ശ്രീമദ്വാല്മീകീയ രാമായണേ സുംദരകാംഡമ് ।
അഥ ചത്വാരിംശസ്സര്ഗഃ ।
ശ്രുത്വാ തു വചനം തസ്യ വായുസൂനോര്മഹാത്മനഃ ।
ഉവാചാത്മഹിതം വാക്യം സീതാ സുരസുതോപമാ ॥ 1 ॥
ത്വാം ദൃഷ്ട്വാ പ്രിയവക്താരം സംപ്രഹൃഷ്യാമി വാനരഃ ।
അര്ധസംജാതസസ്യേവ വൃഷ്ടിം പ്രാപ്യ വസുംധരാ ॥ 2 ॥
യഥാ തം പുരുഷവ്യാഘ്രം ഗാത്രൈശ്ശോകാഭികര്ശിതൈഃ ।
സംസ്പൃശേയം സകാമാഹം തഥാ കുരു ദയാം മയി ॥ 3 ॥
അഭിജ്ഞാനം ച രാമസ്യ ദദ്യാ ഹരിഗണോത്തമ ।
ക്ഷിപ്താമിഷീകാം കാകസ്യ കോപാദേകാക്ഷിശാതനീമ് ॥ 4 ॥
മനശ്ശിലായാസ്തിലകോ ഗംഡപാര്ശ്വേ നിവേശിതഃ ।
ത്വയാ പ്രണഷ്ടേ തിലകേ തം കില സ്മര്തുമര്ഹസി ॥ 5 ॥
സ വീര്യവാന്കഥം സീതാം ഹൃതാം സമനുമന്യസേ ।
വസംതീം രക്ഷസാം മധ്യേ മഹേംദ്രവരുണോപമഃ ॥ 6 ॥
ഏഷ ചൂഡാമണിര്ദിവ്യോ മയാ സുപരിരക്ഷിതഃ ।
ഏതം ദൃഷ്ട്വാ പ്രഹൃഷ്യാമി വ്യസനേ ത്വാമിവാനഘ ॥ 7 ॥
ഏഷ നിര്യാതിതശ്ശ്രീമാന്മയാ തേ വാരിസംഭവഃ ।
അതഃ പരം ന ശക്ഷ്യാമി ജീവിതും ശോകലാലസാ ॥ 8 ॥
അസഹ്യാനി ച ദുഃഖാനി വാചശ്ച ഹൃദയച്ഛിദഃ ।
രാക്ഷസീനാം സുഘോരാണാം ത്വത്കൃതേ മര്ഷയാമ്യഹമ് ॥ 9 ॥
ധാരയിഷ്യാമി മാസം തു ജീവിതം ശത്രുസൂദന ।
ഊര്ധ്വം മാസാന്ന ജീവിഷ്യേ ത്വയാ ഹീനാ നൃപാത്മജ ॥ 10 ॥
ഘോരോ രാക്ഷസരാജോഽയം ദൃഷ്ടിശ്ച ന സുഖാ മയി ।
ത്വാം ച ശ്രുത്വാ വിപദ്യംതം ന ജീവേയമഹം ക്ഷണമ് ॥ 11 ॥
വൈദേഹ്യാ വചനം ശ്രുത്വാ കരുണം സാശ്രു ഭാഷിതമ് ।
അഥാബ്രവീന്മഹാതേജാ ഹനുമാന്മാരുതാത്മജഃ ॥ 12 ॥
ത്വച്ഛോകവിമുഖോ രാമോ ദേവി സത്യേന തേ ശപേ ।
രാമേ ദുഃഖാഭിഭൂതേ തു ലക്ഷ്മണഃ പരിതപ്യതേ ॥ 13 ॥
കഥംചിദ്ഭവതീ ദൃഷ്ടാ ന കാലഃ പരിശോചിതുമ് ।
ഇമം മുഹൂര്തം ദുഃഖാനാമംതം ദ്രക്ഷ്യസി ഭാമിനി ॥ 14 ॥
താവുഭൌ പുരുഷവ്യാഘ്രൌ രാജപുത്രാവരിംദമൌ ।
ത്വദ്ദര്ശനകൃതോത്സാഹൌ ലംകാം ഭസ്മീകരിഷ്യതഃ ॥ 15 ॥
ഹത്ത്വാ ച സമരേ ക്രൂരം രാവണം സഹബാംധവമ് ।
രാഘവൌ ത്വാം വിശാലാക്ഷി സ്വാം പുരീം പ്രാപയിഷ്യതഃ ॥ 16 ॥
യത്തു രാമോ വിജാനീയാദഭിജ്ഞാനമനിംദിതേ ।
പ്രീതിസംജനനം തസ്യ ഭൂയസ്ത്വം ദാതുമര്ഹസി ॥ 17 ॥
സാബ്രവീദ്ദത്തമേവേതി മയാഭിജ്ഞാനമുത്തമമ് ।
ഏതദേവ ഹി രാമസ്യ ദൃഷ്ട്വാ മത്കേശഭൂഷണമ് ॥ 18 ॥
ശ്രദ്ധേയം ഹനുമന്വാക്യം തവ വീര ഭവിഷ്യതി ।
സ തം മണിവരം ഗൃഹ്യ ശ്രീമാന്പ്ലവഗസത്തമഃ ॥ 19 ॥
പ്രണമ്യ ശിരസാ ദേവീം ഗമനായോപചക്രമേ ।
തമുത്പാതകൃതോത്സാഹമവേക്ഷ്യ ഹരിപുംഗവമ് ॥ 20 ॥
വര്ധമാനം മഹാവേഗമുവാച ജനകാത്മജാ ।
അശ്രുപൂര്ണമുഖീ ദീനാ ബാഷ്പഗദ്ഗദയാ ഗിരാ ॥ 21 ॥
ഹനുമന്സിംഹസംകാശൌ ഭ്രാതരൌ രാമലക്ഷ്മണൌ ।
സുഗ്രീവം ച സഹാമാത്യം സർവാന് ബ്രൂയാഹ്യനാമയമ് ॥ 22 ॥
യഥാ ച സ മഹാബാഹുര്മാം താരയതി രാഘവഃ ।
അസ്മാദ്ദുഃഖാംബുസമ്രോധാത്ത്വം സമാധാതുമര്ഹസി ॥ 23 ॥
ഇമം ച തീവ്രം മമ ശോകവേഗം രക്ഷോഭിരേഭിഃ പരിഭര്ത്സനം ച ।
ബ്രൂയാസ്തു രാമസ്യ ഗതസ്സമീപം ശിവശ്ച തേഽധ്വാഽസ്തു ഹരിപ്രവീര ॥ 24 ॥
സ രാജപുത്ര്യ്രാപ്രതിവേദിതാര്ഥഃ കപിഃ കൃതാര്ഥഃ പരിഹൃഷ്ടചേതാഃ ।
അല്പാവശേഷം പ്രസമീക്ഷ്യ കാര്യം ദിശം ഹ്യുദീചീം മനസാ ജഗാമ ॥ 25 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുംദരകാംഡേ ചത്വാരിംശസ്സര്ഗഃ ॥
