ശ്രീമദ്വാല്മീകീയ രാമായണേ ബാലകാംഡമ് ।
അഥ ഏകാദശസ്സര്ഗഃ ।
ഭൂയ ഏവ ഹി രാജേംദ്ര ശൃണു മേ വചനം ഹിതമ് ।
യഥാ സ ദേവപ്രവരഃ കഥായാമേവമബ്രവീത് ॥ 1 ॥
ഇക്ഷ്വാകൂണാം കുലേ ജാതോ ഭവിഷ്യതി സുധാര്മികഃ ।
രാജാ ദശരഥോ നാമ്നാ ശ്രീമാന്സത്യപ്രതിശ്രവഃ ॥ 2 ॥
അംഗരാജേന സഖ്യം ച തസ്യ രാജ്ഞോ ഭവിഷ്യതി ।
കന്യാ ചാസ്യ മഹാഭാഗാ ശാംതാ നാമ ഭവിഷ്യതി ॥ 3 ॥
പുത്രസ്തു സോഽംഗരാജസ്യ രോമപാദ ഇതി ശ്രുതഃ ।
തം സ രാജാ ദശരഥോ ഗമിഷ്യതി മഹായശാഃ ॥ 4 ॥
അനപത്യോഽസ്മി ധര്മാത്മന് ശാംതാഭര്താ മമ ക്രതുമ് ।
ആഹരേത ത്വയാജ്ഞപ്തസ്സംതാനാര്ഥം കുലസ്യ ച ॥ 5 ॥
ശ്രുത്വാ രാജ്ഞോഽഥ തദ്വാക്യം മനസാ സ വിചിംത്യ ച ।
പ്രദാസ്യതേ പുത്രവംതം ശാംതാഭര്താരമാത്മവാന് ॥ 6 ॥
പ്രതിഗൃഹ്യ ച തം വിപ്രം സ രാജാ വിഗതജ്വരഃ ।
ആഹരിഷ്യതി തം യജ്ഞം പ്രഹൃഷ്ടേനാംതരാത്മനാ ॥ 7 ॥
തം ച രാജാ ദശരഥോ യഷ്ടുകാമഃ കൃതാംജലിഃ ।
ഋശ്യശൃംഗം ദ്വിജശ്രേഷ്ഠം വരയിഷ്യതി ധര്മവിത് ॥ 8 ॥
യജ്ഞാര്ഥം പ്രസവാര്ഥം ച സ്വര്ഗാര്ഥം ച നരേശ്വരഃ ।
ലഭതേ ച സ തം കാമം ദ്വിജമുഖ്യാദ്വിശാംപതിഃ ॥ 9 ॥
പുത്രാശ്ചാസ്യ ഭവിഷ്യംതി ചത്വാരോഽമിതവിക്രമാഃ ।
വംശപ്രതിഷ്ഠാനകരാസ്സർവലോകേഷു വിശ്രുതാഃ ॥ 10 ॥
ഏവം സ ദേവപ്രവരഃ പൂർവം കഥിതവാന്കഥാമ് ।
സനത്കുമാരോ ഭഗവാന്പുരാ ദേവയുഗേ പ്രഭുഃ ॥ 11 ॥
സ ത്വം പുരുഷശാര്ദൂല തമാനയ സുസത്കൃതമ് ।
സ്വയമേവ മഹാരാജ ഗത്വാ സബലവാഹനഃ ॥ 12 ॥
അനുമാന്യ വസിഷ്ഠം ച സൂതവാക്യം നിശമ്യ ച ।
സാംതഃപുരസ്സഹാമാത്യഃ പ്രയയൌ യത്ര സ ദ്വിജഃ ॥ 13 ॥
വനാനി സരിതശ്ചൈവ വ്യതിക്രമ്യ ശനൈശ്ശനൈഃ ।
അഭിചക്രാമ തം ദേശം യത്ര വൈ മുനിപുംഗവഃ ॥ 14 ॥
ആസാദ്യ തം ദ്വിജശ്രേഷ്ഠം രോമപാദസമീപഗമ് ।
ഋഷിപുത്രം ദദര്ശാദൌ ദീപ്യമാനമിവാനലമ് ॥ 15 ॥
തതോ രാജാ യഥാന്യായം പൂജാം ചക്രേ വിശേഷതഃ ।
സഖിത്വാത്തസ്യ വൈ രാജ്ഞഃ പ്രഹൃഷ്ടേനാംതരാത്മനാ ॥ 16 ॥
രോമപാദേന ചാഖ്യാതമൃഷിപുത്രായ ധീമതേ ।
സഖ്യം സംബംധകം ചൈവ തദാ തം പ്രത്യപൂജയത് ॥ 17 ॥
ഏവം സുസത്കൃതസ്തേന സഹോഷിത്വാ നരര്ഷഭഃ ।
സപ്താഷ്ടദിവസാന്രാജാ രാജാനമിദമബ്രവീത് ॥ 18 ॥
ശാംതാ തവ സുതാ രാജന് സഹ ഭര്ത്രാ വിശാംപതേ ।
മദീയനഗരം യാതു കാര്യം ഹി മഹദുദ്യതമ് ॥ 19 ॥
തഥേതി രാജാ സംശ്രുത്യ ഗമനം തസ്യ ധീമതഃ ।
ഉവാച വചനം വിപ്രം ഗച്ഛ ത്വം സഹ ഭാര്യയാ ॥ 20 ॥
ഋഷിപുത്രഃ പ്രതിശ്രുത്യ തഥേത്യാഹ നൃപം തദാ ।
സ നൃപേണാഭ്യനുജ്ഞാതഃ പ്രയയൌ സഹ ഭാര്യയാ ॥ 21 ॥
താവന്യോന്യാംജലിം കൃത്വാ സ്നേഹാത്സംശ്ലിഷ്യ ചോരസാ ।
നനംദതുര്ദശരഥോ രോമപാദശ്ച വീര്യവാന് ॥ 22 ॥
തതസ്സുഹൃദമാപൃച്ഛ്യ പ്രസ്ഥിതോ രഘുനംദനഃ ।
പൌരേഭ്യഃ പ്രേഷയാമാസ ദൂതാന്വൈ ശീഘ്രഗാമിനഃ ॥ 23 ॥
ക്രിയതാം നഗരം സർവം ക്ഷിപ്രമേവ സ്വലംകൃതമ് ।
ധൂപിതം സിക്തസമ്മൃഷ്ടം പതാകാഭിരലംകൃതമ് ॥ 24 ॥
തതഃ പ്രഹൃഷ്ടാഃ പൌരാസ്തേ ശ്രുത്വാ രാജാനമാഗതമ് ।
തഥാ പ്രചക്രുസ്തത്സർവം രാജ്ഞാ യത്പ്രേഷിതം തദാ ॥ 25 ॥
തതസ്സ്വലംകൃതം രാജാ നഗരം പ്രവിവേശ ഹ ।
ശംഖദുംദുഭിനിര്ഘോഷൈഃ പുരസ്കൃത്യ ദ്വിജര്ഷഭമ് ॥ 26 ॥
തതഃ പ്രമുദിതാസ്സർവേ ദൃഷ്ട്വാ തം നാഗരാ ദ്വിജമ് ।
പ്രവേശ്യമാനം സത്കൃത്യ നരേംദ്രേണേംദ്രകര്മണാ ॥ 27 ॥
അംതഃപുരം പ്രവേശ്യൈനം പൂജാം കൃത്വാ ച ശാസ്ത്രതഃ ।
കൃതകൃത്യം തദാത്മാനം മേനേ തസ്യോപവാഹനാത് ॥ 28 ॥
അംതഃപുരസ്ത്രിയസ്സർവാശ്ശാംതാം ദൃഷ്ട്വാ തഥാഗതാമ് ।
സഹ ഭര്ത്രാ വിശാലാക്ഷീം പ്രീത്യാനംദമുപാഗമന് ॥ 29 ॥
പൂജ്യമാനാ ച താഭിസ്സാ രാജ്ഞാ ചൈവ വിശേഷതഃ ।
ഉവാസ തത്ര സുഖിതാ കംചിത്കാലം സഹര്ത്വിജാ ॥ 30 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ഏകാദശസ്സര്ഗഃ ॥
