శ్రీమద్వాల్మీకీయ రామాయణే సుందరకాండమ్ ।
అథ ఏకోనపంచాశస్సర్గః ।
తతస్స కర్మణా తస్య విస్మితో భీమవిక్రమః ।
హనుమాన్రోషతామ్రాక్షో రక్షోధిపమవైక్షత ॥ 1 ॥
భ్రాజమానం మహార్హేణ కాంచనేన విరాజతా ।
ముక్తాజాలావృతేనాథ మకుటేన మహాద్యుతిమ్ ॥ 2 ॥
వజ్రసంయోగసంయుక్తైర్మహార్హమణివిగ్రహైః ।
హైమైరాభరణైశ్చిత్రైర్మనసేవ ప్రకల్పితైః ॥ 3 ॥
మహార్హక్షౌమసంవీతం రక్తచందనరూషితమ్ ।
స్వానులిప్తం విచిత్రాభిర్వివిధాభిశ్చ భక్తిభిః ॥ 4 ॥
విచిత్రైర్దర్శనీయైశ్చ రక్తాక్షైర్భీమదర్శనైః ।
దీప్తతీక్ష్ణమహాదంష్ట్రైః ప్రలంబదశనచ్ఛదైః ॥ 5 ॥
శిరోభిర్దశభిర్వీరం భ్రాజమానం మహౌజసమ్ ।
నానావ్యాలసమాకీర్ణైశ్శిఖరైరివ మందరమ్ ॥ 6 ॥
నీలాంజనచయప్రఖ్యం హారేణోరసి రాజతా ।
పూర్ణచంద్రాభవక్త్రేణ సబలాకమివాంబుదమ్ ॥ 7 ॥
బాహుభిర్బద్ధకేయూరైశ్చందనోత్తమరూషితైః ।
భ్రాజమానాంగదైః పీనైః పంచశీర్షైరివోరగైః ॥ 8 ॥
మహతిస్ఫాటికే చిత్రే రత్నసంయోగసంస్కృతే ।
ఉత్తమాస్తరణాస్తీర్ణే సూపవిష్టం వరాసనే ॥ 9 ॥
అలంకృతాభిరత్యర్థం ప్రమదాభిః సమంతతః ।
వాలవ్యజనహస్తాభిరారాత్సముపసేవితమ్ ॥ 10 ॥
దుర్ధరేణ ప్రహస్తేన మహాపార్శ్వేన రక్షసా ।
మంత్రిభిర్మంత్రతత్త్వజ్ఞైర్నికుంభేన చ మంత్రిణా ॥ 11 ॥
సుఖోపవిష్టం రక్షోభిశ్చతుర్భిర్బలదర్పితైః ।
కృత్స్నం పరివృతం లోకం చతుర్భిరివ సాగరైః ॥ 12 ॥
మంత్రిభిర్మంత్రతత్త్వజ్ఞైరన్యైశ్చ శుభబుద్ధిభిః ।
అన్వాస్యమానం రక్షోభిః సురైరివ సురేశ్వరమ్ ॥ 13 ॥
అపశ్యద్రాక్షసపతిం హనుమానతితేజసమ్ ।
విష్ఠితం మేరుశిఖరే సతోయమివ తోయదమ్ ॥ 14 ॥
స తైస్సంపీడ్యమానోఽపి రక్షోభిర్భీమవిక్రమైః ।
విస్మయం పరమం గత్వా రక్షోధిపమవైక్షత ॥ 15 ॥
భ్రాజమానం తతో దృష్ట్వా హనుమాన్రాక్షసేశ్వరమ్ ।
మనసా చింతయామాస తేజసా తస్య మోహితః ॥ 16 ॥
అహో రూపమహో ధైర్యమహో సత్త్వమహో ద్యుతిః ।
అహో రాక్షసరాజస్య సర్వలక్షణయుక్తతా ॥ 17 ॥
యద్యధర్మో న బలవాన్ స్యాదయం రాక్షసేశ్వరః ।
స్యాదయం సురలోకస్య సశక్రస్యాపి రక్షితా ॥ 18 ॥
అస్య క్రూరైర్నృశంసైశ్చ కర్మభిర్లోకకుత్సితైః ।
సర్వే బిభ్యతి ఖల్వస్మాల్లోకాస్సామరదానవాః ॥ 19 ॥
అయం హ్యుత్సహతే క్రుద్ధః కర్తుమేకార్ణవం జగత్ ।
ఇతి చింతాం బహువిధామకరోన్మతిమాన్ హరిః ॥ 20 ॥
ఇత్యార్షే శ్రీమద్రామాయణే వాల్మీకీయ ఆదికావ్యే సుందరకాండే ఏకోనపంచాశస్సర్గః ॥
