શ્રીમદ્વાલ્મીકીય રામાયણે સુંદરકાંડમ્ ।
અથ ચત્વારિંશસ્સર્ગઃ ।
શ્રુત્વા તુ વચનં તસ્ય વાયુસૂનોર્મહાત્મનઃ ।
ઉવાચાત્મહિતં વાક્યં સીતા સુરસુતોપમા ॥ 1 ॥
ત્વાં દૃષ્ટ્વા પ્રિયવક્તારં સંપ્રહૃષ્યામિ વાનરઃ ।
અર્ધસંજાતસસ્યેવ વૃષ્ટિં પ્રાપ્ય વસુંધરા ॥ 2 ॥
યથા તં પુરુષવ્યાઘ્રં ગાત્રૈશ્શોકાભિકર્શિતૈઃ ।
સંસ્પૃશેયં સકામાહં તથા કુરુ દયાં મયિ ॥ 3 ॥
અભિજ્ઞાનં ચ રામસ્ય દદ્યા હરિગણોત્તમ ।
ક્ષિપ્તામિષીકાં કાકસ્ય કોપાદેકાક્ષિશાતનીમ્ ॥ 4 ॥
મનશ્શિલાયાસ્તિલકો ગંડપાર્શ્વે નિવેશિતઃ ।
ત્વયા પ્રણષ્ટે તિલકે તં કિલ સ્મર્તુમર્હસિ ॥ 5 ॥
સ વીર્યવાન્કથં સીતાં હૃતાં સમનુમન્યસે ।
વસંતીં રક્ષસાં મધ્યે મહેંદ્રવરુણોપમઃ ॥ 6 ॥
એષ ચૂડામણિર્દિવ્યો મયા સુપરિરક્ષિતઃ ।
એતં દૃષ્ટ્વા પ્રહૃષ્યામિ વ્યસને ત્વામિવાનઘ ॥ 7 ॥
એષ નિર્યાતિતશ્શ્રીમાન્મયા તે વારિસંભવઃ ।
અતઃ પરં ન શક્ષ્યામિ જીવિતું શોકલાલસા ॥ 8 ॥
અસહ્યાનિ ચ દુઃખાનિ વાચશ્ચ હૃદયચ્છિદઃ ।
રાક્ષસીનાં સુઘોરાણાં ત્વત્કૃતે મર્ષયામ્યહમ્ ॥ 9 ॥
ધારયિષ્યામિ માસં તુ જીવિતં શત્રુસૂદન ।
ઊર્ધ્વં માસાન્ન જીવિષ્યે ત્વયા હીના નૃપાત્મજ ॥ 10 ॥
ઘોરો રાક્ષસરાજોઽયં દૃષ્ટિશ્ચ ન સુખા મયિ ।
ત્વાં ચ શ્રુત્વા વિપદ્યંતં ન જીવેયમહં ક્ષણમ્ ॥ 11 ॥
વૈદેહ્યા વચનં શ્રુત્વા કરુણં સાશ્રુ ભાષિતમ્ ।
અથાબ્રવીન્મહાતેજા હનુમાન્મારુતાત્મજઃ ॥ 12 ॥
ત્વચ્છોકવિમુખો રામો દેવિ સત્યેન તે શપે ।
રામે દુઃખાભિભૂતે તુ લક્ષ્મણઃ પરિતપ્યતે ॥ 13 ॥
કથંચિદ્ભવતી દૃષ્ટા ન કાલઃ પરિશોચિતુમ્ ।
ઇમં મુહૂર્તં દુઃખાનામંતં દ્રક્ષ્યસિ ભામિનિ ॥ 14 ॥
તાવુભૌ પુરુષવ્યાઘ્રૌ રાજપુત્રાવરિંદમૌ ।
ત્વદ્દર્શનકૃતોત્સાહૌ લંકાં ભસ્મીકરિષ્યતઃ ॥ 15 ॥
હત્ત્વા ચ સમરે ક્રૂરં રાવણં સહબાંધવમ્ ।
રાઘવૌ ત્વાં વિશાલાક્ષિ સ્વાં પુરીં પ્રાપયિષ્યતઃ ॥ 16 ॥
યત્તુ રામો વિજાનીયાદભિજ્ઞાનમનિંદિતે ।
પ્રીતિસંજનનં તસ્ય ભૂયસ્ત્વં દાતુમર્હસિ ॥ 17 ॥
સાબ્રવીદ્દત્તમેવેતિ મયાભિજ્ઞાનમુત્તમમ્ ।
એતદેવ હિ રામસ્ય દૃષ્ટ્વા મત્કેશભૂષણમ્ ॥ 18 ॥
શ્રદ્ધેયં હનુમન્વાક્યં તવ વીર ભવિષ્યતિ ।
સ તં મણિવરં ગૃહ્ય શ્રીમાન્પ્લવગસત્તમઃ ॥ 19 ॥
પ્રણમ્ય શિરસા દેવીં ગમનાયોપચક્રમે ।
તમુત્પાતકૃતોત્સાહમવેક્ષ્ય હરિપુંગવમ્ ॥ 20 ॥
વર્ધમાનં મહાવેગમુવાચ જનકાત્મજા ।
અશ્રુપૂર્ણમુખી દીના બાષ્પગદ્ગદયા ગિરા ॥ 21 ॥
હનુમન્સિંહસંકાશૌ ભ્રાતરૌ રામલક્ષ્મણૌ ।
સુગ્રીવં ચ સહામાત્યં સર્વાન્ બ્રૂયાહ્યનામયમ્ ॥ 22 ॥
યથા ચ સ મહાબાહુર્માં તારયતિ રાઘવઃ ।
અસ્માદ્દુઃખાંબુસમ્રોધાત્ત્વં સમાધાતુમર્હસિ ॥ 23 ॥
ઇમં ચ તીવ્રં મમ શોકવેગં રક્ષોભિરેભિઃ પરિભર્ત્સનં ચ ।
બ્રૂયાસ્તુ રામસ્ય ગતસ્સમીપં શિવશ્ચ તેઽધ્વાઽસ્તુ હરિપ્રવીર ॥ 24 ॥
સ રાજપુત્ર્ય્રાપ્રતિવેદિતાર્થઃ કપિઃ કૃતાર્થઃ પરિહૃષ્ટચેતાઃ ।
અલ્પાવશેષં પ્રસમીક્ષ્ય કાર્યં દિશં હ્યુદીચીં મનસા જગામ ॥ 25 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે સુંદરકાંડે ચત્વારિંશસ્સર્ગઃ ॥
