śrīmadvālmīkīya rāmāyaṇē sundarakāṇḍam ।
atha chatvāriṃśassargaḥ ।
śrutvā tu vachanaṃ tasya vāyusūnōrmahātmanaḥ ।
uvāchātmahitaṃ vākyaṃ sītā surasutōpamā ॥ 1 ॥
tvāṃ dṛṣṭvā priyavaktāraṃ samprahṛṣyāmi vānaraḥ ।
ardhasañjātasasyēva vṛṣṭiṃ prāpya vasundharā ॥ 2 ॥
yathā taṃ puruṣavyāghraṃ gātraiśśōkābhikarśitaiḥ ।
saṃspṛśēyaṃ sakāmāhaṃ tathā kuru dayāṃ mayi ॥ 3 ॥
abhijñānaṃ cha rāmasya dadyā harigaṇōttama ।
kṣiptāmiṣīkāṃ kākasya kōpādēkākṣiśātanīm ॥ 4 ॥
manaśśilāyāstilakō gaṇḍapārśvē nivēśitaḥ ।
tvayā praṇaṣṭē tilakē taṃ kila smartumarhasi ॥ 5 ॥
sa vīryavānkathaṃ sītāṃ hṛtāṃ samanumanyasē ।
vasantīṃ rakṣasāṃ madhyē mahēndravaruṇōpamaḥ ॥ 6 ॥
ēṣa chūḍāmaṇirdivyō mayā suparirakṣitaḥ ।
ētaṃ dṛṣṭvā prahṛṣyāmi vyasanē tvāmivānagha ॥ 7 ॥
ēṣa niryātitaśśrīmānmayā tē vārisambhavaḥ ।
ataḥ paraṃ na śakṣyāmi jīvituṃ śōkalālasā ॥ 8 ॥
asahyāni cha duḥkhāni vāchaścha hṛdayachChidaḥ ।
rākṣasīnāṃ sughōrāṇāṃ tvatkṛtē marṣayāmyaham ॥ 9 ॥
dhārayiṣyāmi māsaṃ tu jīvitaṃ śatrusūdana ।
ūrdhvaṃ māsānna jīviṣyē tvayā hīnā nṛpātmaja ॥ 10 ॥
ghōrō rākṣasarājō'yaṃ dṛṣṭiścha na sukhā mayi ।
tvāṃ cha śrutvā vipadyantaṃ na jīvēyamahaṃ kṣaṇam ॥ 11 ॥
vaidēhyā vachanaṃ śrutvā karuṇaṃ sāśru bhāṣitam ।
athābravīnmahātējā hanumānmārutātmajaḥ ॥ 12 ॥
tvachChōkavimukhō rāmō dēvi satyēna tē śapē ।
rāmē duḥkhābhibhūtē tu lakṣmaṇaḥ paritapyatē ॥ 13 ॥
kathañchidbhavatī dṛṣṭā na kālaḥ pariśōchitum ।
imaṃ muhūrtaṃ duḥkhānāmantaṃ drakṣyasi bhāmini ॥ 14 ॥
tāvubhau puruṣavyāghrau rājaputrāvarindamau ।
tvaddarśanakṛtōtsāhau laṅkāṃ bhasmīkariṣyataḥ ॥ 15 ॥
hattvā cha samarē krūraṃ rāvaṇaṃ sahabāndhavam ।
rāghavau tvāṃ viśālākṣi svāṃ purīṃ prāpayiṣyataḥ ॥ 16 ॥
yattu rāmō vijānīyādabhijñānamaninditē ।
prītisañjananaṃ tasya bhūyastvaṃ dātumarhasi ॥ 17 ॥
sābravīddattamēvēti mayābhijñānamuttamam ।
ētadēva hi rāmasya dṛṣṭvā matkēśabhūṣaṇam ॥ 18 ॥
śraddhēyaṃ hanumanvākyaṃ tava vīra bhaviṣyati ।
sa taṃ maṇivaraṃ gṛhya śrīmānplavagasattamaḥ ॥ 19 ॥
praṇamya śirasā dēvīṃ gamanāyōpachakramē ।
tamutpātakṛtōtsāhamavēkṣya haripuṅgavam ॥ 20 ॥
vardhamānaṃ mahāvēgamuvācha janakātmajā ।
aśrupūrṇamukhī dīnā bāṣpagadgadayā girā ॥ 21 ॥
hanumansiṃhasaṅkāśau bhrātarau rāmalakṣmaṇau ।
sugrīvaṃ cha sahāmātyaṃ sarvān brūyāhyanāmayam ॥ 22 ॥
yathā cha sa mahābāhurmāṃ tārayati rāghavaḥ ।
asmādduḥkhāmbusamrōdhāttvaṃ samādhātumarhasi ॥ 23 ॥
imaṃ cha tīvraṃ mama śōkavēgaṃ rakṣōbhirēbhiḥ paribhartsanaṃ cha ।
brūyāstu rāmasya gatassamīpaṃ śivaścha tē'dhvā'stu haripravīra ॥ 24 ॥
sa rājaputryrāprativēditārthaḥ kapiḥ kṛtārthaḥ parihṛṣṭachētāḥ ।
alpāvaśēṣaṃ prasamīkṣya kāryaṃ diśaṃ hyudīchīṃ manasā jagāma ॥ 25 ॥
ityārṣē śrīmadrāmāyaṇē vālmīkīya ādikāvyē sundarakāṇḍē chatvāriṃśassargaḥ ॥
