śrīmadvālmīkīya rāmāyaṇē bālakāṇḍam ।
atha tripañchāśassargaḥ ।
ēvamuktā vasiṣṭhēna śabalā śatrusūdana ।
vidadhē kāmadhukkāmānyasya yasya yathēpsitam ॥ 1 ॥
ikṣūnmadhūṃ stathā lājānmairēyāṃścha varāsanān ।
pānāni cha mahārhāṇi bhakṣyāṃśchōchchāvachāṃ stathā ॥ 2 ॥
uṣṇāḍhyasyōdanasyātra rāśayaḥ parvatōpamāḥ ।
mṛṣṭānnāni cha sūpāścha dadhikulyāstathaiva cha ॥ 3 ॥
nānāsvādurasānāṃ cha ṣāḍabānāṃ tathaiva cha ।
bhājanāni supūrṇāni gauḍāni cha sahasraśaḥ ॥ 4 ॥
sarvamāsītsusantuṣṭhaṃ hṛṣṭapuṣṭajanāyutam ।
viśvāmitrabalaṃ rāma vasiṣṭhēnābhitarpitam ॥ 5 ॥
viśvāmitrō'pi rājarṣirhṛṣṭaḥ puṣṭastadābhavat ।
sāntaḥpuravarō rājā sabrāhmaṇapurōhitaḥ ॥ 6 ॥
sāmātyō mantrisahitassabhṛtyaḥ pūjitastadā ।
yuktaḥ paramaharṣēṇa vasiṣṭhamidamabravīt ॥ 7 ॥
pūjitō'haṃ tvayā brahman pūjārhēṇa susatkṛtaḥ ।
śrūyatāmabhidhāsyāmi vākyaṃ vākyaviśārada ॥ 8 ॥
gavāṃ śatasahasrēṇa dīyatāṃ śabalā mama ।
ratnaṃ hi bhagavannētadratnahārī cha prārthivaḥ ॥ 9 ॥
tasmānmē śabalāṃ dēhi mamaiṣā dharmatō dvija ।
ēvamuktastu bhagavānvasiṣṭhō munisattamaḥ ।
viśvāmitrēṇa dharmātmā pratyuvācha mahīpatim ॥ 10 ॥
nāhaṃ śatasahasrēṇa nāpi kōṭiśatairgavām ।
rājan dāsyāmi śabalāṃ rāśibhī rajatasya cha ॥ 11 ॥
na parityāgamarhēyaṃ matsakāśādarindama ।
śāśvatī śabalā mahyaṃ kīrtirātmavatō yathā ॥ 12 ॥
asyāṃ havyaṃ cha kavyaṃ cha prāṇayātrā tathaiva cha ।
āyattamagnihōtraṃ cha balirhōmastathaiva cha ॥ 13 ॥
svāhākāravaṣaṭkārau vidyāścha vividhā stathā ।
āyattamatra rājarṣē sarvamētanna saṃśayaḥ ॥ 14 ॥
sarvasvamētatsatyēna mama tuṣṭikarī sadā ।
kāraṇairbahubhī rājanna dāsyē śabalāṃ tava ॥ 15 ॥
vasiṣṭhēnaivamuktastu viśvāmitrō'bravīttataḥ ।
saṃrabdhataramatyarthaṃ vākyaṃ vākyaviśāradaḥ ॥ 16 ॥
hairaṇyakakṣyāgraivēyān suvarṇāṅkuśabhūṣitān ।
dadāmi kuñjarāṃstēṣāṃ sahasrāṇi chaturdaśa ॥ 17 ॥
hairaṇyānāṃ rathānāṃ cha śvētāśvānāṃ chaturyujām ।
dadāmi tē śatānyaṣṭau kiṅkiṇīkavibhūṣitān ॥ 18 ॥
hayānāṃ dēśajātānāṃ kulajānāṃ mahaujasām ।
sahasramēkaṃ daśa cha dadāmi tava suvrata ॥ 19 ॥
nānāvarṇavibhaktānāṃ vayassthānāṃ tathaiva cha ।
dadāmyēkāṃ gavāṃ kōṭiṃ śabalā dīyatāṃ mama ॥ 20 ॥
yāvadichChasi ratnaṃ vā hiraṇyaṃ vā dvijōttama ।
tāvaddadāmi tatsarvaṃ śabalā dīyatāṃ mama ॥ 21 ॥
ēvamuktastu bhagavān viśvāmitrēṇa dhīmatā ।
na dāsyāmīti śabalāṃ prāha rājan kathañchana ॥ 22 ॥
ētadēva hi mē ratnamētadēva hi mē dhanam ।
ētadēva hi sarvasvamētadēva hi jīvitam ॥ 23 ॥
darśaścha pūrṇamāsaścha yajñāśchaivāptadakṣiṇāḥ ।
ētadēva hi mē rājan vividhāścha kriyāstathā ॥ 24 ॥
adōmūlāḥ kriyāssarvā mama rājanna saṃśayaḥ ।
bahunā kiṃ pralāpēna na dāsyē kāmadōhinīm ॥ 25 ॥
ityārṣē śrīmadrāmāyaṇē vālmīkīya ādikāvyē bālakāṇḍē tripañchāśassargaḥ ॥
