శ్రీమద్వాల్మీకీయ రామాయణే బాలకాండమ్ ।
అథ త్రిపంచాశస్సర్గః ।
ఏవముక్తా వసిష్ఠేన శబలా శత్రుసూదన ।
విదధే కామధుక్కామాన్యస్య యస్య యథేప్సితమ్ ॥ 1 ॥
ఇక్షూన్మధూం స్తథా లాజాన్మైరేయాంశ్చ వరాసనాన్ ।
పానాని చ మహార్హాణి భక్ష్యాంశ్చోచ్చావచాం స్తథా ॥ 2 ॥
ఉష్ణాఢ్యస్యోదనస్యాత్ర రాశయః పర్వతోపమాః ।
మృష్టాన్నాని చ సూపాశ్చ దధికుల్యాస్తథైవ చ ॥ 3 ॥
నానాస్వాదురసానాం చ షాడబానాం తథైవ చ ।
భాజనాని సుపూర్ణాని గౌడాని చ సహస్రశః ॥ 4 ॥
సర్వమాసీత్సుసంతుష్ఠం హృష్టపుష్టజనాయుతమ్ ।
విశ్వామిత్రబలం రామ వసిష్ఠేనాభితర్పితమ్ ॥ 5 ॥
విశ్వామిత్రోఽపి రాజర్షిర్హృష్టః పుష్టస్తదాభవత్ ।
సాంతఃపురవరో రాజా సబ్రాహ్మణపురోహితః ॥ 6 ॥
సామాత్యో మంత్రిసహితస్సభృత్యః పూజితస్తదా ।
యుక్తః పరమహర్షేణ వసిష్ఠమిదమబ్రవీత్ ॥ 7 ॥
పూజితోఽహం త్వయా బ్రహ్మన్ పూజార్హేణ సుసత్కృతః ।
శ్రూయతామభిధాస్యామి వాక్యం వాక్యవిశారద ॥ 8 ॥
గవాం శతసహస్రేణ దీయతాం శబలా మమ ।
రత్నం హి భగవన్నేతద్రత్నహారీ చ ప్రార్థివః ॥ 9 ॥
తస్మాన్మే శబలాం దేహి మమైషా ధర్మతో ద్విజ ।
ఏవముక్తస్తు భగవాన్వసిష్ఠో మునిసత్తమః ।
విశ్వామిత్రేణ ధర్మాత్మా ప్రత్యువాచ మహీపతిమ్ ॥ 10 ॥
నాహం శతసహస్రేణ నాపి కోటిశతైర్గవామ్ ।
రాజన్ దాస్యామి శబలాం రాశిభీ రజతస్య చ ॥ 11 ॥
న పరిత్యాగమర్హేయం మత్సకాశాదరిందమ ।
శాశ్వతీ శబలా మహ్యం కీర్తిరాత్మవతో యథా ॥ 12 ॥
అస్యాం హవ్యం చ కవ్యం చ ప్రాణయాత్రా తథైవ చ ।
ఆయత్తమగ్నిహోత్రం చ బలిర్హోమస్తథైవ చ ॥ 13 ॥
స్వాహాకారవషట్కారౌ విద్యాశ్చ వివిధా స్తథా ।
ఆయత్తమత్ర రాజర్షే సర్వమేతన్న సంశయః ॥ 14 ॥
సర్వస్వమేతత్సత్యేన మమ తుష్టికరీ సదా ।
కారణైర్బహుభీ రాజన్న దాస్యే శబలాం తవ ॥ 15 ॥
వసిష్ఠేనైవముక్తస్తు విశ్వామిత్రోఽబ్రవీత్తతః ।
సంరబ్ధతరమత్యర్థం వాక్యం వాక్యవిశారదః ॥ 16 ॥
హైరణ్యకక్ష్యాగ్రైవేయాన్ సువర్ణాంకుశభూషితాన్ ।
దదామి కుంజరాంస్తేషాం సహస్రాణి చతుర్దశ ॥ 17 ॥
హైరణ్యానాం రథానాం చ శ్వేతాశ్వానాం చతుర్యుజామ్ ।
దదామి తే శతాన్యష్టౌ కింకిణీకవిభూషితాన్ ॥ 18 ॥
హయానాం దేశజాతానాం కులజానాం మహౌజసామ్ ।
సహస్రమేకం దశ చ దదామి తవ సువ్రత ॥ 19 ॥
నానావర్ణవిభక్తానాం వయస్స్థానాం తథైవ చ ।
దదామ్యేకాం గవాం కోటిం శబలా దీయతాం మమ ॥ 20 ॥
యావదిచ్ఛసి రత్నం వా హిరణ్యం వా ద్విజోత్తమ ।
తావద్దదామి తత్సర్వం శబలా దీయతాం మమ ॥ 21 ॥
ఏవముక్తస్తు భగవాన్ విశ్వామిత్రేణ ధీమతా ।
న దాస్యామీతి శబలాం ప్రాహ రాజన్ కథంచన ॥ 22 ॥
ఏతదేవ హి మే రత్నమేతదేవ హి మే ధనమ్ ।
ఏతదేవ హి సర్వస్వమేతదేవ హి జీవితమ్ ॥ 23 ॥
దర్శశ్చ పూర్ణమాసశ్చ యజ్ఞాశ్చైవాప్తదక్షిణాః ।
ఏతదేవ హి మే రాజన్ వివిధాశ్చ క్రియాస్తథా ॥ 24 ॥
అదోమూలాః క్రియాస్సర్వా మమ రాజన్న సంశయః ।
బహునా కిం ప్రలాపేన న దాస్యే కామదోహినీమ్ ॥ 25 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే త్రిపంచాశస్సర్గః ॥
