ර්ය්රාප්රතිවේදිතාර්ථඃ කපිඃ කෘතාර්ථඃ පරිහෘෂ්ටචේතාඃ ।
අල්පාවශේෂං ප්රසමීක්ෂ්ය කාර්යං දිශං හ්යුදීචීං මනසා ජගාම ॥ 25 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ චත්වාරිංශස්සර්ගඃ ॥
