શ્રીમદ્વાલ્મીકીય રામાયણે સુંદરકાંડમ્ ।
અથ એકોનપંચાશસ્સર્ગઃ ।
તતસ્સ કર્મણા તસ્ય વિસ્મિતો ભીમવિક્રમઃ ।
હનુમાન્રોષતામ્રાક્ષો રક્ષોધિપમવૈક્ષત ॥ 1 ॥
ભ્રાજમાનં મહાર્હેણ કાંચનેન વિરાજતા ।
મુક્તાજાલાવૃતેનાથ મકુટેન મહાદ્યુતિમ્ ॥ 2 ॥
વજ્રસંયોગસંયુક્તૈર્મહાર્હમણિવિગ્રહૈઃ ।
હૈમૈરાભરણૈશ્ચિત્રૈર્મનસેવ પ્રકલ્પિતૈઃ ॥ 3 ॥
મહાર્હક્ષૌમસંવીતં રક્તચંદનરૂષિતમ્ ।
સ્વાનુલિપ્તં વિચિત્રાભિર્વિવિધાભિશ્ચ ભક્તિભિઃ ॥ 4 ॥
વિચિત્રૈર્દર્શનીયૈશ્ચ રક્તાક્ષૈર્ભીમદર્શનૈઃ ।
દીપ્તતીક્ષ્ણમહાદંષ્ટ્રૈઃ પ્રલંબદશનચ્છદૈઃ ॥ 5 ॥
શિરોભિર્દશભિર્વીરં ભ્રાજમાનં મહૌજસમ્ ।
નાનાવ્યાલસમાકીર્ણૈશ્શિખરૈરિવ મંદરમ્ ॥ 6 ॥
નીલાંજનચયપ્રખ્યં હારેણોરસિ રાજતા ।
પૂર્ણચંદ્રાભવક્ત્રેણ સબલાકમિવાંબુદમ્ ॥ 7 ॥
બાહુભિર્બદ્ધકેયૂરૈશ્ચંદનોત્તમરૂષિતૈઃ ।
ભ્રાજમાનાંગદૈઃ પીનૈઃ પંચશીર્ષૈરિવોરગૈઃ ॥ 8 ॥
મહતિસ્ફાટિકે ચિત્રે રત્નસંયોગસંસ્કૃતે ।
ઉત્તમાસ્તરણાસ્તીર્ણે સૂપવિષ્ટં વરાસને ॥ 9 ॥
અલંકૃતાભિરત્યર્થં પ્રમદાભિઃ સમંતતઃ ।
વાલવ્યજનહસ્તાભિરારાત્સમુપસેવિતમ્ ॥ 10 ॥
દુર્ધરેણ પ્રહસ્તેન મહાપાર્શ્વેન રક્ષસા ।
મંત્રિભિર્મંત્રતત્ત્વજ્ઞૈર્નિકુંભેન ચ મંત્રિણા ॥ 11 ॥
સુખોપવિષ્ટં રક્ષોભિશ્ચતુર્ભિર્બલદર્પિતૈઃ ।
કૃત્સ્નં પરિવૃતં લોકં ચતુર્ભિરિવ સાગરૈઃ ॥ 12 ॥
મંત્રિભિર્મંત્રતત્ત્વજ્ઞૈરન્યૈશ્ચ શુભબુદ્ધિભિઃ ।
અન્વાસ્યમાનં રક્ષોભિઃ સુરૈરિવ સુરેશ્વરમ્ ॥ 13 ॥
અપશ્યદ્રાક્ષસપતિં હનુમાનતિતેજસમ્ ।
વિષ્ઠિતં મેરુશિખરે સતોયમિવ તોયદમ્ ॥ 14 ॥
સ તૈસ્સંપીડ્યમાનોઽપિ રક્ષોભિર્ભીમવિક્રમૈઃ ।
વિસ્મયં પરમં ગત્વા રક્ષોધિપમવૈક્ષત ॥ 15 ॥
ભ્રાજમાનં તતો દૃષ્ટ્વા હનુમાન્રાક્ષસેશ્વરમ્ ।
મનસા ચિંતયામાસ તેજસા તસ્ય મોહિતઃ ॥ 16 ॥
અહો રૂપમહો ધૈર્યમહો સત્ત્વમહો દ્યુતિઃ ।
અહો રાક્ષસરાજસ્ય સર્વલક્ષણયુક્તતા ॥ 17 ॥
યદ્યધર્મો ન બલવાન્ સ્યાદયં રાક્ષસેશ્વરઃ ।
સ્યાદયં સુરલોકસ્ય સશક્રસ્યાપિ રક્ષિતા ॥ 18 ॥
અસ્ય ક્રૂરૈર્નૃશંસૈશ્ચ કર્મભિર્લોકકુત્સિતૈઃ ।
સર્વે બિભ્યતિ ખલ્વસ્માલ્લોકાસ્સામરદાનવાઃ ॥ 19 ॥
અયં હ્યુત્સહતે ક્રુદ્ધઃ કર્તુમેકાર્ણવં જગત્ ।
ઇતિ ચિંતાં બહુવિધામકરોન્મતિમાન્ હરિઃ ॥ 20 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે સુંદરકાંડે એકોનપંચાશસ્સર્ગઃ ॥
