శ్రీమద్వాల్మీకీయ రామాయణే అరణ్యకాండమ్ ।
అథ పంచషష్టితమస్సర్గః ।
తప్యమానం తథా రామం సీతాహరణకర్శితమ్ ।
లోకానామభవే యుక్తం సాంవర్తకమివానలమ్ ॥ 1 ॥
వీక్షమాణం ధనుస్సజ్యం నిశ్శ్వసంతం పునః పునః ।
దగ్ధుకామం జగత్సర్వం యుగాంతే చ యథా హరమ్ ॥ 2 ॥
అదృష్టపూర్వం సంక్రుద్ధం దృష్ట్వా రామం తు లక్ష్మణః ।
అబ్రవీత్ప్రాంజలిర్వాక్యం ముఖేన పరిశుష్యతా ॥ 3 ॥
పురా భూత్వా మృదుర్దాంతస్సర్వభూతహితే రతః ।
న క్రోధవశమాపన్నః ప్రకృతిం హాతుమర్హసి ॥ 4 ॥
చంద్రే లక్ష్మీః ప్రభా సూర్యే గతిర్వాయౌ భువి క్షమా ।
ఏతత్తు నియతం సర్వం త్వయి చానుత్తమం యశః ॥ 5 ॥
ఏకస్య నాపరాధేన లోకాన్ హంతుం త్వమర్హసి ।
న తు జానామి కస్యాయం భగ్నస్సాంగ్రామికో రథః ॥ 6 ॥
కేన వా కస్య వా హేతోస్సాయుధస్సపరిచ్ఛదః ।
ఖురనేమిక్షతశ్చాయం సిక్తో రుధిరబింధుభిః ॥ 7 ॥
దేశో నిర్వృత్తసంగ్రామస్సుఘోరః పార్థివాత్మజ ।
ఏకస్య తు విమర్ధోఽయం న ద్వయోర్వదతాంవర ॥ 8 ॥
న హి వృత్తం హి పశ్యామి బలస్య మహతః పదమ్ ।
నైకస్య తు కృతే లోకాన్వినాశయితుమర్హసి ॥ 9 ॥
యుక్తదండా హి మృదవః ప్రశాంతా వసుధాధిపాః ।
సదా త్వం సర్వభూతానాం శరణ్యః పరమా గతిః ॥ 10 ॥
కో ను దారప్రణాశం తే సాధు మన్యేత రాఘవ ।
సరితస్సాగరాశ్శైలా దేవగంధర్వదానవాః ॥ 11 ॥
నాలం తే విప్రియం కర్తుం దీక్షితస్యేవ సాధవః ।
యేన రాజన్హృతా సీతా తమన్వేషితుమర్హసి ॥ 12 ॥
మద్వితీయో ధనుష్పాణిస్సహాయైః పరమర్షిభిః ।
సముద్రం చ విచేష్యామః పర్వతాంశ్చ వనాని చ ॥ 13 ॥
గుహాశ్చ వివిధా ఘోరా నదీ పద్మవనాని చ ।
దేవగంధర్వలోకాంశ్చ విచేష్యామస్సమాహితాః ॥ 14 ॥
యావన్నాధిగమిష్యామస్తవ భార్యాపహారిణమ్ ।
న చేత్సామ్నా ప్రదాస్యంతి పత్నీం తే త్రిదశేశ్వరాః ॥ 15 ॥
కోసలేంద్ర తతః పశ్చాత్ప్రాప్తకాలం కరిష్యసి ।
శీలేన సామ్నా వినయేన సీతాం నయేన న ప్రాప్స్యసి చేన్నరేంద్ర ।
తతస్సముత్సాదయ హేమపుంఖై ర్మహేంద్రవజ్రప్రతిమైశ్శరౌఘైః ॥ 16 ॥
ఇత్యార్షే శ్రీమద్రామాయణే వాల్మీకీయ ఆదికావ్యే అరణ్యకాండే పంచషష్టితమస్సర్గః ॥
