ശ്രീമദ്വാല്മീകീയ രാമായണേ ബാലകാംഡമ് ।
അഥ ത്രിപംചാശസ്സര്ഗഃ ।
ഏവമുക്താ വസിഷ്ഠേന ശബലാ ശത്രുസൂദന ।
വിദധേ കാമധുക്കാമാന്യസ്യ യസ്യ യഥേപ്സിതമ് ॥ 1 ॥
ഇക്ഷൂന്മധൂം സ്തഥാ ലാജാന്മൈരേയാംശ്ച വരാസനാന് ।
പാനാനി ച മഹാര്ഹാണി ഭക്ഷ്യാംശ്ചോച്ചാവചാം സ്തഥാ ॥ 2 ॥
ഉഷ്ണാഢ്യസ്യോദനസ്യാത്ര രാശയഃ പർവതോപമാഃ ।
മൃഷ്ടാന്നാനി ച സൂപാശ്ച ദധികുല്യാസ്തഥൈവ ച ॥ 3 ॥
നാനാസ്വാദുരസാനാം ച ഷാഡബാനാം തഥൈവ ച ।
ഭാജനാനി സുപൂര്ണാനി ഗൌഡാനി ച സഹസ്രശഃ ॥ 4 ॥
സർവമാസീത്സുസംതുഷ്ഠം ഹൃഷ്ടപുഷ്ടജനായുതമ് ।
വിശ്വാമിത്രബലം രാമ വസിഷ്ഠേനാഭിതര്പിതമ് ॥ 5 ॥
വിശ്വാമിത്രോഽപി രാജര്ഷിര്ഹൃഷ്ടഃ പുഷ്ടസ്തദാഭവത് ।
സാംതഃപുരവരോ രാജാ സബ്രാഹ്മണപുരോഹിതഃ ॥ 6 ॥
സാമാത്യോ മംത്രിസഹിതസ്സഭൃത്യഃ പൂജിതസ്തദാ ।
യുക്തഃ പരമഹര്ഷേണ വസിഷ്ഠമിദമബ്രവീത് ॥ 7 ॥
പൂജിതോഽഹം ത്വയാ ബ്രഹ്മന് പൂജാര്ഹേണ സുസത്കൃതഃ ।
ശ്രൂയതാമഭിധാസ്യാമി വാക്യം വാക്യവിശാരദ ॥ 8 ॥
ഗവാം ശതസഹസ്രേണ ദീയതാം ശബലാ മമ ।
രത്നം ഹി ഭഗവന്നേതദ്രത്നഹാരീ ച പ്രാര്ഥിവഃ ॥ 9 ॥
തസ്മാന്മേ ശബലാം ദേഹി മമൈഷാ ധര്മതോ ദ്വിജ ।
ഏവമുക്തസ്തു ഭഗവാന്വസിഷ്ഠോ മുനിസത്തമഃ ।
വിശ്വാമിത്രേണ ധര്മാത്മാ പ്രത്യുവാച മഹീപതിമ് ॥ 10 ॥
നാഹം ശതസഹസ്രേണ നാപി കോടിശതൈര്ഗവാമ് ।
രാജന് ദാസ്യാമി ശബലാം രാശിഭീ രജതസ്യ ച ॥ 11 ॥
ന പരിത്യാഗമര്ഹേയം മത്സകാശാദരിംദമ ।
ശാശ്വതീ ശബലാ മഹ്യം കീര്തിരാത്മവതോ യഥാ ॥ 12 ॥
അസ്യാം ഹവ്യം ച കവ്യം ച പ്രാണയാത്രാ തഥൈവ ച ।
ആയത്തമഗ്നിഹോത്രം ച ബലിര്ഹോമസ്തഥൈവ ച ॥ 13 ॥
സ്വാഹാകാരവഷട്കാരൌ വിദ്യാശ്ച വിവിധാ സ്തഥാ ।
ആയത്തമത്ര രാജര്ഷേ സർവമേതന്ന സംശയഃ ॥ 14 ॥
സർവസ്വമേതത്സത്യേന മമ തുഷ്ടികരീ സദാ ।
കാരണൈര്ബഹുഭീ രാജന്ന ദാസ്യേ ശബലാം തവ ॥ 15 ॥
വസിഷ്ഠേനൈവമുക്തസ്തു വിശ്വാമിത്രോഽബ്രവീത്തതഃ ।
സംരബ്ധതരമത്യര്ഥം വാക്യം വാക്യവിശാരദഃ ॥ 16 ॥
ഹൈരണ്യകക്ഷ്യാഗ്രൈവേയാന് സുവര്ണാംകുശഭൂഷിതാന് ।
ദദാമി കുംജരാംസ്തേഷാം സഹസ്രാണി ചതുര്ദശ ॥ 17 ॥
ഹൈരണ്യാനാം രഥാനാം ച ശ്വേതാശ്വാനാം ചതുര്യുജാമ് ।
ദദാമി തേ ശതാന്യഷ്ടൌ കിംകിണീകവിഭൂഷിതാന് ॥ 18 ॥
ഹയാനാം ദേശജാതാനാം കുലജാനാം മഹൌജസാമ് ।
സഹസ്രമേകം ദശ ച ദദാമി തവ സുവ്രത ॥ 19 ॥
നാനാവര്ണവിഭക്താനാം വയസ്സ്ഥാനാം തഥൈവ ച ।
ദദാമ്യേകാം ഗവാം കോടിം ശബലാ ദീയതാം മമ ॥ 20 ॥
യാവദിച്ഛസി രത്നം വാ ഹിരണ്യം വാ ദ്വിജോത്തമ ।
താവദ്ദദാമി തത്സർവം ശബലാ ദീയതാം മമ ॥ 21 ॥
ഏവമുക്തസ്തു ഭഗവാന് വിശ്വാമിത്രേണ ധീമതാ ।
ന ദാസ്യാമീതി ശബലാം പ്രാഹ രാജന് കഥംചന ॥ 22 ॥
ഏതദേവ ഹി മേ രത്നമേതദേവ ഹി മേ ധനമ് ।
ഏതദേവ ഹി സർവസ്വമേതദേവ ഹി ജീവിതമ് ॥ 23 ॥
ദര്ശശ്ച പൂര്ണമാസശ്ച യജ്ഞാശ്ചൈവാപ്തദക്ഷിണാഃ ।
ഏതദേവ ഹി മേ രാജന് വിവിധാശ്ച ക്രിയാസ്തഥാ ॥ 24 ॥
അദോമൂലാഃ ക്രിയാസ്സർവാ മമ രാജന്ന സംശയഃ ।
ബഹുനാ കിം പ്രലാപേന ന ദാസ്യേ കാമദോഹിനീമ് ॥ 25 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ത്രിപംചാശസ്സര്ഗഃ ॥
