ශ්රීමද්වාල්මීකීය රාමායණේ බාලකාංඩම් ।
අථ ඒකාදශස්සර්ගඃ ।
භූය ඒව හි රාජේංද්ර ශෘණු මේ වචනං හිතම් ।
යථා ස දේවප්රවරඃ කථායාමේවමබ්රවීත් ॥ 1 ॥
ඉක්ෂ්වාකූණාං කුලේ ජාතෝ භවිෂ්යති සුධාර්මිකඃ ।
රාජා දශරථෝ නාම්නා ශ්රීමාන්සත්යප්රතිශ්රවඃ ॥ 2 ॥
අංගරාජේන සඛ්යං ච තස්ය රාජ්ඤෝ භවිෂ්යති ।
කන්යා චාස්ය මහාභාගා ශාංතා නාම භවිෂ්යති ॥ 3 ॥
පුත්රස්තු සෝऽංගරාජස්ය රෝමපාද ඉති ශ්රුතඃ ।
තං ස රාජා දශරථෝ ගමිෂ්යති මහායශාඃ ॥ 4 ॥
අනපත්යෝऽස්මි ධර්මාත්මන් ශාංතාභර්තා මම ක්රතුම් ।
ආහරේත ත්වයාජ්ඤප්තස්සංතානාර්ථං කුලස්ය ච ॥ 5 ॥
ශ්රුත්වා රාජ්ඤෝऽථ තද්වාක්යං මනසා ස විචිංත්ය ච ।
ප්රදාස්යතේ පුත්රවංතං ශාංතාභර්තාරමාත්මවාන් ॥ 6 ॥
ප්රතිගෘහ්ය ච තං විප්රං ස රාජා විගතජ්වරඃ ।
ආහරිෂ්යති තං යජ්ඤං ප්රහෘෂ්ටේනාංතරාත්මනා ॥ 7 ॥
තං ච රාජා දශරථෝ යෂ්ටුකාමඃ කෘතාංජලිඃ ।
ඍශ්යශෘංගං ද්විජශ්රේෂ්ඨං වරයිෂ්යති ධර්මවිත් ॥ 8 ॥
යජ්ඤාර්ථං ප්රසවාර්ථං ච ස්වර්ගාර්ථං ච නරේශ්වරඃ ।
ලභතේ ච ස තං කාමං ද්විජමුඛ්යාද්විශාංපතිඃ ॥ 9 ॥
පුත්රාශ්චාස්ය භවිෂ්යංති චත්වාරෝऽමිතවික්රමාඃ ।
වංශප්රතිෂ්ඨානකරාස්සර්වලෝකේෂු විශ්රුතාඃ ॥ 10 ॥
ඒවං ස දේවප්රවරඃ පූර්වං කථිතවාන්කථාම් ।
සනත්කුමාරෝ භගවාන්පුරා දේවයුගේ ප්රභුඃ ॥ 11 ॥
ස ත්වං පුරුෂශාර්දූල තමානය සුසත්කෘතම් ।
ස්වයමේව මහාරාජ ගත්වා සබලවාහනඃ ॥ 12 ॥
අනුමාන්ය වසිෂ්ඨං ච සූතවාක්යං නිශම්ය ච ।
සාංතඃපුරස්සහාමාත්යඃ ප්රයයෞ යත්ර ස ද්විජඃ ॥ 13 ॥
වනානි සරිතශ්චෛව ව්යතික්රම්ය ශනෛශ්ශනෛඃ ।
අභිචක්රාම තං දේශං යත්ර වෛ මුනිපුංගවඃ ॥ 14 ॥
ආසාද්ය තං ද්විජශ්රේෂ්ඨං රෝමපාදසමීපගම් ।
ඍෂිපුත්රං දදර්ශාදෞ දීප්යමානමිවානලම් ॥ 15 ॥
තතෝ රාජා යථාන්යායං පූජාං චක්රේ විශේෂතඃ ।
සඛිත්වාත්තස්ය වෛ රාජ්ඤඃ ප්රහෘෂ්ටේනාංතරාත්මනා ॥ 16 ॥
රෝමපාදේන චාඛ්යාතමෘෂිපුත්රාය ධීමතේ ।
සඛ්යං සංබංධකං චෛව තදා තං ප්රත්යපූජයත් ॥ 17 ॥
ඒවං සුසත්කෘතස්තේන සහෝෂිත්වා නරර්ෂභඃ ।
සප්තාෂ්ටදිවසාන්රාජා රාජානමිදමබ්රවීත් ॥ 18 ॥
ශාංතා තව සුතා රාජන් සහ භර්ත්රා විශාංපතේ ।
මදීයනගරං යාතු කාර්යං හි මහදුද්යතම් ॥ 19 ॥
තථේති රාජා සංශ්රුත්ය ගමනං තස්ය ධීමතඃ ।
උවාච වචනං විප්රං ගච්ඡ ත්වං සහ භාර්යයා ॥ 20 ॥
ඍෂිපුත්රඃ ප්රතිශ්රුත්ය තථේත්යාහ නෘපං තදා ।
ස නෘපේණාභ්යනුජ්ඤාතඃ ප්රයයෞ සහ භාර්යයා ॥ 21 ॥
තාවන්යෝන්යාංජලිං කෘත්වා ස්නේහාත්සංශ්ලිෂ්ය චෝරසා ।
නනංදතුර්දශරථෝ රෝමපාදශ්ච වීර්යවාන් ॥ 22 ॥
තතස්සුහෘදමාපෘච්ඡ්ය ප්රස්ථිතෝ රඝුනංදනඃ ।
පෞරේභ්යඃ ප්රේෂයාමාස දූතාන්වෛ ශීඝ්රගාමිනඃ ॥ 23 ॥
ක්රියතාං නගරං සර්වං ක්ෂිප්රමේව ස්වලංකෘතම් ।
ධූපිතං සික්තසම්මෘෂ්ටං පතාකාභිරලංකෘතම් ॥ 24 ॥
තතඃ ප්රහෘෂ්ටාඃ පෞරාස්තේ ශ්රුත්වා රාජානමාගතම් ।
තථා ප්රචක්රුස්තත්සර්වං රාජ්ඤා යත්ප්රේෂිතං තදා ॥ 25 ॥
තතස්ස්වලංකෘතං රාජා නගරං ප්රවිවේශ හ ।
ශංඛදුංදුභිනිර්ඝෝෂෛඃ පුරස්කෘත්ය ද්විජර්ෂභම් ॥ 26 ॥
තතඃ ප්රමුදිතාස්සර්වේ දෘෂ්ට්වා තං නාගරා ද්විජම් ।
ප්රවේශ්යමානං සත්කෘත්ය නරේංද්රේණේංද්රකර්මණා ॥ 27 ॥
අංතඃපුරං ප්රවේශ්යෛනං පූජාං කෘත්වා ච ශාස්ත්රතඃ ।
කෘතකෘත්යං තදාත්මානං මේනේ තස්යෝපවාහනාත් ॥ 28 ॥
අංතඃපුරස්ත්රියස්සර්වාශ්ශාංතාං දෘෂ්ට්වා තථාගතාම් ।
සහ භර්ත්රා විශාලාක්ෂීං ප්රීත්යානංදමුපාගමන් ॥ 29 ॥
පූජ්යමානා ච තාභිස්සා රාජ්ඤා චෛව විශේෂතඃ ।
උවාස තත්ර සුඛිතා කංචිත්කාලං සහර්ත්විජා ॥ 30 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ ඒකාදශස්සර්ගඃ ॥
