ശ്രീമദ്വാല്മീകീയ രാമായണേ അയോധ്യാകാംഡമ് ।
അഥ ഷണ്ണവതിതമസ്സര്ഗഃ ।
താം തഥാ ദര്ശയിത്വാ തു മൈഥിലീം ഗിരിനിമ്നഗാമ് ।
നിഷസാദ ഗിരിപ്രസ്ഥേ സീതാം മാംസേന ഛംദയന് ॥ 1 ॥
ഇദം മേധ്യമിദം സ്വാദു നിഷ്ടപ്തമിദമഗ്നിനാ ।
ഏവമാസ്തേ സ ധര്മാത്മാ സീതയാ സഹ രാഘവഃ ॥ 2 ॥
തഥാ തത്രാഽസതസ്തസ്യ ഭരതസ്യൌപയായിനഃ ।
സൈന്യരേണുശ്ച ശബ്ദശ്ച പ്രാദുരാസ്താം നഭസ്പൃശൌ ॥ 3 ॥
ഏതസ്മിന്നംതരേ ത്രസ്താ ശ്ശബ്ദേന മഹതാ തതഃ ।
അര്ദിതാ യൂഥപാ മത്താ സ്സയൂഥാ ദുദ്രുവുര്ദിശഃ ॥ 4 ॥
സ തം സൈന്യസമുദ്ധൂതം ശബ്ദം ശുശ്രാവ രാഘവഃ ।
താം ശ്ച വിപ്രദ്രുതാന്സർവാന്യൂഥപാനന്വവൈക്ഷത ॥ 5 ॥
താംശ്ച വിദ്രുവതോ ദൃഷ്ട്വാ തം ച ശ്രുത്വാ ച നിസ്വനമ് ।
ഉവാച രാമ സ്സൌമിത്രിം ലക്ഷ്മണം ദീപ്തതേജസമ് ॥ 6 ॥
ഹംത ലക്ഷ്മണ പശ്യേഹ സുമിത്രാസുപ്രജാസ്ത്വയാ ।
ഭീമസ്തനിതഗംഭീരസ്തുമുലഃ ശ്രൂയതേ സ്വനഃ ॥ 7 ॥
ഗജയൂഥാനി വാഽരണ്യേ മഹിഷാ വാ മഹാവനേ ।
വിത്രാസിതാ മൃഗാ സ്സിംഹൈ സ്സഹസാ പ്രദ്രുതാ ദിശഃ ॥ 8 ॥
രാജാ വാ രാജപുത്രോ വാ മൃഗയാമടതേ വനേ ।
അന്യദ്വാ ശ്വാപദം കിംചിത്സൌമിത്രേ ജ്ഞാതുമര്ഹസി ॥ 9 ॥
സുദുശ്ചരോ ഗിരിശ്ചായം പക്ഷിണാമപി ലക്ഷ്മണ ।
സർവമേതദ്യഥാതത്ത്വമചിരാത് ജ്ഞാതുമര്ഹസി ॥ 10 ॥
സ ലക്ഷ്മണ സ്സംത്വരിത സ്സാലമാരുഹ്യ പുഷ്പിതമ് ।
പ്രേക്ഷമാണോ ദിശ സ്സർവാഃ പൂർവാം ദിശമുദൈക്ഷത ॥ 11 ॥
ഉദങ്മുഖഃ പ്രേക്ഷമാണോ ദദര്ശ മഹതീം ചമൂമ് ।
രഥാശ്വഗജസംബാധാം യത്തൈര്യുക്താം പദാതിഭിഃ ॥ 12 ॥
താമശ്വഗജസംപൂര്ണാം രഥധ്വജവിഭൂഷിതാമ് ।
ശശംസ സേനാം രാമായ വചനം ചേദമബ്രവീത് ॥ 13 ॥
അഗ്നിം സംശമയത്വാര്യ സ്സീതാ ച ഭജതാം ഗുഹാമ് ।
സജ്യം കുരുഷ്വ ചാപം ച ശരാംശ്ച കവചം തഥാ ॥ 14 ॥
തം രാമഃ പുരുഷവ്യാഘ്രോ ലക്ഷ്മണം പ്രത്യുവാച ഹ ।
അംഗാവേക്ഷസ്വ സൌമിത്രേ കസ്യേമാം മന്യസേ ചമൂമ് ॥ 15 ॥
ഏവമുക്തസ്തു രാമേണ ലക്ഷ്മണോ വാക്യമബ്രവീത് ।
ദിധക്ഷന്നിവ താം സേനാം രുഷിതഃ പാവകോ യഥാ ॥ 16 ॥
സംപന്നം രാജ്യമിച്ഛംസ്തു വ്യക്തം പ്രാപ്യാഭിഷേചനമ് ।
ആവാം ഹംതും സമഭ്യേതി കൈകേയ്യാ ഭരതസ്സുതഃ ॥ 17 ॥
ഏഷ വൈ സുമഹാംഛ്രീമാന്വിടപീ സംപ്രകാശതേ ।
വിരാജത്യുദ്ഗതസ്കംധം കോവിദാരധ്വജോ രഥേ ॥ 18 ॥
അസൌ ഹി സുമഹാസ്കംധോ വിടപീ ച മഹാദ്രുമഃ ।
വിരാജതേ മഹാസൈന്യേ കോവിദാരധ്വജോ രഥേ ॥ 19 ॥
ഭജംത്യേതേ യഥാകാമമശ്വാനാരുഹ്യ ശീഘ്രഗാന് ।
ഏതേ ഭ്രാജംതി സംഹൃഷ്ടാ ഗജാനാരുഹ്യ സാദിനഃ ॥ 20 ॥
ഗൃഹീതധനുഷൌ ചാവാം ഗിരിം വീര ശ്രയാവഹൈ ।
അഥവേഹൈവ തിഷ്ഠാവ സ്സന്നദ്ധാവുദ്യതായുധൌ ॥ 21 ॥
അപി നൌ വശമാഗച്ഛേത്കോവിദാരധ്വജോ രണേ ।
അപി ദ്രക്ഷ്യാമി ഭരതം യത്കൃതേ വ്യസനം മഹത് ॥ 22 ॥
ത്വയാ രാഘവ സംപ്രാപ്തം സീതയാ ച മയാ തഥാ ।
യന്നിമിത്തം ഭവാന്രാജ്യാച്ഛ്യുതോ രാഘവ ശാശ്വതാത് ॥ 23 ॥
സംപ്രാപ്തോഽയമരിർവീര ഭരതോ വധ്യ ഏവ മേ ।
ഭരതസ്യ വധേ ദോഷം നാഹം പശ്യാമി രാഘവ ।
പൂർവാപകാരിണം ഹത്വാ ന ഹ്യധര്മേണ യുജ്യതേ ॥ 24 ॥
പൂർവാപകാരീ ഭരതസ്ത്യക്തധര്മശ്ച രാഘവ ।
ഏതസ്മിന്നിഹതേ കൃത്സ്നാമനുശാധി വസുംധരാമ് ॥ 25 ॥
അദ്യ പുത്രം ഹതം സംഖ്യേ കൈകേയീ രാജ്യകാമുകാ ।
മയാ പശ്യേത്സുദുഃഖാര്താ ഹസ്തിഭഗ്നമിവ ദ്രുമമ് ॥ 26 ॥
കൈകേയീം ച വധിഷ്യാമി സാനുബംധാം സബാംധവാമ് ।
കലുഷേണാദ്യ മഹതാ മേദിനീ പരിമുച്യതാമ് ॥ 27 ॥
അദ്യേമം സംയതം ക്രോധമസത്കാരം ച മാനദ ।
മോക്ഷ്യാമി ശത്രുസൈന്യേഷു കക്ഷേഷ്വിവ ഹുതാശനമ് ॥ 28 ॥
അദ്യൈതച്ഛിത്രകൂടസ്യ കാനനം നിശിതൈ ശ്ശരൈഃ ।
ഛിംദംചത്രുശരീരാണി കരിഷ്യേ ശോണിതോക്ഷിതമ് ॥ 29 ॥
ശരൈര്നിര്ഭിന്നഹൃദയാന്കുംജരാംസ്തുരഗാംസ്തഥാ ।
ശ്വാപദാഃ പരികര്ഷംതു നരാംശ്ച നിഹതാന്മയാ ॥ 30 ॥
ശരാണാം ധനുഷശ്ചാഹമനൃണോഽസ്മിന്മഹാവനേ ।
സസൈന്യം ഭരതം ഹത്വാ ഭവിഷ്യാമി ന സംശയഃ ॥ 31 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അയോധ്യാകാംഡേ ഷണ്ണവതിതമസ്സര്ഗഃ ॥
