শ্রীমদ্বাল্মীকীয় রামাযণে বালকাংডম্ ।
অথ একাদশস্সর্গঃ ।
ভূয় এব হি রাজেংদ্র শৃণু মে বচনং হিতম্ ।
যথা স দেবপ্রবরঃ কথায়ামেবমব্রবীত্ ॥ 1 ॥
ইক্ষ্বাকূণাং কুলে জাতো ভবিষ্যতি সুধার্মিকঃ ।
রাজা দশরথো নাম্না শ্রীমান্সত্যপ্রতিশ্রবঃ ॥ 2 ॥
অংগরাজেন সখ্য়ং চ তস্য় রাজ্ঞো ভবিষ্যতি ।
কন্য়া চাস্য় মহাভাগা শাংতা নাম ভবিষ্যতি ॥ 3 ॥
পুত্রস্তু সোঽংগরাজস্য় রোমপাদ ইতি শ্রুতঃ ।
তং স রাজা দশরথো গমিষ্যতি মহাযশাঃ ॥ 4 ॥
অনপত্য়োঽস্মি ধর্মাত্মন্ শাংতাভর্তা মম ক্রতুম্ ।
আহরেত ত্বয়াজ্ঞপ্তস্সংতানার্থং কুলস্য় চ ॥ 5 ॥
শ্রুত্বা রাজ্ঞোঽথ তদ্বাক্য়ং মনসা স বিচিংত্য় চ ।
প্রদাস্যতে পুত্রবংতং শাংতাভর্তারমাত্মবান্ ॥ 6 ॥
প্রতিগৃহ্য় চ তং বিপ্রং স রাজা বিগতজ্বরঃ ।
আহরিষ্যতি তং যজ্ঞং প্রহৃষ্টেনাংতরাত্মনা ॥ 7 ॥
তং চ রাজা দশরথো যষ্টুকামঃ কৃতাংজলিঃ ।
ঋশ্যশৃংগং দ্বিজশ্রেষ্ঠং বরয়িষ্যতি ধর্মবিত্ ॥ 8 ॥
যজ্ঞার্থং প্রসবার্থং চ স্বর্গার্থং চ নরেশ্বরঃ ।
লভতে চ স তং কামং দ্বিজমুখ্য়াদ্বিশাংপতিঃ ॥ 9 ॥
পুত্রাশ্চাস্য় ভবিষ্য়ংতি চত্বারোঽমিতবিক্রমাঃ ।
বংশপ্রতিষ্ঠানকরাস্সর্বলোকেষু বিশ্রুতাঃ ॥ 10 ॥
এবং স দেবপ্রবরঃ পূর্বং কথিতবান্কথাম্ ।
সনত্কুমারো ভগবান্পুরা দেবয়ুগে প্রভুঃ ॥ 11 ॥
স ত্বং পুরুষশার্দূল তমানয় সুসত্কৃতম্ ।
স্বযমেব মহারাজ গত্বা সবলবাহনঃ ॥ 12 ॥
অনুমান্য় বসিষ্ঠং চ সূতবাক্য়ং নিশম্য় চ ।
সাংতঃপুরস্সহামাত্য়ঃ প্রযয়ৌ যত্র স দ্বিজঃ ॥ 13 ॥
বনানি সরিতশ্চৈব ব্যতিক্রম্য় শনৈশ্শনৈঃ ।
অভিচক্রাম তং দেশং যত্র বৈ মুনিপুংগবঃ ॥ 14 ॥
আসাদ্য় তং দ্বিজশ্রেষ্ঠং রোমপাদসমীপগম্ ।
ঋষিপুত্রং দদর্শাদৌ দীপ্যমানমিবানলম্ ॥ 15 ॥
ততো রাজা যথান্য়ায়ং পূজাং চক্রে বিশেষতঃ ।
সখিত্বাত্তস্য় বৈ রাজ্ঞঃ প্রহৃষ্টেনাংতরাত্মনা ॥ 16 ॥
রোমপাদেন চাখ্য়াতমৃষিপুত্রায় ধীমতে ।
সখ্য়ং সংবংধকং চৈব তদা তং প্রত্যপূজযত্ ॥ 17 ॥
এবং সুসত্কৃতস্তেন সহোষিত্বা নরর্ষভঃ ।
সপ্তাষ্টদিবসান্রাজা রাজানমিদমব্রবীত্ ॥ 18 ॥
শাংতা তব সুতা রাজন্ সহ ভর্ত্রা বিশাংপতে ।
মদীযনগরং যাতু কার্য়ং হি মহদুদ্যতম্ ॥ 19 ॥
তথেতি রাজা সংশ্রুত্য় গমনং তস্য় ধীমতঃ ।
উবাচ বচনং বিপ্রং গচ্ছ ত্বং সহ ভার্যয়া ॥ 20 ॥
ঋষিপুত্রঃ প্রতিশ্রুত্য় তথেত্য়াহ নৃপং তদা ।
স নৃপেণাভ্যনুজ্ঞাতঃ প্রযয়ৌ সহ ভার্যয়া ॥ 21 ॥
তাবন্য়োন্য়াংজলিং কৃত্বা স্নেহাত্সংশ্লিষ্য় চোরসা ।
ননংদতুর্দশরথো রোমপাদশ্চ বীর্যবান্ ॥ 22 ॥
ততস্সুহৃদমাপৃচ্ছ্য় প্রস্থিতো রঘুনংদনঃ ।
পৌরেভ্য়ঃ প্রেষয়ামাস দূতান্বৈ শীঘ্রগামিনঃ ॥ 23 ॥
ক্রিযতাং নগরং সর্বং ক্ষিপ্রমেব স্বলংকৃতম্ ।
ধূপিতং সিক্তসম্মৃষ্টং পতাকাভিরলংকৃতম্ ॥ 24 ॥
ততঃ প্রহৃষ্টাঃ পৌরাস্তে শ্রুত্বা রাজানমাগতম্ ।
তথা প্রচক্রুস্তত্সর্বং রাজ্ঞা যত্প্রেষিতং তদা ॥ 25 ॥
ততস্স্বলংকৃতং রাজা নগরং প্রবিবেশ হ ।
শংখদুংদুভিনির্ঘোষৈঃ পুরস্কৃত্য় দ্বিজর্ষভম্ ॥ 26 ॥
ততঃ প্রমুদিতাস্সর্বে দৃষ্ট্বা তং নাগরা দ্বিজম্ ।
প্রবেশ্যমানং সত্কৃত্য় নরেংদ্রেণেংদ্রকর্মণা ॥ 27 ॥
অংতঃপুরং প্রবেশ্য়ৈনং পূজাং কৃত্বা চ শাস্ত্রতঃ ।
কৃতকৃত্য়ং তদাত্মানং মেনে তস্য়োপবাহনাত্ ॥ 28 ॥
অংতঃপুরস্ত্রিযস্সর্বাশ্শাংতাং দৃষ্ট্বা তথাগতাম্ ।
সহ ভর্ত্রা বিশালাক্ষীং প্রীত্য়ানংদমুপাগমন্ ॥ 29 ॥
পূজ্যমানা চ তাভিস্সা রাজ্ঞা চৈব বিশেষতঃ ।
উবাস তত্র সুখিতা কংচিত্কালং সহর্ত্বিজা ॥ 30 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে বালকাংডে একাদশস্সর্গঃ ॥
