શ્રીમદ્વાલ્મીકીય રામાયણે બાલકાંડમ્ ।
અથ ત્રિપંચાશસ્સર્ગઃ ।
એવમુક્તા વસિષ્ઠેન શબલા શત્રુસૂદન ।
વિદધે કામધુક્કામાન્યસ્ય યસ્ય યથેપ્સિતમ્ ॥ 1 ॥
ઇક્ષૂન્મધૂં સ્તથા લાજાન્મૈરેયાંશ્ચ વરાસનાન્ ।
પાનાનિ ચ મહાર્હાણિ ભક્ષ્યાંશ્ચોચ્ચાવચાં સ્તથા ॥ 2 ॥
ઉષ્ણાઢ્યસ્યોદનસ્યાત્ર રાશયઃ પર્વતોપમાઃ ।
મૃષ્ટાન્નાનિ ચ સૂપાશ્ચ દધિકુલ્યાસ્તથૈવ ચ ॥ 3 ॥
નાનાસ્વાદુરસાનાં ચ ષાડબાનાં તથૈવ ચ ।
ભાજનાનિ સુપૂર્ણાનિ ગૌડાનિ ચ સહસ્રશઃ ॥ 4 ॥
સર્વમાસીત્સુસંતુષ્ઠં હૃષ્ટપુષ્ટજનાયુતમ્ ।
વિશ્વામિત્રબલં રામ વસિષ્ઠેનાભિતર્પિતમ્ ॥ 5 ॥
વિશ્વામિત્રોઽપિ રાજર્ષિર્હૃષ્ટઃ પુષ્ટસ્તદાભવત્ ।
સાંતઃપુરવરો રાજા સબ્રાહ્મણપુરોહિતઃ ॥ 6 ॥
સામાત્યો મંત્રિસહિતસ્સભૃત્યઃ પૂજિતસ્તદા ।
યુક્તઃ પરમહર્ષેણ વસિષ્ઠમિદમબ્રવીત્ ॥ 7 ॥
પૂજિતોઽહં ત્વયા બ્રહ્મન્ પૂજાર્હેણ સુસત્કૃતઃ ।
શ્રૂયતામભિધાસ્યામિ વાક્યં વાક્યવિશારદ ॥ 8 ॥
ગવાં શતસહસ્રેણ દીયતાં શબલા મમ ।
રત્નં હિ ભગવન્નેતદ્રત્નહારી ચ પ્રાર્થિવઃ ॥ 9 ॥
તસ્માન્મે શબલાં દેહિ મમૈષા ધર્મતો દ્વિજ ।
એવમુક્તસ્તુ ભગવાન્વસિષ્ઠો મુનિસત્તમઃ ।
વિશ્વામિત્રેણ ધર્માત્મા પ્રત્યુવાચ મહીપતિમ્ ॥ 10 ॥
નાહં શતસહસ્રેણ નાપિ કોટિશતૈર્ગવામ્ ।
રાજન્ દાસ્યામિ શબલાં રાશિભી રજતસ્ય ચ ॥ 11 ॥
ન પરિત્યાગમર્હેયં મત્સકાશાદરિંદમ ।
શાશ્વતી શબલા મહ્યં કીર્તિરાત્મવતો યથા ॥ 12 ॥
અસ્યાં હવ્યં ચ કવ્યં ચ પ્રાણયાત્રા તથૈવ ચ ।
આયત્તમગ્નિહોત્રં ચ બલિર્હોમસ્તથૈવ ચ ॥ 13 ॥
સ્વાહાકારવષટ્કારૌ વિદ્યાશ્ચ વિવિધા સ્તથા ।
આયત્તમત્ર રાજર્ષે સર્વમેતન્ન સંશયઃ ॥ 14 ॥
સર્વસ્વમેતત્સત્યેન મમ તુષ્ટિકરી સદા ।
કારણૈર્બહુભી રાજન્ન દાસ્યે શબલાં તવ ॥ 15 ॥
વસિષ્ઠેનૈવમુક્તસ્તુ વિશ્વામિત્રોઽબ્રવીત્તતઃ ।
સંરબ્ધતરમત્યર્થં વાક્યં વાક્યવિશારદઃ ॥ 16 ॥
હૈરણ્યકક્ષ્યાગ્રૈવેયાન્ સુવર્ણાંકુશભૂષિતાન્ ।
દદામિ કુંજરાંસ્તેષાં સહસ્રાણિ ચતુર્દશ ॥ 17 ॥
હૈરણ્યાનાં રથાનાં ચ શ્વેતાશ્વાનાં ચતુર્યુજામ્ ।
દદામિ તે શતાન્યષ્ટૌ કિંકિણીકવિભૂષિતાન્ ॥ 18 ॥
હયાનાં દેશજાતાનાં કુલજાનાં મહૌજસામ્ ।
સહસ્રમેકં દશ ચ દદામિ તવ સુવ્રત ॥ 19 ॥
નાનાવર્ણવિભક્તાનાં વયસ્સ્થાનાં તથૈવ ચ ।
દદામ્યેકાં ગવાં કોટિં શબલા દીયતાં મમ ॥ 20 ॥
યાવદિચ્છસિ રત્નં વા હિરણ્યં વા દ્વિજોત્તમ ।
તાવદ્દદામિ તત્સર્વં શબલા દીયતાં મમ ॥ 21 ॥
એવમુક્તસ્તુ ભગવાન્ વિશ્વામિત્રેણ ધીમતા ।
ન દાસ્યામીતિ શબલાં પ્રાહ રાજન્ કથંચન ॥ 22 ॥
એતદેવ હિ મે રત્નમેતદેવ હિ મે ધનમ્ ।
એતદેવ હિ સર્વસ્વમેતદેવ હિ જીવિતમ્ ॥ 23 ॥
દર્શશ્ચ પૂર્ણમાસશ્ચ યજ્ઞાશ્ચૈવાપ્તદક્ષિણાઃ ।
એતદેવ હિ મે રાજન્ વિવિધાશ્ચ ક્રિયાસ્તથા ॥ 24 ॥
અદોમૂલાઃ ક્રિયાસ્સર્વા મમ રાજન્ન સંશયઃ ।
બહુના કિં પ્રલાપેન ન દાસ્યે કામદોહિનીમ્ ॥ 25 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે ત્રિપંચાશસ્સર્ગઃ ॥
