śrīmadvālmīkīya rāmāyaṇē ayōdhyākāṇḍam ।
atha ṣaṇṇavatitamassargaḥ ।
tāṃ tathā darśayitvā tu maithilīṃ girinimnagām ।
niṣasāda giriprasthē sītāṃ māṃsēna Chandayan ॥ 1 ॥
idaṃ mēdhyamidaṃ svādu niṣṭaptamidamagninā ।
ēvamāstē sa dharmātmā sītayā saha rāghavaḥ ॥ 2 ॥
tathā tatrā'satastasya bharatasyaupayāyinaḥ ।
sainyarēṇuścha śabdaścha prādurāstāṃ nabhaspṛśau ॥ 3 ॥
ētasminnantarē trastā śśabdēna mahatā tataḥ ।
arditā yūthapā mattā ssayūthā dudruvurdiśaḥ ॥ 4 ॥
sa taṃ sainyasamuddhūtaṃ śabdaṃ śuśrāva rāghavaḥ ।
tāṃ ścha vipradrutānsarvānyūthapānanvavaikṣata ॥ 5 ॥
tāṃścha vidruvatō dṛṣṭvā taṃ cha śrutvā cha nisvanam ।
uvācha rāma ssaumitriṃ lakṣmaṇaṃ dīptatējasam ॥ 6 ॥
hanta lakṣmaṇa paśyēha sumitrāsuprajāstvayā ।
bhīmastanitagambhīrastumulaḥ śrūyatē svanaḥ ॥ 7 ॥
gajayūthāni vā'raṇyē mahiṣā vā mahāvanē ।
vitrāsitā mṛgā ssiṃhai ssahasā pradrutā diśaḥ ॥ 8 ॥
rājā vā rājaputrō vā mṛgayāmaṭatē vanē ।
anyadvā śvāpadaṃ kiñchitsaumitrē jñātumarhasi ॥ 9 ॥
suduścharō giriśchāyaṃ pakṣiṇāmapi lakṣmaṇa ।
sarvamētadyathātattvamachirāt jñātumarhasi ॥ 10 ॥
sa lakṣmaṇa ssantvarita ssālamāruhya puṣpitam ।
prēkṣamāṇō diśa ssarvāḥ pūrvāṃ diśamudaikṣata ॥ 11 ॥
udaṅmukhaḥ prēkṣamāṇō dadarśa mahatīṃ chamūm ।
rathāśvagajasambādhāṃ yattairyuktāṃ padātibhiḥ ॥ 12 ॥
tāmaśvagajasampūrṇāṃ rathadhvajavibhūṣitām ।
śaśaṃsa sēnāṃ rāmāya vachanaṃ chēdamabravīt ॥ 13 ॥
agniṃ saṃśamayatvārya ssītā cha bhajatāṃ guhām ।
sajyaṃ kuruṣva chāpaṃ cha śarāṃścha kavachaṃ tathā ॥ 14 ॥
taṃ rāmaḥ puruṣavyāghrō lakṣmaṇaṃ pratyuvācha ha ।
aṅgāvēkṣasva saumitrē kasyēmāṃ manyasē chamūm ॥ 15 ॥
ēvamuktastu rāmēṇa lakṣmaṇō vākyamabravīt ।
didhakṣanniva tāṃ sēnāṃ ruṣitaḥ pāvakō yathā ॥ 16 ॥
sampannaṃ rājyamichChaṃstu vyaktaṃ prāpyābhiṣēchanam ।
āvāṃ hantuṃ samabhyēti kaikēyyā bharatassutaḥ ॥ 17 ॥
ēṣa vai sumahāñChrīmānviṭapī samprakāśatē ।
virājatyudgataskandhaṃ kōvidāradhvajō rathē ॥ 18 ॥
asau hi sumahāskandhō viṭapī cha mahādrumaḥ ।
virājatē mahāsainyē kōvidāradhvajō rathē ॥ 19 ॥
bhajantyētē yathākāmamaśvānāruhya śīghragān ।
ētē bhrājanti saṃhṛṣṭā gajānāruhya sādinaḥ ॥ 20 ॥
gṛhītadhanuṣau chāvāṃ giriṃ vīra śrayāvahai ।
athavēhaiva tiṣṭhāva ssannaddhāvudyatāyudhau ॥ 21 ॥
api nau vaśamāgachChētkōvidāradhvajō raṇē ।
api drakṣyāmi bharataṃ yatkṛtē vyasanaṃ mahat ॥ 22 ॥
tvayā rāghava samprāptaṃ sītayā cha mayā tathā ।
yannimittaṃ bhavānrājyāchChyutō rāghava śāśvatāt ॥ 23 ॥
samprāptō'yamarirvīra bharatō vadhya ēva mē ।
bharatasya vadhē dōṣaṃ nāhaṃ paśyāmi rāghava ।
pūrvāpakāriṇaṃ hatvā na hyadharmēṇa yujyatē ॥ 24 ॥
pūrvāpakārī bharatastyaktadharmaścha rāghava ।
ētasminnihatē kṛtsnāmanuśādhi vasundharām ॥ 25 ॥
adya putraṃ hataṃ saṅkhyē kaikēyī rājyakāmukā ।
mayā paśyētsuduḥkhārtā hastibhagnamiva drumam ॥ 26 ॥
kaikēyīṃ cha vadhiṣyāmi sānubandhāṃ sabāndhavām ।
kaluṣēṇādya mahatā mēdinī parimuchyatām ॥ 27 ॥
adyēmaṃ saṃyataṃ krōdhamasatkāraṃ cha mānada ।
mōkṣyāmi śatrusainyēṣu kakṣēṣviva hutāśanam ॥ 28 ॥
adyaitachChitrakūṭasya kānanaṃ niśitai śśaraiḥ ।
Chindañchatruśarīrāṇi kariṣyē śōṇitōkṣitam ॥ 29 ॥
śarairnirbhinnahṛdayānkuñjarāṃsturagāṃstathā ।
śvāpadāḥ parikarṣantu narāṃścha nihatānmayā ॥ 30 ॥
śarāṇāṃ dhanuṣaśchāhamanṛṇō'sminmahāvanē ।
sasainyaṃ bharataṃ hatvā bhaviṣyāmi na saṃśayaḥ ॥ 31 ॥
ityārṣē śrīmadrāmāyaṇē vālmīkīya ādikāvyē ayōdhyākāṇḍē ṣaṇṇavatitamassargaḥ ॥
