శ్రీమద్వాల్మీకీయ రామాయణే బాలకాండమ్ ।
అథ ఏకాదశస్సర్గః ।
భూయ ఏవ హి రాజేంద్ర శృణు మే వచనం హితమ్ ।
యథా స దేవప్రవరః కథాయామేవమబ్రవీత్ ॥ 1 ॥
ఇక్ష్వాకూణాం కులే జాతో భవిష్యతి సుధార్మికః ।
రాజా దశరథో నామ్నా శ్రీమాన్సత్యప్రతిశ్రవః ॥ 2 ॥
అంగరాజేన సఖ్యం చ తస్య రాజ్ఞో భవిష్యతి ।
కన్యా చాస్య మహాభాగా శాంతా నామ భవిష్యతి ॥ 3 ॥
పుత్రస్తు సోఽంగరాజస్య రోమపాద ఇతి శ్రుతః ।
తం స రాజా దశరథో గమిష్యతి మహాయశాః ॥ 4 ॥
అనపత్యోఽస్మి ధర్మాత్మన్ శాంతాభర్తా మమ క్రతుమ్ ।
ఆహరేత త్వయాజ్ఞప్తస్సంతానార్థం కులస్య చ ॥ 5 ॥
శ్రుత్వా రాజ్ఞోఽథ తద్వాక్యం మనసా స విచింత్య చ ।
ప్రదాస్యతే పుత్రవంతం శాంతాభర్తారమాత్మవాన్ ॥ 6 ॥
ప్రతిగృహ్య చ తం విప్రం స రాజా విగతజ్వరః ।
ఆహరిష్యతి తం యజ్ఞం ప్రహృష్టేనాంతరాత్మనా ॥ 7 ॥
తం చ రాజా దశరథో యష్టుకామః కృతాంజలిః ।
ఋశ్యశృంగం ద్విజశ్రేష్ఠం వరయిష్యతి ధర్మవిత్ ॥ 8 ॥
యజ్ఞార్థం ప్రసవార్థం చ స్వర్గార్థం చ నరేశ్వరః ।
లభతే చ స తం కామం ద్విజముఖ్యాద్విశాంపతిః ॥ 9 ॥
పుత్రాశ్చాస్య భవిష్యంతి చత్వారోఽమితవిక్రమాః ।
వంశప్రతిష్ఠానకరాస్సర్వలోకేషు విశ్రుతాః ॥ 10 ॥
ఏవం స దేవప్రవరః పూర్వం కథితవాన్కథామ్ ।
సనత్కుమారో భగవాన్పురా దేవయుగే ప్రభుః ॥ 11 ॥
స త్వం పురుషశార్దూల తమానయ సుసత్కృతమ్ ।
స్వయమేవ మహారాజ గత్వా సబలవాహనః ॥ 12 ॥
అనుమాన్య వసిష్ఠం చ సూతవాక్యం నిశమ్య చ ।
సాంతఃపురస్సహామాత్యః ప్రయయౌ యత్ర స ద్విజః ॥ 13 ॥
వనాని సరితశ్చైవ వ్యతిక్రమ్య శనైశ్శనైః ।
అభిచక్రామ తం దేశం యత్ర వై మునిపుంగవః ॥ 14 ॥
ఆసాద్య తం ద్విజశ్రేష్ఠం రోమపాదసమీపగమ్ ।
ఋషిపుత్రం దదర్శాదౌ దీప్యమానమివానలమ్ ॥ 15 ॥
తతో రాజా యథాన్యాయం పూజాం చక్రే విశేషతః ।
సఖిత్వాత్తస్య వై రాజ్ఞః ప్రహృష్టేనాంతరాత్మనా ॥ 16 ॥
రోమపాదేన చాఖ్యాతమృషిపుత్రాయ ధీమతే ।
సఖ్యం సంబంధకం చైవ తదా తం ప్రత్యపూజయత్ ॥ 17 ॥
ఏవం సుసత్కృతస్తేన సహోషిత్వా నరర్షభః ।
సప్తాష్టదివసాన్రాజా రాజానమిదమబ్రవీత్ ॥ 18 ॥
శాంతా తవ సుతా రాజన్ సహ భర్త్రా విశాంపతే ।
మదీయనగరం యాతు కార్యం హి మహదుద్యతమ్ ॥ 19 ॥
తథేతి రాజా సంశ్రుత్య గమనం తస్య ధీమతః ।
ఉవాచ వచనం విప్రం గచ్ఛ త్వం సహ భార్యయా ॥ 20 ॥
ఋషిపుత్రః ప్రతిశ్రుత్య తథేత్యాహ నృపం తదా ।
స నృపేణాభ్యనుజ్ఞాతః ప్రయయౌ సహ భార్యయా ॥ 21 ॥
తావన్యోన్యాంజలిం కృత్వా స్నేహాత్సంశ్లిష్య చోరసా ।
ననందతుర్దశరథో రోమపాదశ్చ వీర్యవాన్ ॥ 22 ॥
తతస్సుహృదమాపృచ్ఛ్య ప్రస్థితో రఘునందనః ।
పౌరేభ్యః ప్రేషయామాస దూతాన్వై శీఘ్రగామినః ॥ 23 ॥
క్రియతాం నగరం సర్వం క్షిప్రమేవ స్వలంకృతమ్ ।
ధూపితం సిక్తసమ్మృష్టం పతాకాభిరలంకృతమ్ ॥ 24 ॥
తతః ప్రహృష్టాః పౌరాస్తే శ్రుత్వా రాజానమాగతమ్ ।
తథా ప్రచక్రుస్తత్సర్వం రాజ్ఞా యత్ప్రేషితం తదా ॥ 25 ॥
తతస్స్వలంకృతం రాజా నగరం ప్రవివేశ హ ।
శంఖదుందుభినిర్ఘోషైః పురస్కృత్య ద్విజర్షభమ్ ॥ 26 ॥
తతః ప్రముదితాస్సర్వే దృష్ట్వా తం నాగరా ద్విజమ్ ।
ప్రవేశ్యమానం సత్కృత్య నరేంద్రేణేంద్రకర్మణా ॥ 27 ॥
అంతఃపురం ప్రవేశ్యైనం పూజాం కృత్వా చ శాస్త్రతః ।
కృతకృత్యం తదాత్మానం మేనే తస్యోపవాహనాత్ ॥ 28 ॥
అంతఃపురస్త్రియస్సర్వాశ్శాంతాం దృష్ట్వా తథాగతామ్ ।
సహ భర్త్రా విశాలాక్షీం ప్రీత్యానందముపాగమన్ ॥ 29 ॥
పూజ్యమానా చ తాభిస్సా రాజ్ఞా చైవ విశేషతః ।
ఉవాస తత్ర సుఖితా కంచిత్కాలం సహర్త్విజా ॥ 30 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే ఏకాదశస్సర్గః ॥
