ශ්රීමද්වාල්මීකීය රාමායණේ අයෝධ්යාකාංඩම් ।
අථ ෂණ්ණවතිතමස්සර්ගඃ ।
තාං තථා දර්ශයිත්වා තු මෛථිලීං ගිරිනිම්නගාම් ।
නිෂසාද ගිරිප්රස්ථේ සීතාං මාංසේන ඡංදයන් ॥ 1 ॥
ඉදං මේධ්යමිදං ස්වාදු නිෂ්ටප්තමිදමග්නිනා ।
ඒවමාස්තේ ස ධර්මාත්මා සීතයා සහ රාඝවඃ ॥ 2 ॥
තථා තත්රාऽසතස්තස්ය භරතස්යෞපයායිනඃ ।
සෛන්යරේණුශ්ච ශබ්දශ්ච ප්රාදුරාස්තාං නභස්පෘශෞ ॥ 3 ॥
ඒතස්මින්නංතරේ ත්රස්තා ශ්ශබ්දේන මහතා තතඃ ।
අර්දිතා යූථපා මත්තා ස්සයූථා දුද්රුවුර්දිශඃ ॥ 4 ॥
ස තං සෛන්යසමුද්ධූතං ශබ්දං ශුශ්රාව රාඝවඃ ।
තාං ශ්ච විප්රද්රුතාන්සර්වාන්යූථපානන්වවෛක්ෂත ॥ 5 ॥
තාංශ්ච විද්රුවතෝ දෘෂ්ට්වා තං ච ශ්රුත්වා ච නිස්වනම් ।
උවාච රාම ස්සෞමිත්රිං ලක්ෂ්මණං දීප්තතේජසම් ॥ 6 ॥
හංත ලක්ෂ්මණ පශ්යේහ සුමිත්රාසුප්රජාස්ත්වයා ।
භීමස්තනිතගංභීරස්තුමුලඃ ශ්රූයතේ ස්වනඃ ॥ 7 ॥
ගජයූථානි වාऽරණ්යේ මහිෂා වා මහාවනේ ।
විත්රාසිතා මෘගා ස්සිංහෛ ස්සහසා ප්රද්රුතා දිශඃ ॥ 8 ॥
රාජා වා රාජපුත්රෝ වා මෘගයාමටතේ වනේ ।
අන්යද්වා ශ්වාපදං කිංචිත්සෞමිත්රේ ජ්ඤාතුමර්හසි ॥ 9 ॥
සුදුශ්චරෝ ගිරිශ්චායං පක්ෂිණාමපි ලක්ෂ්මණ ।
සර්වමේතද්යථාතත්ත්වමචිරාත් ජ්ඤාතුමර්හසි ॥ 10 ॥
ස ලක්ෂ්මණ ස්සංත්වරිත ස්සාලමාරුහ්ය පුෂ්පිතම් ।
ප්රේක්ෂමාණෝ දිශ ස්සර්වාඃ පූර්වාං දිශමුදෛක්ෂත ॥ 11 ॥
උදඞ්මුඛඃ ප්රේක්ෂමාණෝ දදර්ශ මහතීං චමූම් ।
රථාශ්වගජසංබාධාං යත්තෛර්යුක්තාං පදාතිභිඃ ॥ 12 ॥
තාමශ්වගජසංපූර්ණාං රථධ්වජවිභූෂිතාම් ।
ශශංස සේනාං රාමාය වචනං චේදමබ්රවීත් ॥ 13 ॥
අග්නිං සංශමයත්වාර්ය ස්සීතා ච භජතාං ගුහාම් ।
සජ්යං කුරුෂ්ව චාපං ච ශරාංශ්ච කවචං තථා ॥ 14 ॥
තං රාමඃ පුරුෂව්යාඝ්රෝ ලක්ෂ්මණං ප්රත්යුවාච හ ।
අංගාවේක්ෂස්ව සෞමිත්රේ කස්යේමාං මන්යසේ චමූම් ॥ 15 ॥
ඒවමුක්තස්තු රාමේණ ලක්ෂ්මණෝ වාක්යමබ්රවීත් ।
දිධක්ෂන්නිව තාං සේනාං රුෂිතඃ පාවකෝ යථා ॥ 16 ॥
සංපන්නං රාජ්යමිච්ඡංස්තු ව්යක්තං ප්රාප්යාභිෂේචනම් ।
ආවාං හංතුං සමභ්යේති කෛකේය්යා භරතස්සුතඃ ॥ 17 ॥
ඒෂ වෛ සුමහාංඡ්රීමාන්විටපී සංප්රකාශතේ ।
විරාජත්යුද්ගතස්කංධං කෝවිදාරධ්වජෝ රථේ ॥ 18 ॥
අසෞ හි සුමහාස්කංධෝ විටපී ච මහාද්රුමඃ ।
විරාජතේ මහාසෛන්යේ කෝවිදාරධ්වජෝ රථේ ॥ 19 ॥
භජංත්යේතේ යථාකාමමශ්වානාරුහ්ය ශීඝ්රගාන් ।
ඒතේ භ්රාජංති සංහෘෂ්ටා ගජානාරුහ්ය සාදිනඃ ॥ 20 ॥
ගෘහීතධනුෂෞ චාවාං ගිරිං වීර ශ්රයාවහෛ ।
අථවේහෛව තිෂ්ඨාව ස්සන්නද්ධාවුද්යතායුධෞ ॥ 21 ॥
අපි නෞ වශමාගච්ඡේත්කෝවිදාරධ්වජෝ රණේ ।
අපි ද්රක්ෂ්යාමි භරතං යත්කෘතේ ව්යසනං මහත් ॥ 22 ॥
ත්වයා රාඝව සංප්රාප්තං සීතයා ච මයා තථා ।
යන්නිමිත්තං භවාන්රාජ්යාච්ඡ්යුතෝ රාඝව ශාශ්වතාත් ॥ 23 ॥
සංප්රාප්තෝऽයමරිර්වීර භරතෝ වධ්ය ඒව මේ ।
භරතස්ය වධේ දෝෂං නාහං පශ්යාමි රාඝව ।
පූර්වාපකාරිණං හත්වා න හ්යධර්මේණ යුජ්යතේ ॥ 24 ॥
පූර්වාපකාරී භරතස්ත්යක්තධර්මශ්ච රාඝව ।
ඒතස්මින්නිහතේ කෘත්ස්නාමනුශාධි වසුංධරාම් ॥ 25 ॥
අද්ය පුත්රං හතං සංඛ්යේ කෛකේයී රාජ්යකාමුකා ।
මයා පශ්යේත්සුදුඃඛාර්තා හස්තිභග්නමිව ද්රුමම් ॥ 26 ॥
කෛකේයීං ච වධිෂ්යාමි සානුබංධාං සබාංධවාම් ।
කලුෂේණාද්ය මහතා මේදිනී පරිමුච්යතාම් ॥ 27 ॥
අද්යේමං සංයතං ක්රෝධමසත්කාරං ච මානද ।
මෝක්ෂ්යාමි ශත්රුසෛන්යේෂු කක්ෂේෂ්විව හුතාශනම් ॥ 28 ॥
අද්යෛතච්ඡිත්රකූටස්ය කානනං නිශිතෛ ශ්ශරෛඃ ।
ඡිංදංචත්රුශරීරාණි කරිෂ්යේ ශෝණිතෝක්ෂිතම් ॥ 29 ॥
ශරෛර්නිර්භින්නහෘදයාන්කුංජරාංස්තුරගාංස්තථා ।
ශ්වාපදාඃ පරිකර්ෂංතු නරාංශ්ච නිහතාන්මයා ॥ 30 ॥
ශරාණාං ධනුෂශ්චාහමනෘණෝऽස්මින්මහාවනේ ।
සසෛන්යං භරතං හත්වා භවිෂ්යාමි න සංශයඃ ॥ 31 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ ෂණ්ණවතිතමස්සර්ගඃ ॥
