শ্রীমদ্বাল্মীকীয় রামাযণে অয়োধ্য়াকাংডম্ ।
অথ ষণ্ণবতিতমস্সর্গঃ ।
তাং তথা দর্শয়িত্বা তু মৈথিলীং গিরিনিম্নগাম্ ।
নিষসাদ গিরিপ্রস্থে সীতাং মাংসেন ছংদযন্ ॥ 1 ॥
ইদং মেধ্যমিদং স্বাদু নিষ্টপ্তমিদমগ্নিনা ।
এবমাস্তে স ধর্মাত্মা সীতয়া সহ রাঘবঃ ॥ 2 ॥
তথা তত্রাঽসতস্তস্য় ভরতস্য়ৌপয়ায়িনঃ ।
সৈন্যরেণুশ্চ শব্দশ্চ প্রাদুরাস্তাং নভস্পৃশৌ ॥ 3 ॥
এতস্মিন্নংতরে ত্রস্তা শ্শব্দেন মহতা ততঃ ।
অর্দিতা যূথপা মত্তা স্সয়ূথা দুদ্রুবুর্দিশঃ ॥ 4 ॥
স তং সৈন্যসমুদ্ধূতং শব্দং শুশ্রাব রাঘবঃ ।
তাং শ্চ বিপ্রদ্রুতান্সর্বান্য়ূথপানন্ববৈক্ষত ॥ 5 ॥
তাংশ্চ বিদ্রুবতো দৃষ্ট্বা তং চ শ্রুত্বা চ নিস্বনম্ ।
উবাচ রাম স্সৌমিত্রিং লক্ষ্মণং দীপ্ততেজসম্ ॥ 6 ॥
হংত লক্ষ্মণ পশ্য়েহ সুমিত্রাসুপ্রজাস্ত্বয়া ।
ভীমস্তনিতগংভীরস্তুমুলঃ শ্রূযতে স্বনঃ ॥ 7 ॥
গজয়ূথানি বাঽরণ্য়ে মহিষা বা মহাবনে ।
বিত্রাসিতা মৃগা স্সিংহৈ স্সহসা প্রদ্রুতা দিশঃ ॥ 8 ॥
রাজা বা রাজপুত্রো বা মৃগয়ামটতে বনে ।
অন্যদ্বা শ্বাপদং কিংচিত্সৌমিত্রে জ্ঞাতুমর্হসি ॥ 9 ॥
সুদুশ্চরো গিরিশ্চায়ং পক্ষিণামপি লক্ষ্মণ ।
সর্বমেতদ্যথাতত্ত্বমচিরাত্ জ্ঞাতুমর্হসি ॥ 10 ॥
স লক্ষ্মণ স্সংত্বরিত স্সালমারুহ্য় পুষ্পিতম্ ।
প্রেক্ষমাণো দিশ স্সর্বাঃ পূর্বাং দিশমুদৈক্ষত ॥ 11 ॥
উদঙ্মুখঃ প্রেক্ষমাণো দদর্শ মহতীং চমূম্ ।
রথাশ্বগজসংবাধাং যত্তৈর্য়ুক্তাং পদাতিভিঃ ॥ 12 ॥
তামশ্বগজসংপূর্ণাং রথধ্বজবিভূষিতাম্ ।
শশংস সেনাং রামায় বচনং চেদমব্রবীত্ ॥ 13 ॥
অগ্নিং সংশমযত্বার্য় স্সীতা চ ভজতাং গুহাম্ ।
সজ্য়ং কুরুষ্ব চাপং চ শরাংশ্চ কবচং তথা ॥ 14 ॥
তং রামঃ পুরুষব্য়াঘ্রো লক্ষ্মণং প্রত্য়ুবাচ হ ।
অংগাবেক্ষস্ব সৌমিত্রে কস্য়েমাং মন্যসে চমূম্ ॥ 15 ॥
এবমুক্তস্তু রামেণ লক্ষ্মণো বাক্যমব্রবীত্ ।
দিধক্ষন্নিব তাং সেনাং রুষিতঃ পাবকো যথা ॥ 16 ॥
সংপন্নং রাজ্যমিচ্ছংস্তু ব্যক্তং প্রাপ্য়াভিষেচনম্ ।
আবাং হংতুং সমভ্য়েতি কৈকেয়্য়া ভরতস্সুতঃ ॥ 17 ॥
এষ বৈ সুমহাংছ্রীমান্বিটপী সংপ্রকাশতে ।
বিরাজত্য়ুদ্গতস্কংধং কোবিদারধ্বজো রথে ॥ 18 ॥
অসৌ হি সুমহাস্কংধো বিটপী চ মহাদ্রুমঃ ।
বিরাজতে মহাসৈন্য়ে কোবিদারধ্বজো রথে ॥ 19 ॥
ভজংত্য়েতে যথাকামমশ্বানারুহ্য় শীঘ্রগান্ ।
এতে ভ্রাজংতি সংহৃষ্টা গজানারুহ্য় সাদিনঃ ॥ 20 ॥
গৃহীতধনুষৌ চাবাং গিরিং বীর শ্রয়াবহৈ ।
অথবেহৈব তিষ্ঠাব স্সন্নদ্ধাবুদ্যতায়ুধৌ ॥ 21 ॥
অপি নৌ বশমাগচ্ছেত্কোবিদারধ্বজো রণে ।
অপি দ্রক্ষ্য়ামি ভরতং যত্কৃতে ব্যসনং মহত্ ॥ 22 ॥
ত্বয়া রাঘব সংপ্রাপ্তং সীতয়া চ ময়া তথা ।
যন্নিমিত্তং ভবান্রাজ্য়াচ্ছ্য়ুতো রাঘব শাশ্বতাত্ ॥ 23 ॥
সংপ্রাপ্তোঽযমরির্বীর ভরতো বধ্য় এব মে ।
ভরতস্য় বধে দোষং নাহং পশ্য়ামি রাঘব ।
পূর্বাপকারিণং হত্বা ন হ্যধর্মেণ যুজ্যতে ॥ 24 ॥
পূর্বাপকারী ভরতস্ত্যক্তধর্মশ্চ রাঘব ।
এতস্মিন্নিহতে কৃত্স্নামনুশাধি বসুংধরাম্ ॥ 25 ॥
অদ্য় পুত্রং হতং সংখ্য়ে কৈকেয়ী রাজ্যকামুকা ।
ময়া পশ্য়েত্সুদুঃখার্তা হস্তিভগ্নমিব দ্রুমম্ ॥ 26 ॥
কৈকেয়ীং চ বধিষ্য়ামি সানুবংধাং সবাংধবাম্ ।
কলুষেণাদ্য় মহতা মেদিনী পরিমুচ্যতাম্ ॥ 27 ॥
অদ্য়েমং সংযতং ক্রোধমসত্কারং চ মানদ ।
মোক্ষ্য়ামি শত্রুসৈন্য়েষু কক্ষেষ্বিব হুতাশনম্ ॥ 28 ॥
অদ্য়ৈতচ্ছিত্রকূটস্য় কাননং নিশিতৈ শ্শরৈঃ ।
ছিংদংচত্রুশরীরাণি করিষ্য়ে শোণিতোক্ষিতম্ ॥ 29 ॥
শরৈর্নির্ভিন্নহৃদয়ান্কুংজরাংস্তুরগাংস্তথা ।
শ্বাপদাঃ পরিকর্ষংতু নরাংশ্চ নিহতান্ময়া ॥ 30 ॥
শরাণাং ধনুষশ্চাহমনৃণোঽস্মিন্মহাবনে ।
সসৈন্য়ং ভরতং হত্বা ভবিষ্য়ামি ন সংশয়ঃ ॥ 31 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অয়োধ্য়াকাংডে ষণ্ণবতিতমস্সর্গঃ ॥
