ශ්රීමද්වාල්මීකීය රාමායණේ අරණ්යකාංඩම් ।
අථ ඒකෝනපංචාශස්සර්ගඃ ।
සීතායා වචනං ශ්රුත්වා දශග්රීවඃ ප්රතාපවාම් ।
හස්තේ හස්තං සමාහත්ය චකාර සුමහද්වපුඃ ॥ 1 ॥
ස මෛථිලීං පුනර්වාක්යං බභාෂේ ච තතෝ භෘශම් ।
නෝන්මත්තයා ශ්රුතෞ මන්යේ මම වීර්යපරාක්රමෞ ॥ 2 ॥
උද්වහේයං භුජාභ්යාං තු මේදිනීමංබරේ ස්ථිතඃ ।
ආපිබේයං සමුද්රං ච හන්යාං මෘත්යුං රණේ ස්ථිතඃ ॥ 3 ॥
අර්කං තුංද්යාං ශරෛඃ තීක්ෂ්ණෛර් විභිංද්යාං හි මහීතලම් ।
කාම රූපිණං උන්මත්තේ පශ්ය මාං කාමදං පතිම් ॥ 4 ॥
ඒවමුක්තවතස්තස්ය සූර්යකල්පේ ශිඛිප්රභේ ।
ක්රුද්ධස්ය හරිපර්යංතේ රක්තේ නේත්රේ බභූවතුඃ ॥ 5 ॥
සද්යස්සෞම්යං පරිත්යජ්ය භික්ෂුරූපං ස රාවණඃ ।
ස්වං රූපං කාලරූපාභං භේජේ වෛශ්රවණානුජඃ ॥ 6 ॥
සංරක්තනයනශ්ශ්රීමාංස්තප්තකාංචනභූෂණඃ ।
ක්රෝධේන මහතාවිෂ්ටෝ නීලජීමූතසන්නිභඃ ॥ 7 ॥
දශාස්යඃ කාර්මුකී බාණී බභූව ක්ෂණදාචරඃ ।
ස පරිව්රාජකච්ඡද්ම මහාකායෝ විහාය තත් ॥ 8 ॥
ප්රතිපද්ය ස්වකං රූපං රාවණෝ රාක්ෂසාධිපඃ ।
සංරක්තනයනඃ ක්රෝධාජ්ජීමූතනිචයප්රභඃ ॥ 9 ॥
රක්තාංබරධරස්තස්ථෞ ස්ත්රීරත්නං ප්රේක්ෂ්ය මෛථිලීම් ।
ස තාමසිතකේශාංතාං භාස්කරස්ය ප්රභාමිව ॥ 10 ॥
වසනාභරණෝපේතාං මෛථිලීං රාවණෝऽබ්රවීත් ।
ත්රිෂු ලෝකේෂු විඛ්යාතං යදි භර්තාරමිච්ඡසි ॥ 11 ॥
මාමාශ්රය වරාරෝහේ තවාහං සදෘශඃ පතිඃ ।
මාං භජස්ව චිරාය ත්වමහං ශ්ලාඝ්යඃ ප්රියස්තව ॥ 12 ॥
නෛව චාහං ක්වචිද්භද්රේ කරිෂ්යේ තව විප්රියම් ।
ත්යජ්යතාං මානුෂේ භාවෝ මයි භාවඃ ප්රණීයතාම් ॥ 13 ॥
රාජ්යාච්ච්යුතමසිද්ධාර්ථං රාමං පරිමිතායුෂම් ।
කෛර්ගුණෛරනුරක්තාසි මූඪේ පංඩිතමානිනි ॥ 14 ॥
යඃ ස්ත්රියා වචනාද්රාජ්යං විහාය සසුහෘජ්ජනම් ।
අස්මින්ව්යාලානුචරිතේ වනේ වසති දුර්මතිඃ ॥ 15 ॥
ඉත්යුක්ත්වා මෛථිලීං වාක්යං ප්රියාර්හාං ප්රියවාදිනීම් ।
අභිගම්ය සුදුෂ්ටාත්මා රාක්ෂසඃ කාමමෝහිතඃ ॥ 16 ॥
ජග්රාහ රාවණස්සීතාං බුධඃ ඛේ රෝහිණීමිව ।
වාමේන සීතාං පද්මාක්ෂීං මූර්ධජේෂු කරේණ සඃ ॥ 17 ॥
ඌර්වෝස්තු දක්ෂිණේනෛව පරිජග්රාහ පාණිනා ।
තං දෘෂ්ට්වා මෘත්යුසංකාශං තීක්ෂ්ණදංෂ්ට්රං මහාභුජම් ॥ 18 ॥
ප්රාද්රවන්ගිරිසංකාශං භයාර්තා වනදේවතාඃ ।
ස ච මායාමයෝ දිව්යඃ ඛරයුක්තඃ ඛරස්වනඃ ॥ 19 ॥
ප්රත්යදෘශ්යත හේමාංගෝ රාවණස්ය මහාරථඃ ।
තතස්තාං පරුෂෛර්වාක්යෛර්භර්ත්සයන්ස මහාස්වනඃ ॥ 20 ॥
අංකේනාදාය වෛදේහීං රථමාරෝපයත්තදා ।
සා ගෘහීතා විචුක්රෝශ රාවණේන යශස්ස්විනී ॥ 21 ॥
රාමේති සීතා දුඃඛාර්තා රාමං දූරගතංවනේ ।
තාමකාමාං ස කාමාර්තඃ පන්නගේංද්රවධූමිව ॥ 22 ॥
විවේෂ්ටමානාමාදාය උත්පපාතාථ රාවණඃ ।
තතස්සා රාක්ෂසේංද්රේණ හ්රියමාණා විහායසා ॥ 23 ॥
භෘශං චුක්රෝශ මත්තේව භ්රාංතචිත්තා යථාऽऽතුරා ।
හා ලක්ෂ්මණ මහාබාහෝ ගුරුචිත්තප්රසාදක ॥ 24 ॥
හ්රියමාණාං න ජානීෂේ රක්ෂසා මාමමර්ෂිණා ।
ජීවිතං සුඛමර්ථාංශ්ච ධර්මහේතෝඃ පරිත්යජන් ॥ 25 ॥
හ්රියමාණාමධර්මේණ මාං රාඝව න පශ්යසි ।
නනු නාමාවිනීතානාං විනේතාසි පරංතප ॥ 26 ॥
කථමේවංවිධං පාපං න ත්වං ශාසි හි රාවණම් ।
නනු සද්යෝऽවිනීතස්ය දෘශ්යතේ කර්මණඃඵලම් ॥ 27 ॥
කාලෝऽප්යංගීභවත්යත්ර සස්යානාමිව පක්තයේ ।
ත්වං කර්ම කෘතවානේතත්කාලෝපහතචේතනඃ ॥ 28 ॥
ජීවිතාංතකරං ඝෝරං රාමාද්ව්යසනමාප්නුහි ।
හංතේදානීං සකාමාස්තු කෛකේයී සහ බාංධවෛඃ ॥ 29 ॥
හ්රියේ යද්ධර්මකාමස්ය ධර්මපත්නී යශස්විනඃ ।
ආමංත්රයේ ජනස්ථානේ කර්ණිකාරාන්සුපුෂ්පිතාන් ॥ 30 ॥
ක්ෂිප්රං රාමාය ශංසධ්වං සීතාං හරති රාවණඃ ।
මාල්යවංතං ශිඛරිණං වංදේ ප්රස්රවණං ගිරිම් ॥ 31 ॥
ක්ෂිප්රං රාමාය ශංස ත්වං සීතාං හරති රාවණඃ ।
හංසකාරංඩවාකීර්ණාං වංදේ ගෝදාවරීං නදීම් ॥ 32 ॥
ක්ෂිප්රං රාමාය ශංස ත්වං සීතාං හරති රාවණඃ ।
දෛවතානි ච යාන්යස්මින්වනේ විවිධපාදපේ ॥ 33 ॥
නමස්කරෝම්යහං තේභ්යෝභර්තුශ්ශංසත මාං හෘතාම් ।
යානි කානි චිදප්යත්ර සත්ත්වානි නිවසංත්යුත ॥ 34 ॥
සර්වාණි ශරණං යාමි මෘගපක්ෂිගණානපි ।
හ්රියමාණාං ප්රියාං භර්තුඃ ප්රාණේභ්යෝऽපි ගරීයසීම් ॥ 35 ॥
විවශාऽපහෘතා සීතා රාවණේනේති ශංසත ।
විදිත්වා මාං මහාබාහුරමුත්රාපි මහාබලඃ ॥ 36 ॥
ආනේෂ්යති පරාක්රම්ය වෛවස්වතහෘතාමපි ।
සා තදා කරුණා වාචෝ විලපංතී සුදුඃඛිතා ॥ 37 ॥
වනස්පතිගතං ගෘධ්රං දදර්ශාऽයතලෝචනා ।
සා තමුද්වීක්ෂ්ය සුශ්රෝණී රාවණස්ය වශං ගතා ॥ 38 ॥
සමාක්රංදද්භයපරා දුඃඛෝපහතයා ගිරා ।
ජටායෝ පශ්ය මාමද්ය හ්රියමාණාමනාථවත් ॥ 39 ॥
අනේන රාක්ෂසේංද්රේණ කරුණං පාපකර්මණා ।
නෛෂ වාරයිතුං ශක්යස්තව ක්රූරෝ නිශාචරඃ ॥ 40 ॥
සත්ත්වාංජිතකාශී ච සායුධශ්චෛව දුර්මතිඃ ।
රාමාය තු යථාතත්ත්වං ජටායෝ හරණං මම ॥ 41 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ඒකෝනපංචාශස්සර්ගඃ ॥
