শ্রীমদ্বাল্মীকীয় রামাযণে বালকাংডম্ ।
অথ ত্রিপংচাশস্সর্গঃ ।
এবমুক্তা বসিষ্ঠেন শবলা শত্রুসূদন ।
বিদধে কামধুক্কামান্যস্য় যস্য় যথেপ্সিতম্ ॥ 1 ॥
ইক্ষূন্মধূং স্তথা লাজান্মৈরেয়াংশ্চ বরাসনান্ ।
পানানি চ মহার্হাণি ভক্ষ্য়াংশ্চোচ্চাবচাং স্তথা ॥ 2 ॥
উষ্ণাঢ্যস্য়োদনস্য়াত্র রাশয়ঃ পর্বতোপমাঃ ।
মৃষ্টান্নানি চ সূপাশ্চ দধিকুল্য়াস্তথৈব চ ॥ 3 ॥
নানাস্বাদুরসানাং চ ষাডবানাং তথৈব চ ।
ভাজনানি সুপূর্ণানি গৌডানি চ সহস্রশঃ ॥ 4 ॥
সর্বমাসীত্সুসংতুষ্ঠং হৃষ্টপুষ্টজনায়ুতম্ ।
বিশ্বামিত্রবলং রাম বসিষ্ঠেনাভিতর্পিতম্ ॥ 5 ॥
বিশ্বামিত্রোঽপি রাজর্ষির্হৃষ্টঃ পুষ্টস্তদাভবত্ ।
সাংতঃপুরবরো রাজা সব্রাহ্মণপুরোহিতঃ ॥ 6 ॥
সামাত্য়ো মংত্রিসহিতস্সভৃত্য়ঃ পূজিতস্তদা ।
যুক্তঃ পরমহর্ষেণ বসিষ্ঠমিদমব্রবীত্ ॥ 7 ॥
পূজিতোঽহং ত্বয়া ব্রহ্মন্ পূজার্হেণ সুসত্কৃতঃ ।
শ্রূযতামভিধাস্য়ামি বাক্য়ং বাক্যবিশারদ ॥ 8 ॥
গবাং শতসহস্রেণ দীযতাং শবলা মম ।
রত্নং হি ভগবন্নেতদ্রত্নহারী চ প্রার্থিবঃ ॥ 9 ॥
তস্মান্মে শবলাং দেহি মমৈষা ধর্মতো দ্বিজ ।
এবমুক্তস্তু ভগবান্বসিষ্ঠো মুনিসত্তমঃ ।
বিশ্বামিত্রেণ ধর্মাত্মা প্রত্য়ুবাচ মহীপতিম্ ॥ 10 ॥
নাহং শতসহস্রেণ নাপি কোটিশতৈর্গবাম্ ।
রাজন্ দাস্য়ামি শবলাং রাশিভী রজতস্য় চ ॥ 11 ॥
ন পরিত্য়াগমর্হেয়ং মত্সকাশাদরিংদম ।
শাশ্বতী শবলা মহ্য়ং কীর্তিরাত্মবতো যথা ॥ 12 ॥
অস্য়াং হব্য়ং চ কব্য়ং চ প্রাণয়াত্রা তথৈব চ ।
আযত্তমগ্নিহোত্রং চ বলির্হোমস্তথৈব চ ॥ 13 ॥
স্বাহাকারবষট্কারৌ বিদ্য়াশ্চ বিবিধা স্তথা ।
আযত্তমত্র রাজর্ষে সর্বমেতন্ন সংশয়ঃ ॥ 14 ॥
সর্বস্বমেতত্সত্য়েন মম তুষ্টিকরী সদা ।
কারণৈর্বহুভী রাজন্ন দাস্য়ে শবলাং তব ॥ 15 ॥
বসিষ্ঠেনৈবমুক্তস্তু বিশ্বামিত্রোঽব্রবীত্ততঃ ।
সংরব্ধতরমত্যর্থং বাক্য়ং বাক্যবিশারদঃ ॥ 16 ॥
হৈরণ্যকক্ষ্য়াগ্রৈবেয়ান্ সুবর্ণাংকুশভূষিতান্ ।
দদামি কুংজরাংস্তেষাং সহস্রাণি চতুর্দশ ॥ 17 ॥
হৈরণ্য়ানাং রথানাং চ শ্বেতাশ্বানাং চতুর্য়ুজাম্ ।
দদামি তে শতান্যষ্টৌ কিংকিণীকবিভূষিতান্ ॥ 18 ॥
হয়ানাং দেশজাতানাং কুলজানাং মহৌজসাম্ ।
সহস্রমেকং দশ চ দদামি তব সুব্রত ॥ 19 ॥
নানাবর্ণবিভক্তানাং বযস্স্থানাং তথৈব চ ।
দদাম্য়েকাং গবাং কোটিং শবলা দীযতাং মম ॥ 20 ॥
যাবদিচ্ছসি রত্নং বা হিরণ্য়ং বা দ্বিজোত্তম ।
তাবদ্দদামি তত্সর্বং শবলা দীযতাং মম ॥ 21 ॥
এবমুক্তস্তু ভগবান্ বিশ্বামিত্রেণ ধীমতা ।
ন দাস্য়ামীতি শবলাং প্রাহ রাজন্ কথংচন ॥ 22 ॥
এতদেব হি মে রত্নমেতদেব হি মে ধনম্ ।
এতদেব হি সর্বস্বমেতদেব হি জীবিতম্ ॥ 23 ॥
দর্শশ্চ পূর্ণমাসশ্চ যজ্ঞাশ্চৈবাপ্তদক্ষিণাঃ ।
এতদেব হি মে রাজন্ বিবিধাশ্চ ক্রিয়াস্তথা ॥ 24 ॥
অদোমূলাঃ ক্রিয়াস্সর্বা মম রাজন্ন সংশয়ঃ ।
বহুনা কিং প্রলাপেন ন দাস্য়ে কামদোহিনীম্ ॥ 25 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে বালকাংডে ত্রিপংচাশস্সর্গঃ ॥
