ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ତ୍ରିପଂଚାଶସ୍ସର୍ଗଃ ।
ଏଵମୁକ୍ତା ଵସିଷ୍ଠେନ ଶବଲା ଶତ୍ରୁସୂଦନ ।
ଵିଦଧେ କାମଧୁକ୍କାମାନ୍ୟସ୍ୟ ୟସ୍ୟ ୟଥେପ୍ସିତମ୍ ॥ 1 ॥
ଇକ୍ଷୂନ୍ମଧୂଂ ସ୍ତଥା ଲାଜାନ୍ମୈରେୟାଂଶ୍ଚ ଵରାସନାନ୍ ।
ପାନାନି ଚ ମହାର୍ହାଣି ଭକ୍ଷ୍ୟାଂଶ୍ଚୋଚ୍ଚାଵଚାଂ ସ୍ତଥା ॥ 2 ॥
ଉଷ୍ଣାଢ୍ୟସ୍ୟୋଦନସ୍ୟାତ୍ର ରାଶୟଃ ପର୍ଵତୋପମାଃ ।
ମୃଷ୍ଟାନ୍ନାନି ଚ ସୂପାଶ୍ଚ ଦଧିକୁଲ୍ୟାସ୍ତଥୈଵ ଚ ॥ 3 ॥
ନାନାସ୍ଵାଦୁରସାନାଂ ଚ ଷାଡବାନାଂ ତଥୈଵ ଚ ।
ଭାଜନାନି ସୁପୂର୍ଣାନି ଗୌଡାନି ଚ ସହସ୍ରଶଃ ॥ 4 ॥
ସର୍ଵମାସୀତ୍ସୁସଂତୁଷ୍ଠଂ ହୃଷ୍ଟପୁଷ୍ଟଜନାୟୁତମ୍ ।
ଵିଶ୍ଵାମିତ୍ରବଲଂ ରାମ ଵସିଷ୍ଠେନାଭିତର୍ପିତମ୍ ॥ 5 ॥
ଵିଶ୍ଵାମିତ୍ରୋଽପି ରାଜର୍ଷିର୍ହୃଷ୍ଟଃ ପୁଷ୍ଟସ୍ତଦାଭଵତ୍ ।
ସାଂତଃପୁରଵରୋ ରାଜା ସବ୍ରାହ୍ମଣପୁରୋହିତଃ ॥ 6 ॥
ସାମାତ୍ୟୋ ମଂତ୍ରିସହିତସ୍ସଭୃତ୍ୟଃ ପୂଜିତସ୍ତଦା ।
ୟୁକ୍ତଃ ପରମହର୍ଷେଣ ଵସିଷ୍ଠମିଦମବ୍ରଵୀତ୍ ॥ 7 ॥
ପୂଜିତୋଽହଂ ତ୍ଵୟା ବ୍ରହ୍ମନ୍ ପୂଜାର୍ହେଣ ସୁସତ୍କୃତଃ ।
ଶ୍ରୂୟତାମଭିଧାସ୍ୟାମି ଵାକ୍ୟଂ ଵାକ୍ୟଵିଶାରଦ ॥ 8 ॥
ଗଵାଂ ଶତସହସ୍ରେଣ ଦୀୟତାଂ ଶବଲା ମମ ।
ରତ୍ନଂ ହି ଭଗଵନ୍ନେତଦ୍ରତ୍ନହାରୀ ଚ ପ୍ରାର୍ଥିଵଃ ॥ 9 ॥
ତସ୍ମାନ୍ମେ ଶବଲାଂ ଦେହି ମମୈଷା ଧର୍ମତୋ ଦ୍ଵିଜ ।
ଏଵମୁକ୍ତସ୍ତୁ ଭଗଵାନ୍ଵସିଷ୍ଠୋ ମୁନିସତ୍ତମଃ ।
ଵିଶ୍ଵାମିତ୍ରେଣ ଧର୍ମାତ୍ମା ପ୍ରତ୍ୟୁଵାଚ ମହୀପତିମ୍ ॥ 10 ॥
ନାହଂ ଶତସହସ୍ରେଣ ନାପି କୋଟିଶତୈର୍ଗଵାମ୍ ।
ରାଜନ୍ ଦାସ୍ୟାମି ଶବଲାଂ ରାଶିଭୀ ରଜତସ୍ୟ ଚ ॥ 11 ॥
ନ ପରିତ୍ୟାଗମର୍ହେୟଂ ମତ୍ସକାଶାଦରିଂଦମ ।
ଶାଶ୍ଵତୀ ଶବଲା ମହ୍ୟଂ କୀର୍ତିରାତ୍ମଵତୋ ୟଥା ॥ 12 ॥
ଅସ୍ୟାଂ ହଵ୍ୟଂ ଚ କଵ୍ୟଂ ଚ ପ୍ରାଣୟାତ୍ରା ତଥୈଵ ଚ ।
ଆୟତ୍ତମଗ୍ନିହୋତ୍ରଂ ଚ ବଲିର୍ହୋମସ୍ତଥୈଵ ଚ ॥ 13 ॥
ସ୍ଵାହାକାରଵଷଟ୍କାରୌ ଵିଦ୍ୟାଶ୍ଚ ଵିଵିଧା ସ୍ତଥା ।
ଆୟତ୍ତମତ୍ର ରାଜର୍ଷେ ସର୍ଵମେତନ୍ନ ସଂଶୟଃ ॥ 14 ॥
ସର୍ଵସ୍ଵମେତତ୍ସତ୍ୟେନ ମମ ତୁଷ୍ଟିକରୀ ସଦା ।
କାରଣୈର୍ବହୁଭୀ ରାଜନ୍ନ ଦାସ୍ୟେ ଶବଲାଂ ତଵ ॥ 15 ॥
ଵସିଷ୍ଠେନୈଵମୁକ୍ତସ୍ତୁ ଵିଶ୍ଵାମିତ୍ରୋଽବ୍ରଵୀତ୍ତତଃ ।
ସଂରବ୍ଧତରମତ୍ୟର୍ଥଂ ଵାକ୍ୟଂ ଵାକ୍ୟଵିଶାରଦଃ ॥ 16 ॥
ହୈରଣ୍ୟକକ୍ଷ୍ୟାଗ୍ରୈଵେୟାନ୍ ସୁଵର୍ଣାଂକୁଶଭୂଷିତାନ୍ ।
ଦଦାମି କୁଂଜରାଂସ୍ତେଷାଂ ସହସ୍ରାଣି ଚତୁର୍ଦଶ ॥ 17 ॥
ହୈରଣ୍ୟାନାଂ ରଥାନାଂ ଚ ଶ୍ଵେତାଶ୍ଵାନାଂ ଚତୁର୍ୟୁଜାମ୍ ।
ଦଦାମି ତେ ଶତାନ୍ୟଷ୍ଟୌ କିଂକିଣୀକଵିଭୂଷିତାନ୍ ॥ 18 ॥
ହୟାନାଂ ଦେଶଜାତାନାଂ କୁଲଜାନାଂ ମହୌଜସାମ୍ ।
ସହସ୍ରମେକଂ ଦଶ ଚ ଦଦାମି ତଵ ସୁଵ୍ରତ ॥ 19 ॥
ନାନାଵର୍ଣଵିଭକ୍ତାନାଂ ଵୟସ୍ସ୍ଥାନାଂ ତଥୈଵ ଚ ।
ଦଦାମ୍ୟେକାଂ ଗଵାଂ କୋଟିଂ ଶବଲା ଦୀୟତାଂ ମମ ॥ 20 ॥
ୟାଵଦିଚ୍ଛସି ରତ୍ନଂ ଵା ହିରଣ୍ୟଂ ଵା ଦ୍ଵିଜୋତ୍ତମ ।
ତାଵଦ୍ଦଦାମି ତତ୍ସର୍ଵଂ ଶବଲା ଦୀୟତାଂ ମମ ॥ 21 ॥
ଏଵମୁକ୍ତସ୍ତୁ ଭଗଵାନ୍ ଵିଶ୍ଵାମିତ୍ରେଣ ଧୀମତା ।
ନ ଦାସ୍ୟାମୀତି ଶବଲାଂ ପ୍ରାହ ରାଜନ୍ କଥଂଚନ ॥ 22 ॥
ଏତଦେଵ ହି ମେ ରତ୍ନମେତଦେଵ ହି ମେ ଧନମ୍ ।
ଏତଦେଵ ହି ସର୍ଵସ୍ଵମେତଦେଵ ହି ଜୀଵିତମ୍ ॥ 23 ॥
ଦର୍ଶଶ୍ଚ ପୂର୍ଣମାସଶ୍ଚ ୟଜ୍ଞାଶ୍ଚୈଵାପ୍ତଦକ୍ଷିଣାଃ ।
ଏତଦେଵ ହି ମେ ରାଜନ୍ ଵିଵିଧାଶ୍ଚ କ୍ରିୟାସ୍ତଥା ॥ 24 ॥
ଅଦୋମୂଲାଃ କ୍ରିୟାସ୍ସର୍ଵା ମମ ରାଜନ୍ନ ସଂଶୟଃ ।
ବହୁନା କିଂ ପ୍ରଲାପେନ ନ ଦାସ୍ୟେ କାମଦୋହିନୀମ୍ ॥ 25 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ତ୍ରିପଂଚାଶସ୍ସର୍ଗଃ ॥
