শ্রীমদ্বাল্মীকীয় রামাযণে সুংদরকাংডম্ ।
অথ একোনপংচাশস্সর্গঃ ।
ততস্স কর্মণা তস্য় বিস্মিতো ভীমবিক্রমঃ ।
হনুমান্রোষতাম্রাক্ষো রক্ষোধিপমবৈক্ষত ॥ 1 ॥
ভ্রাজমানং মহার্হেণ কাংচনেন বিরাজতা ।
মুক্তাজালাবৃতেনাথ মকুটেন মহাদ্য়ুতিম্ ॥ 2 ॥
বজ্রসংয়োগসংয়ুক্তৈর্মহার্হমণিবিগ্রহৈঃ ।
হৈমৈরাভরণৈশ্চিত্রৈর্মনসেব প্রকল্পিতৈঃ ॥ 3 ॥
মহার্হক্ষৌমসংবীতং রক্তচংদনরূষিতম্ ।
স্বানুলিপ্তং বিচিত্রাভির্বিবিধাভিশ্চ ভক্তিভিঃ ॥ 4 ॥
বিচিত্রৈর্দর্শনীয়ৈশ্চ রক্তাক্ষৈর্ভীমদর্শনৈঃ ।
দীপ্ততীক্ষ্ণমহাদংষ্ট্রৈঃ প্রলংবদশনচ্ছদৈঃ ॥ 5 ॥
শিরোভির্দশভির্বীরং ভ্রাজমানং মহৌজসম্ ।
নানাব্য়ালসমাকীর্ণৈশ্শিখরৈরিব মংদরম্ ॥ 6 ॥
নীলাংজনচযপ্রখ্য়ং হারেণোরসি রাজতা ।
পূর্ণচংদ্রাভবক্ত্রেণ সবলাকমিবাংবুদম্ ॥ 7 ॥
বাহুভির্বদ্ধকেয়ূরৈশ্চংদনোত্তমরূষিতৈঃ ।
ভ্রাজমানাংগদৈঃ পীনৈঃ পংচশীর্ষৈরিবোরগৈঃ ॥ 8 ॥
মহতিস্ফাটিকে চিত্রে রত্নসংয়োগসংস্কৃতে ।
উত্তমাস্তরণাস্তীর্ণে সূপবিষ্টং বরাসনে ॥ 9 ॥
অলংকৃতাভিরত্যর্থং প্রমদাভিঃ সমংততঃ ।
বালব্যজনহস্তাভিরারাত্সমুপসেবিতম্ ॥ 10 ॥
দুর্ধরেণ প্রহস্তেন মহাপার্শ্বেন রক্ষসা ।
মংত্রিভির্মংত্রতত্ত্বজ্ঞৈর্নিকুংভেন চ মংত্রিণা ॥ 11 ॥
সুখোপবিষ্টং রক্ষোভিশ্চতুর্ভির্বলদর্পিতৈঃ ।
কৃত্স্নং পরিবৃতং লোকং চতুর্ভিরিব সাগরৈঃ ॥ 12 ॥
মংত্রিভির্মংত্রতত্ত্বজ্ঞৈরন্য়ৈশ্চ শুভবুদ্ধিভিঃ ।
অন্বাস্যমানং রক্ষোভিঃ সুরৈরিব সুরেশ্বরম্ ॥ 13 ॥
অপশ্যদ্রাক্ষসপতিং হনুমানতিতেজসম্ ।
বিষ্ঠিতং মেরুশিখরে সতোযমিব তোযদম্ ॥ 14 ॥
স তৈস্সংপীড্যমানোঽপি রক্ষোভির্ভীমবিক্রমৈঃ ।
বিস্ময়ং পরমং গত্বা রক্ষোধিপমবৈক্ষত ॥ 15 ॥
ভ্রাজমানং ততো দৃষ্ট্বা হনুমান্রাক্ষসেশ্বরম্ ।
মনসা চিংতয়ামাস তেজসা তস্য় মোহিতঃ ॥ 16 ॥
অহো রূপমহো ধৈর্যমহো সত্ত্বমহো দ্য়ুতিঃ ।
অহো রাক্ষসরাজস্য় সর্বলক্ষণয়ুক্ততা ॥ 17 ॥
যদ্যধর্মো ন বলবান্ স্য়াদয়ং রাক্ষসেশ্বরঃ ।
স্য়াদয়ং সুরলোকস্য় সশক্রস্য়াপি রক্ষিতা ॥ 18 ॥
অস্য় ক্রূরৈর্নৃশংসৈশ্চ কর্মভির্লোককুত্সিতৈঃ ।
সর্বে বিভ্যতি খল্বস্মাল্লোকাস্সামরদানবাঃ ॥ 19 ॥
অয়ং হ্য়ুত্সহতে ক্রুদ্ধঃ কর্তুমেকার্ণবং জগত্ ।
ইতি চিংতাং বহুবিধামকরোন্মতিমান্ হরিঃ ॥ 20 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে সুংদরকাংডে একোনপংচাশস্সর্গঃ ॥
