ଶ୍ରୀମଦ୍ଵାଲ୍ମୀକୀୟ ରାମାୟଣେ ସୁଂଦରକାଂଡମ୍ ।
ଅଥ ଏକୋନପଂଚାଶସ୍ସର୍ଗଃ ।
ତତସ୍ସ କର୍ମଣା ତସ୍ୟ ଵିସ୍ମିତୋ ଭୀମଵିକ୍ରମଃ ।
ହନୁମାନ୍ରୋଷତାମ୍ରାକ୍ଷୋ ରକ୍ଷୋଧିପମଵୈକ୍ଷତ ॥ 1 ॥
ଭ୍ରାଜମାନଂ ମହାର୍ହେଣ କାଂଚନେନ ଵିରାଜତା ।
ମୁକ୍ତାଜାଲାଵୃତେନାଥ ମକୁଟେନ ମହାଦ୍ୟୁତିମ୍ ॥ 2 ॥
ଵଜ୍ରସଂୟୋଗସଂୟୁକ୍ତୈର୍ମହାର୍ହମଣିଵିଗ୍ରହୈଃ ।
ହୈମୈରାଭରଣୈଶ୍ଚିତ୍ରୈର୍ମନସେଵ ପ୍ରକଲ୍ପିତୈଃ ॥ 3 ॥
ମହାର୍ହକ୍ଷୌମସଂଵୀତଂ ରକ୍ତଚଂଦନରୂଷିତମ୍ ।
ସ୍ଵାନୁଲିପ୍ତଂ ଵିଚିତ୍ରାଭିର୍ଵିଵିଧାଭିଶ୍ଚ ଭକ୍ତିଭିଃ ॥ 4 ॥
ଵିଚିତ୍ରୈର୍ଦର୍ଶନୀୟୈଶ୍ଚ ରକ୍ତାକ୍ଷୈର୍ଭୀମଦର୍ଶନୈଃ ।
ଦୀପ୍ତତୀକ୍ଷ୍ଣମହାଦଂଷ୍ଟ୍ରୈଃ ପ୍ରଲଂବଦଶନଚ୍ଛଦୈଃ ॥ 5 ॥
ଶିରୋଭିର୍ଦଶଭିର୍ଵୀରଂ ଭ୍ରାଜମାନଂ ମହୌଜସମ୍ ।
ନାନାଵ୍ୟାଲସମାକୀର୍ଣୈଶ୍ଶିଖରୈରିଵ ମଂଦରମ୍ ॥ 6 ॥
ନୀଲାଂଜନଚୟପ୍ରଖ୍ୟଂ ହାରେଣୋରସି ରାଜତା ।
ପୂର୍ଣଚଂଦ୍ରାଭଵକ୍ତ୍ରେଣ ସବଲାକମିଵାଂବୁଦମ୍ ॥ 7 ॥
ବାହୁଭିର୍ବଦ୍ଧକେୟୂରୈଶ୍ଚଂଦନୋତ୍ତମରୂଷିତୈଃ ।
ଭ୍ରାଜମାନାଂଗଦୈଃ ପୀନୈଃ ପଂଚଶୀର୍ଷୈରିଵୋରଗୈଃ ॥ 8 ॥
ମହତିସ୍ଫାଟିକେ ଚିତ୍ରେ ରତ୍ନସଂୟୋଗସଂସ୍କୃତେ ।
ଉତ୍ତମାସ୍ତରଣାସ୍ତୀର୍ଣେ ସୂପଵିଷ୍ଟଂ ଵରାସନେ ॥ 9 ॥
ଅଲଂକୃତାଭିରତ୍ୟର୍ଥଂ ପ୍ରମଦାଭିଃ ସମଂତତଃ ।
ଵାଲଵ୍ୟଜନହସ୍ତାଭିରାରାତ୍ସମୁପସେଵିତମ୍ ॥ 10 ॥
ଦୁର୍ଧରେଣ ପ୍ରହସ୍ତେନ ମହାପାର୍ଶ୍ଵେନ ରକ୍ଷସା ।
ମଂତ୍ରିଭିର୍ମଂତ୍ରତତ୍ତ୍ଵଜ୍ଞୈର୍ନିକୁଂଭେନ ଚ ମଂତ୍ରିଣା ॥ 11 ॥
ସୁଖୋପଵିଷ୍ଟଂ ରକ୍ଷୋଭିଶ୍ଚତୁର୍ଭିର୍ବଲଦର୍ପିତୈଃ ।
କୃତ୍ସ୍ନଂ ପରିଵୃତଂ ଲୋକଂ ଚତୁର୍ଭିରିଵ ସାଗରୈଃ ॥ 12 ॥
ମଂତ୍ରିଭିର୍ମଂତ୍ରତତ୍ତ୍ଵଜ୍ଞୈରନ୍ୟୈଶ୍ଚ ଶୁଭବୁଦ୍ଧିଭିଃ ।
ଅନ୍ଵାସ୍ୟମାନଂ ରକ୍ଷୋଭିଃ ସୁରୈରିଵ ସୁରେଶ୍ଵରମ୍ ॥ 13 ॥
ଅପଶ୍ୟଦ୍ରାକ୍ଷସପତିଂ ହନୁମାନତିତେଜସମ୍ ।
ଵିଷ୍ଠିତଂ ମେରୁଶିଖରେ ସତୋୟମିଵ ତୋୟଦମ୍ ॥ 14 ॥
ସ ତୈସ୍ସଂପୀଡ୍ୟମାନୋଽପି ରକ୍ଷୋଭିର୍ଭୀମଵିକ୍ରମୈଃ ।
ଵିସ୍ମୟଂ ପରମଂ ଗତ୍ଵା ରକ୍ଷୋଧିପମଵୈକ୍ଷତ ॥ 15 ॥
ଭ୍ରାଜମାନଂ ତତୋ ଦୃଷ୍ଟ୍ଵା ହନୁମାନ୍ରାକ୍ଷସେଶ୍ଵରମ୍ ।
ମନସା ଚିଂତୟାମାସ ତେଜସା ତସ୍ୟ ମୋହିତଃ ॥ 16 ॥
ଅହୋ ରୂପମହୋ ଧୈର୍ୟମହୋ ସତ୍ତ୍ଵମହୋ ଦ୍ୟୁତିଃ ।
ଅହୋ ରାକ୍ଷସରାଜସ୍ୟ ସର୍ଵଲକ୍ଷଣୟୁକ୍ତତା ॥ 17 ॥
ୟଦ୍ୟଧର୍ମୋ ନ ବଲଵାନ୍ ସ୍ୟାଦୟଂ ରାକ୍ଷସେଶ୍ଵରଃ ।
ସ୍ୟାଦୟଂ ସୁରଲୋକସ୍ୟ ସଶକ୍ରସ୍ୟାପି ରକ୍ଷିତା ॥ 18 ॥
ଅସ୍ୟ କ୍ରୂରୈର୍ନୃଶଂସୈଶ୍ଚ କର୍ମଭିର୍ଲୋକକୁତ୍ସିତୈଃ ।
ସର୍ଵେ ବିଭ୍ୟତି ଖଲ୍ଵସ୍ମାଲ୍ଲୋକାସ୍ସାମରଦାନଵାଃ ॥ 19 ॥
ଅୟଂ ହ୍ୟୁତ୍ସହତେ କ୍ରୁଦ୍ଧଃ କର୍ତୁମେକାର୍ଣଵଂ ଜଗତ୍ ।
ଇତି ଚିଂତାଂ ବହୁଵିଧାମକରୋନ୍ମତିମାନ୍ ହରିଃ ॥ 20 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ସୁଂଦରକାଂଡେ ଏକୋନପଂଚାଶସ୍ସର୍ଗଃ ॥
