ශ්රීමද්වාල්මීකීය රාමායණේ සුංදරකාංඩම් ।
අථ ෂට්චත්වාරිංශස්සර්ගඃ ।
හතාන්මංත්රිසුතාන් බුද්ධ්වා වානරේණ මහාත්මනා ।
රාවණස්සංවෘතාකාරශ්චකාර මතිමුත්තමාම් ॥ 1 ॥
ස විරූපාක්ෂයූපාක්ෂෞ දුර්ධරං චෛව රාක්ෂසම් ।
ප්රඝසං භාසකර්ණං ච පංචසේනාග්රනායකාන් ॥ 2 ॥
සංදිදේශ දශග්රීවෝ වීරාන්නයවිශාරදාන් ।
හනුමද්ග්රහණව්යග්රාන්වායුවේගසමාන්යුධි ॥ 3 ॥
යාත සේනාග්රගාස්සර්වේ මහාබලපරිග්රහාඃ ।
සවාජිරථමාතංගාස්ස කපිශ්ශාස්යතාමිති ॥ 4 ॥
යත්නෛශ්ච ඛලු භාව්යං ස්යාත්තමාසාද්ය වනාලයම් ।
කර්ම චාපි සමාධේයං දේශකාලාවිරෝධිනම් ॥ 5 ॥
න හ්යහං තං කපිං මන්යේ කර්මණා ප්රතිතර්කයන් ।
සර්වථා තන්මහද්භූතං මහාබලපරිග්රහම් ॥ 6 ॥
භවේදිංද්රේණ වා සෘෂ්ටමස්මදර්ථං තපෝබලාත් ।
සනාගයක්ෂගංධර්වා දේවාසුරමහර්ෂයඃ ॥ 7 ॥
යුෂ්මාභිස්සහිතෛස්සර්වෛර්මයා සහ විනිර්ජිතාඃ ।
තෛරවශ්යං විධාතව්යං ව්යලීකං කිංචිදේව නඃ ॥ 8 ॥
තදේව නාත්ර සංදේහඃ ප්රසහ්ය පරිගෘහ්යතාම් ।
නාවමාන්යෝ භවද්භිශ්ච හරිර්ධීරපරාක්රමඃ ॥ 9 ॥
දෘෂ්ටා හි හරයඃ පූර්වං මයා විපුලවික්රමාඃ ।
වාලී ච සහසුග්රීවෝ ජාංබවාංශ්ච මහාබලඃ ॥ 10 ॥
නීලස්සේනාපතිශ්චෛව යේ චාන්යේ ද්විවිදාදයඃ ।
නෛවං තේෂාං ගතිර්භීමා න තේජෝ න පරාක්රමඃ ॥ 11 ॥
න මතිර්න බලෝත්සාහෞ න රූපපරිකල්පනම් ।
මහත්සත්ත්වමිදං ජ්ඤේයං කපිරූපං ව්යවස්ථිතම් ॥ 12 ॥
ප්රයත්නං මහදාස්ථාය ක්රියතාමස්ය නිග්රහඃ ।
කාමං ලෝකාස්ත්රයස්සේංද්රාස්සසුරාසුරමානවාඃ ॥ 13 ॥
භවතාමග්රතඃ ස්ථාතුං න පර්යාප්තා රණාජිරේ ।
තථාපි තු නයජ්ඤේන ජයමාකාංක්ෂතා රණේ ॥ 14 ॥
ආත්මා රක්ෂ්යඃ ප්රයත්නේන යුද්ධසිද්ධිර්හි චංචලා ।
තේ ස්වාමිවචනං සර්වේ ප්රතිගෘහ්ය මහෞජසඃ ॥ 15 ॥
සමුත්පේතුර්මහාවේගා හුතාශසමතේජසඃ ।
රථෛර්මත්තෛශ්ච මාතංගෛර්වාජිභිශ්ච මහාජවෛඃ ॥ 16 ॥
ශස්ත්රෛශ්ච විවිධෛස්තීක්ෂ්ණෛස්සර්වෛශ්චෝපචිතා බලෛඃ ।
තතස්තං දදෘශුර්වීරා දීප්යමානං මහාකපිම් ॥ 17 ॥
රශ්මිමංතමිවෝද්යංතං ස්වතේජෝරශ්මිමාලිනම් ।
තෝරණස්ථං මහෝත්සාහං මහාසත්ත්වං මහාබලම් ॥ 18 ॥
මහාමතිං මහාවේගං මහාකායං මහාබලම් ।
තං සමීක්ෂ්යෛව තේ සර්වේ දික්ෂු සර්වාස්වවස්ථිතාඃ ॥ 19 ॥
තෛ ස්තෛඃ ප්රහරණෛර්භීමෛරභිපේතුස්තතස්තතඃ ।
තස්ය පංචායසාස්තීක්ෂ්ණාශ්ශිතාඃ පීතමුඛාශ්ශරාඃ ॥ 20 ॥
ශිරස්යුත්පලපත්රාභා දුර්ධරේණ නිපාතිතාඃ ।
ස තෛඃ පංචභිරාවිද්ධශ්ශරෛශ්ශිරසි වානරඃ ॥ 21 ॥
උත්පපාත නදන් ව්යෝම්නි දිශෝ දශ විනාදයන් ।
තතස්තු දුර්ධරෝ වීරස්සරථස්සජ්යකාර්මුකඃ ॥ 22 ॥
කිරන් ශරශතෛස්තීක්ෂ්ණෛරභිපේදේ මහාබලඃ ।
ස කපිර්වාරයාමාස තං ව්යෝම්නි ශරවර්ෂිණම් ॥ 23 ॥
වෘෂ්ටිමංතං පයෝදාංතේ පයෝදමිව මාරුතඃ ।
අර්ධ්යමානස්තතස්තේන දුර්ධරේණානිලාත්මජඃ ॥ 24 ॥
චකාර කදනං භූයෝ ව්යවර්ධත ච වේගවාන් ।
ස දූරං සහසෝත්පත්ය දුර්ධරස්ය රථේ හරිඃ ॥ 25 ॥
නිපපාත මහාවේගෝ විද්යුද්රාශිර්ගිරාවිව ।
තතස්ස මථිතාෂ්ටාශ්වං රථං භග්නාක්ෂකූබරම් ॥ 26 ॥
විහාය න්යපතද්භූමෞ දුර්ධරස්ත්යක්තජීවිතඃ ।
තං විරූපාක්ෂයූපාක්ෂෞ දෘෂ්ට්වා නිපතිතං භුවි ॥ 27 ॥
සංජාතරෝෂෞ දුර්ධර්ෂාවුත්පේතුරරිංදමෞ ।
ස තාභ්යාං සහසෝත්පත්ය විෂ්ඨිතෝ විමලේऽංබරේ ॥ 28 ॥
මුද්ගරාභ්යාං මහාබාහුර්වක්ෂස්යභිහතඃ කපිඃ ।
තයෝර්වේගවතෝර්වේගං විනිහත්ය මහාබලඃ ॥ 29 ॥
නිපපාත පුනර්භූමෞ සුපර්ණසමවික්රමඃ ।
ස සාලවෘක්ෂමාසාද්ය තමුත්පාට්ය ච වානරඃ ॥ 30 ॥
තාවුභෞ රාක්ෂසෞ වීරෞ ජඝාන පවනාත්මජඃ ।
තතස්තාංස්ත්රීන්හතාන්ජ්ඤාත්වා වානරේණ තරස්විනා ॥ 31 ॥
අභිපේදේ මහාවේගඃ ප්රසහ්ය ප්රඝසෝ හරිම් ।
භාසකර්ණශ්ච සංකෘද්ධශ්ශූලමාදාය වීර්යවාන් ॥ 32 ॥
ඒකතඃ කපිශාර්දූලං යශස්විනමවස්ථිතම් ।
පට්ටිසේන ශිතාග්රේණ ප්රඝසඃ ප්රත්යයෝධයත් ॥ 33 ॥
භාසකර්ණශ්ච ශූලේන රාක්ෂසඃ කපිසත්තමම් ।
ස තාභ්යාං වික්ෂතෛර්ගාත්රෛරසෘග්දිග්ධතනූරුහඃ ॥ 34 ॥
අභවද්වානරඃ ක්රුද්ධෝ බාලසූර්යසමප්රභඃ ।
සමුත්පාට්ය ගිරේශ්ශෘංගං සමෘගව්යාලපාදපම් ॥ 35 ॥
ජඝාන හනුමාන් වීරෝ රාක්ෂසෞ කපිකුංජරඃ ।
තතස්තේෂ්වවසන්නේෂු සේනාපතිෂු පංචසු ॥ 36 ॥
බලං තදවශේෂං ච නාශයාමාස වානරඃ ।
අශ්වෛරශ්වාන් ගජෛර්නාගාන් යෝධෛර්යෝධාන් රථෛරථාන් ॥ 37 ॥
ස කපිර්නාශයාමාස සහස්රාක්ෂ ඉවාසුරාන් ।
හතෛර්නාගෛශ්ච තුරගෛර්භග්නාක්ෂෛශ්ච මහාරථෛඃ ॥ 38 ॥
හතෛශ්ච රාක්ෂසෛර්භූමී රුද්ධමාර්ගා සමංතතඃ ।
තතඃ කපිස්තාංධ්වජිනීපතීන් රණේ නිහත්ය වීරාන්සබලාන්සවාහනාන් ।
සමීක්ෂ්ය වීරඃ පරිගෘහ්ය තෝරණං කෘතක්ෂණඃ කාල ඉව ප්රජාක්ෂයේ ॥ 39 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ ෂට්චත්වාරිංශස්සර්ගඃ ॥
