śrīmadvālmīkīya rāmāyaṇē sundarakāṇḍam ।
atha ēkōnapañchāśassargaḥ ।
tatassa karmaṇā tasya vismitō bhīmavikramaḥ ।
hanumānrōṣatāmrākṣō rakṣōdhipamavaikṣata ॥ 1 ॥
bhrājamānaṃ mahārhēṇa kāñchanēna virājatā ।
muktājālāvṛtēnātha makuṭēna mahādyutim ॥ 2 ॥
vajrasaṃyōgasaṃyuktairmahārhamaṇivigrahaiḥ ।
haimairābharaṇaiśchitrairmanasēva prakalpitaiḥ ॥ 3 ॥
mahārhakṣaumasaṃvītaṃ raktachandanarūṣitam ।
svānuliptaṃ vichitrābhirvividhābhiścha bhaktibhiḥ ॥ 4 ॥
vichitrairdarśanīyaiścha raktākṣairbhīmadarśanaiḥ ।
dīptatīkṣṇamahādaṃṣṭraiḥ pralambadaśanachChadaiḥ ॥ 5 ॥
śirōbhirdaśabhirvīraṃ bhrājamānaṃ mahaujasam ।
nānāvyālasamākīrṇaiśśikharairiva mandaram ॥ 6 ॥
nīlāñjanachayaprakhyaṃ hārēṇōrasi rājatā ।
pūrṇachandrābhavaktrēṇa sabalākamivāmbudam ॥ 7 ॥
bāhubhirbaddhakēyūraiśchandanōttamarūṣitaiḥ ।
bhrājamānāṅgadaiḥ pīnaiḥ pañchaśīrṣairivōragaiḥ ॥ 8 ॥
mahatisphāṭikē chitrē ratnasaṃyōgasaṃskṛtē ।
uttamāstaraṇāstīrṇē sūpaviṣṭaṃ varāsanē ॥ 9 ॥
alaṅkṛtābhiratyarthaṃ pramadābhiḥ samantataḥ ।
vālavyajanahastābhirārātsamupasēvitam ॥ 10 ॥
durdharēṇa prahastēna mahāpārśvēna rakṣasā ।
mantribhirmantratattvajñairnikumbhēna cha mantriṇā ॥ 11 ॥
sukhōpaviṣṭaṃ rakṣōbhiśchaturbhirbaladarpitaiḥ ।
kṛtsnaṃ parivṛtaṃ lōkaṃ chaturbhiriva sāgaraiḥ ॥ 12 ॥
mantribhirmantratattvajñairanyaiścha śubhabuddhibhiḥ ।
anvāsyamānaṃ rakṣōbhiḥ surairiva surēśvaram ॥ 13 ॥
apaśyadrākṣasapatiṃ hanumānatitējasam ।
viṣṭhitaṃ mēruśikharē satōyamiva tōyadam ॥ 14 ॥
sa taissampīḍyamānō'pi rakṣōbhirbhīmavikramaiḥ ।
vismayaṃ paramaṃ gatvā rakṣōdhipamavaikṣata ॥ 15 ॥
bhrājamānaṃ tatō dṛṣṭvā hanumānrākṣasēśvaram ।
manasā chintayāmāsa tējasā tasya mōhitaḥ ॥ 16 ॥
ahō rūpamahō dhairyamahō sattvamahō dyutiḥ ।
ahō rākṣasarājasya sarvalakṣaṇayuktatā ॥ 17 ॥
yadyadharmō na balavān syādayaṃ rākṣasēśvaraḥ ।
syādayaṃ suralōkasya saśakrasyāpi rakṣitā ॥ 18 ॥
asya krūrairnṛśaṃsaiścha karmabhirlōkakutsitaiḥ ।
sarvē bibhyati khalvasmāllōkāssāmaradānavāḥ ॥ 19 ॥
ayaṃ hyutsahatē kruddhaḥ kartumēkārṇavaṃ jagat ।
iti chintāṃ bahuvidhāmakarōnmatimān hariḥ ॥ 20 ॥
ityārṣē śrīmadrāmāyaṇē vālmīkīya ādikāvyē sundarakāṇḍē ēkōnapañchāśassargaḥ ॥
