ശ്രീമദ്വാല്മീകീയ രാമായണേ സുംദരകാംഡമ് ।
അഥ ഏകോനപംചാശസ്സര്ഗഃ ।
തതസ്സ കര്മണാ തസ്യ വിസ്മിതോ ഭീമവിക്രമഃ ।
ഹനുമാന്രോഷതാമ്രാക്ഷോ രക്ഷോധിപമവൈക്ഷത ॥ 1 ॥
ഭ്രാജമാനം മഹാര്ഹേണ കാംചനേന വിരാജതാ ।
മുക്താജാലാവൃതേനാഥ മകുടേന മഹാദ്യുതിമ് ॥ 2 ॥
വജ്രസംയോഗസംയുക്തൈര്മഹാര്ഹമണിവിഗ്രഹൈഃ ।
ഹൈമൈരാഭരണൈശ്ചിത്രൈര്മനസേവ പ്രകല്പിതൈഃ ॥ 3 ॥
മഹാര്ഹക്ഷൌമസംവീതം രക്തചംദനരൂഷിതമ് ।
സ്വാനുലിപ്തം വിചിത്രാഭിർവിവിധാഭിശ്ച ഭക്തിഭിഃ ॥ 4 ॥
വിചിത്രൈര്ദര്ശനീയൈശ്ച രക്താക്ഷൈര്ഭീമദര്ശനൈഃ ।
ദീപ്തതീക്ഷ്ണമഹാദംഷ്ട്രൈഃ പ്രലംബദശനച്ഛദൈഃ ॥ 5 ॥
ശിരോഭിര്ദശഭിർവീരം ഭ്രാജമാനം മഹൌജസമ് ।
നാനാവ്യാലസമാകീര്ണൈശ്ശിഖരൈരിവ മംദരമ് ॥ 6 ॥
നീലാംജനചയപ്രഖ്യം ഹാരേണോരസി രാജതാ ।
പൂര്ണചംദ്രാഭവക്ത്രേണ സബലാകമിവാംബുദമ് ॥ 7 ॥
ബാഹുഭിര്ബദ്ധകേയൂരൈശ്ചംദനോത്തമരൂഷിതൈഃ ।
ഭ്രാജമാനാംഗദൈഃ പീനൈഃ പംചശീര്ഷൈരിവോരഗൈഃ ॥ 8 ॥
മഹതിസ്ഫാടികേ ചിത്രേ രത്നസംയോഗസംസ്കൃതേ ।
ഉത്തമാസ്തരണാസ്തീര്ണേ സൂപവിഷ്ടം വരാസനേ ॥ 9 ॥
അലംകൃതാഭിരത്യര്ഥം പ്രമദാഭിഃ സമംതതഃ ।
വാലവ്യജനഹസ്താഭിരാരാത്സമുപസേവിതമ് ॥ 10 ॥
ദുര്ധരേണ പ്രഹസ്തേന മഹാപാര്ശ്വേന രക്ഷസാ ।
മംത്രിഭിര്മംത്രതത്ത്വജ്ഞൈര്നികുംഭേന ച മംത്രിണാ ॥ 11 ॥
സുഖോപവിഷ്ടം രക്ഷോഭിശ്ചതുര്ഭിര്ബലദര്പിതൈഃ ।
കൃത്സ്നം പരിവൃതം ലോകം ചതുര്ഭിരിവ സാഗരൈഃ ॥ 12 ॥
മംത്രിഭിര്മംത്രതത്ത്വജ്ഞൈരന്യൈശ്ച ശുഭബുദ്ധിഭിഃ ।
അന്വാസ്യമാനം രക്ഷോഭിഃ സുരൈരിവ സുരേശ്വരമ് ॥ 13 ॥
അപശ്യദ്രാക്ഷസപതിം ഹനുമാനതിതേജസമ് ।
വിഷ്ഠിതം മേരുശിഖരേ സതോയമിവ തോയദമ് ॥ 14 ॥
സ തൈസ്സംപീഡ്യമാനോഽപി രക്ഷോഭിര്ഭീമവിക്രമൈഃ ।
വിസ്മയം പരമം ഗത്വാ രക്ഷോധിപമവൈക്ഷത ॥ 15 ॥
ഭ്രാജമാനം തതോ ദൃഷ്ട്വാ ഹനുമാന്രാക്ഷസേശ്വരമ് ।
മനസാ ചിംതയാമാസ തേജസാ തസ്യ മോഹിതഃ ॥ 16 ॥
അഹോ രൂപമഹോ ധൈര്യമഹോ സത്ത്വമഹോ ദ്യുതിഃ ।
അഹോ രാക്ഷസരാജസ്യ സർവലക്ഷണയുക്തതാ ॥ 17 ॥
യദ്യധര്മോ ന ബലവാന് സ്യാദയം രാക്ഷസേശ്വരഃ ।
സ്യാദയം സുരലോകസ്യ സശക്രസ്യാപി രക്ഷിതാ ॥ 18 ॥
അസ്യ ക്രൂരൈര്നൃശംസൈശ്ച കര്മഭിര്ലോകകുത്സിതൈഃ ।
സർവേ ബിഭ്യതി ഖല്വസ്മാല്ലോകാസ്സാമരദാനവാഃ ॥ 19 ॥
അയം ഹ്യുത്സഹതേ ക്രുദ്ധഃ കര്തുമേകാര്ണവം ജഗത് ।
ഇതി ചിംതാം ബഹുവിധാമകരോന്മതിമാന് ഹരിഃ ॥ 20 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുംദരകാംഡേ ഏകോനപംചാശസ്സര്ഗഃ ॥
