ශ්රීමද්වාල්මීකීය රාමායණේ සුංදරකාංඩම් ।
අථ ඒකෝනපංචාශස්සර්ගඃ ।
තතස්ස කර්මණා තස්ය විස්මිතෝ භීමවික්රමඃ ।
හනුමාන්රෝෂතාම්රාක්ෂෝ රක්ෂෝධිපමවෛක්ෂත ॥ 1 ॥
භ්රාජමානං මහාර්හේණ කාංචනේන විරාජතා ।
මුක්තාජාලාවෘතේනාථ මකුටේන මහාද්යුතිම් ॥ 2 ॥
වජ්රසංයෝගසංයුක්තෛර්මහාර්හමණිවිග්රහෛඃ ।
හෛමෛරාභරණෛශ්චිත්රෛර්මනසේව ප්රකල්පිතෛඃ ॥ 3 ॥
මහාර්හක්ෂෞමසංවීතං රක්තචංදනරූෂිතම් ।
ස්වානුලිප්තං විචිත්රාභිර්විවිධාභිශ්ච භක්තිභිඃ ॥ 4 ॥
විචිත්රෛර්දර්ශනීයෛශ්ච රක්තාක්ෂෛර්භීමදර්ශනෛඃ ।
දීප්තතීක්ෂ්ණමහාදංෂ්ට්රෛඃ ප්රලංබදශනච්ඡදෛඃ ॥ 5 ॥
ශිරෝභිර්දශභිර්වීරං භ්රාජමානං මහෞජසම් ।
නානාව්යාලසමාකීර්ණෛශ්ශිඛරෛරිව මංදරම් ॥ 6 ॥
නීලාංජනචයප්රඛ්යං හාරේණෝරසි රාජතා ।
පූර්ණචංද්රාභවක්ත්රේණ සබලාකමිවාංබුදම් ॥ 7 ॥
බාහුභිර්බද්ධකේයූරෛශ්චංදනෝත්තමරූෂිතෛඃ ।
භ්රාජමානාංගදෛඃ පීනෛඃ පංචශීර්ෂෛරිවෝරගෛඃ ॥ 8 ॥
මහතිස්ඵාටිකේ චිත්රේ රත්නසංයෝගසංස්කෘතේ ।
උත්තමාස්තරණාස්තීර්ණේ සූපවිෂ්ටං වරාසනේ ॥ 9 ॥
අලංකෘතාභිරත්යර්ථං ප්රමදාභිඃ සමංතතඃ ।
වාලව්යජනහස්තාභිරාරාත්සමුපසේවිතම් ॥ 10 ॥
දුර්ධරේණ ප්රහස්තේන මහාපාර්ශ්වේන රක්ෂසා ।
මංත්රිභිර්මංත්රතත්ත්වජ්ඤෛර්නිකුංභේන ච මංත්රිණා ॥ 11 ॥
සුඛෝපවිෂ්ටං රක්ෂෝභිශ්චතුර්භිර්බලදර්පිතෛඃ ।
කෘත්ස්නං පරිවෘතං ලෝකං චතුර්භිරිව සාගරෛඃ ॥ 12 ॥
මංත්රිභිර්මංත්රතත්ත්වජ්ඤෛරන්යෛශ්ච ශුභබුද්ධිභිඃ ।
අන්වාස්යමානං රක්ෂෝභිඃ සුරෛරිව සුරේශ්වරම් ॥ 13 ॥
අපශ්යද්රාක්ෂසපතිං හනුමානතිතේජසම් ।
විෂ්ඨිතං මේරුශිඛරේ සතෝයමිව තෝයදම් ॥ 14 ॥
ස තෛස්සංපීඩ්යමානෝऽපි රක්ෂෝභිර්භීමවික්රමෛඃ ।
විස්මයං පරමං ගත්වා රක්ෂෝධිපමවෛක්ෂත ॥ 15 ॥
භ්රාජමානං තතෝ දෘෂ්ට්වා හනුමාන්රාක්ෂසේශ්වරම් ।
මනසා චිංතයාමාස තේජසා තස්ය මෝහිතඃ ॥ 16 ॥
අහෝ රූපමහෝ ධෛර්යමහෝ සත්ත්වමහෝ ද්යුතිඃ ।
අහෝ රාක්ෂසරාජස්ය සර්වලක්ෂණයුක්තතා ॥ 17 ॥
යද්යධර්මෝ න බලවාන් ස්යාදයං රාක්ෂසේශ්වරඃ ।
ස්යාදයං සුරලෝකස්ය සශක්රස්යාපි රක්ෂිතා ॥ 18 ॥
අස්ය ක්රූරෛර්නෘශංසෛශ්ච කර්මභිර්ලෝකකුත්සිතෛඃ ।
සර්වේ බිභ්යති ඛල්වස්මාල්ලෝකාස්සාමරදානවාඃ ॥ 19 ॥
අයං හ්යුත්සහතේ ක්රුද්ධඃ කර්තුමේකාර්ණවං ජගත් ।
ඉති චිංතාං බහුවිධාමකරෝන්මතිමාන් හරිඃ ॥ 20 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ ඒකෝනපංචාශස්සර්ගඃ ॥
