শ্রীমদ্বাল্মীকীয় রামাযণে অরণ্যকাংডম্ ।
অথ একষষ্টিতমস্সর্গঃ ।
দৃষ্ট্বাশ্রমপদং শূন্য়ং রামো দশরথাত্মজঃ ।
রহিতাং পর্ণশালাং চ বিধ্বস্তান্য়াসনানি চ ॥ 1 ॥
অদৃষ্ট্বা তত্র বৈদেহীং সন্নিরীক্ষ্য় চ সর্বশঃ ।
উবাচ রামঃ প্রাক্রুশ্য় প্রগৃহ্য় রুচিরৌ ভুজৌ ॥ 2 ॥
ক্ব নু লক্ষ্মণ বৈদেহী কং বা দেশমিতো গতা ।
কেনাহৃতা বা সৌমিত্রে ভক্ষিতা কেন বা প্রিয়া ॥ 3 ॥
বৃক্ষেণাচ্ছাদ্য় যদি মাং সীতে হসিতুমিচ্ছসি ।
অলং তে হসিতেনাদ্য় মাং ভজস্ব সুদুঃখিতম্ ॥ 4 ॥
যৈস্সহ ক্রীডসে সীতে বিশ্বস্তৈর্মৃগপোতকৈঃ ।
এতে হীনাস্ত্বয়া সৌম্য়ে ধ্য়ায়ংত্যস্রাবিলেক্ষণাঃ ॥ 5 ॥
সীতয়া রহিতোঽহং বৈ ন হি জীবামি লক্ষ্মণ ।
মৃতং শোকেন মহতা সীতাহরণজেন মাম্ ॥ 6 ॥
পরলোকে মহারাজো নূনং দ্রক্ষ্যতি মে পিতা ।
কথং প্রতিজ্ঞাং সংশ্রুত্য় ময়া ত্বমভিয়োজিতঃ ॥ 7 ॥
অপূরয়িত্বা তং কালং মত্সকাশমিহাগতঃ ।
কামবৃত্তমনার্য়ং মাং মৃষাবাদিনমেব চ ॥ 8 ॥
ধিক্ত্বামিতি পরে লোকে ব্যক্তং বক্ষ্যতি মে পিতা ।
বিবশং শোকসংতপ্তং দীনং ভগ্নমনোরথম্ ॥ 9 ॥
মামিহোত্সৃজ্য় করুণং কীর্তির্নরমিবানৃজুম্ ।
ক্ব গচ্ছসি বরারোহে মাং নোত্সৃজ সুমধ্যমে ॥ 10 ॥
ত্বয়া বিরহিতশ্চাহং মোক্ষ্য়ে জীবিতমাত্মনঃ ।
ইতীব বিলপন্রামস্সীতাদর্শনলালসঃ ॥ 11 ॥
ন দদর্শ সুদুঃখার্তো রাঘবো জনকাত্মজাম্ ।
অনাসাদযমানং তং সীতাং দশরথাত্মজম্ ॥ 12 ॥
পংকমাসাদ্য় বিপুলং সীদংতমিব কুংজরম্ ।
লক্ষ্মণো রামমত্যর্থমুবাচ হিতকাম্যয়া ॥ 13 ॥
মা বিষাদং মহাবাহো কুরু যত্নং ময়া সহ ।
ইদং চ হি বনং শূর বহুকংদরশোভিতম্ ॥ 14 ॥
প্রিযকাননসংচারা বনোন্মত্তা চ মৈথিলী ।
সা বনং বা প্রবিষ্টা স্য়ান্নলিনীং বা সুপুষ্পিতাম্ ॥ 15 ॥
সরিতং বাপি সংপ্রাপ্তা মীনবংজুলসেবিতাম্ ।
স্নাতুকামা নিলীনা স্য়াদ্ধাসকামা বনে ক্বচিত্ ॥ 16 ॥
বিত্রাসয়িতুকামা বা লীনা স্য়াত্কাননে ক্বচিত্ ।
জিজ্ঞাসমানা বৈদেহী ত্বাং মাং চ পুরুষর্ষভ ॥ 17 ॥
তস্য়াহ্যন্বেষণে শ্রীমন্ ক্ষিপ্রমেব যতাবহে ।
বনং সর্বং বিচিনুবো যত্র সা জনকাত্মজা ॥ 18 ॥
মন্যসে যদি কাকুত্স্থ মা স্ম শোকে মনঃ কৃথাঃ ।
এবমুক্তস্তু সৌহার্দাল্লক্ষ্মণেন সমাহিতঃ ॥ 19 ॥
সহ সৌমিত্রিণা রামো বিচেতুমুপচক্রমে ।
তৌ বনানি গিরীংশ্চৈব সরিতশ্চ সরাংসি চ ॥ 20 ॥
নিখিলেন বিচিন্বানৌ সীতাং দশরথাত্মজৌ ।
তস্য় শৈলস্য় সানূনি গুহাশ্চ শিখরাণি চ ॥ 21 ॥
নিখিলেন বিচিন্বানৌ নৈব তামভিজগ্মতুঃ ।
বিচিত্য় সর্বতশ্শৈলং রামো লক্ষ্মণমব্রবিত্ ॥ 22 ॥
নেহ পশ্য়ামি সৌমিত্রে বৈদেহীং পর্বতে শুভাম্ ।
ততো দুঃখাভিসংতপ্তো লক্ষ্মণো বাক্যমব্রবীত্ ॥ 23 ॥
বিচরংদংডকারণ্য়ং ভ্রাতরং দীপ্ততেজসম্ ।
প্রাপ্স্যসি ত্বং মহাপ্রাজ্ঞ মৈথিলীং জনকাত্মজাম্ ॥ 24 ॥
যথা বিষ্ণুর্মহাবাহুর্বলিং বদ্ধ্বা মহীমিমাম্ ।
এবমুক্তস্তু সৌহার্দাল্লক্ষ্মণেন স রাঘবঃ ॥ 25 ॥
উবাচ দীনয়া বাচা দুঃখাভিহতচেতনঃ ।
বনং সর্বং সুবিচিতং পদ্মিন্য়ঃ ফুল্লপংকজাঃ ॥ 26 ॥
গিরিশ্চায়ং মহাপ্রাজ্ঞ বহুকংদরনির্ঝরঃ ।
ন হি পশ্য়ামি বৈদেহীং প্রাণেভ্য়োঽপি গরীযসীম্ ॥ 27 ॥
এবং স বিলপন্রামস্সীতাহরণকর্শিতঃ ।
দীনশ্শোকসমাবিষ্টো মুহূর্তং বিহ্বলোঽভবত্ ॥ 28 ॥
সংতপ্তো হ্যবসন্নাংগো গতবুদ্ধির্বিচেতনঃ ।
নিষসাদাতুরো দীনো নিশ্শ্বস্য়াশীতমাযতম্ ॥ 29 ॥
বহুলং স তু নিশ্শ্বস্য় রামো রাজীবলোচনঃ ।
হা প্রিয়েতি বিচুক্রোশ বহুশো বাষ্পগদ্গদঃ ॥ 30 ॥
তং ততস্সাংত্বয়ামাস লক্ষ্মণঃ প্রিযবাংধবঃ ।
বহুপ্রকারং ধর্মজ্ঞঃ প্রশ্রিতং প্রশ্রিতাংজলিঃ ॥ 31 ॥
অনাদৃত্য় তু তদ্বাক্য়ং লক্ষ্মণোষ্ঠপুটাচ্চ্য়ুতম্ ।
অপশ্য়ংস্তাং প্রিয়াং সীতাং প্রাক্রোশত্স পুনঃ পুনঃ ॥ 32 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অরণ্যকাংডে একষষ্টিতমস্সর্গঃ ॥
