śrīmadvālmīkīya rāmāyaṇē bālakāṇḍam ।
atha ēkādaśassargaḥ ।
bhūya ēva hi rājēndra śṛṇu mē vachanaṃ hitam ।
yathā sa dēvapravaraḥ kathāyāmēvamabravīt ॥ 1 ॥
ikṣvākūṇāṃ kulē jātō bhaviṣyati sudhārmikaḥ ।
rājā daśarathō nāmnā śrīmānsatyapratiśravaḥ ॥ 2 ॥
aṅgarājēna sakhyaṃ cha tasya rājñō bhaviṣyati ।
kanyā chāsya mahābhāgā śāntā nāma bhaviṣyati ॥ 3 ॥
putrastu sō'ṅgarājasya rōmapāda iti śrutaḥ ।
taṃ sa rājā daśarathō gamiṣyati mahāyaśāḥ ॥ 4 ॥
anapatyō'smi dharmātman śāntābhartā mama kratum ।
āharēta tvayājñaptassantānārthaṃ kulasya cha ॥ 5 ॥
śrutvā rājñō'tha tadvākyaṃ manasā sa vichintya cha ।
pradāsyatē putravantaṃ śāntābhartāramātmavān ॥ 6 ॥
pratigṛhya cha taṃ vipraṃ sa rājā vigatajvaraḥ ।
āhariṣyati taṃ yajñaṃ prahṛṣṭēnāntarātmanā ॥ 7 ॥
taṃ cha rājā daśarathō yaṣṭukāmaḥ kṛtāñjaliḥ ।
ṛśyaśṛṅgaṃ dvijaśrēṣṭhaṃ varayiṣyati dharmavit ॥ 8 ॥
yajñārthaṃ prasavārthaṃ cha svargārthaṃ cha narēśvaraḥ ।
labhatē cha sa taṃ kāmaṃ dvijamukhyādviśāmpatiḥ ॥ 9 ॥
putrāśchāsya bhaviṣyanti chatvārō'mitavikramāḥ ।
vaṃśapratiṣṭhānakarāssarvalōkēṣu viśrutāḥ ॥ 10 ॥
ēvaṃ sa dēvapravaraḥ pūrvaṃ kathitavānkathām ।
sanatkumārō bhagavānpurā dēvayugē prabhuḥ ॥ 11 ॥
sa tvaṃ puruṣaśārdūla tamānaya susatkṛtam ।
svayamēva mahārāja gatvā sabalavāhanaḥ ॥ 12 ॥
anumānya vasiṣṭhaṃ cha sūtavākyaṃ niśamya cha ।
sāntaḥpurassahāmātyaḥ prayayau yatra sa dvijaḥ ॥ 13 ॥
vanāni saritaśchaiva vyatikramya śanaiśśanaiḥ ।
abhichakrāma taṃ dēśaṃ yatra vai munipuṅgavaḥ ॥ 14 ॥
āsādya taṃ dvijaśrēṣṭhaṃ rōmapādasamīpagam ।
ṛṣiputraṃ dadarśādau dīpyamānamivānalam ॥ 15 ॥
tatō rājā yathānyāyaṃ pūjāṃ chakrē viśēṣataḥ ।
sakhitvāttasya vai rājñaḥ prahṛṣṭēnāntarātmanā ॥ 16 ॥
rōmapādēna chākhyātamṛṣiputrāya dhīmatē ।
sakhyaṃ sambandhakaṃ chaiva tadā taṃ pratyapūjayat ॥ 17 ॥
ēvaṃ susatkṛtastēna sahōṣitvā nararṣabhaḥ ।
saptāṣṭadivasānrājā rājānamidamabravīt ॥ 18 ॥
śāntā tava sutā rājan saha bhartrā viśāmpatē ।
madīyanagaraṃ yātu kāryaṃ hi mahadudyatam ॥ 19 ॥
tathēti rājā saṃśrutya gamanaṃ tasya dhīmataḥ ।
uvācha vachanaṃ vipraṃ gachCha tvaṃ saha bhāryayā ॥ 20 ॥
ṛṣiputraḥ pratiśrutya tathētyāha nṛpaṃ tadā ।
sa nṛpēṇābhyanujñātaḥ prayayau saha bhāryayā ॥ 21 ॥
tāvanyōnyāñjaliṃ kṛtvā snēhātsaṃśliṣya chōrasā ।
nanandaturdaśarathō rōmapādaścha vīryavān ॥ 22 ॥
tatassuhṛdamāpṛchChya prasthitō raghunandanaḥ ।
paurēbhyaḥ prēṣayāmāsa dūtānvai śīghragāminaḥ ॥ 23 ॥
kriyatāṃ nagaraṃ sarvaṃ kṣipramēva svalaṅkṛtam ।
dhūpitaṃ siktasammṛṣṭaṃ patākābhiralaṅkṛtam ॥ 24 ॥
tataḥ prahṛṣṭāḥ paurāstē śrutvā rājānamāgatam ।
tathā prachakrustatsarvaṃ rājñā yatprēṣitaṃ tadā ॥ 25 ॥
tatassvalaṅkṛtaṃ rājā nagaraṃ pravivēśa ha ।
śaṅkhadundubhinirghōṣaiḥ puraskṛtya dvijarṣabham ॥ 26 ॥
tataḥ pramuditāssarvē dṛṣṭvā taṃ nāgarā dvijam ।
pravēśyamānaṃ satkṛtya narēndrēṇēndrakarmaṇā ॥ 27 ॥
antaḥpuraṃ pravēśyainaṃ pūjāṃ kṛtvā cha śāstrataḥ ।
kṛtakṛtyaṃ tadātmānaṃ mēnē tasyōpavāhanāt ॥ 28 ॥
antaḥpurastriyassarvāśśāntāṃ dṛṣṭvā tathāgatām ।
saha bhartrā viśālākṣīṃ prītyānandamupāgaman ॥ 29 ॥
pūjyamānā cha tābhissā rājñā chaiva viśēṣataḥ ।
uvāsa tatra sukhitā kañchitkālaṃ sahartvijā ॥ 30 ॥
ityārṣē śrīmadrāmāyaṇē vālmīkīya ādikāvyē bālakāṇḍē ēkādaśassargaḥ ॥
