শ্রীমদ্বাল্মীকীয় রামাযণে সুংদরকাংডম্ ।
অথ ষট্চত্বারিংশস্সর্গঃ ।
হতান্মংত্রিসুতান্ বুদ্ধ্বা বানরেণ মহাত্মনা ।
রাবণস্সংবৃতাকারশ্চকার মতিমুত্তমাম্ ॥ 1 ॥
স বিরূপাক্ষয়ূপাক্ষৌ দুর্ধরং চৈব রাক্ষসম্ ।
প্রঘসং ভাসকর্ণং চ পংচসেনাগ্রনাযকান্ ॥ 2 ॥
সংদিদেশ দশগ্রীবো বীরান্নযবিশারদান্ ।
হনুমদ্গ্রহণব্যগ্রান্বায়ুবেগসমান্য়ুধি ॥ 3 ॥
যাত সেনাগ্রগাস্সর্বে মহাবলপরিগ্রহাঃ ।
সবাজিরথমাতংগাস্স কপিশ্শাস্যতামিতি ॥ 4 ॥
যত্নৈশ্চ খলু ভাব্য়ং স্য়াত্তমাসাদ্য় বনালযম্ ।
কর্ম চাপি সমাধেয়ং দেশকালাবিরোধিনম্ ॥ 5 ॥
ন হ্যহং তং কপিং মন্য়ে কর্মণা প্রতিতর্কযন্ ।
সর্বথা তন্মহদ্ভূতং মহাবলপরিগ্রহম্ ॥ 6 ॥
ভবেদিংদ্রেণ বা সৃষ্টমস্মদর্থং তপোবলাত্ ।
সনাগযক্ষগংধর্বা দেবাসুরমহর্ষয়ঃ ॥ 7 ॥
যুষ্মাভিস্সহিতৈস্সর্বৈর্ময়া সহ বিনির্জিতাঃ ।
তৈরবশ্য়ং বিধাতব্য়ং ব্যলীকং কিংচিদেব নঃ ॥ 8 ॥
তদেব নাত্র সংদেহঃ প্রসহ্য় পরিগৃহ্যতাম্ ।
নাবমান্য়ো ভবদ্ভিশ্চ হরির্ধীরপরাক্রমঃ ॥ 9 ॥
দৃষ্টা হি হরয়ঃ পূর্বং ময়া বিপুলবিক্রমাঃ ।
বালী চ সহসুগ্রীবো জাংববাংশ্চ মহাবলঃ ॥ 10 ॥
নীলস্সেনাপতিশ্চৈব যে চান্য়ে দ্বিবিদাদয়ঃ ।
নৈবং তেষাং গতির্ভীমা ন তেজো ন পরাক্রমঃ ॥ 11 ॥
ন মতির্ন বলোত্সাহৌ ন রূপপরিকল্পনম্ ।
মহত্সত্ত্বমিদং জ্ঞেয়ং কপিরূপং ব্যবস্থিতম্ ॥ 12 ॥
প্রযত্নং মহদাস্থায় ক্রিযতামস্য় নিগ্রহঃ ।
কামং লোকাস্ত্রযস্সেংদ্রাস্সসুরাসুরমানবাঃ ॥ 13 ॥
ভবতামগ্রতঃ স্থাতুং ন পর্য়াপ্তা রণাজিরে ।
তথাপি তু নযজ্ঞেন জযমাকাংক্ষতা রণে ॥ 14 ॥
আত্মা রক্ষ্য়ঃ প্রযত্নেন যুদ্ধসিদ্ধির্হি চংচলা ।
তে স্বামিবচনং সর্বে প্রতিগৃহ্য় মহৌজসঃ ॥ 15 ॥
সমুত্পেতুর্মহাবেগা হুতাশসমতেজসঃ ।
রথৈর্মত্তৈশ্চ মাতংগৈর্বাজিভিশ্চ মহাজবৈঃ ॥ 16 ॥
শস্ত্রৈশ্চ বিবিধৈস্তীক্ষ্ণৈস্সর্বৈশ্চোপচিতা বলৈঃ ।
ততস্তং দদৃশুর্বীরা দীপ্যমানং মহাকপিম্ ॥ 17 ॥
রশ্মিমংতমিবোদ্য়ংতং স্বতেজোরশ্মিমালিনম্ ।
তোরণস্থং মহোত্সাহং মহাসত্ত্বং মহাবলম্ ॥ 18 ॥
মহামতিং মহাবেগং মহাকায়ং মহাবলম্ ।
তং সমীক্ষ্য়ৈব তে সর্বে দিক্ষু সর্বাস্ববস্থিতাঃ ॥ 19 ॥
তৈ স্তৈঃ প্রহরণৈর্ভীমৈরভিপেতুস্ততস্ততঃ ।
তস্য় পংচাযসাস্তীক্ষ্ণাশ্শিতাঃ পীতমুখাশ্শরাঃ ॥ 20 ॥
শিরস্য়ুত্পলপত্রাভা দুর্ধরেণ নিপাতিতাঃ ।
স তৈঃ পংচভিরাবিদ্ধশ্শরৈশ্শিরসি বানরঃ ॥ 21 ॥
উত্পপাত নদন্ ব্য়োম্নি দিশো দশ বিনাদযন্ ।
ততস্তু দুর্ধরো বীরস্সরথস্সজ্যকার্মুকঃ ॥ 22 ॥
কিরন্ শরশতৈস্তীক্ষ্ণৈরভিপেদে মহাবলঃ ।
স কপির্বারয়ামাস তং ব্য়োম্নি শরবর্ষিণম্ ॥ 23 ॥
বৃষ্টিমংতং পয়োদাংতে পয়োদমিব মারুতঃ ।
অর্ধ্যমানস্ততস্তেন দুর্ধরেণানিলাত্মজঃ ॥ 24 ॥
চকার কদনং ভূয়ো ব্যবর্ধত চ বেগবান্ ।
স দূরং সহসোত্পত্য় দুর্ধরস্য় রথে হরিঃ ॥ 25 ॥
নিপপাত মহাবেগো বিদ্য়ুদ্রাশির্গিরাবিব ।
ততস্স মথিতাষ্টাশ্বং রথং ভগ্নাক্ষকূবরম্ ॥ 26 ॥
বিহায় ন্যপতদ্ভূমৌ দুর্ধরস্ত্যক্তজীবিতঃ ।
তং বিরূপাক্ষয়ূপাক্ষৌ দৃষ্ট্বা নিপতিতং ভুবি ॥ 27 ॥
সংজাতরোষৌ দুর্ধর্ষাবুত্পেতুররিংদমৌ ।
স তাভ্য়াং সহসোত্পত্য় বিষ্ঠিতো বিমলেঽংবরে ॥ 28 ॥
মুদ্গরাভ্য়াং মহাবাহুর্বক্ষস্যভিহতঃ কপিঃ ।
তয়োর্বেগবতোর্বেগং বিনিহত্য় মহাবলঃ ॥ 29 ॥
নিপপাত পুনর্ভূমৌ সুপর্ণসমবিক্রমঃ ।
স সালবৃক্ষমাসাদ্য় তমুত্পাট্য় চ বানরঃ ॥ 30 ॥
তাবুভৌ রাক্ষসৌ বীরৌ জঘান পবনাত্মজঃ ।
ততস্তাংস্ত্রীন্হতান্জ্ঞাত্বা বানরেণ তরস্বিনা ॥ 31 ॥
অভিপেদে মহাবেগঃ প্রসহ্য় প্রঘসো হরিম্ ।
ভাসকর্ণশ্চ সংকৃদ্ধশ্শূলমাদায় বীর্যবান্ ॥ 32 ॥
একতঃ কপিশার্দূলং যশস্বিনমবস্থিতম্ ।
পট্টিসেন শিতাগ্রেণ প্রঘসঃ প্রত্যয়োধযত্ ॥ 33 ॥
ভাসকর্ণশ্চ শূলেন রাক্ষসঃ কপিসত্তমম্ ।
স তাভ্য়াং বিক্ষতৈর্গাত্রৈরসৃগ্দিগ্ধতনূরুহঃ ॥ 34 ॥
অভবদ্বানরঃ ক্রুদ্ধো বালসূর্যসমপ্রভঃ ।
সমুত্পাট্য় গিরেশ্শৃংগং সমৃগব্য়ালপাদপম্ ॥ 35 ॥
জঘান হনুমান্ বীরো রাক্ষসৌ কপিকুংজরঃ ।
ততস্তেষ্ববসন্নেষু সেনাপতিষু পংচসু ॥ 36 ॥
বলং তদবশেষং চ নাশয়ামাস বানরঃ ।
অশ্বৈরশ্বান্ গজৈর্নাগান্ যোধৈর্য়োধান্ রথৈরথান্ ॥ 37 ॥
স কপির্নাশয়ামাস সহস্রাক্ষ ইবাসুরান্ ।
হতৈর্নাগৈশ্চ তুরগৈর্ভগ্নাক্ষৈশ্চ মহারথৈঃ ॥ 38 ॥
হতৈশ্চ রাক্ষসৈর্ভূমী রুদ্ধমার্গা সমংততঃ ।
ততঃ কপিস্তাংধ্বজিনীপতীন্ রণে নিহত্য় বীরান্সবলান্সবাহনান্ ।
সমীক্ষ্য় বীরঃ পরিগৃহ্য় তোরণং কৃতক্ষণঃ কাল ইব প্রজাক্ষয়ে ॥ 39 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে সুংদরকাংডে ষট্চত্বারিংশস্সর্গঃ ॥
