ஶ்ரீமத்³வால்மீகீய ராமாயணே அரண்யகாண்ட³ம் ।
அத² ஏகஷஷ்டிதமஸ்ஸர்க:³ ।
த்³ருஷ்ட்வாஶ்ரமபத³ம் ஶூன்யம் ராமோ த³ஶரதா²த்மஜ: ।
ரஹிதாம் பர்ணஶாலாம் ச வித்⁴வஸ்தான்யாஸனானி ச ॥ 1 ॥
அத்³ருஷ்ட்வா தத்ர வைதே³ஹீம் ஸன்னிரீக்ஷ்ய ச ஸர்வஶ: ।
உவாச ராம: ப்ராக்ருஶ்ய ப்ரக்³ருஹ்ய ருசிரௌ பு⁴ஜௌ ॥ 2 ॥
க்வ நு லக்ஷ்மண வைதே³ஹீ கம் வா தே³ஶமிதோ க³தா ।
கேனாஹ்ருதா வா ஸௌமித்ரே ப⁴க்ஷிதா கேன வா ப்ரியா ॥ 3 ॥
வ்ருக்ஷேணாச்சா²த்³ய யதி³ மாம் ஸீதே ஹஸிதுமிச்ச²ஸி ।
அலம் தே ஹஸிதேனாத்³ய மாம் பஜ⁴ஸ்வ ஸுது³:கி²தம் ॥ 4 ॥
யைஸ்ஸஹ க்ரீட³ஸே ஸீதே விஶ்வஸ்தைர்ம்ருக³போதகை: ।
ஏதே ஹீனாஸ்த்வயா ஸௌம்யே த்⁴யாயந்த்யஸ்ராவிலேக்ஷணா: ॥ 5 ॥
ஸீதயா ரஹிதோஹம் வை ந ஹி ஜீவாமி லக்ஷ்மண ।
ம்ருதம் ஶோகேன மஹதா ஸீதாஹரணஜேன மாம் ॥ 6 ॥
பரலோகே மஹாராஜோ நூனம் த்³ரக்ஷ்யதி மே பிதா ।
கத²ம் ப்ரதிஜ்ஞாம் ஸம்ஶ்ருத்ய மயா த்வமபி⁴யோஜித: ॥ 7 ॥
அபூரயித்வா தம் காலம் மத்ஸகாஶமிஹாக³த: ।
காமவ்ருத்தமனார்யம் மாம் ம்ருஷாவாதி³னமேவ ச ॥ 8 ॥
தி⁴க்த்வாமிதி பரே லோகே வ்யக்தம் வக்ஷ்யதி மே பிதா ।
விவஶம் ஶோகஸந்தப்தம் தீ³னம் ப⁴க்³னமனோரத²ம் ॥ 9 ॥
மாமிஹோத்ஸ்ருஜ்ய கருணம் கீர்திர்னரமிவான்ருஜும் ।
க்வ க³ச்ச²ஸி வராரோஹே மாம் நோத்ஸ்ருஜ ஸுமத்⁴யமே ॥ 1௦ ॥
த்வயா விரஹிதஶ்சாஹம் மோக்ஷ்யே ஜீவிதமாத்மன: ।
இதீவ விலபன்ராமஸ்ஸீதாத³ர்ஶனலாலஸ: ॥ 11 ॥
ந த³த³ர்ஶ ஸுது³:கா²ர்தோ ராக⁴வோ ஜனகாத்மஜாம் ।
அனாஸாத³யமானம் தம் ஸீதாம் த³ஶரதா²த்மஜம் ॥ 12 ॥
பங்கமாஸாத்³ய விபுலம் ஸீத³ந்தமிவ குஞ்ஜரம் ।
லக்ஷ்மணோ ராமமத்யர்த²முவாச ஹிதகாம்யயா ॥ 13 ॥
மா விஷாத³ம் மஹாபா³ஹோ குரு யத்னம் மயா ஸஹ ।
இத³ம் ச ஹி வனம் ஶூர ப³ஹுகந்த³ரஶோபி⁴தம் ॥ 14 ॥
ப்ரியகானநஸஞ்சாரா வனோன்மத்தா ச மைதி²லீ ।
ஸா வனம் வா ப்ரவிஷ்டா ஸ்யான்னலினீம் வா ஸுபுஷ்பிதாம் ॥ 15 ॥
ஸரிதம் வாபி ஸம்ப்ராப்தா மீனவஞ்ஜுலஸேவிதாம் ।
ஸ்னாதுகாமா நிலீனா ஸ்யாத்³தா⁴ஸகாமா வனே க்வசித் ॥ 16 ॥
வித்ராஸயிதுகாமா வா லீனா ஸ்யாத்கானநே க்வசித் ।
ஜிஜ்ஞாஸமானா வைதே³ஹீ த்வாம் மாம் ச புருஷர்ஷப⁴ ॥ 17 ॥
தஸ்யாஹ்யன்வேஷணே ஶ்ரீமன் க்ஷிப்ரமேவ யதாவஹே ।
வனம் ஸர்வம் விசினுவோ யத்ர ஸா ஜனகாத்மஜா ॥ 18 ॥
மன்யஸே யதி³ காகுத்ஸ்த² மா ஸ்ம ஶோகே மன: க்ருதா²: ।
ஏவமுக்தஸ்து ஸௌஹார்தா³ல்லக்ஷ்மணேன ஸமாஹித: ॥ 19 ॥
ஸஹ ஸௌமித்ரிணா ராமோ விசேதுமுபசக்ரமே ।
தௌ வனானி கி³ரீம்ஶ்சைவ ஸரிதஶ்ச ஸராம்ஸி ச ॥ 2௦ ॥
நிகி²லேன விசின்வானௌ ஸீதாம் த³ஶரதா²த்மஜௌ ।
தஸ்ய ஶைலஸ்ய ஸானூனி கு³ஹாஶ்ச ஶிக²ராணி ச ॥ 21 ॥
நிகி²லேன விசின்வானௌ நைவ தாமபி⁴ஜக்³மது: ।
விசித்ய ஸர்வதஶ்ஶைலம் ராமோ லக்ஷ்மணமப்³ரவித் ॥ 22 ॥
நேஹ பஶ்யாமி ஸௌமித்ரே வைதே³ஹீம் பர்வதே ஶுபா⁴ம் ।
ததோ து³:கா²பி⁴ஸந்தப்தோ லக்ஷ்மணோ வாக்யமப்³ரவீத் ॥ 23 ॥
விசரந்த³ண்ட³காரண்யம் ப்⁴ராதரம் தீ³ப்ததேஜஸம் ।
ப்ராப்ஸ்யஸி த்வம் மஹாப்ராஜ்ஞ மைதி²லீம் ஜனகாத்மஜாம் ॥ 24 ॥
யதா² விஷ்ணுர்மஹாபா³ஹுர்ப³லிம் ப³த்³த்⁴வா மஹீமிமாம் ।
ஏவமுக்தஸ்து ஸௌஹார்தா³ல்லக்ஷ்மணேன ஸ ராக⁴வ: ॥ 25 ॥
உவாச தீ³னயா வாசா து³:கா²பி⁴ஹதசேதன: ।
வனம் ஸர்வம் ஸுவிசிதம் பத்³மின்ய: பு²ல்லபங்கஜா: ॥ 26 ॥
கி³ரிஶ்சாயம் மஹாப்ராஜ்ஞ ப³ஹுகந்த³ரனிர்ஜ²ர: ।
ந ஹி பஶ்யாமி வைதே³ஹீம் ப்ராணேப்⁴யோபி க³ரீயஸீம் ॥ 27 ॥
ஏவம் ஸ விலபன்ராமஸ்ஸீதாஹரணகர்ஶித: ।
தீ³னஶ்ஶோகஸமாவிஷ்டோ முஹூர்தம் விஹ்வலோப⁴வத் ॥ 28 ॥
ஸந்தப்தோ ஹ்யவஸன்னாங்கோ³ க³தபு³த்³தி⁴ர்விசேதன: ।
நிஷஸாதா³துரோ தீ³னோ நிஶ்ஶ்வஸ்யாஶீதமாயதம் ॥ 29 ॥
ப³ஹுலம் ஸ து நிஶ்ஶ்வஸ்ய ராமோ ராஜீவலோசன: ।
ஹா ப்ரியேதி விசுக்ரோஶ ப³ஹுஶோ பா³ஷ்பக³த்³க³த:³ ॥ 3௦ ॥
தம் ததஸ்ஸாந்த்வயாமாஸ லக்ஷ்மண: ப்ரியபா³ந்த⁴வ: ।
ப³ஹுப்ரகாரம் த⁴ர்மஜ்ஞ: ப்ரஶ்ரிதம் ப்ரஶ்ரிதாஞ்ஜலி: ॥ 31 ॥
அனாத்³ருத்ய து தத்³வாக்யம் லக்ஷ்மணோஷ்ட²புடாச்ச்யுதம் ।
அபஶ்யம்ஸ்தாம் ப்ரியாம் ஸீதாம் ப்ராக்ரோஶத்ஸ புன: புன: ॥ 32 ॥
இத்யார்ஷே ஶ்ரீமத்³ராமாயணே வால்மீகீய ஆதி³காவ்யே அரண்யகாண்டே³ ஏகஷஷ்டிதமஸ்ஸர்க:³ ॥
