ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଏକାଦଶସ୍ସର୍ଗଃ ।
ଭୂୟ ଏଵ ହି ରାଜେଂଦ୍ର ଶୃଣୁ ମେ ଵଚନଂ ହିତମ୍ ।
ୟଥା ସ ଦେଵପ୍ରଵରଃ କଥାୟାମେଵମବ୍ରଵୀତ୍ ॥ 1 ॥
ଇକ୍ଷ୍ଵାକୂଣାଂ କୁଲେ ଜାତୋ ଭଵିଷ୍ୟତି ସୁଧାର୍ମିକଃ ।
ରାଜା ଦଶରଥୋ ନାମ୍ନା ଶ୍ରୀମାନ୍ସତ୍ୟପ୍ରତିଶ୍ରଵଃ ॥ 2 ॥
ଅଂଗରାଜେନ ସଖ୍ୟଂ ଚ ତସ୍ୟ ରାଜ୍ଞୋ ଭଵିଷ୍ୟତି ।
କନ୍ୟା ଚାସ୍ୟ ମହାଭାଗା ଶାଂତା ନାମ ଭଵିଷ୍ୟତି ॥ 3 ॥
ପୁତ୍ରସ୍ତୁ ସୋଽଂଗରାଜସ୍ୟ ରୋମପାଦ ଇତି ଶ୍ରୁତଃ ।
ତଂ ସ ରାଜା ଦଶରଥୋ ଗମିଷ୍ୟତି ମହାୟଶାଃ ॥ 4 ॥
ଅନପତ୍ୟୋଽସ୍ମି ଧର୍ମାତ୍ମନ୍ ଶାଂତାଭର୍ତା ମମ କ୍ରତୁମ୍ ।
ଆହରେତ ତ୍ଵୟାଜ୍ଞପ୍ତସ୍ସଂତାନାର୍ଥଂ କୁଲସ୍ୟ ଚ ॥ 5 ॥
ଶ୍ରୁତ୍ଵା ରାଜ୍ଞୋଽଥ ତଦ୍ଵାକ୍ୟଂ ମନସା ସ ଵିଚିଂତ୍ୟ ଚ ।
ପ୍ରଦାସ୍ୟତେ ପୁତ୍ରଵଂତଂ ଶାଂତାଭର୍ତାରମାତ୍ମଵାନ୍ ॥ 6 ॥
ପ୍ରତିଗୃହ୍ୟ ଚ ତଂ ଵିପ୍ରଂ ସ ରାଜା ଵିଗତଜ୍ଵରଃ ।
ଆହରିଷ୍ୟତି ତଂ ୟଜ୍ଞଂ ପ୍ରହୃଷ୍ଟେନାଂତରାତ୍ମନା ॥ 7 ॥
ତଂ ଚ ରାଜା ଦଶରଥୋ ୟଷ୍ଟୁକାମଃ କୃତାଂଜଲିଃ ।
ଋଶ୍ୟଶୃଂଗଂ ଦ୍ଵିଜଶ୍ରେଷ୍ଠଂ ଵରୟିଷ୍ୟତି ଧର୍ମଵିତ୍ ॥ 8 ॥
ୟଜ୍ଞାର୍ଥଂ ପ୍ରସଵାର୍ଥଂ ଚ ସ୍ଵର୍ଗାର୍ଥଂ ଚ ନରେଶ୍ଵରଃ ।
ଲଭତେ ଚ ସ ତଂ କାମଂ ଦ୍ଵିଜମୁଖ୍ୟାଦ୍ଵିଶାଂପତିଃ ॥ 9 ॥
ପୁତ୍ରାଶ୍ଚାସ୍ୟ ଭଵିଷ୍ୟଂତି ଚତ୍ଵାରୋଽମିତଵିକ୍ରମାଃ ।
ଵଂଶପ୍ରତିଷ୍ଠାନକରାସ୍ସର୍ଵଲୋକେଷୁ ଵିଶ୍ରୁତାଃ ॥ 10 ॥
ଏଵଂ ସ ଦେଵପ୍ରଵରଃ ପୂର୍ଵଂ କଥିତଵାନ୍କଥାମ୍ ।
ସନତ୍କୁମାରୋ ଭଗଵାନ୍ପୁରା ଦେଵୟୁଗେ ପ୍ରଭୁଃ ॥ 11 ॥
ସ ତ୍ଵଂ ପୁରୁଷଶାର୍ଦୂଲ ତମାନୟ ସୁସତ୍କୃତମ୍ ।
ସ୍ଵୟମେଵ ମହାରାଜ ଗତ୍ଵା ସବଲଵାହନଃ ॥ 12 ॥
ଅନୁମାନ୍ୟ ଵସିଷ୍ଠଂ ଚ ସୂତଵାକ୍ୟଂ ନିଶମ୍ୟ ଚ ।
ସାଂତଃପୁରସ୍ସହାମାତ୍ୟଃ ପ୍ରୟୟୌ ୟତ୍ର ସ ଦ୍ଵିଜଃ ॥ 13 ॥
ଵନାନି ସରିତଶ୍ଚୈଵ ଵ୍ୟତିକ୍ରମ୍ୟ ଶନୈଶ୍ଶନୈଃ ।
ଅଭିଚକ୍ରାମ ତଂ ଦେଶଂ ୟତ୍ର ଵୈ ମୁନିପୁଂଗଵଃ ॥ 14 ॥
ଆସାଦ୍ୟ ତଂ ଦ୍ଵିଜଶ୍ରେଷ୍ଠଂ ରୋମପାଦସମୀପଗମ୍ ।
ଋଷିପୁତ୍ରଂ ଦଦର୍ଶାଦୌ ଦୀପ୍ୟମାନମିଵାନଲମ୍ ॥ 15 ॥
ତତୋ ରାଜା ୟଥାନ୍ୟାୟଂ ପୂଜାଂ ଚକ୍ରେ ଵିଶେଷତଃ ।
ସଖିତ୍ଵାତ୍ତସ୍ୟ ଵୈ ରାଜ୍ଞଃ ପ୍ରହୃଷ୍ଟେନାଂତରାତ୍ମନା ॥ 16 ॥
ରୋମପାଦେନ ଚାଖ୍ୟାତମୃଷିପୁତ୍ରାୟ ଧୀମତେ ।
ସଖ୍ୟଂ ସଂବଂଧକଂ ଚୈଵ ତଦା ତଂ ପ୍ରତ୍ୟପୂଜୟତ୍ ॥ 17 ॥
ଏଵଂ ସୁସତ୍କୃତସ୍ତେନ ସହୋଷିତ୍ଵା ନରର୍ଷଭଃ ।
ସପ୍ତାଷ୍ଟଦିଵସାନ୍ରାଜା ରାଜାନମିଦମବ୍ରଵୀତ୍ ॥ 18 ॥
ଶାଂତା ତଵ ସୁତା ରାଜନ୍ ସହ ଭର୍ତ୍ରା ଵିଶାଂପତେ ।
ମଦୀୟନଗରଂ ୟାତୁ କାର୍ୟଂ ହି ମହଦୁଦ୍ୟତମ୍ ॥ 19 ॥
ତଥେତି ରାଜା ସଂଶ୍ରୁତ୍ୟ ଗମନଂ ତସ୍ୟ ଧୀମତଃ ।
ଉଵାଚ ଵଚନଂ ଵିପ୍ରଂ ଗଚ୍ଛ ତ୍ଵଂ ସହ ଭାର୍ୟୟା ॥ 20 ॥
ଋଷିପୁତ୍ରଃ ପ୍ରତିଶ୍ରୁତ୍ୟ ତଥେତ୍ୟାହ ନୃପଂ ତଦା ।
ସ ନୃପେଣାଭ୍ୟନୁଜ୍ଞାତଃ ପ୍ରୟୟୌ ସହ ଭାର୍ୟୟା ॥ 21 ॥
ତାଵନ୍ୟୋନ୍ୟାଂଜଲିଂ କୃତ୍ଵା ସ୍ନେହାତ୍ସଂଶ୍ଲିଷ୍ୟ ଚୋରସା ।
ନନଂଦତୁର୍ଦଶରଥୋ ରୋମପାଦଶ୍ଚ ଵୀର୍ୟଵାନ୍ ॥ 22 ॥
ତତସ୍ସୁହୃଦମାପୃଚ୍ଛ୍ୟ ପ୍ରସ୍ଥିତୋ ରଘୁନଂଦନଃ ।
ପୌରେଭ୍ୟଃ ପ୍ରେଷୟାମାସ ଦୂତାନ୍ଵୈ ଶୀଘ୍ରଗାମିନଃ ॥ 23 ॥
କ୍ରିୟତାଂ ନଗରଂ ସର୍ଵଂ କ୍ଷିପ୍ରମେଵ ସ୍ଵଲଂକୃତମ୍ ।
ଧୂପିତଂ ସିକ୍ତସମ୍ମୃଷ୍ଟଂ ପତାକାଭିରଲଂକୃତମ୍ ॥ 24 ॥
ତତଃ ପ୍ରହୃଷ୍ଟାଃ ପୌରାସ୍ତେ ଶ୍ରୁତ୍ଵା ରାଜାନମାଗତମ୍ ।
ତଥା ପ୍ରଚକ୍ରୁସ୍ତତ୍ସର୍ଵଂ ରାଜ୍ଞା ୟତ୍ପ୍ରେଷିତଂ ତଦା ॥ 25 ॥
ତତସ୍ସ୍ଵଲଂକୃତଂ ରାଜା ନଗରଂ ପ୍ରଵିଵେଶ ହ ।
ଶଂଖଦୁଂଦୁଭିନିର୍ଘୋଷୈଃ ପୁରସ୍କୃତ୍ୟ ଦ୍ଵିଜର୍ଷଭମ୍ ॥ 26 ॥
ତତଃ ପ୍ରମୁଦିତାସ୍ସର୍ଵେ ଦୃଷ୍ଟ୍ଵା ତଂ ନାଗରା ଦ୍ଵିଜମ୍ ।
ପ୍ରଵେଶ୍ୟମାନଂ ସତ୍କୃତ୍ୟ ନରେଂଦ୍ରେଣେଂଦ୍ରକର୍ମଣା ॥ 27 ॥
ଅଂତଃପୁରଂ ପ୍ରଵେଶ୍ୟୈନଂ ପୂଜାଂ କୃତ୍ଵା ଚ ଶାସ୍ତ୍ରତଃ ।
କୃତକୃତ୍ୟଂ ତଦାତ୍ମାନଂ ମେନେ ତସ୍ୟୋପଵାହନାତ୍ ॥ 28 ॥
ଅଂତଃପୁରସ୍ତ୍ରିୟସ୍ସର୍ଵାଶ୍ଶାଂତାଂ ଦୃଷ୍ଟ୍ଵା ତଥାଗତାମ୍ ।
ସହ ଭର୍ତ୍ରା ଵିଶାଲାକ୍ଷୀଂ ପ୍ରୀତ୍ୟାନଂଦମୁପାଗମନ୍ ॥ 29 ॥
ପୂଜ୍ୟମାନା ଚ ତାଭିସ୍ସା ରାଜ୍ଞା ଚୈଵ ଵିଶେଷତଃ ।
ଉଵାସ ତତ୍ର ସୁଖିତା କଂଚିତ୍କାଲଂ ସହର୍ତ୍ଵିଜା ॥ 30 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଏକାଦଶସ୍ସର୍ଗଃ ॥
