ශ්රීමද්වාල්මීකීය රාමායණේ අරණ්යකාංඩම් ।
අථ ඒකෂෂ්ටිතමස්සර්ගඃ ।
දෘෂ්ට්වාශ්රමපදං ශූන්යං රාමෝ දශරථාත්මජඃ ।
රහිතාං පර්ණශාලාං ච විධ්වස්තාන්යාසනානි ච ॥ 1 ॥
අදෘෂ්ට්වා තත්ර වෛදේහීං සන්නිරීක්ෂ්ය ච සර්වශඃ ।
උවාච රාමඃ ප්රාක්රුශ්ය ප්රගෘහ්ය රුචිරෞ භුජෞ ॥ 2 ॥
ක්ව නු ලක්ෂ්මණ වෛදේහී කං වා දේශමිතෝ ගතා ।
කේනාහෘතා වා සෞමිත්රේ භක්ෂිතා කේන වා ප්රියා ॥ 3 ॥
වෘක්ෂේණාච්ඡාද්ය යදි මාං සීතේ හසිතුමිච්ඡසි ।
අලං තේ හසිතේනාද්ය මාං භජස්ව සුදුඃඛිතම් ॥ 4 ॥
යෛස්සහ ක්රීඩසේ සීතේ විශ්වස්තෛර්මෘගපෝතකෛඃ ।
ඒතේ හීනාස්ත්වයා සෞම්යේ ධ්යායංත්යස්රාවිලේක්ෂණාඃ ॥ 5 ॥
සීතයා රහිතෝऽහං වෛ න හි ජීවාමි ලක්ෂ්මණ ।
මෘතං ශෝකේන මහතා සීතාහරණජේන මාම් ॥ 6 ॥
පරලෝකේ මහාරාජෝ නූනං ද්රක්ෂ්යති මේ පිතා ।
කථං ප්රතිජ්ඤාං සංශ්රුත්ය මයා ත්වමභියෝජිතඃ ॥ 7 ॥
අපූරයිත්වා තං කාලං මත්සකාශමිහාගතඃ ।
කාමවෘත්තමනාර්යං මාං මෘෂාවාදිනමේව ච ॥ 8 ॥
ධික්ත්වාමිති පරේ ලෝකේ ව්යක්තං වක්ෂ්යති මේ පිතා ।
විවශං ශෝකසංතප්තං දීනං භග්නමනෝරථම් ॥ 9 ॥
මාමිහෝත්සෘජ්ය කරුණං කීර්තිර්නරමිවානෘජුම් ।
ක්ව ගච්ඡසි වරාරෝහේ මාං නෝත්සෘජ සුමධ්යමේ ॥ 10 ॥
ත්වයා විරහිතශ්චාහං මෝක්ෂ්යේ ජීවිතමාත්මනඃ ।
ඉතීව විලපන්රාමස්සීතාදර්ශනලාලසඃ ॥ 11 ॥
න දදර්ශ සුදුඃඛාර්තෝ රාඝවෝ ජනකාත්මජාම් ।
අනාසාදයමානං තං සීතාං දශරථාත්මජම් ॥ 12 ॥
පංකමාසාද්ය විපුලං සීදංතමිව කුංජරම් ।
ලක්ෂ්මණෝ රාමමත්යර්ථමුවාච හිතකාම්යයා ॥ 13 ॥
මා විෂාදං මහාබාහෝ කුරු යත්නං මයා සහ ।
ඉදං ච හි වනං ශූර බහුකංදරශෝභිතම් ॥ 14 ॥
ප්රියකානනසංචාරා වනෝන්මත්තා ච මෛථිලී ।
සා වනං වා ප්රවිෂ්ටා ස්යාන්නලිනීං වා සුපුෂ්පිතාම් ॥ 15 ॥
සරිතං වාපි සංප්රාප්තා මීනවංජුලසේවිතාම් ।
ස්නාතුකාමා නිලීනා ස්යාද්ධාසකාමා වනේ ක්වචිත් ॥ 16 ॥
විත්රාසයිතුකාමා වා ලීනා ස්යාත්කානනේ ක්වචිත් ।
ජිජ්ඤාසමානා වෛදේහී ත්වාං මාං ච පුරුෂර්ෂභ ॥ 17 ॥
තස්යාහ්යන්වේෂණේ ශ්රීමන් ක්ෂිප්රමේව යතාවහේ ।
වනං සර්වං විචිනුවෝ යත්ර සා ජනකාත්මජා ॥ 18 ॥
මන්යසේ යදි කාකුත්ස්ථ මා ස්ම ශෝකේ මනඃ කෘථාඃ ।
ඒවමුක්තස්තු සෞහාර්දාල්ලක්ෂ්මණේන සමාහිතඃ ॥ 19 ॥
සහ සෞමිත්රිණා රාමෝ විචේතුමුපචක්රමේ ।
තෞ වනානි ගිරීංශ්චෛව සරිතශ්ච සරාංසි ච ॥ 20 ॥
නිඛිලේන විචින්වානෞ සීතාං දශරථාත්මජෞ ।
තස්ය ශෛලස්ය සානූනි ගුහාශ්ච ශිඛරාණි ච ॥ 21 ॥
නිඛිලේන විචින්වානෞ නෛව තාමභිජග්මතුඃ ।
විචිත්ය සර්වතශ්ශෛලං රාමෝ ලක්ෂ්මණමබ්රවිත් ॥ 22 ॥
නේහ පශ්යාමි සෞමිත්රේ වෛදේහීං පර්වතේ ශුභාම් ।
තතෝ දුඃඛාභිසංතප්තෝ ලක්ෂ්මණෝ වාක්යමබ්රවීත් ॥ 23 ॥
විචරංදංඩකාරණ්යං භ්රාතරං දීප්තතේජසම් ।
ප්රාප්ස්යසි ත්වං මහාප්රාජ්ඤ මෛථිලීං ජනකාත්මජාම් ॥ 24 ॥
යථා විෂ්ණුර්මහාබාහුර්බලිං බද්ධ්වා මහීමිමාම් ।
ඒවමුක්තස්තු සෞහාර්දාල්ලක්ෂ්මණේන ස රාඝවඃ ॥ 25 ॥
උවාච දීනයා වාචා දුඃඛාභිහතචේතනඃ ।
වනං සර්වං සුවිචිතං පද්මින්යඃ ඵුල්ලපංකජාඃ ॥ 26 ॥
ගිරිශ්චායං මහාප්රාජ්ඤ බහුකංදරනිර්ඣරඃ ।
න හි පශ්යාමි වෛදේහීං ප්රාණේභ්යෝऽපි ගරීයසීම් ॥ 27 ॥
ඒවං ස විලපන්රාමස්සීතාහරණකර්ශිතඃ ।
දීනශ්ශෝකසමාවිෂ්ටෝ මුහූර්තං විහ්වලෝऽභවත් ॥ 28 ॥
සංතප්තෝ හ්යවසන්නාංගෝ ගතබුද්ධිර්විචේතනඃ ।
නිෂසාදාතුරෝ දීනෝ නිශ්ශ්වස්යාශීතමායතම් ॥ 29 ॥
බහුලං ස තු නිශ්ශ්වස්ය රාමෝ රාජීවලෝචනඃ ।
හා ප්රියේති විචුක්රෝශ බහුශෝ බාෂ්පගද්ගදඃ ॥ 30 ॥
තං තතස්සාංත්වයාමාස ලක්ෂ්මණඃ ප්රියබාංධවඃ ।
බහුප්රකාරං ධර්මජ්ඤඃ ප්රශ්රිතං ප්රශ්රිතාංජලිඃ ॥ 31 ॥
අනාදෘත්ය තු තද්වාක්යං ලක්ෂ්මණෝෂ්ඨපුටාච්ච්යුතම් ।
අපශ්යංස්තාං ප්රියාං සීතාං ප්රාක්රෝශත්ස පුනඃ පුනඃ ॥ 32 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ඒකෂෂ්ටිතමස්සර්ගඃ ॥
