શ્રીમદ્વાલ્મીકીય રામાયણે બાલકાંડમ્ ।
અથ એકાદશસ્સર્ગઃ ।
ભૂય એવ હિ રાજેંદ્ર શૃણુ મે વચનં હિતમ્ ।
યથા સ દેવપ્રવરઃ કથાયામેવમબ્રવીત્ ॥ 1 ॥
ઇક્ષ્વાકૂણાં કુલે જાતો ભવિષ્યતિ સુધાર્મિકઃ ।
રાજા દશરથો નામ્ના શ્રીમાન્સત્યપ્રતિશ્રવઃ ॥ 2 ॥
અંગરાજેન સખ્યં ચ તસ્ય રાજ્ઞો ભવિષ્યતિ ।
કન્યા ચાસ્ય મહાભાગા શાંતા નામ ભવિષ્યતિ ॥ 3 ॥
પુત્રસ્તુ સોઽંગરાજસ્ય રોમપાદ ઇતિ શ્રુતઃ ।
તં સ રાજા દશરથો ગમિષ્યતિ મહાયશાઃ ॥ 4 ॥
અનપત્યોઽસ્મિ ધર્માત્મન્ શાંતાભર્તા મમ ક્રતુમ્ ।
આહરેત ત્વયાજ્ઞપ્તસ્સંતાનાર્થં કુલસ્ય ચ ॥ 5 ॥
શ્રુત્વા રાજ્ઞોઽથ તદ્વાક્યં મનસા સ વિચિંત્ય ચ ।
પ્રદાસ્યતે પુત્રવંતં શાંતાભર્તારમાત્મવાન્ ॥ 6 ॥
પ્રતિગૃહ્ય ચ તં વિપ્રં સ રાજા વિગતજ્વરઃ ।
આહરિષ્યતિ તં યજ્ઞં પ્રહૃષ્ટેનાંતરાત્મના ॥ 7 ॥
તં ચ રાજા દશરથો યષ્ટુકામઃ કૃતાંજલિઃ ।
ઋશ્યશૃંગં દ્વિજશ્રેષ્ઠં વરયિષ્યતિ ધર્મવિત્ ॥ 8 ॥
યજ્ઞાર્થં પ્રસવાર્થં ચ સ્વર્ગાર્થં ચ નરેશ્વરઃ ।
લભતે ચ સ તં કામં દ્વિજમુખ્યાદ્વિશાંપતિઃ ॥ 9 ॥
પુત્રાશ્ચાસ્ય ભવિષ્યંતિ ચત્વારોઽમિતવિક્રમાઃ ।
વંશપ્રતિષ્ઠાનકરાસ્સર્વલોકેષુ વિશ્રુતાઃ ॥ 10 ॥
એવં સ દેવપ્રવરઃ પૂર્વં કથિતવાન્કથામ્ ।
સનત્કુમારો ભગવાન્પુરા દેવયુગે પ્રભુઃ ॥ 11 ॥
સ ત્વં પુરુષશાર્દૂલ તમાનય સુસત્કૃતમ્ ।
સ્વયમેવ મહારાજ ગત્વા સબલવાહનઃ ॥ 12 ॥
અનુમાન્ય વસિષ્ઠં ચ સૂતવાક્યં નિશમ્ય ચ ।
સાંતઃપુરસ્સહામાત્યઃ પ્રયયૌ યત્ર સ દ્વિજઃ ॥ 13 ॥
વનાનિ સરિતશ્ચૈવ વ્યતિક્રમ્ય શનૈશ્શનૈઃ ।
અભિચક્રામ તં દેશં યત્ર વૈ મુનિપુંગવઃ ॥ 14 ॥
આસાદ્ય તં દ્વિજશ્રેષ્ઠં રોમપાદસમીપગમ્ ।
ઋષિપુત્રં દદર્શાદૌ દીપ્યમાનમિવાનલમ્ ॥ 15 ॥
તતો રાજા યથાન્યાયં પૂજાં ચક્રે વિશેષતઃ ।
સખિત્વાત્તસ્ય વૈ રાજ્ઞઃ પ્રહૃષ્ટેનાંતરાત્મના ॥ 16 ॥
રોમપાદેન ચાખ્યાતમૃષિપુત્રાય ધીમતે ।
સખ્યં સંબંધકં ચૈવ તદા તં પ્રત્યપૂજયત્ ॥ 17 ॥
એવં સુસત્કૃતસ્તેન સહોષિત્વા નરર્ષભઃ ।
સપ્તાષ્ટદિવસાન્રાજા રાજાનમિદમબ્રવીત્ ॥ 18 ॥
શાંતા તવ સુતા રાજન્ સહ ભર્ત્રા વિશાંપતે ।
મદીયનગરં યાતુ કાર્યં હિ મહદુદ્યતમ્ ॥ 19 ॥
તથેતિ રાજા સંશ્રુત્ય ગમનં તસ્ય ધીમતઃ ।
ઉવાચ વચનં વિપ્રં ગચ્છ ત્વં સહ ભાર્યયા ॥ 20 ॥
ઋષિપુત્રઃ પ્રતિશ્રુત્ય તથેત્યાહ નૃપં તદા ।
સ નૃપેણાભ્યનુજ્ઞાતઃ પ્રયયૌ સહ ભાર્યયા ॥ 21 ॥
તાવન્યોન્યાંજલિં કૃત્વા સ્નેહાત્સંશ્લિષ્ય ચોરસા ।
નનંદતુર્દશરથો રોમપાદશ્ચ વીર્યવાન્ ॥ 22 ॥
તતસ્સુહૃદમાપૃચ્છ્ય પ્રસ્થિતો રઘુનંદનઃ ।
પૌરેભ્યઃ પ્રેષયામાસ દૂતાન્વૈ શીઘ્રગામિનઃ ॥ 23 ॥
ક્રિયતાં નગરં સર્વં ક્ષિપ્રમેવ સ્વલંકૃતમ્ ।
ધૂપિતં સિક્તસમ્મૃષ્ટં પતાકાભિરલંકૃતમ્ ॥ 24 ॥
તતઃ પ્રહૃષ્ટાઃ પૌરાસ્તે શ્રુત્વા રાજાનમાગતમ્ ।
તથા પ્રચક્રુસ્તત્સર્વં રાજ્ઞા યત્પ્રેષિતં તદા ॥ 25 ॥
તતસ્સ્વલંકૃતં રાજા નગરં પ્રવિવેશ હ ।
શંખદુંદુભિનિર્ઘોષૈઃ પુરસ્કૃત્ય દ્વિજર્ષભમ્ ॥ 26 ॥
તતઃ પ્રમુદિતાસ્સર્વે દૃષ્ટ્વા તં નાગરા દ્વિજમ્ ।
પ્રવેશ્યમાનં સત્કૃત્ય નરેંદ્રેણેંદ્રકર્મણા ॥ 27 ॥
અંતઃપુરં પ્રવેશ્યૈનં પૂજાં કૃત્વા ચ શાસ્ત્રતઃ ।
કૃતકૃત્યં તદાત્માનં મેને તસ્યોપવાહનાત્ ॥ 28 ॥
અંતઃપુરસ્ત્રિયસ્સર્વાશ્શાંતાં દૃષ્ટ્વા તથાગતામ્ ।
સહ ભર્ત્રા વિશાલાક્ષીં પ્રીત્યાનંદમુપાગમન્ ॥ 29 ॥
પૂજ્યમાના ચ તાભિસ્સા રાજ્ઞા ચૈવ વિશેષતઃ ।
ઉવાસ તત્ર સુખિતા કંચિત્કાલં સહર્ત્વિજા ॥ 30 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે એકાદશસ્સર્ગઃ ॥
