শ্রীমদ্বাল্মীকীয় রামাযণে সুংদরকাংডম্ ।
অথ অষ্টচত্বারিংশস্সর্গঃ ।
ততস্তু রক্ষোধিপতির্মহাত্মা হনূমতাক্ষে নিহতে কুমারে ।
মনস্সমাধায় সদেবকল্পং সমাদিদেশেংদ্রজিতং সরোষঃ ॥ 1 ॥
ত্বমস্ত্রবিচ্ছস্ত্রবিদাং বরিষ্ঠস্সুরাসুরাণামপি শোকদাতা ।
সুরেষু সেংদ্রেষু চ দৃষ্টকর্মা পিতামহারাধনসংচিতাস্ত্রঃ ॥ 2 ॥
তবাস্ত্রবলমাসাদ্য় সসুরাঃ সমরুদ্গণাঃ ।
ন শেকুস্সমরে স্থাতুং সুরেশ্বরসমাশ্রিতাঃ ॥ 3 ॥
ন কশ্চিত্ত্রিষু লোকেষু সংয়ুগেন গতশ্রমঃ ।
ভুজবীর্য়াভিগুপ্তশ্চ তপসা চাভিরক্ষিতঃ ॥ 4 ॥
দেশকালবিভাগজ্ঞস্ত্বমেব মতিসত্তমঃ ।
ন তেঽস্ত্যশক্য়ং সমরেষু কর্মণা ন তেঽস্ত্যকার্য়ং মতিপূর্বমংত্রণে ।
ন সোঽস্তি কশ্চিত্ত্রিষু সংগ্রহেষু বৈ ন বেদ যস্তেঽস্ত্রবলং বলং চ তে ॥ 5 ॥
মমানুরূপং তপসো বলং চ তে পরাক্রমশ্চাস্ত্রবলং চ সংয়ুগে ।
ন ত্বাং সমাসাদ্য় রণাবমর্দে মনশ্শ্রমং গচ্ছতি নিশ্চিতার্থম্ ॥ 6 ॥
নিহতাঃ কিংকরাস্সর্বে জংবুমালী চ রাক্ষসঃ ।
অমাত্যপুত্রা বীরাশ্চ পংচ সেনাগ্রয়ায়িনঃ ॥ 7 ॥
বলানি সুসমৃদ্ধানি সাশ্বনাগরথানি চ ।
সহোদরস্তে দয়িতঃ কুমারোঽক্ষশ্চ সূদিতঃ ॥ 8 ॥
ন হি তেষ্বেব মে সারো যস্ত্বয়্যরিনিষূদন ।
ইদং হি দৃষ্ট্বা মতিমন্মহদ্বলং কপেঃ প্রভাবং চ পরাক্রমং চ ।
ত্বমাত্মনশ্চাপি সমীক্ষ্য় সারং কুরুষ্ব বেগং স্ববলানুরূপম্ ॥ 9 ॥
বলাবমর্থস্তয়ি সন্নিকৃষ্টে যথা গতে শাম্যতি শাংতশত্রৌ ।
তথা সমীক্ষ্য়াত্মবলং পরং চ সমারভস্বাস্ত্রবিদাং বরিষ্ঠ ॥ 10 ॥
ন বীরসেনা গণশোচ্যবংতি ন বজ্রমাদায় বিশালসারম্ ।
ন মারুতস্য়াস্য় গতেঃ প্রমাণং ন চাগ্নিকল্পঃ করণেন হংতুম্ ॥ 11 ॥
তমেবমর্থং প্রসমীক্ষ্য় সম্যক্ স্বকর্মসাম্য়াদ্ধি সমাহিতাত্মা ।
স্মরংশ্চ দিব্য়ং ধনুষোঽস্ত্রবীর্য়ং ব্রজাক্ষতং কর্ম সমারভস্ব ॥ 12 ॥
ন খল্বিয়ং মতিশ্শ্রেষ্ঠা যত্ত্বাং সংপ্রেষয়াম্যহম্ ।
ইয়ং চ রাজধর্মাণাং ক্ষত্রিযস্য় মতির্মতা ॥ 13 ॥
নানাশস্ত্রেষু সংগ্রামে বৈশারদ্যমরিংদম ।
অবশ্যমেব বোদ্ধব্য়ং কাম্যশ্চ বিজয়ো রণে ॥ 14 ॥
ততঃ পিতুস্তদ্বচনং নিশম্য় প্রদক্ষিণং দক্ষসুতপ্রভাবঃ ।
চকার ভর্তারমদীনসত্ত্বো রণায় বীরঃ প্রতিপন্নবুদ্ধিঃ ॥ 15 ॥
ততস্তৈ স্স্বগণৈরিষ্টৈরিংদ্রজিত্ প্রতিপূজিতঃ ।
যুদ্ধোদ্ধতঃ কৃতোত্সাহস্সংগ্রামং প্রত্যপদ্যত ॥ 16 ॥
শ্রীমান্পদ্মপলাশাক্ষো রাক্ষসাধিপতেস্সুতঃ ।
নির্জগাম মহাতেজাস্সমুদ্র ইব পর্বসু ॥ 17 ॥
স পক্ষিরাজোপমতুল্যবেগৈ ।
র্ব্য়ালৈশ্চতুর্ভিঃ সিততীক্ষ্ণদম্ষ্ট্রৈঃ ।
রথং সমায়ুক্তমসম্গবেগম্ ।
সমারুরোহেংদ্রজিদিংদ্রকল্পঃ ॥ 18 ॥
স রথী ধন্বিনাং শ্রেষ্ঠঃ শস্ত্রজ্ঞোস্ত্রবিদাং বরঃ ।
রথেনাভিযয়ৌ ক্ষিপ্রং হনুমান্যত্র সোঽভবত্ ॥ 19 ॥
স তস্য় রথনির্ঘোষং জ্য়াস্বনং কার্মুকস্য় চ ।
নিশম্য় হরিবীরোঽসৌ সংপ্রহৃষ্টতরোঽভবত্ ॥ 20 ॥
সুমহচ্চাপমাদায় শিতশল্য়াংশ্চ সাযকান্ ।
হনুমংতমভিপ্রেত্য় জগাম রণপংডিতঃ ॥ 21 ॥
তস্মিংস্ততঃ সংযতি জাতহর্ষে রণায় নির্গচ্ছতি চাপপাণৌ ।
দিশশ্চ সর্বাঃ কলুষা বভূবু র্মৃগাশ্চ রৌদ্রা বহুধা বিনেদুঃ ॥ 22 ॥
সমাগতাস্তত্র তু নাগযক্ষা মহর্ষযশ্চক্রচরাশ্চ সিদ্ধাঃ ।
নভস্সমাবৃত্য় চ পক্ষিসংঘা বিনেদুরুচ্চৈঃ পরমপ্রহৃষ্টাঃ ॥ 23 ॥
আয়াংতং সরথং দৃষ্ট্বা তূর্ণমিংদ্রজিতং কপিঃ ।
বিননাদ মহানাদং ব্যবর্ধত চ বেগবান্ ॥ 24 ॥
ইংদ্রজিত্তু রথং দিব্যমাস্থিতশ্চিত্রকার্মুকঃ ।
ধনুর্বিষ্ফারয়ামাস তটিদূর্জিতন্নিস্স্বনম্ ॥ 25 ॥
ততস্সমেতাবতিতীক্ষ্ণবেগৌ মহাবলৌ তৌ রণনির্বিশংকৌ ।
কপিশ্চ রক্ষোধিপতেস্তনূজঃ সুরাসুরেংদ্রাবিব বদ্ধবৈরৌ ॥ 26 ॥
স তস্য় বীরস্য় মহারথস্য় ধনুষ্মতঃ সংযতি সম্মতস্য় ।
শরপ্রবেগং ব্যহনত্প্রবৃদ্ধ শ্চচার মার্গে পিতুরপ্রমেয়ঃ ॥ 27 ॥
ততশ্শরানাযততীক্ষ্ণশল্য়ান্ সুপত্রিণঃ কাংচনচিত্রপুংখান্ ।
মুমোচ বীরঃ পরবীরহংতা সুসন্নতান্ বজ্রনিপাতবেগান্ ॥ 28 ॥
ততস্তু তত্স্য়ংদননিস্স্বনং চ মৃদংগভেরীপটহস্বনং চ ।
বিকৃষ্যমাণস্য় চ কার্মুকস্য় নিশম্য় ঘোষং পুনরুত্পপাত ॥ 29 ॥
শরাণামংতরেষ্বাশু ব্যবর্তত মহাকপিঃ ।
হরিস্তস্য়াভিলক্ষ্যস্য় মোঘযন্লক্ষ্যসংগ্রহম্ ॥ 30 ॥
শরাণামগ্রতস্তস্য় পুনঃ সমভিবর্তত ।
প্রসার্য় হস্তৌ হনুমানুত্পপাতানিলাত্মজঃ ॥ 31 ॥
তাবুভৌ বেগসংপন্নৌ রণকর্মবিশারদৌ ।
সর্বভূতমনোগ্রাহি চক্রতুর্য়ুদ্ধমুত্তমম্ ॥ 32 ॥
হনুমতো বেদ ন রাক্ষসোঽংতরং ন মারুতিস্তস্য় মহাত্মনোঽংতরম্ ।
পরস্পরং নির্বিষহৌ বভূবতুঃ সমেত্য় তৌ দেবসমানবিক্রমৌ ॥ 33 ॥
ততস্তু লক্ষ্য়ে স বিহন্যমানে শরেষ্বমোঘেষু চ সংপতত্সু ।
জগাম চিংতাং মহতীং মহাত্মা সমাধিসংয়োগসমাহিতাত্মা ॥ 34 ॥
ততো মতিং রাক্ষসরাজসূনু শ্চকার তস্মিন্ হরিবীরমুখ্য়ে ।
অবধ্যতাং তস্য় কপেস্সমীক্ষ্য় কথং নিগচ্ছেদিতি নিগ্রহার্থম্ ॥ 35 ॥
ততঃ পৈতামহং বীরঃ সোঽস্ত্রমস্ত্রবিদাং বরঃ ।
সংদধে সুমহত্তেজাঃ তং হরিপ্রবরং প্রতি ॥ 36 ॥
অবধ্য়োঽযমিতি জ্ঞাত্বা তমস্ত্রেণাস্ত্রতত্ত্ববিত্ ।
নিজগ্রাহ মহাবাহুর্মারুতাত্মজমিংদ্রজিত্ ॥ 37 ॥
তেন বদ্ধস্ততোঽস্ত্রেণ রাক্ষসেন স বানরঃ ।
অভবন্নির্বিচেষ্টশ্চ পপাত স মহীতলে ॥ 38 ॥
ততোঽথ বুদ্ধ্বা স তদস্ত্রবংধং প্রভোঃ প্রভাবাদ্বিগতাত্মবেগঃ ।
পিতামহানুগ্রহমাত্মনশ্চ বিচিংতয়ামাস হরিপ্রবীরঃ ॥ 39 ॥
তত স্স্বায়ংবুবৈর্মংত্রৈর্ব্রহ্মাস্ত্রমভিমংত্রিতম্ ।
হনুমাংশ্চিংতয়ামাস বরদানং পিতামহাত্ ॥ 40 ॥
ন মেঽস্ত্রবংধস্য় চ শক্তিরস্তি বিমোক্ষণে লোকগুরোঃ প্রভাবাত্ ।
ইত্য়েব মত্বা বিহিতোঽস্ত্রবংধো ময়াত্ময়োনেরনুবর্তিতব্য়ঃ ॥ 41 ॥
স বীর্যমস্ত্রস্য় কপির্বিচার্য় পিতামহানুগ্রহমাত্মনশ্চ ।
বিমোক্ষশক্তিং পরিচিংতয়িত্বা পিতামহাজ্ঞামনুবর্ততে স্ম ॥ 42 ॥
অস্ত্রেণাপি হি বদ্ধস্য় ভয়ং মম ন জাযতে ।
পিতামহমহেংদ্রাভ্য়াং রক্ষিতস্য়ানিলেন চ ॥ 43 ॥
গ্রহণে চাপি রক্ষোভির্মহন্মে গুণদর্শনম্ ।
রাক্ষসেংদ্রেণ সংবাদস্তস্মাদ্গৃহ্ণংতু মাং পরে ॥ 44 ॥
স নিশ্চিতার্থঃ পরবীরহংতা সমীক্ষ্যকারী বিনিবৃত্তচেষ্টঃ ।
পরৈঃ প্রসহ্য়াভিগতৈর্নিগৃহ্য় ননাদ তৈস্ত্রৈঃ পরিভর্ত্স্যমানঃ ॥ 45 ॥
ততস্তং রাক্ষসা দৃষ্ট্বা নির্বিচেষ্টমরিংদমম্ ।
ববংধুশ্শণবল্কৈশ্চ দ্রুমচীরৈশ্চ সংহতৈঃ ॥ 46 ॥
স রোচয়ামাস পরৈশ্চ বংধনং প্রসহ্য় বীরৈরভিনিগ্রহং চ ।
কৌতূহলান্মাং যদি রাক্ষসেংদ্রো দ্রষ্টুং ব্যবস্য়েদিতি নিশ্চিতার্থঃ ॥ 47 ॥
স বদ্ধস্তেন বল্কেন বিমুক্তোঽস্ত্রেণ বীর্যবান্ ।
অস্ত্রবংধঃ স চান্য়ং হি ন বংধমনুবর্ততে ॥ 48 ॥
অথেংদ্রজিত্তু দ্রুমচীরবদ্ধং বিচার্য় বীরঃ কপিসত্তমং তম্ ।
বিমুক্তমস্ত্রেণ জগাম চিংতাং নান্য়েন বদ্ধো হ্যনুবর্ততেঽস্ত্রম্ ॥ 49 ॥
অহো মহত্কর্ম কৃতং নিরর্থকম্কং ন রাক্ষসৈর্মংত্রগতির্বিমৃষ্টা ।
পুনশ্চ মংত্রে বিহতেঽস্ত্রমন্যত্প্রবর্ততে সংশয়িতা স্স্মসর্বে ॥ 50 ॥
অস্ত্রেণ হনুমান্মুক্তো নাত্মানমববুধ্যত ।
কৃষ্যমাণস্তু রক্ষোভি স্তৌশ্চ বংধৈর্নিপীডিতঃ ॥ 51 ॥
হন্যমানস্ততঃ ক্রূরৈ রাক্ষসৈঃ কাষ্ঠমুষ্টিভিঃ ।
সমীপং রাক্ষসেংদ্রস্য় প্রাকৃষ্যত স বানরঃ ॥ 52 ॥
অথেংদ্রজিত্তং প্রসমীক্ষ্য় মুক্তমস্ত্রেণ বদ্ধং দ্রুমচীরসূত্রৈঃ ।
ন্যদর্শযত্তত্র মহাবলং তং হরিপ্রবীরং সগণায় রাজ্ঞে ॥ 53 ॥
তং মত্তমিব মাতংগং বদ্ধং কপিবরোত্তমম্ ।
রাক্ষসা রাক্ষসেংদ্রায় রাবণায় ন্যবেদযন্ ॥ 54 ॥
কোঽয়ং কস্য় কুতোবাত্র কিং কার্য়ং কো ব্যপাশ্রয়ঃ ।
ইতি রাক্ষসবীরাণাং তত্র সংজজ্ঞিরে কথাঃ ॥ 55 ॥
হন্যতাং দহ্যতাং বাপি ভক্ষ্যতামিতি চাপরে ।
রাক্ষসাস্তত্র সংক্রুদ্ধাঃ পরস্পরমথাব্রুবন্ ॥ 56 ॥
অতীত্য় মার্গং সহসা মহাত্মা স তত্র রক্ষোধিপপাদমূলে ।
দদর্শ রাজ্ঞঃ পরিচারবৃদ্ধান্ গৃহং মহারত্নবিভূষিতং চ ॥ 57 ॥
স দদর্শ মহাতেজা রাবণঃ কপিসত্তমম্ ।
রক্ষোভির্বিকৃতাকারৈঃ কৃষ্যমাণমিতস্ততঃ ॥ 58 ॥
রাক্ষসাধিপতিং চাপি দদর্শ কপিসত্তমঃ ।
তেজোবলসমায়ুক্তং তপংতমিব ভাস্করম্ ॥ 59 ॥
সরোষসম্বর্তিততাম্রদৃষ্টির্দশাননস্তং কপিমন্ববেক্ষ্য় ।
অথোপবিষ্টান্ কুলশীলবৃদ্ধান্ সমাদিশত্তং প্রতি মংত্রিমুখ্য়ান্ ॥ 60 ॥
যথাক্রমং তৈস্স কপির্বিপৃষ্টঃ কার্য়ার্থমর্ধস্য় চ মূলমাদৌ ।
নিবেদয়ামাস হরীশ্বরস্য় দূতঃ সকাশাদহমাগতোঽস্মি ॥ 61 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে সুংদরকাংডে অষ্টচত্বারিংশস্সর্গঃ ॥
