ശ്രീമദ്വാല്മീകീയ രാമായണേ അരണ്യകാംഡമ് ।
അഥ ഏകോനപംചാശസ്സര്ഗഃ ।
സീതായാ വചനം ശ്രുത്വാ ദശഗ്രീവഃ പ്രതാപവാമ് ।
ഹസ്തേ ഹസ്തം സമാഹത്യ ചകാര സുമഹദ്വപുഃ ॥ 1 ॥
സ മൈഥിലീം പുനർവാക്യം ബഭാഷേ ച തതോ ഭൃശമ് ।
നോന്മത്തയാ ശ്രുതൌ മന്യേ മമ വീര്യപരാക്രമൌ ॥ 2 ॥
ഉദ്വഹേയം ഭുജാഭ്യാം തു മേദിനീമംബരേ സ്ഥിതഃ ।
ആപിബേയം സമുദ്രം ച ഹന്യാം മൃത്യും രണേ സ്ഥിതഃ ॥ 3 ॥
അര്കം തുംദ്യാം ശരൈഃ തീക്ഷ്ണൈര് വിഭിംദ്യാം ഹി മഹീതലമ് ।
കാമ രൂപിണം ഉന്മത്തേ പശ്യ മാം കാമദം പതിമ് ॥ 4 ॥
ഏവമുക്തവതസ്തസ്യ സൂര്യകല്പേ ശിഖിപ്രഭേ ।
ക്രുദ്ധസ്യ ഹരിപര്യംതേ രക്തേ നേത്രേ ബഭൂവതുഃ ॥ 5 ॥
സദ്യസ്സൌമ്യം പരിത്യജ്യ ഭിക്ഷുരൂപം സ രാവണഃ ।
സ്വം രൂപം കാലരൂപാഭം ഭേജേ വൈശ്രവണാനുജഃ ॥ 6 ॥
സംരക്തനയനശ്ശ്രീമാംസ്തപ്തകാംചനഭൂഷണഃ ।
ക്രോധേന മഹതാവിഷ്ടോ നീലജീമൂതസന്നിഭഃ ॥ 7 ॥
ദശാസ്യഃ കാര്മുകീ ബാണീ ബഭൂവ ക്ഷണദാചരഃ ।
സ പരിവ്രാജകച്ഛദ്മ മഹാകായോ വിഹായ തത് ॥ 8 ॥
പ്രതിപദ്യ സ്വകം രൂപം രാവണോ രാക്ഷസാധിപഃ ।
സംരക്തനയനഃ ക്രോധാജ്ജീമൂതനിചയപ്രഭഃ ॥ 9 ॥
രക്താംബരധരസ്തസ്ഥൌ സ്ത്രീരത്നം പ്രേക്ഷ്യ മൈഥിലീമ് ।
സ താമസിതകേശാംതാം ഭാസ്കരസ്യ പ്രഭാമിവ ॥ 10 ॥
വസനാഭരണോപേതാം മൈഥിലീം രാവണോഽബ്രവീത് ।
ത്രിഷു ലോകേഷു വിഖ്യാതം യദി ഭര്താരമിച്ഛസി ॥ 11 ॥
മാമാശ്രയ വരാരോഹേ തവാഹം സദൃശഃ പതിഃ ।
മാം ഭജസ്വ ചിരായ ത്വമഹം ശ്ലാഘ്യഃ പ്രിയസ്തവ ॥ 12 ॥
നൈവ ചാഹം ക്വചിദ്ഭദ്രേ കരിഷ്യേ തവ വിപ്രിയമ് ।
ത്യജ്യതാം മാനുഷേ ഭാവോ മയി ഭാവഃ പ്രണീയതാമ് ॥ 13 ॥
രാജ്യാച്ച്യുതമസിദ്ധാര്ഥം രാമം പരിമിതായുഷമ് ।
കൈര്ഗുണൈരനുരക്താസി മൂഢേ പംഡിതമാനിനി ॥ 14 ॥
യഃ സ്ത്രിയാ വചനാദ്രാജ്യം വിഹായ സസുഹൃജ്ജനമ് ।
അസ്മിന്വ്യാലാനുചരിതേ വനേ വസതി ദുര്മതിഃ ॥ 15 ॥
ഇത്യുക്ത്വാ മൈഥിലീം വാക്യം പ്രിയാര്ഹാം പ്രിയവാദിനീമ് ।
അഭിഗമ്യ സുദുഷ്ടാത്മാ രാക്ഷസഃ കാമമോഹിതഃ ॥ 16 ॥
ജഗ്രാഹ രാവണസ്സീതാം ബുധഃ ഖേ രോഹിണീമിവ ।
വാമേന സീതാം പദ്മാക്ഷീം മൂര്ധജേഷു കരേണ സഃ ॥ 17 ॥
ഊർവോസ്തു ദക്ഷിണേനൈവ പരിജഗ്രാഹ പാണിനാ ।
തം ദൃഷ്ട്വാ മൃത്യുസംകാശം തീക്ഷ്ണദംഷ്ട്രം മഹാഭുജമ് ॥ 18 ॥
പ്രാദ്രവന്ഗിരിസംകാശം ഭയാര്താ വനദേവതാഃ ।
സ ച മായാമയോ ദിവ്യഃ ഖരയുക്തഃ ഖരസ്വനഃ ॥ 19 ॥
പ്രത്യദൃശ്യത ഹേമാംഗോ രാവണസ്യ മഹാരഥഃ ।
തതസ്താം പരുഷൈർവാക്യൈര്ഭര്ത്സയന്സ മഹാസ്വനഃ ॥ 20 ॥
അംകേനാദായ വൈദേഹീം രഥമാരോപയത്തദാ ।
സാ ഗൃഹീതാ വിചുക്രോശ രാവണേന യശസ്സ്വിനീ ॥ 21 ॥
രാമേതി സീതാ ദുഃഖാര്താ രാമം ദൂരഗതംവനേ ।
താമകാമാം സ കാമാര്തഃ പന്നഗേംദ്രവധൂമിവ ॥ 22 ॥
വിവേഷ്ടമാനാമാദായ ഉത്പപാതാഥ രാവണഃ ।
തതസ്സാ രാക്ഷസേംദ്രേണ ഹ്രിയമാണാ വിഹായസാ ॥ 23 ॥
ഭൃശം ചുക്രോശ മത്തേവ ഭ്രാംതചിത്താ യഥാഽഽതുരാ ।
ഹാ ലക്ഷ്മണ മഹാബാഹോ ഗുരുചിത്തപ്രസാദക ॥ 24 ॥
ഹ്രിയമാണാം ന ജാനീഷേ രക്ഷസാ മാമമര്ഷിണാ ।
ജീവിതം സുഖമര്ഥാംശ്ച ധര്മഹേതോഃ പരിത്യജന് ॥ 25 ॥
ഹ്രിയമാണാമധര്മേണ മാം രാഘവ ന പശ്യസി ।
നനു നാമാവിനീതാനാം വിനേതാസി പരംതപ ॥ 26 ॥
കഥമേവംവിധം പാപം ന ത്വം ശാസി ഹി രാവണമ് ।
നനു സദ്യോഽവിനീതസ്യ ദൃശ്യതേ കര്മണഃഫലമ് ॥ 27 ॥
കാലോഽപ്യംഗീഭവത്യത്ര സസ്യാനാമിവ പക്തയേ ।
ത്വം കര്മ കൃതവാനേതത്കാലോപഹതചേതനഃ ॥ 28 ॥
ജീവിതാംതകരം ഘോരം രാമാദ്വ്യസനമാപ്നുഹി ।
ഹംതേദാനീം സകാമാസ്തു കൈകേയീ സഹ ബാംധവൈഃ ॥ 29 ॥
ഹ്രിയേ യദ്ധര്മകാമസ്യ ധര്മപത്നീ യശസ്വിനഃ ।
ആമംത്രയേ ജനസ്ഥാനേ കര്ണികാരാന്സുപുഷ്പിതാന് ॥ 30 ॥
ക്ഷിപ്രം രാമായ ശംസധ്വം സീതാം ഹരതി രാവണഃ ।
മാല്യവംതം ശിഖരിണം വംദേ പ്രസ്രവണം ഗിരിമ് ॥ 31 ॥
ക്ഷിപ്രം രാമായ ശംസ ത്വം സീതാം ഹരതി രാവണഃ ।
ഹംസകാരംഡവാകീര്ണാം വംദേ ഗോദാവരീം നദീമ് ॥ 32 ॥
ക്ഷിപ്രം രാമായ ശംസ ത്വം സീതാം ഹരതി രാവണഃ ।
ദൈവതാനി ച യാന്യസ്മിന്വനേ വിവിധപാദപേ ॥ 33 ॥
നമസ്കരോമ്യഹം തേഭ്യോഭര്തുശ്ശംസത മാം ഹൃതാമ് ।
യാനി കാനി ചിദപ്യത്ര സത്ത്വാനി നിവസംത്യുത ॥ 34 ॥
സർവാണി ശരണം യാമി മൃഗപക്ഷിഗണാനപി ।
ഹ്രിയമാണാം പ്രിയാം ഭര്തുഃ പ്രാണേഭ്യോഽപി ഗരീയസീമ് ॥ 35 ॥
വിവശാഽപഹൃതാ സീതാ രാവണേനേതി ശംസത ।
വിദിത്വാ മാം മഹാബാഹുരമുത്രാപി മഹാബലഃ ॥ 36 ॥
ആനേഷ്യതി പരാക്രമ്യ വൈവസ്വതഹൃതാമപി ।
സാ തദാ കരുണാ വാചോ വിലപംതീ സുദുഃഖിതാ ॥ 37 ॥
വനസ്പതിഗതം ഗൃധ്രം ദദര്ശാഽയതലോചനാ ।
സാ തമുദ്വീക്ഷ്യ സുശ്രോണീ രാവണസ്യ വശം ഗതാ ॥ 38 ॥
സമാക്രംദദ്ഭയപരാ ദുഃഖോപഹതയാ ഗിരാ ।
ജടായോ പശ്യ മാമദ്യ ഹ്രിയമാണാമനാഥവത് ॥ 39 ॥
അനേന രാക്ഷസേംദ്രേണ കരുണം പാപകര്മണാ ।
നൈഷ വാരയിതും ശക്യസ്തവ ക്രൂരോ നിശാചരഃ ॥ 40 ॥
സത്ത്വാംജിതകാശീ ച സായുധശ്ചൈവ ദുര്മതിഃ ।
രാമായ തു യഥാതത്ത്വം ജടായോ ഹരണം മമ ॥ 41 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ ഏകോനപംചാശസ്സര്ഗഃ ॥
